Ka Juda thianpa pakhat hian "Ke chuan kal, motor chuan zin, thlawhna chuan thlawk," tih tur a tih avângin 'thlawhna a thlawh' tih thupuiah ka han thlang a ni.
Thlawhtheihna hrim hrim hi chu kan hmu vek tawh hlawmin a rinawm a, mi rethei leh thingtlang chengker a awm te pawhin an chung zawna a thlawk chu an hmu fo ngei ang. Kan chuang kherlo a ni mai a. Naupan at lai kha chuan thlawhna te hi lian turah kan han ngai em em khawp a, a chhûngah hian thlawhna te pawh la thlawk lehchhawng thei turah te ka ngai thin. Thlawhna kan inhmuh hnaih siak tak tak te kha aw, 'a khalhtu lu pawh arbawm tiatin ka hmu' kan han ti mai thin a nih kha. Tualte vanglaia thlawhna thlawk hniam tak tak chu fanghmir te pawh an kun da da kan ti mawh heklo.
Thlawhna hrim hrim hi kan ngai ropui em em a, chuan ve tinah pawh kan tin ngai meuhlo. Lengpui a a rawn tum ve hnu khan ka thianpa pakhat nen sawi ve reng rengah tiin Kolkata a thlawh thlaka, rel a hawn te kan sawi ve hman a, a tih hlawhtlin erawh kan harsat ta deuh a nih kha.
Israel kan kal dawna (2006) kan chuan kha thlawhna ka chuan hmasak ber tum a ni a, khami tum khan ni khatah vawihnih ngawt (Lengpui - Kolkata, Kolkata - Mumbai) ka'n chuang nghal a nih kha. Vanneithlak takin tukverh bul ka chang ve ve hlauh a, Zoram khawthlang lam, Bangladesh leh Brahmaputra luipui han hmuh meuh khan zawng nun kha a va han hlim tak em. Thianho a chuang kan ni bawka, kan khek nasa tlang teh e. Tunhnnua mak ka tih em em chu thlalak phal loh, fon khawih phalloh etc. phalloh kha a tam em em mai a, media hrang hrangah khan phalloh hrang hrang ho an lek lai leh khang hnathawh hmuhnawm tak tak hmuh tur lo awm leh si te hi a ni. Sorkar hotu ten dan an siama, an siam loh anga thil awm, hremna awm leh silo ang hi a ni ber mai awm e.
A thlawh kual lai te khan kan za chuai chuai mai thin. Khawvel kha a lang lei vu mai a, a mak thin khawp mai. A thlawh kan dawn leh a tum dawn hian mawng a za duh viau a, a kan hnu, sang lehzuala a invawrh dawn khan a za duh lehzual.
Mi za pawh lenlohnaah ka chuang ve tawh a, mi 400 chuang lennaah ka chuang tawh bawk. Khatiangah khan thlawhna lian nge nge chu a su dulh dulh kha a awmlo deuh in ka hria. Thlawhna mei lamah hian inthiarna hi a awm tlangpui a, khami panna lamah khan a che hi a hriat lehzual. Bus chuan nikhuaa a hnung lam a sawh nasa bik ang deuh hi a ni awm e. Kan chuan hmasak ber tum khan darkar khat bawr vel chauh thlawk mah ila, sawi ve reng rengah tiin ka e. Tunhmain thlawhnaah hian ek flash nan hian tui an hmanglo tih an sawi ka hriat tawh avangin ka flash dawnin ka khawih khera, an sawi dik a niang, a huh miahlo.
Tullo ka tih em em chu seat belt hren kha a ni. Thutna atanga tlak tawp hlauhawm khawpin thil thleng a awm khat hle a, khama lum emaw thil sut bur tur a awm bawk silo. Chutiang chu lo awm ta pawh nise seat belt khan min hum in ka hre chuanglo.
Thlawhna hi veivahna atana him berah mithiam te chuan an sawi fo. A dik maithei e. Mahse, thlawhna a chesual hi thih vek tum hi a tam zawk angem aw, ka ti thin. Lirthei danga chetsual hi chuan hliam neuh neuh awm thin mah se thih vek hi a awm khat hle. Chuvangin, mithiam thusawi hi a dik kher biklo thei in ka hria. Finfiah theih mang chiah silo. Israel atanga Mumbai pana kan thlawh tumin Middle east ram dang ten Israel thlawhna an ram chunga thlawh an phalloh avangin tuipui chung zelah kan thlawk a, hemi ṭum hian thlipuiin min han nuai tehreng a nih kha. Thingpui an sem lai, kan in hman hma deuh a ni a, a na viau ni tur a ni, ka thingpui, dawhkana ka hun kha a baw vek hial mawle. Life jacket kan ha far mai. Chuti chung chuan a hlauhawm loh thu in min thlamuan an la tum fan. Thil reng reng a hlauhawm loh thu kan sawi kan sawi tawh chinah chuan thil hi a lo hlauhawm hle zel zawng a nih hi. Tumkhat, Lengpuia kan tum dawn hian chhum a zing phui mup mai a, pilot chuan ṭum a tum chhin phawt thu a sawi a nih chu mawle. A chunga sawi tak ang khian thlawhna chesual a tel te chu an thi vek tlangpui tih ka hre ve tho si. A thlamuan thlak loh teh a nia. Him taka kan tum ta lawmthu ka sawi nasat zia kha.
