1st. Monday : Thenzawl-a Village Councils, NGOs leh khawtlang mipui tangrual chuan Thenzawl Peace City lawmna inkhawm Jt. YMA Hall, Bazar Vengah an buatsaih a, bialtu MLA, Chief Minister, Lalduhoma chu khuallian a ni. Thenzawl Peace City tur hian mipui nuai khat leng thei tura ruahman niin, kilometer 108 thut tura ruahman a ni bawk.
2nd. Tuesday :
Vanlalhruaia s/o Zabiaka, Mamit Field veng chu a thingkih in a vawhlum.
3rd. Wednesday : MNF chuan Dampa Bial MLA by-election lo awm tura an candidate atan an Senior Vice President, Dr R Lalthangliana a nih thu an puang.
4th. Thursday : Tun thla ni 1-a Commerce & Industries Director atanga Fisheries Special Secretary atana sawn, Pi Maria CT Zuali chu Horticulture Secretary tura sawn leh a ni.
5th. Friday : Central YMA chuan Siaha-ah Sub Hqrs YMA chu Chhimtuipui Group YMA Hall-ah an hawng.
6th. Saturday : September ni 4, 2025-a tui tla hlum, Laldinsânga (17), Chawngtelui ruang chu hmuh a ni a; ni 4 vêka chin hriat lohva bo, Hauruang tlangvâl Lalêngkima (37) ruang chu hmuh a ni bawk.
7th. Sunday : Nl Zosangzuali (26) d/o Lalhmasawna, Zemabawk North chu Tuirialah a tlahlum.
8th. Monday : Mizo Hnam Runa chhung inkhawm neihah Vanlalzawma, Vice President chuan thusawiin, "Hmun hrang hranga kan boruak thlir hian, kum khat leh thla kua awrh chauh ZPM sorkar kan hrawn mekah, an thiltih diklo leh fuhlo tamtak avang hian kum 2028 inthlan kan thlir thup tawh mai a. Sawrkar hnathawk leh tlawmngai pawl hrang hrangte sawrkar lakah an lungawi lova, kiltinah lungawilo thawm hriat tur a tam hle a ni," a ti.
9th. Tuesday : Dr. G.S. Randhawa Auditorium, ICAR-Indian Institute of Horticultural Research, Hessarghatta Lake Post Bengaluru – ah C. Lalchawimawia, Rabung khua chuan IIHR Innovative Farmer Award-2025 a dawng.
10th. Wednesday : Dampa bial MLA bye-election atana INC candidate atan John Rotluangliana ruat a nih thu INC MPCC President, Lal Thanzara'n Congress Bhavan-ah a puang.
11th. Thursday:
Thingfal khua, Mamte venga Baptist Church of Mizoram (BCM) Biak In chu a thlang kawng an laih avangin a chim.
12th. Friday : William Vanlalhruaia, Luangmual chuan a nupui, K. Thangrimawii (63) chu airgun in a kap palh a, damdawi in panpui a nih hnu-ah a hliam tuar loin boral.
13th. Saturday : Prime Minister, Narendra Modi chuan Sairang to Delhi (Rajdhani Express), Sairang to Guwahati (Mizoram Express) leh Sairang to Kolkata (Kolkata Mizoram Express) rel service chu Lengpui Airport atangin a vailiam.
14th. Sunday : Presbyterian Naupang Sunday School Inkhawmpui Ni a ni a, Pastor Bial hrang hrangah Naupang Inkhawmpui hi hman a ni.
15th. Monday : Tunlai hian Sawrkar lakah thil phut neiin pawl lungawilo, nawrh huaihawt mek an awm thu sawrkar chuan dawng a. A hnuaia hnathawk ten harsatna an tawh loh hi Sawrkar duh dan ber a ni. Hetiang thil duhawmloh a thlen loh nan leh thlamuang taka Sawrkar hnathawk ten an hna an thawh theih nan Aizawl District mipuite zawm turin District Magistrate, Aizawl District, Aizawl hetiang hian thuchhuah a siam. “Aizawl District huam chhunga Sawrkar Office (Govt. Institutions) awmna hmun hrang hrang Raj Bhawan, Chief Minister's Office, Mizoram Assembly Secretariat, MINECO etc. leh a chheh velah sawrkar, politics, sakhuana, vantlang leh thil dang engvang mahin mi 5 (panga) aia tam punkhawm leh bengchhen khap tlat a ni”. He thupek hian chhuah a nih atangin thla 2 (two months) chhung a huam ang.
16th. Tuesday : Chief Minister Pu Lalduhoma chuan Tualpui khaw lo zawhna a telpui. Hei hi Association of Tour Operators Mizoram (ATOM), Tourism Department leh Agriculture Department tangkawp ten Agro Tourism chawikan na'na an buatsaih a ni.
17th. Wednesday : Prime Minister, Narendra Modi pianchampha vawi 75 na, (doy 1950) a ni a, hemi pual hian BJP Mizoram te chuan an State Conference Hall, Mipui Rûn, Upper Republic-ah Aizawl Civil Hospital Blood Bank tan thisen unit 35 an pe a, thisen petute hi hmeichhia 2 leh mipa 33 an ni.
