1. BIAKIN RAWK : February ni 15 khan Mizoram Police te chuan report an dawn bawhzuiin Electrict North BCM biakin rawktu, tualchhung tlangval, ruihhlo ngai chu an man. He pa hnen atang hian pangpar khawina (vase) pasarih, cheng 3,500/- man hu leh pangpar lem, cheng 9720/- man hu hmuhlet a ni.
Hemi atanga ni 20 ral hma in BCM biakin pahnih chuan rawk a tawk leh a, August thla khan Lunglei Zobawk Vengthlang Presbyterian Kohhran Biak In chu suasam a ni leh bawk.
Hetianga biakin rawktu te hi rukru chu awm bawk mah se rilru lam buaina a ni tlangpuiin a lang a, chuvangin, Zoram ringtu te kan in enfiah a tul takzet a ni.
2. PHIR ZAI : Dr.John Lalliandinga, Associate Professor of Surgery and Paediatric Surgeon, ZMC leh a team te chuan February ni 22 khan Mizoram a a hmasa ber atan phir, an taksa a inzawm "conjoined twins" chu Zoram Medical College-ah hlawhtling takin an zai.
Zaite hi Lawngtlai district-ah February ni 9, 2023 khan an piang a, an awm leh dul a inzawm bakah an thin (liver) a inzawm bawk a ni. Thin pakhat intawm an nih avangin nausen pahnih hi thin pakhatin a chawm zawh dawn loh avangin
an nu leh pa te remtihna (consent) an lak hnuah pakhat zawk talin a damchhuahpui beiseiin zai a ni. Pakhat zawk erawh chuan a taksa mamawh tawk thin a neih phak ve tak loh avangin an zai ni vek khan a thi a ni.
3. G20 MEETING AIZAWL-AH : G20 hnuaia group pakhat B20 meeting chu Tanhrila Mizoram University-ah March ni 1–3 chhung khan hman a ni. He hunah hian Union Minister of State for Commerce and Industries, Som Parkash leh Minister of State for External Affairs, Dr R K Ranjan Singh, Chief Minister, Pu Zoramthanga leh sawrkar hotu lute an tel a, ram hrang hrang 17 atangin palai an lokal bakah, state pawn atangin palai 16 an lo tel bawk.
He hun ah hian ‘Conference on Opportunities for Multilateral Business Partnerships in Urban planning, Infrastructure, Bamboo & Skill Development’ tih chu thupui atan hman a ni. Tun tum meeting hi a si per mai a la ni a, G20 summit pui ber chu ni September ni 9 leh ni 10 khan Pragati Maidan, New Delhi-ah neih a ni thung. Summit puiber neih hma hian India khawpui hrang hrang, hmun 55-ah meeting tenau vawi 215 zet neih hmasak a ni a, chung zinga pakhat chu kan lo chang ve tihna a ni.
India hi nikum December ni 1 aţang khan G20 leader a ni a, November ni 30 thleng Presidency hi a ni dawn a ni. India in G20 a kaihhruai chhung hian thupui (theme) ah ‘Vasudhaiva Kutumbakam’ - ‘One Earth One Family One Future’ tih hman a ni.
LMC : Lunglei Municipal Council (LMC) inthlan vawikhatna chu March ni 30 khan neih a ni a, he hunah hian voters 40,548 atangin 30,111 (74.26%) vote a tla a ni. Tichuan, vote tla te hi April ni 3 ah chhiar a ni ta a, ZPM candidate mi 11 te chu an tling vek. Inthlanaah hian party lian pali ten kil hrang hrang atangin an chuh a ni a, party mal an solid thak mai hi a mak zawk hle. Vote tla zawng zawngah ZPM chuan vote 30,111 zet an hmu a, MNF in 8706, INC in 6065 leh. BJP in Vote 226 an hmu ve bawk.
Dt.18th, April-ah rinawmna thutiam tira lakluh an ni a, District Magistrate leh District Municipal Election Officer ni bawk Pi Ramdinliani chuan lalutin a ni kaihhruaiina vek hian mawhphurhna hetiang hian siam nghal a ni : Chairman : Pu Lalzuithanga, ward No. III
Vice Chairman : Pu K. Lalrinawma, Ward No. VII. Tin, executive atan Pi Lalhruaitluangi Sailo, Ward No. I leh Zorinsanga Hmar, Ward No. IX te a ruat an ni bawk a, an ni pawh hian rinawmna thu tiam in lak luh nghal an ni.
PADMA SHRI :
India rama civil mite chawimawina, Padma Shri chu April ni 5 khan President, Droupadi Murmu chuan Rashtrapati Bhavan-ah Mizo Folk singer K.C. Runremsangi hnenah a hlan.
Arts huang atanga Padma Shri dawng tura thlan K.C. Runremsang hi Pu Lalthanmawia nupui, Bawngkawn South a cheng mek a ni a, Mizo zingah rimawi huang atanga Padma Shri dawng hmasa ber a ni. KC Runremsangi hian kum 2017 khan folk music lama a thawhhlawk avangin India President kalchhuak Ram Nath Kovind hnen atangin 'Sangeet Natak Akademi Award' a lo dawng tawh bawk.
ZIRLAI INAWKHLUM : May ni 11 khan Mizoram Board of School Education chuan pâwl 10 board exam result a tihchhuak a, exam zawng zawng 18102 zînga 12878 (71.14%) in an pass. Zirlai hlawhtling heti zat an awm laiin vanduai ta engemawzat an awm bawk. Vanduai zingah
Rulkual, Lawngtlai Dist. a Jehova Jire English School zirlai, Betsebi Lalruattluangi chu a pass zawh veloh avangin a inawkhlum. Pass zawhloh avanga mahni nunna la Mizoramah a awm vawikhatna niin a lang.
