1. THI LEH PIANG : Nikum (2023) chhung khan kan khawtlangah thihna in thla a zar nasa mawlh mawlh leh hle. Mitthi hi 42 zet awmin heng zinga pathum (ST Thara, HI Zahmingthanga leh Lammuanthang) hi hmun danga phum an ni a, hmundang atanga Sihphir a phum hi pahnih (Thangliani leh Rosangzuali) an awm bawk. Thi hmasa ber chu January ni 10 a mi, ST Thara h/o Lalrinkimi, Arpu, Seling lama phum tak kha a ni a, thi hnuhnung ber chu December ni 21 a thi, Pu H. Ronghinglova h/o Lungmuani, Arpu kha a ni thung.
Hetih mek lai hian sub-center enkawltu te chhinchhiah danin nikum (2023) chhûng khan naupiang thar hi 81 lai an awm bawk.
2. ROHRENGA HALL HAWNG : January ni 12 khan Chief Minister leh Bialtu MLA ni bawk, Pu Zoramthanga chuan Kawnveng Twin Market chunga a Sihphir Lal, Rohrenga hmingchawi a Hall siam 'Rohrenga Hall' chu ropui takin a hawng.
Chief Minister chuan khawtlang inrelbawlna atana tangkai tak tur, vantlang punkhawmna atana hmun remchang tak hawn a ni thei chu lawmawm a tih thu sawiin hall hming atana Sihphir lal hlui Rohrenga hming vuah a ni chuan mi hmasa leh mi ropui te chawimawina rilru khawtlang mipui ten an pu tih a lantir thu a sawi.
Hetih mek lai hian Mizorama hall lian ber, Arpu a Mizoram State Sports Council enkawl tura sak chu October ni 3 khan video Conference hmangin a hunlaia Sports Minister, Pu Robert Romawia Royte chuan a hawng bawk.
3. RITCHAWI CHAK : April ni 21 a Mizoram Powerlifting Championship, (Deadlift Championship Mizoram) Mizoram Powerlifting Hall, Republic Vengthlang a neihah Tv David R.K Lalnunmawia s/o Lalrinkima, Chhanhim Veng chuan below 59-ah ama record siam vêk, kgs 200 chu khumin, kgs 210 a chawi a, Mizoram record thar a siam.
Amah vek hian he record ropui tak hi September thla khan Squat 180, Bench 97.5 leh Deadlift 210 te chawiin gold medal a la leh bawka, heti hian ama record siam tawh hi khum leh a ni.
4. V/C TI DANGLAM : March ni 31 zan khan V/C te chu hetiang hian an insiam rem :
President : Pu Lalnelawma
Vice President : Pu Thanglianchhunga
Treasurer : Pi Lalbiakdiki
Party hruaitute chuan VCP ni lai, Pu Lalropuia Pachuau hi headquarters lamah General Secretary nilai a ni a, inthlanpui neih kum a lo ni bawk nen, headquarters lamin an mamawh zual deuh avanga hetianga insiam rem ta hi niin an sawi.
5. BATMINTON COACH : Tv. Lalruatpuia s/o Lalrinliana
Royte, Damveng chu Qatar-ah
Grassroot Badminton coaching pe turin
May ni 4 khan a kal.
Lalruatpuia hi TATA trust (NEIDA) hnuai-ah Sihphir Grassroot (naupang) te enkawlin (Coach) kum hnih vel a awm hnu in kum 2019 khan Bisht Badminton Academy, New Delhi-ah a awm leh a, zirna te a chhawnzawm leh hnuah kum 2022 December thla khan Hyderabad a Gopichand Badminton coach turin an rawn thlang ta a ni. Thlathum vel a awm hnuin hotute duhsakna avangin Doha, Qatar hmunah a awm ta a, tûnah hian chawlh hmangin a lo haw chhuak mek a ni.
6. HSS RECORD : May ni 19 khan MBSE-in Higher Secondary Leaving Certificate results a ti chhuak a, Sihphir Higher Secondary School zirlai te chu pass vekin Mizoram chhunga 100% pass thei school 54 zingah Sihphir Higher Secondary School hian candidate 84 neiin zirlai ngah ber an ni nghe nghe. Mizoram pumah school pakhat atanga exam passed kim zingah naupang ngah ber an nih avang hian MBSE Exam Result bu-ah No. 1 nihna an hauh hial a ni.
Sihphir Higher Secondary School hi Government High School hmunah an kal thin a ni a, a building sak that tum a nih avangin Multipurpose indoor hall-ah zirna hi an kalpui mek a ni. Tin, September thla khan cabinet chuan Provisional Adhoc grant in aid dinhmunah a hlangkai ve ta bawk.
