1st. Friday : Election Commission of India (ECI) in MLA inthlan result puan ni atana Pathianni an ruat chungchangah Kristian ni serh humhalh punkhawm Raj Bhavan hmarlam gate bulah neih a ni a, he hun hi Pu Nghaklianmawia, president MUP chuan a kaihruai. A hnu deuhah ECI chuan December ni li a puan tur a nih thu in an tifel nghal.
2nd. Saturday : Vanapa Hall-ah Mizo tradittional fiction behchhana siam KEIMI film chu Carol VLMS Dawngkimi, Director, Art & Culture Department chuan a tlangzarh. Christo Pa Entertianment leh B Lego Pictures te buatsaih KEIMI film hi Christo Pa ziak a ni a, he film buiatsaih nan hian kum khat chuang hun hman niin MIzoram leh Myanmar ram chhunga khaw hrang hrangah chan a ni.
3rd. Sunday : Mizoram pum huap, Catholic Thalai Inkhawmpui Zirtawpni atanga St Peter the Apostle’s Parish Chhingchhipa neih tan chu a tiak.
4th. Monday :
November ni 7 a Member of Legislative Assembly (MLA) kan thlan result chu district khawpui tinah chhiar a ni a, he hunah hian seat 40 awm zingah Zoram People Movement (ZPM) chuan seat 27 zet lain sorkarna an siam a, rorel lai, Mizo National Front (MNF) chuan seat 10 la bawkin Bharatiya Janata Party in seat 2 leh Indian National Congress in seat 1 an la ve bawk.
5th. Tuesday : Pathianni thleng awh tur, Synod Inkhawmpui vawi 100-na chu Mission Veng Kohhran Biak Inah neih tan a ni.
6th. Wednesday : Jharkhand Sorkar chuan an state chhunga IAS leh IPS Officer thenkhat hna chanpual a siksawi a, Jharkhand Chief Secretary thar atan Pu Lalbiaktluanga Khiangte, Shri Krishna Institute of Public Administration, Ranchi-a Director General hna leh Addl. Chief Secretary hna a chelh mektu chu an ruat.
7th. Thursday :
Mizoram hmun hrang hrangah ‘Fîmkhurna Hapta’ Road Safety Week hman ṭan a ni.
8th. Friday : ZPM leader, Pu Lalduhoma chu Mizoram Chief Minister 6-na ni tûrin governor, Dr Hari Babu Kambhampati chuan rinawmna thu tiamtîrin a la lût a; Cabinet Minister atân Pu K Sâpdanga, Pu Vânlalhlana, Pu C Lalsawivunga, Pu Lalthansânga, Dr Vânlalthlana, Pu PC Vânlalruata leh Pi Lalrinpuii-te lâk luh niin Minister of State atân Pu F Rodingliana, Pu B Lalchhanzova, Professor Lalnîlâwma leh Pu Lalnghînglova Hmâr-te bâkah pro tem Speaker atân Pu Lalfamkima te lâk luh an ni bawk.
9th. Saturday : Chief Minister thar, Pu Lalduhoma chuan Zârkawt, Mc Donald Hill a a office tur chu a luah lût.
10th. Sunday : Tun thla ni 5 atanga neih, Mizoram Presbyterian Synod vawi 100-na Mission Veng Kohhran Biak Ina neih chu a tiak ta. Mizoram Synod hnuaiah hian member 6,2, 8719 awm mekin, Pastor Bial 298 ah Kohhran puitling 1140 a awm mek a ni.
11th. Monday : Sorkar thara Minister hrang hrangten an pisa an luah tan.
12th. Tuesday : 9th Mizoram State Legislative Assembly Session hmasa ber chu Protem Speaker, Pu Lalfamkima kaihhruaiin tan a ni. Session-ah hian member-te rinawmna thutiama lakluh an nih hnu-ah Protem speaker chuan Speaker atan Pu Lalbiakzama thlantlin anih thu a puang a, House Leader Pu Lalduhoma leh Opposotion leader Pu Lalchhandama Ralte ten Speaker hi a thutna-ah an hruai a, Speaker Pu Lalbiakzama chuan Mizoram Assembly inkhawm chu kaihruai chhunzawmin house zahawm tak anih theih nana vawn nun zel a tul thu a sawi.
13th. Wednesday :
Governor, Dr Hari Babu Kambhampati chuan Mizoram State Planning Board Vice Chairman atan Dr Kenneth Chawngliana a ruat. Planning Board Vice Chairman hi Cabinet Minister rank a ni a, Cabinet Minister-te hlawh ang an hlawh bakah an hamthatna dawn ang zawng zawng an dawng ve thei dawn a ni.
14th. Thursday : Ni 3 awh, Mizoram Legislative Assembly pakuana, thutkhawm hmasa ber chu tiamchin awm lova tih tawp a ni. Session-ah hian Dy. Speaker atan Kolasib bialtu MLA, Lalfamkima thlan a ni a, Member hlui, Lalbiakzuala sunna hun hman a ni bawk.
15th. Friday : University leh College-a Mizo subject zirtirtu inzawmkhawm pawl, 'Mizo Literature and Language Teachers' Academy (MILLTA)' chuan Govt.Aizawl North College-ah Inkhawmpui an hmang a, an inkhawmpui hi R.Lallianzuala, Chairman, Mizo Language Development Board, Govt. of Mizoram chuan khual lian niin a hmanpui.