Lengpui airport a kan thil tawn chungchang atanga ka ngaihtuah zui tak chu thlawhna neitu te zingah hian sorkar leh private an awm. Tuntuma kan chuanna kha private company a ni. An sawi danin private company chuan flight delay leh cancel vel hi an hlau hle thin. A chhan chu an sum hloh tur a tam em vang a ni. Sorkar ta erawh engemaw hlekah cancel emaw khang kan tawn ang chi-ah kha chuan thlawh let chang pawh an nei thin. A hnuah man chawi loin a kal leh theih mai a, pindan changkangah ei man chawiloin a awm theih thin bawk. Chuvângin, a tha zawk pawh hriatthiam a har. Tum risk kha a hlauhawm a, chutihrualin, thlawk let ta ila, hun tam tak kan khawhral dawn a ni bawk si. Tumkhat erawh a hun laiin ninawm viau mah se Delhi to Amsterdam kan thlawh dawn hian engemaw harsatna a awm avangin a thenawm ram, Belgium ram hotel changkangah kan riak a, tunhnuah erawh sawi tur ti tam tu tha tak a lo ni.
Sorkar leh private chungchang bawk hi sawi ta zel ila, ei tur sem leh sem lemlo pawh an lo awm a ni. Thenkhat ticket a tel lo a a hrana order chawp ngai a awm bawk. Tumkhat ka chuanna chu eitur awmlo chi a lo ni a, ril a tam raih raih mai. Ka thutpui nu, air hostess/cabin crew ni turah ka ngai ngawt. An chuang ve nuala, uniform an ha vek bawk si. Hmuh an nuam takzet a ni. Chu nula chuan sweet min pe hlauh a nih kha. 'Ṭam tawk apiang a tui' an lo ti chu a dik zia ka hre chiang hle. Thil sem sawi takah naupan lai khan thlawhnaah chuan zu pawh an sem thin niin kan hriaa, a duh tan chuan man chawi a lam theih a lo ni zawk awm e. Sem han ti em tur chu a ni lo deuh a nih chu. Air hostess te chu kekawrte leh bra nen an duty thin nia kan hriat pawh kan lo hre thelh nasa a lo ni. A nalh erawh an nalh tlang.
Rampawna zin dawn hian chinchang hriat hmasak a lo tul khawp mai. Tumkhat chu, England kal ka tum ṭumin kan thlen na tur khaw hming ziahna turah a khaw hming ziak ta mai loin Mizo pa dawr hming (Jimmy Thai Restaurant) ka'n ziak ngawt pek a nih kha. A hming kha Zofa te zingah lar viau mah se an lo hre ve mang silo. Chulai rama awm, ka thianpa ka be thei ta hlauh zawka, ka buai lutuk lo zawk a ni.
Airport-ah hian prepaid taxi hman tur a awm thin a, tunlaiah erawh uber/ola an ti taa, a dan a dang deuh maithei e. Ṭumkhat taxi ka chuanna te chuan min zuam ve khawp mai. Ka lehkha chu en min dil a, ka pe duhlo. A nih chuan chhuk rawh an tia, ka hlau lemlo. A chhan chu kha lehkha hmang khan airport-ah khan pawisa an va lam leh a ngai a ni. 'Kan enchhin ringawt dawn alawm' an ti a, ka pe ngam chuanglo. "Duhleh ka chhuk mai ang," ka ti a, min chhuktir ringawt se pawisa an va lamna tur lehkha ka kawl miau avangin min chhuktir ngawt dawnlo tih ka hre ve kar. 'A nih leh cheng 200/- min pek belh a ngai ang' an ti a, kei chuan 'awle, mahse, airport kan thlen hunah' ka ti ve tlat. Buai na lian tham thlengloin kan thleng ta a, min dil zui ngam biklo. Lehkha ka pek hnuin buaina awm zui loin ka kalsan ta a ni. Tumkhat kan tum hlimah mi pakhat hian min lo dawngsawng thuai a, ka tawlailir te chu min nawrpui. Hetiang a min lo pui tawp hi an awm leh thin. Min tanpui a ni lo a, a hnuah pawisa min dil leh thin. Ka hriat sa avangin ngeiawm ka chhhuah a, ka hnar hranlo. Kan thlen hnua min dil chuan, 'pui turin ka sawm hleinem che' tiin ka pe duh derlo. Dik a ti ve tho a niang chu lungawi vaklo in min kalsan ve mai bawk a.
Ticket lak dawn hian thlawh zelna tur (connecting flight) nei tan chuan a hun chhung hi dah zauh a ngai khawp in ka hria. Pathian zarah rampawn thlengin ka thlawk ve ta nuala, hetiang atang hian eng thlawhna mah hian hun an vawng dik tak taklo tih hi a ni. Keipawh thlawh lehna tur nanloh avangin rampawn leh ramchhungah tumthum ngawt ka khawtlai phah tawh a, airport leh a chhehvel chu kan fang chipchiar hman thin khawp mai. Tunhnuah sawi tur a ti tam ta a ni mai a, a hunlai boruak thlirin thlawh lehna tur man hman zan tura insiam hi a pawimawh khawp mai tih min hmuhchhuah tir.
Ziah tur a tam. Kan ziak senglo a ni e. Chhiartu te kei aia thlawk hnem leh hre zawk pawh in awm ngei ang tih ka hre tho na a, hlawkna tlemte tal in lo neih ve takin tiin ka han ziak a ni e. Ka lawm e.
Comments
Post a Comment