7. SOLAR STREET LIGHT : UD &PA (Smart city) atanga sum hmuh hmangin kawngpui dung leh a vel tih enna turin solar street light 140 zet phun a ni.
Venghlun lamah, melkaw chhuk thlengin engemawzat phun a ni bawk.
8. NAUPANG SAWISA : August thla khan Sihphir khaw tana mualphona rapthlak tak mai a thleng. Naupang pakhat, kum thum mi chu amah enkawltu (nu leh pa nilo) te chuan an ti duhdah nia thu an dawn avangin Child Welfare lamin an rawn la. A hnuin he naupang hi Child Welfare atangin a chhungte, hmun danga awm ten an hruaichhuak leh ta nia sawi a ni.
Tunhnu-ah hetiang boruak ang chi hi a awm leh palh thei a, mit leh beng chhi tlang ila, khawtlang ang pawh a hmingchhiat vak theihna a nih avangin hetiang ang chi thawm kan hre feih a nih chuan khawtlang hruaitu te hriattir thuai ni thei se a duhawm hle ang.
9. MA GOLDMEDALIST : September ni 26 khan khatih laia Chief Minister, Pu Zoramthanga chuan a pisa-ah MA pahnih, an line ve ve a pakhatna ni thei (gold medalist), Lalmuanzuali Royte d/o Lalthlamuana Royte, Kawnveng, (English) ICFAI University leh Vanlalkroshlua Ngente s/o Vanlalhruaia Ngente, Tlangveng (IMBA) Mizoram University te chu lawmpui nan lehkhapui (Citation) leh Laptop Computer a hlan.
CM chuan a instagram page-ah 'ka bial chhung aṭanga zirlai chhuanawm tak, Gold Medalist ni thei kan nei hi lawmawm ka tiin ka lawmpui tak zet a. Pathianin hun ṭha leh hriselna ṭha a pek hmang thiama thawhrimna nen hlawhtlinna sang tak an chang thei hi an thawhrim rah a ni a, an fakawm ka ti em em a ni. An thiamna leh finnate Pathian, kan ram leh hnam tana hmang tur leh hlawhtlinna sang zawk chang zel turin duhsakna ka hlan nghal bawk e,' tiin a tarlang.
Zirna kan hriat dana pawl sang ber an nih tawh laia rampuma pakhatna ni thei kan nei hi a ropuiin an chhuanawm takzet a ni.
10. VEHBUR KHAWN : Damlohna kaihhnawih thilah manganna vawrtawp an tawh avangin chhungkaw pahnih te chu khawtlang hruaitute thurawn angin vehbur khawnsak an ni a, pawisa khawn hna hi YMA lamin buaipuiin cheng Rs 2,08,360/- zet hmuh a ni. Pawisa te hi Pu Lalnelawma, VCP kaihhruaina hnuaiah ruahmanna siam a ni a, an pahnih a damdawi in bill ba neih mek engemaw zat rulh nan sum hmuhchhuah te hi 50:50 a then a ni.
Sum leh pai thawhtu, khawtlang mipui te chungah khawtlang hruaitu te an lawm hle. Kan damlo te pawh an ziaawm ve zel niin a langa, a lawmawm takzet a ni.
Vehbur khawn hi kan kalpui ta zeuh zeuh a, a rawtchhuak tu khawtlang hruaitu te an bengvarna a lawmawm a, laklkhawm hna thawktu, YMA lam an ti tha bawk. Heng zinga pawimawh ber, pawisa thawhtu khawtlang mipui te an fakawm leh zual awm e.
11. RALTLAN : Manipur-ah chi leh chi inkara buaina a chhuah avangin mi tam tak Mizoram lamah an rawn tlanchhia a, Sihphirah ngei pawh engemawzat an rawn lut ve a ni. Heng ho lo tuamhlawm tur hian VCP chairman na hnuaiah Manipur raltlan relief committee, din a ni a, V/C member dangte bakah YMA OB te leh section tin leader theuh te chu member an ni bawk.
Chhungkaw engemawzat an rawn tlan a, khawdang a chhuak leh Manipur a haw leh ta hi engemawzat an awmin la chambang hi tlem azawng an la awm bawk. Hetih lai hian July ni 10 khan raltlan zinga, Lammuanthang chu electrict man avangin a boral hlauh mai a, a ni la la hian Central YMA hmalakna in Manipur lam panpui nghal a ni.
Comments
Post a Comment