1st. Thursday : Lawipu Vêngah Bolero pic-up chuan Lawipu Vêng Presbyterian Kohhran Biak-In hnuai chu su-in, motor hi a let a, vanneih thlak takin thi leh hliam an awm lo. Motor hian dawr bungrua a phur nasa hle a, chu mi kârah chuan Zu (Whiskey) case țhahnem tak hmuh a ni bawk. Zu a lo phurh nual avang hian hemi vwng YMA hruaitu te chuan police an bia a, motor khalhtu leh a zuitu, Silchar lam mi ve ve chu police-in an la nghal a ni.
2nd. Friday :
Zirlai ten a hun taka zirlaibu an dawn theih dan tur ngaihtuahin Printing & Stationery Minister, F. Rodingliana chuan Guwahati a zirlaibu chhutna hmun leh Sikul Textbook chhut mekna Printing Press hrang hrang a tlawh kual. Minister hian Saraighat Photo Types Pvt. Ltd., Panikhaiti-ah Company hrang hrang hotute kawmin, an hmalakna leh hnathawh chungchang a sawipui bawk.
3rd. Saturday : Ruthi Lalpekhlui (7) d/o F. Lalruatkima, Kawnpui chu ui (Pitbull) in na takin a seh a, damdawi in panpui nghal a ni. A sehtu, ui hi tih hlum ve nghal a ni.
4th. Sunday : Pastor, PC Nghaklianmawia chuan Synod Prison Ministry Director, Rev Lalhmuchhuaka remruatnain Central Jail-ah rawng a bawl a, tunlaia Pathian mi hman zaithiam, Nl Maruati leh One in Christ ten an tawiawm.
5th. Monday : Chief Minister office, cabinet room-ah CM, Lalduhoma hovin Council of Ministers an thukhawm a, department panga atanga thu pawimawh rel dan tur (agenda) lut te an sawiho.
6th. Tuesday : Serchhip District Level Coordination on National Deworming Day leh District Task Force on Malaria Elimination meeting chu Chief Medical Officer, Dr LP Malsawma kaihhruaiin CMO Conference Hall, Serchhipah neih a ni a, National Deworming Day hawnna programme hman dan tur vel an rel. Meeting-ah hian department hrang hrang : Education, UD&PA, Social Welfare, I&PR, Fisheries leh Health Department hotute bakah Serchhip Sub-Headquarters YMA hruaitute an tel.
7th. Wednesday : Serchhip DC Meeting Hall-ah District Level Convergence Committee chu SDO (Sadar), Rebecca Laldinmawii Hrahsel hovin an thukhawm a, Poshan Maah tha taka kalpui dan tur an sawiho.
8th. Thursday : Mizoram Fisheries Technical Service Association hruaitute chuan Chief Minister, Pu Lalduhoma chu a office-ah CM Relief Fund a hman turin cheng singhnih an hlan.
9th. Friday : Social media-a mipat hmeichhiatna kaihhnawih pholangtu, Zolanu tia hriat leh a thiannu te chu Aizawlah Cyber Crime Police ten an man a, lock up-ah dah an ni.
10th. Saturday : Chief Minister, Pu Lalduhoma chuan Union Home Minister, Pu Amit Shah chu Delhi-ah a hmu a.Indo- Myanmar border fencing chungchang bakah thil pawimawh dang hrang hrang te an sawi dun.
11th. Sunday : Zirtawpni atang a tan, Presbyterian bial hmeichhie inkhawmpui chu a tiak.
12th. Monday : Environment, Forest & Climate Change (EF&CC) hnathawktuten sava leh thehlei kap tua puh mi pathum Inrinni a an man te chu magistrate hmaah hruai an niin Central Jail-ah dah luh nghal an ni.
13th. Tuesday : Sorkar laipui hotute dawra New Delhi-a zin, Chief Minister, Pu Lalduhoma chu Aizawlah a lo haw leh ta. CM hian
Aizawl a lo thlen hnuah Chief Minister Office Conference Hall-ah thuthar thehdarhtute kawmin, sorkar laipui hotute a dawr dan hrang hrang a hrilh.
14th. Wednesday : Valentines Day a ni a, he ni puala Zoram hmun hrang hranga thisen pek runpui-ah thisen unit 1031 zet pek a ni. Valentine day thupui chu "hmangaihna lantir la, thisen pe rawh- show love give blood" tih a ni.
15th. Thursday : Zankhat riaka Mizoram rawn tlawhtu, Union Minister of State, Health & Family Welfare, Professor S.P. Singh Baghel chuan Lengpui airport atangin Mizoram a chhuahsan.
16th. Friday :
Excise & Narcotics Department chuan Zemabâwkah ganja kg. 16.91, Mercy Zoêngmâwii (26), Sesawng leh Laldawngsânga (28), Hmârkhawlian, Assam nia inchhâlte kut aṭangin an man.