Hmeichhe tawng tamlo leh ngawichawi tak hetianga a awm ta mai hi a pawitak zet a ni. Mi taktakin inawkhlum hi kan dem hle thin. Ni e, an dawmawm thlawt. Amaherawhchu, eng harsatna nge an tawh kan hriat loh miau avangin pawngpaw dem ngawt chu a fuhlo maithei. Mitinin intih hlum mai duhna thinlung pawh kan neih ve vek tho hi. An nun'a harsatna an paltlang zawhloh vang a ni mai a, an lainatawm zawk hle a ni.
BAWLHLAWH THIAN : Vanlallawmzuala Varte, Mission veng chu Cleanliness Trekking Expedition nei in Lailapur atanga Khaykhi, Siaha District, km 623 zet chu ke ngata kalin bawlhlawh thian leh mi bawlhhlawh sawngbawl dan vel zirin May ni 26, 2023 atanga June 22,2023 chhungin a kal.
Pu Lawmzuala chuan, dumping ground neilo khua an awm nual thu sawiin mineral water um chhar tur a tam ber thu a sawi bawk.
Pu Lawmzuala hi hi Sairang pa pakhat chuan motor a zuiin a bawlhhlawh chhar sa te hi a lo phurh khawm sak thin a ni. Pu Lawmzuala chetvelna senso hi pawl leh mimal engemawzatin an sponsored a ni.
FOOTBALLER OF THE YEAR : July ni 4 a All India Football Federation body meeting, Bengaluru khawpuia neih chuan
Lallianzuala Chhangte, Lunglei, Mumbai city FC tana khel mek chu India ram a football thiam ber (footballer of the Year) atan a thlang. He chawimawina hi kum 2016 khan Jeje Lalpekhlua chuan a lo dawng tawh bawk a ni.
Zuala hian kum 2013 khan Mizoram huap football-ah hming chher tanin, Lunglei Football Club chu MPL-ah a tlinpui a, 2014-15 season-ah khan U-19 I League-ah DSK tan inlanin hemi tum hian goal 16 thun in Top Scorer a ni nghe nghe. Kum 2015 khan India senior team tan koh niin SAFF Championship-a Sri Lanka an hmachhawn tum khan India senior team tana khel thei naupang ber nihna a hauh nghe nghe.
Ni 16, May, 2016 khan Lallianzuala hian 2016 Indian Super League season khel turin North East United hi loan-in a zawm a. Hemi hnu hian club hrang hrang tana a khelh kual hnuah tuna a khelh mekna, Mumbai city FC hi a zawm ta a ni.
A ni hi Transfermarkt.co.in in an chhut danin Indian players zînga hlu ber a niin an chhal nghe nghe. A hlutna hi 2.8 crore lai a ni hem mai reng a.
PUK LUT : Zotrek Adventure Club te chuan khawvela pûk (sandstone cave) thui ber, km. 24.5-a thui, Krem Puri, Laitsohum, Meghalaya a awm chu October ni 23 khan an luhchhuak.
Cave Expedition-ah hian Club Member 30 an kal a, Laitsohum Tourism Development Society Guide, mi 4 in an tel pui bawk. Pûk luh nan hian darkar 13 leh a chanve (07:00- 20:30) zet an thang a ni.
Zotrek Adventure Club te hian kum 2014 khan Krem Mawmluh (7 km) Cherrapunji a mi chu a lo zu luhchhuak tawh a, Mizorama Pûk hrang hrang te pawh an lo lutchhuak fo tawh bawk a ni.
HALL LIAN BER : Mizoram a hall lian ber, Multipurpose Indoor Hall, Sihphir a mi chu Sports Minister, Pu Robert Romawia Royte chuan October ni 5 khan Aijal Club atangin online in a hawng. Rs.12.77 Cr senna he hall lian takah hian infiamna hmun item hrang hrang siam a ni a, parking zau nuam tak a awm bawk.
Hall hawn tum hian Minister hian 1) Synthetic Turf Hockey Ground at MSSC Sports Complex, Muallungthu, 2) MSSC Sports Hostel, Mualpui, Community Service Centre at Bungtlang South, Bunghmun, Chawngte, Rangte, Zawlnuam te bakah 3) Volleyball Court with Viewing Gallery at Tuidam, Kanhmun, Thinghlun, Darlak, Zamuang, Kawrthah North, Sihtlangpui te hawng telin Khelo India Scheme kaltlanga sum hmuh hmangin Khelo India Centre of Excellence 10 Mizoram hmun hrang hranga dinna tur lungphum a phum nghal bawk.
MLA INTHLAN : Kum nga dana neih thin, kan ram hruaitu, Member of Legislative Assembly (MLA) tur chu November ni 7 khan thlan a ni ta a, he hunah hian seat 40 awm zingah Zoram People Movement (ZPM) chuan seat 27 zet lain sorkarna an siam a, rorel lai, Mizo National Front (MNF) chuan seat 10 la bawkin Bharatiya Janata Party in seat 2 leh Indian National Congress in seat 1 an la ve bawk.
Sorkar tharah hian a hma daih atanga chief ministerial candidate atana neih, Pu Lalduhoma chu Chief Minister atan ruat zui niin heng :
1. Financ
2.Planning & Programme Implementation
3. Vigilance
4. General Administration Department
5. Political & Cabinet leh
6. Law & Judicial te a chang a ni. A hnuaiah hian Cabinet Minister 7 leh minister of state 4 te awmin Speaker atan Lalbiakzama chu thlan a niin Dy-Speaker atan Lalfamkima te an awm bawk.
Comments
Post a Comment