QUARRY CHIM CHUNGCHANG

  

Ka feh haw chu ka nupui hian "Quarry chim kha i hre ve em?" min lo ti nghal. Sarepkawn lama ram nei niin quarry chim mai hlauhawm tak chunga lohtheihlohna avanga kal thin kan ni a, engtikah tak chim ang maw? tih chu kan rilrua hlauthawng taka helama kal te ngaihtuah thin a ni. Chuvang chuan tuna quarry chim chungchang min lo zawh pawh khan khami kha ka tlan zawh hnu khan a chim ta ni-ah ka ngai nghal. Mahse, Mota lui lamah daih a lo ni thung si a nih hi. Engmah ti khawtlai loin ka tlan chho ve nghal. Dar li vela hna bang ka ni a, quarry kha dar thum vela chim nia sawi a nih avangin ka thlen chhoh ve meuh chuan mi an lo thahnem tawh khawp mai. 

Quarry chim na bawrah khan mi 7 an awma, a sira chim pheiin an zinga 2 an tlanchhuak hman a, hliam tuar leh tang pahnih ve ve an awm bawk. Hliam tuar pakhat erawh damdawi in panpui a nih laiin a boral thung. Quarry-a chim hian motor pakhat a delh bawk.

Ka thlen chhoh hun hi a tlai tawh avangin ruang tang te lakchhuah tumin an lo bei mup mup tawh. A lo rapthlak ngei mai. A luhka ber atanga zawng loin a chim laia an lo awmkhawmna lai dap hmasak a ni a, an tlanchhiat ve ngei ka rin avangin a fuh ka ring vak lo. 'An lo awmlo a nih ngat phei chuan kan inhmu lawk lo ang a' ka ti chhuak hial nghe nghe. Chinchang hre zawk ten'a an hmalakna a nih avang erawh chuan ka sawi zui duh ta lemlo.     

Mi kan beidawn rum rum hnu in ni ngana-ah Dumka pa kan hmu ta hlauh mai. A chhungte kha ka van lawmpui tak e aw! Chhiattawh thu an hriat atangin Jharkhand lam atang an rawn kal ve vang vang a ni a, a hmunah an rawn awm chilh ve rawt mai. An michhe ve hle ang tih an awmdan atangin a chiang reng a, beisei nei taka an rawn thu ve ran reng hmuh khan mittui an ti tla hial thei nia. A zawnna lama kan tan tlan zia leh a vuina lama mi kan thatthnem zia te, ralna sum kha zozai a tling te kha an beisei hauhin ka ringlo. Kan chet dan khan Sihphir min ti mawi hle in ka hria.

Lak chhuah hnuhnun zawk, Chakma pa nupui mawlh kha ka khawngaih. Ka thlen hun kha tlai tawh viau mah se an lo la hrilh chiahlo nge mawni? an ina kan kal khan chinchang a hre mang tlatlo! A chi ai vang pawh a ni mahna. A tukah te khan quarry a lo kalin a tap nasa mai thin kha a ni a, hmuh a hrehawm thin ngei mai. Quarry neitu teakah pawh tawngkam a duhtui vaklo niawm a ni. Ka dem hranlo. Thil a ngaihtuah vak vak anga, an in atanga hnaite-ah hmuh theih siloh in a awm a ni a, a lo la dam mial angem?' ti te leh lung rawn tawlh a hmuha a mangan dan tur thlengin a suangtuah ngei ang. Kan hmuh tak mai silohah khan a beidawng rum rumin ka ringa, a zawngtu te pawh ti tha duhlo-ah hial pawh min ngai maithei. Ruang pakhat hmuh a nih chiah khan beiseina sang tak a nei thar ngei ang. Beisei angin kan hmu leh ta mai bawk silo. Kan hmuh taka a lawm dan tur leh a nat thar dan tur te kha aw!

Quarry nei tu, Pu Changliana kha ka khawngaih lutuk bawk. An eibel ber a nih a rinawm a, senso zawng zawng an tum vek tur a nih thu an sawi phei kha chuan khawlin darkar khata a hlawh tam tur zia ngaihtuahin an va inseng hnem dawn em! Chuta karah (metter 500 bial) an la tih tawp (stay) sak dawn zui.

An thenawm te chhiattawh zar a chhelama zo tu, Pu Roddy-a te hlei hlei kha an khawngaihthlak. An thiamloh ni miahlo-ah an hnathawk an chan a, an rilru a hahin damlo leh chhiattawk chhungte an chhawmdawl dan zozai te kha aw. An thenawma quarry neitu te dang te pawh an lainatawm. A tuartu ber ang maiin an hmanhlel ve hle a nih kha. Anni bakah an hnuaia thawktu te mawlh mai hi. An eizawnna a tawp hmuk mai dawn si. 

Khawtlang hruaitu, VC leh YMA hruaitu te hah dan tur te kha aw. An rilru zawng zawng an pe tih a hriat. Excavator khalh tu pa mawlh kha, thawklakna hun takngial pawh neiloin kan chhawr a ni a, a hna a bahah hlek lo kha a mak zawk! Theihtawpin a tang tih a hriat  NDRF leh YMA QRF te bakah section eisiam ho pawh kha an fakawm. 

A mipui mimir pawh khan kan vei tlang khawp bawk in ka hria. Kal ve hmanlo te pawh khan chin kan ngaihven reng tih a hriat. Phone ka bih chhen mai a nih hlawm kha. Mi nawlpui kal a remlo chungin a him chin atanga thlirtu kha zat kan awm pawh kha hawkdak satliah vang ringawt chu niin ka hrelo. 

Mizo dana ni 7 zawn a nih hnu pawha kan beidawn rum rum hnu-ah a ni kua naa kan han inhmu kim zet kha chu kan lawm tlang teh e. WhatsApp atanga an hmuh thu ka chhiar chiah khan 'ruang an hmu' tiin ka au chhuak thawt nghe nghe. 

Kan hliam tuar bera pawh a zia sawt viau e. Nilaini khan YMA te thisen pe tura min ngen angin ka va pe ve nghe nghe. Thangkhat lian zet thisen ka pek tawhloh hnua ka pe leh thei hi ka lawm hle bawk.