17th. Saturday :. Lawngtlai III-ah mi in luaha khawsa mêk, Angela C Lalnunmâwii (37) chu hnam dang khalh tipper-in a su hlum.
18th. Sunday : Mizoram Presbyterian Kohhran Synod Mission Board hnuaia Missionary tirh chhuah inkhawm Durtlang, Leitan Presbyterian Kohhran Biak Inah buatsaih a ni. He hunah hian mipa 12 leh hmeichhia 21 an vaiin mi 33 tirh chhuah an ni a. Home Mission North-ah mi 18, hmarchhakah mi 11, Central-ah mi 4 ten Evan. Teacher, Evangelist, Medical leh Craft Teacher hna te an thawk dawn a ni.
19th. Monday : Mizoram Legislative Assembly pakuana thutkhawm vawi 2-na, Budget Session chu tan a ni a, he hunah hian Larsap, Dr. Hari Babu Kambhampati chuan member-te hmaah thu sawiin, sorkar intiamna chu mawhphurhna lak ngam leh sorkar inrelbawlna kawng hrang hranga langtlang taka hmalak a nih thu a sawi.
20th. Tuesday : Mizoram state puitlinga hlan kai kan nih hriatreng na champha, State Day a ni a, Zoram hmun hrang hrangah hman a ni. A hmanna pui ber Aizawl a sipai lammualah chuan Celebration Committee (SDCC) bultumin zaihona leh tawngtaihona neih a ni a, saiip puan sin mi thahnemtak an pungkhawm.
21st. Wednesday :
Sihhmuia raltlan camp-ah kangmei a chhuak a, camp pariat lai a kang a ni. Kangmei hi eirawngbawlna atanga chhuak a niin an thenawmte a kangkai zel niin a lang. Hliam na lutuk erawh an awmlo hlauh.
22nd. Thursday : Chief Minister, Pu Lalduhoma kum 75 na champha a ni a. A piancham lawmpuiin Dr. Droupadi Murmu, Hon'ble President of India chuan a zinna Andaman & Nicobar Island atangin a rawn biaa, lawmpuina leh duhsakna a rawn hlan. Chief Minister hi Hon'ble Prime Minister, Pu Narendra Modi leh leh ram pum huap hruaitu thahnem takin an X (tweeter) kaltlangin lawmpuina an hlan hlawm bawk.
23rd. Friday : Vathuampui khua a cheng, Joseph Ngurthanzawna, kum 38 leh Lalsangliana, kum 27 te chu Vathuampui atanga Km 5 vela hla, Seletiva lui a Sangha man tura kal na lamah savawmin na takin a seh. Damdawi in lamah enkawl nghal an ni.
24th. Saturday : Lalengmawia (46) h/o Laltlanzovi, Lenchim chu boke accident avangin a thi. Lalengmawia hi bike-in a nupui leh a fanu nen a chuang an ni a, bike break a fail avangin in pakhat a sutna lamah a hliam tuarloin damdawiin kawngah a thi a ni. A nupui erawh zuangthla tura a tih angin a zuangthla hman hlauh thung. A fanu in an sut hma hian bike atangin a tla hman hlauh bawk.
25th. Sunday : Lunglei a PC Lallawmkima in luahlai chu bungrua engmah chuh hman lohin a kang a, vanduaithlak takin chhungkaw pa ber, Pu PC Lallawmkima, kum 44 chu kangmei avang hian a boral.
26th. Monday : Vice President, Pu Jagdeep
Dhankar chu Mizoramah a lo zin a, Mizoram
University Convocation vawi 18-na, MZU
Campus-a neihah khuallian niin a hmanpui. Assembly session-ah thu a sawi bawk.
27th. Tuesday : Bilkhawthlir Sub-Hqrs MZP leh Bilkhawthlir Kuhva Chingtu Society te hmalaknain dan lova tawlh, Burma kuhva rah leh a phurtu truck pakhat chu man a ni. Kuhva rah phur motor chhawmtu ni ngeia hriat Bolero leh a neitu a puh H.Ramengmawia Champhai chu man a ni bawk.
28th. Wednesday :
MNF Gen. Hqrs. hruaitu thlan turah nomination thehluh tawp ni a ni a, official nomination-a nomination file-tute ni lo nomination file an awm loh avangin President atana nomination thehluttu Zoramthanga chu President a ni zui zel dawn. Nomination thehluttu dangte:
Senior Vice President-ah Dr. R. Lalthangliana, Vice President-ah Lalchhandama Ralte leh Vanlalzawma, Treasurer-ah Lalruatkima te an ni.
29th. Thursday : KṬP General Conference vawi 60-na March 3, 2024 thleng awh tur chu Ngopa Public Playground-ah palai lawm inkhawm a tan a ni.
Comments
Post a Comment