Skip to main content

MARTAR ROPUI

 

Ka khawl off in thutchawlh ka tum chiah, fon call a lokal nghal. Ka nupui a lo ni. Nicky-a accident chungchang ka hriat leh hriatloh min rawn zawt. Ka lo hrelo hrim hrim. A boral turah ka ngai nghal hmiah. Mahse, a boral chu a lo ni em lo e. A chetsual dan a sawi erawh chuan min va ti na tak em. Ka fon khawih pawh rilru-ah a lut theilo. Ka ngaihtuahin ka na vawng vawng a ni.


A sawi dan chuan Chhuanga quarry kawngah, kawngpui pawh an rawn chhuak tep awm e. Motor dang nena inzuiin a ni hi a hnung zawka tlan a ni. A break a fail avanga zuanchhuah a tum motor let ta siin a delh bet a, chulai kawngah tumah kal an awm bawk silo, a hmaa tlan te lo letin darkar thum vel hnuah rawn hmuin an chhanchhuak ta chauh niawmin a rawn sawi. Che thei silo, harh bawk si a khatianga chen chen a lo tuar tur ka ngaihtuahin ka va lainat tak em.


Pathian lakah pawh pawh ka vui khawp mai. Kha kawngah khan engvanginnge khati chen chen kal an awmloh? A nih loh leh boral nghal mai se emaw nikhaw hrelo tal khan awm se ka lo ti. Ka hawn kawng a ni bawka, peng atanga lung lo invawm khawm thur chu an sulhnu a nih ngei ringin ka zuk thlir kual vel a, a chetsual dan tur awm vel te ka zeldin nasa mai. A break a fail anga, thunun theih bak thil a nih avangin a zuanchhuah tum motor in a leh hnan ta tih chu ka rin dan a niin mi tam zawk rin dan pawh niin a lang.


A hnua a hmaa tlan,  Pu Tlangruala sawi danin an kawng kha Pu Chhuanga kawng niloin a chhak deuha Pu Mamuana kawng a lo ni zawka, anni bak hi kal pawh an awm ngai meuhlo niawm a ni. Nicky a hi motor khalh dam tak mai thin a niin a motor a chuan pawh hi a nuam thin hle. A motor a chuang tawh chuan a khalh thiam zia leh a motor a chuan hahdamthlak bik zia an hrilhfak a ni. Quarry kawng bawl takah pawh kawng thaah kan tlan ta mai emaw tih palh awl tak a ni reng a ni. 


Chutiang taka khalh dam a nih avang chuan a tlan chak vut vut hauh lo ang tih a chiang.  Chuvang chuan a hnunga tlan pawh an peih vaklo thin niawm tak a ni. Hemi tum pawh hian a hmasa-ah an tlan nghe nghe a ni. Durtlang an thleng a, thawm a la rawn neilo. A tlan chakloh vangah an la ngai mai. Inah chawlin muangchanga thingpui te an in muan hnuin a thawm riva a la hrelo. Fon a chhang thei bawk silo. A awm pawh a nuam chiah tawhlo awm e. Quarry lam a biak lahin a hnung lawka a rawn kal ve thu in an lo chhang mai si. Chuta chin chu a awm reng a nuam thei tawhlo. Tlema a speed pawh ti sangin peng an kawi lut chiahin motor lo let ngat mai an zuk hmu ta. Jeck nen an bei ngial naa, a hnuaiah mihring awm bawk nen fimkhur a ngai si. A piah mai quarry a Pu Dawla JCB chu han koin an in lachhuak thei ta hram a ni.


Amah ber harh mah se a hliam a nat em avangin thil zawh vek ngam a nilo. Pu Tlangruala hian thil awm dan vel a rindan chu a dik leh dikloh zawtin a ni hian 'chutiang zawk chuan' a lo ti mai niawm tak a ni.


Tichuan, thil awmdan chu rin thu mai niloin a chiang ta. A hma lama kan rin dan break failed avanga a zuangchhuak turin a delh ta nia kan ngaih kha a Popular shaft a chhiat avangin kawng chho em em leh lung a khatin a phur bawk nen a kal pui zo ta lo a, chhukin lung te pawhin a kam hial a ni. Amaherawhchu, a lung hman in a dan zawhloh avangin a lir ta mai. Motor chesual tur ngaingam loin, engpawh huama motor thunun tuma a lut leh tur chu a luh hma siin motor hian a rawn delh ta a, hetiang thil rapthlak tak mai hi a lo thleng ta a ni. Chuvangin, MARTAR ROPUI tih loh theih pawh a ni awmlo e. Chawimawi pawh a phu hle in ka hria.


