FEBRUARY 2022, MIZO(RAM) DIARY

1st. Tuesday : COVID-19 positive 2573 hmuhchhuah a ni a, nikhat chhunga positive hmuhchhuah tam ber a ni. Nimin (31st.January) khan mi 2531 hrikai an lo awm tawh bawk. 2nd. Wednesday : A (Serchhip) bial chhunga COVID-19 hri kai hmuhchhuah tamna Buangpui khua chu bialtu MLA, Lalduhoma chuan tlawhin an mamawh tur thil chi hrang hrang a pe. 3rd. Thursday : Thuampui venga Grace Home bulah 207 Pick Up a chesuala, motor khalhtu, C.Lalrotluanga (27) S/o Hranghnuna, Bualpui V chu a hliam tuar lovin a boral. Motor ah hian a mah chauh a chuang a ni. 4th. Friday : World Cancer Day a ni a, he ni pual hian Health Minister, Dr R.Lalthangliana chuan Zemabawk Cancer Hospital-ah Mizoram State Cancer Institute (MSCI) building thar a hawng. 5th. Saturday : Home Minister, Pu Lalchamliana chu Central YMA hruaituten kawmin dan lova kuhva tawlh ruk dona kawngah YMA leh Police te thawhho dan tur chungchang an sawiho. Central YMA hruaitute hian kuhva tawlh ruk an duh loh chhan te leh khawtlang leh mimal nun a nghawng dan te leh hma la tura sawrkar an beisei dan te an sawi a ni. 6th. Sunday : Hnahlana Pi Sairengpuii te in, Assam Type building, chhungkaw hnihin an luah lai chu thelh hman lohvin a kang ral vek. 7th. Monday : Mizoram hmun dang rualin Serchhip DC Conference Hall-ah District Bawrhsap, Nazuk Kumar, IAS chuan ‘Kangmei Vên Hapta, 2022’ a hawng. District Level Committee on Fire Prevention huaihawta Kangmei Venna Hapta hawnna hunah hian District Bawrhsap chuan thusawiin, ramngaw chu a chhûnga chêng nunna neite nena inzawm tlat a ni tih sawiin, ''mihringte pawh chung zinga mi chu kan ni a, Mizote pawh hmanlai ata mamawh chi hrang hrang kan hmuhna leh ramhmul damdawi chena ramngaw hmang ṭangkai ṭhin kan ni a, kan lui leh tuihnate min siamsaktu, kan sik leh sa vawngtu pawimawh a ni,'' a ti. 8th. Tuesday : SEDP Executive Board chu an chairman, Deputy Chief Minister, Pu Tawnluia hovin Assembly Annex Conference Hall-ah an thukhawm a, SEDP dawng tur thlan chungchang an sawi ho. 9th. Wednesday : Larsap, Dr. Hari Babu Kambhampati leh a nupui Dr. Jayashree Kambhampati te chu Raj Bhawan)-ah Asian University for Women, Chittagong, Bangladesh a lut tur, Syngenta Scholarship Awardee Hmangaihzuali leh a chhungte chu thingpui an inpui a, Scholarship a hmuh avangin an lawmpui nan Larsap te nupa hian thilpek an hlan nghal. Agriculture lam buaipuitu khawvel huap pawha company lian tak, Switzerland a hmunpui nei, Syngenta Company hian Asian Women University a lut tur zirlai 5 te chu an zirna senso man zawng zawng tum turin Scholarship a pe a, Hmangaihzuali pawh hi full scholarship dawng zingah thlan niin zirlai dang 4 chu Bangladesh mi a ni. Hmangaihzuali hi Pu H. Lalbiakthanga fanu niin,Thingsulthliah Tlangnuam khua an ni. 10th. Thursday : Rock School of London Award Music Exam-ah Youth Icon Star, Zoramchhani chu Vocal grade 8 ah a pass in distinction hial in hlangkaiin 95/100 mark a hmu. Exam hi Mizorama music school 11 atangin zirlai 40 ten exam hi an hmachhawn a ni. 11th. Friday : Chief Minister, Pu Zoramthanga chuan a bial chhunga Sihphir V/V pahnihte chu a tlawha, khawchhung hmasawnna tura hnathawh mek leh hmathar lak dan tur engemawzat enin khawtlang hruaitute a sawipui. 12th. Saturday : 23 Sector, Assam Riffles Bn. Aizawl chuan Sakawrtuichhuna Tawngtai Bethel Camping Centre-ah tanpuina an hlan. Tanpuina hi Assam Riffles Bn commandant, Colonel Rajesh Kumar Nayak leh a thawhpuiten a hmunah kal chilhin an hlan a ni. 13th. Sunday : Karuna Moy Chakma (25), Hruiduk chu zân Covid - 19 vângin ZMC-ah a boral. 14th. Monday : COVID-19 hrikaite sample-ah hrik thar a awm leh awmloh hriatna (Genome Sequencing) atana Mizoram atanga sample an thawn thawhkhatna (1st Batch) leh thawhhnihna (2nd Batch) atangin result 122 result hriat a ni heng zingah hian Aizawl district atangin Omicron Variant 62 hmuhchhuah thar a ni. 15th. Tuesday : Pu K. Lalmuana (68), Ṭhualṭhu chu Lunglei DCHC-ah Covid - 19 vângin a boral. 