16th. Saturday : Mizoram Journalist's Association (MJA) chuan Aizawl Press Club, Treasury Square-ah tunhnaia an member pui, MLA-a tling thar, Pu K.Sapdanga leh Pu LaInghinglova Hmar te hnenah lawmpuina thuchei (citation) leh Rs 10,000/- ve ve an hlan.
17th. Sunday : Presbyterian Kohhran Mizo Sunday School Union, MSSU ruahman angin Kohhran hrang hrangah Naupang Sunday School Exam buatsaih a ni. Sunday School Exam-ah hian Beginner Department leh Primary Department te chuan ka a chhang in exam an hmachhawn a, Junior Department atanga Senior Department thleng te chu ziakin an exam thung.
18th. Monday : Centre for Environment and Social Justice (CESJ) hruaitute chuan Lockdown laia man, Vietnam mi Serchhip District Jail-a a tan hun tur hmang zo tawh, Dahn Niang, Vietnam chu la chhuakin Thutak Nunpuitu Team (TNT) ah an dah.
19th. Tuesday : Environment, Forests & Climate Change (EF&CC) Minister, Pu Lalthansanga chuan Chief Wildlife Warden Conference Hall, MINECO-ah EF&CC Department hotute meeting a neihpui a. He meeting-ah hian Forest Department hmalakna kal mekte leh Department tana ngaihpawimawh tulte sawi ho a ni.
20th. Wednesday :
Pukzing daia Zathanga quarry chu a chim a, quarry chim hian escavator leh operator pahnih bakah helper pakhat, hnamdang vek te chu a delhhlum.
21st. Thursday : Excise & Narcotics Department chuan Hmâwngkhawthlîr kâwn, Thingdawl leh Kolasib inkârah heroin gram 691.600 (hâwng 55) leh a neitu nia puh, Zaithanmâwia (34) leh Lalrempuii (31), Kolasib Project Vêng ve ve nia inchhâlte an man.
22nd. Friday : Vairêngtê Hall vênga chêng, Pu Lalhmingsânga (37) leh a fapa Lalramchuailova (9)-te kawng sîra scooty-a lo ding chu Silchar lam aṭanga motor lian rawn tlân chho chuan suin Pu Sânga hi a hmunah a thi a; a fapa hi damdâwi in panpui tum a nih mêk laiin a thi boral ve leh.
23rd. Saturday : Chief Minister, Pu Lalduhoma’n a pisa-ah Rubber Board of India Chairman, Dr. Sawar Dhanania leh a thawhpuite kawmin Mizorama rubber thar chhuah tihpun dan tur kawng hrang hrang an sawiho.
24th. Sunday : Hunpui lo thleng tur denchhenin Raj Bhavan chu mipui tlawh theih tura hawn a ni. Bhavan hi Thawhlehni thleng a tlawh theih dawn bakah kum thar, January ni 1 atanga ni 3 chhungin tlawh theih a ni bawk ang.
25th. Monday : Kristian te hunpui Krismas chu Zoram hmun hrang hrang a ringtu ten hlim takin an lawm.
26th. Tuesday : Khawvel chhandam tura Isua Krista pian champhaphak, Krismas lawmna vawrtawp chu tualchhung kohhran hrang hrangah hlim taka hman a niin ruai an theh hlawm. Larsap, Dr. Hari Babu Kambampati chuan Krismas lawmna ruai hi Zarkawt Presbyterian Kohhran-ah a theh.
27th. Wednesday :
Environment, Forest & Climate Change Minister, Pu Lalthansanga leh Sports & Youth Services Minister, Pu Lalnghinglova Hmar te chuan Zemabawk Football khelmual siam mek a hmunah an en.
Minister 2 te hi Aizawl Smart City Ltd hotute, Mizoram State Sports Council hotute leh Mizoram Football Association (MFA) hruaituten an tawiawm.
28th. Thursday : PWD, Aizawl Road North Sub Div-III chuan Vaivakawn Zohnuai lei minna lai an siam tha.
29th. Friday : Environment, Forest and Climate Change Minister leh Aizawl East I bialtu MLA ni bawk, Pu Lalthansanga leh PHE Minister, Pu Lalnilawma te chuan Thuampui khawtlang hruaituten Zonal Tank sakna atan Zuangtuia hmun an lo en lailawk chu a hmunah kalin an en. Pu Lalthansanga chuan helai hmun hi a rem loh em avangin hma lak a hautak dawn nia a hriat thu sawiin a aia hmun rem zawk dap nise tiin a rawt a. Thuampui Helipad bawr velah dah theih ni se tia a duh thu sawiin hemi atan hian Sipai hotute a sawipui vat tur thu khawtlang hruaitute a hrilh.
30th. Saturday :
Vanbawng GSA Golden Jubilee puala Football leh Volleyball-a Local Tournament buatsaih, ni 27.12.2023 aṭang ṭan chu zawh a ni ta.
31st. Monday : Nl Nancy Lalropuii d/o kum 30, Malsawmkima Pachuau (L), Chanmari West chu Bangalore-ah a thi.
Comments
Post a Comment