Hemi thupuia hmang hian December ni 4 khan editorial kan ziak tawh. Amaherawhchu, type setting kan tih laiin a hma kara thupui kha kan lo dah palh a, a thu nen pawh a inkalh ta deuh a nih kha.
Khami tum khan biakin, khelmual, thlanmual, bazar etc. bula awm te bungrua kan hmansak fo bakah kan luhchhuah nasat zia te, hetiang bulhnaia awm te kan tihbuai nasat zia chungchang kan ziak kha a ni a, tuntumah pawh hian tunhnaia kan thil tawn atangin kan sawi dawn a ni.
Tunkar Thawhtanni khan Neihbawi a huan enkawltu pakhat chu dawmhlumtu pawh awmloin a ruang hmuh a ni a, khawchhunga mi tlamngai ten bawisawmin kuang nen an khaw lamah thlahliam a ni. Tin, Thawhtanni vek khan zanah Sakawrhmuituaia leng ten an hnawm hal avangin kangmei a chhuak chiam mai bawk a, vengchhung tlangval thenkhat chu kan buai phah hle a nih kha.
A chunga tarlan ang khian hmun pawimawh bula awm te harsatna tawh theih hrang hrang kan sawi a ni a, tunhnaia kan buaina tawh chungchangah pawh hian ka awmna khua chu hmun pawimawh tak a nih ve tak avanga buai ta kan ni pawhin a lang. Sihphir hi Aizawl khawpui atanga hnai te a awm kan ni a, Aizawl pa hausa tam takin huan te an rawn nei thin. Tuntuma thihna pawh hi chung milian ho rama hnathawktu chu a ni a, Sakawrhmuituai kang pawh hi khawpui tawt leh hulum lutuk tlansana hawi thawven na atan an rawn hmang nasa ta hle. Chutianga rawn kal tena an sulhnu chu a ni mai a tih theih ang. Ramri hnaia awmte chuan kan hriat miahloh buaina an tawk nasa hle a, chutiang bawkin khawpuia awmte pawhin thingtlang mite hriatlohin harsatna an tawk ve chamchi bawk thin.
Sihphirah hian thil pawimawh a awmlo tiin kan iak kan iak thin. Tunah chuan khualzin te tana tlawh nahawm tak tak kan nei ve ta. A lawmawm takzet a ni. Thil tha nei tur chuan buai phat a awm ve thin angin khawpui kan hnaih avang leh tourist resort kan neih ve tak avanga harsatna te tham te a ni a, a lawmawm lamah ngai ila, lawmna karah hian buaina pawh kan tawk zel ang tih ring ila, chutiang kan tawng a nih pawha hmachhawn thiam turin i in buatsaih ang u.
1. Tunhmaa an dinhmun : Kan pi pu te khan 'Hmeichhe finin tuikhur ral a kai lo', 'Hmeichhia leh uipui chu lo phun lungawi mai mai rawh se' tih leh 'Hmeichhe hna, hna ni suh, chakai sa, sa ni suh' tih te hi an ṭawng duh dan a ni a, hetaṭang hian hmeichhia te an dah hniam ṭhin zia a chiang viau awm e. Nula in inleng a neihin an mi ngei zawng tak pawh ni se, biak chhiat an ngaitheilo a, ngaihtheih loh chu sawi loh, thianglo hialin an ngai a ni. Khawvar tirh aṭangin hna an ngah nghal hle mai a, tuichawi, buhden, ei rawngbawl, chawei siam leh a seng fel. An kuta awm vek a ni. Pi pute hunlai kha chuan an eizawnna hi a inang ṭhûma, lo neih a niin an feh tlut tlut ringawt mai ṭhin a, chuvangin, Mizo hmeichhia te chuan hetia'ng nikhua hian feh tur mamawh zawng zawng hi an tihtura ngaih vek a ni a, an emin an phurh vek a ngai bawk ṭhin. Mipa chuan iptepui an ak ve hram chauh a ni. Feh haw'n kawngah lah hmeichhia chuan em khatin in lam mamawh an phur haw ...
Comments
Post a Comment