16th. Wednesday : School Education Minister, Lalchhandama Ralte chuan a pisa-ah hnam ziarang hmanga intihsiakna National Kala Utsav 2021-a lawmman pakhatna dawngtu, Lalruatfeli, Class IX, Kids Care School Ramhlun South chu lawmman trophy a hlan. India ram state hrang hrangte intihsiakna National Kala Utsav 2021 January 1-12, 2022 chhunga neihah Visual Arts 3D painting-ah Mizoram aiawha chhuak, Lalruatfeli hian lawmman pakhatna hi a dawng a, hripui leng avangin National Kala Utsav hi virtual mode-a neih a ni a. Lawmman hi Union Minister of Education aiawhin Lalchhandama Ralte hian a hlan a ni. 17th. Thursday : Hunthar Vêng naupang, kum 14 mi lek chu inâwkhluma hmuh a ni. Veng mipuite sawi hmangin chhung te hauh avanga rilru na a nih rin a ni. 18th. Friday : Chingsianzovi, Khawzawl chuan a ram riahpui, a vahnu, Catherine T Biaksiami (14) chu that. 19th. Saturday : C.Lalchhandami, AMC Ward III Councillor chuan Ward Fund a sak Public Toilet ODF+ Standard a sak thar, Ramhlun Venglai-a Biakliana Petrol Pump bul a mi chu a hawng. Helai hmun pawimawh leh hulum laia sak thar he public toilet hi man chawia hman tur a ni a. A hmangtu apiangin thianghlim leh fel taka hmang chhunzawm turin veng chhung mipui leh a hmangtu zawng zawng-te Councillor chuan a ngen a ni. 20th. Sunday : Mizoram State Day vawi 35 na a ni a, he ni pual hian Chief Minister, Pu Zoramthanga chuan thuchah sawiin Zoram mipui zawng zawng tan hlimna leh malsawmna a nih theih nan chibai in buk thu a sawi. 21st. Monday : Sericulture Department leh Lenbuang Handloom & Handicrafts neitu K. Lalmuanpuii te chuan thawhho na thuthlung an ziak.MOU hnuaiah hian Sericulture Department in Lenbuang hnuaia puan tahtute hnenah a thlawnin Silk la an pe ang a, an tah zawh hnuah Sericulture Department hian, silk la man lo paih (cut) in, a lei let sak leh ang. Silk tahtu turte chu K.Lalmuanpuii hian lo zawngin Sericulture Department hnenah hian silk tahte chu a hlan chhawng zel dawn a ni. He MOU ziahnaah hian Dr. Vanlalthlana, MLA Aizawl North II bialtu chu hriatpuitu (Witness)-ah a tang. 22nd. Tuesday : Mizoram Legislative Assembly 8-na thutkhawm vawi 9-na chu neih tan a ni a, March ni 10, 2022 thleng awh tura ruhman a ni. Budget Session tan ni hian Larsap, Dr. Hari Babu Kambhampati chuan House chhungah thu sawiin, sorkar hmalakna hrang hrang a tarlang. 23rd. Wednesday : Aizawl New Market a Bazaar Beat Post, duty-Police te chuan an huamchhung Electric Veng Power House bul Sumo-Stand-ah No 4 tam tham tak Champhai lam atanga lo chhuk Antam kara an thuhruk chu an man a. A neitu nia puh, Zothansangi (43) d/o K. Zonunsanga, tuna Ramhlun Veng Zangena Petrol Pump bula khawsa nia insawi chu manin Aizawl Police Station-ah thubuai ziah luh a ni. 24th. Thursday : Kumin kumtir, January ni 2 atanga chin hriat loh a bo Pu Johny Zoparliana, 4th IR ruang chu Mamit Luangpawl ram chhung Khiangthelh lui hnar pengah hmuh a ni. 25th. Friday : Pu Isak Lalremruata, kum 45 S/o Darthansanga, Phuaibuang khua chuan Pu VL Muana, Sihphir huan a an vawk (thla 2 vela upa) dah chu ru chhuakin sanghal sa angin a repin a zuara, Sihphir Social Reform & Action Committee chuan an man. Hemi an dawpna lamah hian Sihphir hmun hrang hranga a thil ruk te a puang nual bawk. Bawngkawn Police Station-ah FIR theh luh a ni a, anni hian an rawn la. 26th. Saturday : Golf Cup, Dubai-a khelh boxing hmuhnawm tak, India leh Pakistan war an tih fiamthu-ah chuan Mizo boxer pathum te chu an chak vek. Feαtherweight, Laldingliana, Tuipui chuan a khingpui Mohammad Ahmed Kakkar (PAK) chu Round 4-ah Unanimous Decision in a hneh a, Light flyweight, NT Biakkima, Siaha chuan a khingpui Fida Muhammed chu Round 2-na ah a Knock Out in, Super featherweight, Lαlrinsαngα Tlαu, Khawruhlian chuan a khingpui Muhammad Sikandar (PAK) chu Round 6 khelh puiin Unanimous Decision in a hneh bawk. 27th. Sunday : Dr. Bharati Pravin Pawar, Hon'ble Union Minister of State for Health & Family Welfare chuan Mamit tlawhin DC Conference Hall, Mamit-ah Sorkar Officials te leh NGOs te nen Aspirational District chungchangah inkawm hona an nei. 28th. Monday : Mizorama cham mek, Union Minister of State for Health & Family Welfare, Dr. Bharati Pravin Pawar-i’n Health Minister, Dr R Lalthangliana leh Health dept. hotu dangte a kawm.