LlDCAS TEN KAWLAWIA THLAN AN HUNG

Kar hmasa Inrinni khan Sairum rama Berva tlang chhipa awm, Kawlawia lung chu Literature, Preservation, of Hustorical Data and Cultural Heritage Association, Sihphir (LIDCAS) te chuan hungin chhinchhiahna an siam nghal. Kawlawia hi Sehlawh khaw bul, Phuihnam khaw mi a ni a, kum 1877 AD – 1880 AD vela chhak leh thlang indo hunlai khan Kawlawia chuan mumang mak tak a neih avangin an khaw bul lawk Sairum khua a a pu hnenah a thla zuk hualtir a tum a. A pute khua a thlen chuan a chanchin te hrilhin a thla a pawh chu an hualsak ta a; chutichuan, Kawlawia chu an khaw lamah a haw leh ta a. A haw kawngah chuan a Berhvakawn a thlen laiin ralin an lo bei a, a lu leh a khup lehlam an tan sak hnu in an tlansan ta nia sawi a ni. Chumi hnu chuan a pute chuan ‘Berhva Lung’ hmingthang tak hi Kawlawia thihna bulah chuan an phun ta a ni. Pipu te chuan ‘hetia Kawlawia ruang an sawngbawl vel lai hian thim a lo zing a, Kawlawia ruang chu vanah a kai a, arsi pakhat - Zangkhua (Great Bear) ah khian a chang ta ani, an ti. Hetianga Sihphir mai nilo, ram pum ang pawha thil hlu hi humhalh tul tak a ni a, a lung hi tung loin leia tlu a ni a, an nupa lung nia ngaih theih turin mipa leh hmeichhe lem a inker nghe nghe. Kalkawng dunga awm a nih avangin chawlhna atan a rem em em a, chuvangin, a lung han khawih danglam emaw mei chhem mai nan te pawh an hmang fo niin a lang. Hei hi tuntuma hung a chhinchhiahna an siam nachhan ber pawh niin an hruaitu te chuan an sawi. Hemi tum hian a lung hi thirzai hmanga hung chhuah vek a ni a, a banah hian Kawlawia lung a nih thu ziaka tarlan a ni bawk. Hemi hunah hian an pawl hruaitu thenkhatte bakah pawl member leh khawtlang mipui engemawzat an kal a ni. He hmuna an kal pah hian Sairang lamin an ramchhung chin nia an hriat avanga chhinchhiahna an rawn tar pawh an ti chhe nghal bawk.