Nicky-a te nen hian unau (pu te unau) kan ni a, hei vang hian a chanchin pawh ka hre ve nual mai. Ruihhlo avangin kohhran pawh bel lemlo niin leimi te ngaih chuan thlarau bo tia chhhal theih a ni ang. Amaherawhchu, a hun tawp lamah Pathian nen'a intawkin damna ropui tak a chang ta a nih kha. A chesual lai hmutu an awmloh bakah kha chen bawihsawm loha a awm avanga Pathian lakah pawh ka vui thu ka sawi a nih kha. Mahse, Pathian chuan tawrhna hmanga chhanchhuah a tum a lo ni zawk reng si! Ropui lehzual chu a chenpui kal tate Pa angchhunga a han hmu kha a ni awm e.


Nicky I tawrh kha na hle mah se Lal Isua hnenah I chawl tawh bik tih hriat hian kan thik rum rum che. Mahse, i thenrual lungduh te hian kan va ngai si che em. Thlamuang takin pa angchhungah chuan chawl na'ng che.

Comments

Popular posts from this blog

KUM ZA CHHUNGA MIZO HMEICHHIATE DINHMUN

 1. Tunhmaa an dinhmun : Kan pi pu te khan 'Hmeichhe finin tuikhur ral a kai lo', 'Hmeichhia leh uipui chu lo phun lungawi mai mai rawh se' tih leh 'Hmeichhe hna, hna ni suh, chakai sa, sa ni suh' tih te hi an ṭawng duh dan a ni a, hetaṭang hian hmeichhia te an dah hniam ṭhin zia a chiang viau awm e.  Nula in inleng a neihin an mi ngei zawng tak pawh ni se, biak chhiat an ngaitheilo a, ngaihtheih loh chu sawi loh, thianglo hialin an ngai a ni. Khawvar tirh aṭangin hna an ngah nghal hle mai a, tuichawi, buhden, ei rawngbawl, chawei siam leh a seng fel. An kuta awm vek a ni. Pi pute hunlai kha chuan an eizawnna hi a inang ṭhûma, lo neih a niin an feh tlut tlut ringawt mai ṭhin a, chuvangin, Mizo hmeichhia te chuan hetia'ng nikhua hian feh tur mamawh zawng zawng hi an tihtura ngaih vek a ni a, an emin an phurh vek a ngai bawk ṭhin. Mipa chuan iptepui an ak ve hram chauh a ni.  Feh haw'n kawngah lah hmeichhia chuan em khatin in lam mamawh an phur haw ...

CHANCHINBU MAN KHAWN A HUN LEH DAWN TA

  Thlatina Inrinni hnuhnung ber hian chanchinbu man khawn a ni tlangpui a, thlathar Inrinni hmasa ber leh remchang danga khawn pawh kan awm zeuh zeuh bawk. Thla a lo tawp (Inrinni hnuhnung ber) leh takah hian chanchinbu man pek lamah tan i la teh ang u. Kan chanchinbu hi thla khat lak man cheng 30 kan ti a ni a, heti hian a mah leh a mah a intum tawk vel viau a ni. A man pawh a lut tha tlangpui a, a lawmawm. Chutihrualin, pek lam ngaihsak lutuklo kan awm leh zeuh thin erawh a zialo thin khawp mai. Chanchinbu hi naupang semtir thin a ni a, a man khawn thu-ah pawh anni hian an keng tlang mai thin. Naupang an nih avang tak hian thenkhat hian zahlo taka lo tawngkhum in 'min pe ngai silo a, a man khawn hre hlur ringawt mai' tih an hlawh fo niawm tak a ni.  Thenkhat chhiar duh si a man pe duh manglo te pawh an awm niin a semtute hnen atangin thu kan dawng fo. A zialo khawp mai. Tin, pe emaw intia pe silo te pawh a awm theih a nia. Naupang rilru thianghlim tak te an ni a, rilru sual ...

BIBLE CHHIAR

Lehkhabu, a kawm dum, a changtupa thihna ‘Bible’ kan tih mai hi hi khawvela lehkhabu darh zau leh copy pawh tam ber a ni awm e.  He lehkhabu hi chatuan nunna kawng min kawhhmuhtu lehkhabu hlu tak a nih avangin chhiar ngei tur a ni a; a chhiar ve lo pawh chhiar tura in fuih a tul bakah hnam hnufual zawk te pawh chhiar tur chhawp chhuah sak theih hi a tul ngawt mai. Chutiang atana mi thahnemngai tlem azawng an awm pawh hi a tihzia e. Tunhma chuan nitina chhung inkhawm nei thin kan nia; (tunah erawh ‘tunlai chuan mihring kan tul tawh a’ tih chhuanlam tute zingah ka tel ve ta.) chu’ng lai chuan ka pa hian kumthar project-ah ka u hnenah Thuthlung Thar bu pumpui hi chhiar chhuak turin a tia;  kei Chanchin Tha bu li te, tin, ka naute pahnih chu Sam bu chhiar turin a ti bawk. Ka unau dangte khan ka pa  ngenna kha an ti hlawhtling ta em? ka hre ta chiah l’aw, kei erawh chuan ka tih hlawhtlin mai bakah Thuthlung Thar zawng zawng chu ka chhiar ta vek a, ka tui tak zel avangin Thu...