18th. Thursday :
Champhai District-a All India Services (AIS) Officer te chuan zirna In pasarih (7) atanga zirlai thlanchhuah te tan Thangtea Hall, Kahrawt Veng-ah Career Guidance an buatsaih a, he hunah hian Champhai Bawrhsap Mohammad Aaquib (IAS), Champhai SP Lokeshwaran R (IPS), SDO (Sadar) Chandrakant Bagoria (IAS) leh SDPO Vivek Maurya (IPS) te'n zirlai kalkhawm te chu an zirna kawnga an hmasawnna tur leh zirna sang zawk leh hlawh-tlinna an neih theihna turin an zirna zelah rahbi pawimawh tak tak an sawi a. Zirlaite zawhna hrang hrangte pawh chhan nghal a ni bawk.
19th. Friday : Mizo thu leh hla khawvela mi tam takin an dah san ber pawl, H. Lalrinfela (Mafaa) lehkhabu, a thuziak hrang hrang la tihchhuah loh dahkhawmna, ‘Riahrûn Remna’ tih chu Tlangnuam, Aizawla an chenna inah C. Lalnunchanga’n a tlangzarh. ‘Riahrûn Remna’ hi kum 2018-a thih hmaa a lehkhabu hnuhnung ber leh Mizo Academy of Letters (MAL)-in Book of the Year 2018-a a thlan, ‘Hringnun hrualhrui’ hnua a kuthnu tihchhuah leh hmasak ber a ni. Lehkhabu thar hi Rs. 300 man niin lehkhabu dawr hrang hrangah zawrh nghal a ni.
20th. Saturday : ATC Seminar Hall-II-ah Rev. Dr. Vanlal Nghaka Foundation chuan Scholarship hlanna inkhawm neiin, Rev. Dr. Vanlal Nghaka Foundation Chairman, Rev. Dr. K. Lungmuana chuan inkhawm a kaihruai a. Upa Chhawnvunga, Board Member chuan hunserh a hmang. Rev. Dr. Vanlal Nghaka Foundation hi nikum 2024 khan Dr. Lalmalsawma Nghaka chuan a din a ni. Tuntumah hian Pathian thu zirlai, mi pathum ten scholarship hi an dawng a ni.
21st. Sunday : Presbyterian kohhran hnuaia Senior department inkhawmpui chu bial hrang hrangah neih a ni.
22nd. Monday : General Administration Department (GAD) chuan thlasik lai leh nipui laia Mizoram leh state páwna Mizoram sorkar pisa kai hun tur a ti chhuak.
23rd. Tuesday : Mizo Idol chu Zonet studio-ah tan a ni. A tan tir zan hian mipa 10 leh hmeichhia 15 an inlan.
24th. Wednesday :
Aizawl West-I Bialtu MLA, TBC Lalvenchhunga chuan a bial chhung, Rangvamualah ar note leh a chaw a sem. Aizawl West-I Bialtu MLA hian chhungkaw thlan chhuah parukte hnenah ar note 100 theuh bakah a chaw bag hnih theuh leh ar tui pekna te a sem a ni.
25th. Thursday : Mizoram State Pharmacy Council buatsaihin World Pharmacists Day 2025 lawmna hun, Vanapa Hall, Aizâwlah buatsaih a ni.
26th. Friday : Ecco van hmanga Champhai aṭanga Sêrchhîpa khualzinte thlaha kal, Ginsanpianga (36), Champhai Bethel Vêng chu a haw lampangah Keifâng leh Tuirini inkârah kawngthlangah a tlanliama, a hmunah a boral nghal.
27th. Saturday : Mizoram sawrkârin, Mizo dam lai zînga upa bera a puan, Pi Lalneihsângi @Buangi (108), Khatla, Aizâwl chu Ebenezer Medical Center, Aizâwlah awmlai in a boral.
28th. Sunday : Rel, Kawnpui leh Mualkhang station inkara Kolkata Sairang Express 13`125 chuan Zonunzira, kum 51, Mualkhanga hnathawka awm, Naisingpara, North Tripura lam mi chu a chil hlum.
29th. Monday : Mipui ten awlsam zawka Rêl Service an hman tangkai theih nân Transport Department chuan Transport Complex, Chaltlang leh Railway Station, Sairang inkârah MST Bus a service tir tan.
30th. Tuesday : Mizoram sawrkar-in Mizorama ruihhlo lo lut tur beihpui thlakna a kalpui mek, Operation Jericho hnuaiah Excise & Narcotics Department chuan India leh Myanmar inrinnaa Tiau lui, Tlangsamhmun hlui, Champhai District-ah Heroin 118.330 gram (Hawng 10) leh a neitu nia puh – Lalrinmawia (47) s/o Zachula, Tlangsam, Champhai District-a khawsa nia inchhal chu an man.
Comments
Post a Comment