KUHVA THUBUAI

Kuhva hi India rama thei tui ber a nih thu kan sawi fiamthu thin. Mi nawlpui, naupang chen hian kan ei nasa em em a, sualah pawh kan ngailo in zuk leh hmuam huangah pawh kan khung phal meuhlo a nih hi. Hriselna a nghawng dan chu mithiamte sawi kan hre chamchi tawh anga, Mizoram economy pawh a nghawng na hle a nih hi. Dawr tin deuhthawah kan zuar a, chinai siamin an hralh hnem dan atanng te hian kan ei nasat zia chu a hriat theih awm e. Nikum tawp lamah Champhai leh a chhehvelah nasa takin a hluar a, Burma lam atanga dan loa lo lut niin DC pawhin a man sak hial a nih kha. Danloa rampawn atanga lo lut reng reng hi sual a ni a, amaherawhchu, thenkhat erawh mi tam zawk tana tangkai a nih avangin kan sorkar pawh hian a bengkhawn tehchiam lo niin a lang. DC hmalakna atangin mi nawlpui chuan kan ngaihven ve chauh niin a lang. DC hian a ti tha takzet a, mahse, a fel leh a vei em vang pawh ni lemin a langlo. Central thu pek a ni miau a, a man a ni mai. Kuhva tawlhruk chungchangah hian kan sorkara mi challang tak tak inrawlha puhna te pawh nasa takin kan hria a nih hi. Tunhnaiah kan Chief Minister leh Assam CM te chawhlui kilnaah kuhva tawlhruknaa inhnamhnawih pakhatin a kil ve tih hriat a ni a, a sawmtu zawk nihloh inchuhin nasa takin an inpuh tawn a nih kha. Engpawhnise kuhva tawlhruka lian taka inhnamhnawih, Abu Mazumdar hi state pahnih CM-te zanriah kilnaah hian a tel ngei tih thlalakah a chiang a, chuvangin, thil fel tawklo chu a awm ngei niin a ngaih theih ang. Kuhva hi hriselna atan a thalo a, mi bula tawng leh mi hmaa ding tur tan phei chuan thil mawilo leh tenawm tak a chang thei. Chuvangin, smugling thil a ni emaw, engpawhnise, ei insum deuh chu thil tul tak a ni.