1st. Monday : World AIDS Day a ni a, Mizoram hmun hrang hrangah hman niin, a hmanna pui ber, Aizawlah chuan Mizoram State AIDS Control Society (MSACS) bultumin Vanapa Hall-ah hman a ni.
2nd. Tuesday :
National Pollution Control Day a ni a, hemi denchhen hian Mizoram Pollution Control Board hnuaia Environment Education Programme (EEP) chuan Online competition hrang hrang a buatsaih.
3rd. Wednesday : Lai Autonomous District Council (LADC) hnuaia 12th Member of District Council (MDC) inthlanpui chu harsatna lian tham thleng loin neih a ni. Vote hi 83.99 % a tla. Vote tlate hi December 9, 2025 zing dar 8 aṭangin chhiar a ni ang. MDC hi 25 thlan tur a ni a, candidate 80 an awm.
4th. Thursday : Mizoram Governor hlui, Swaraj Kaushal chu kum 73 mi niin AIIMS hospital-ah a thi. Swaraj Kaushal hi kum 37 a nih laiin 1990 atanga 1993 thleng khan Mizoram Governor a rawn ni a, Governor ni thei naupang ber a ni a nghe nghe.
5th. Friday : Ni hnih awh, 15th Mizoram State Fencing Championship 2025, Multi Purpose Indoor Hall, Sihphir a neih chu a tiak.
6th. Saturday : Central YMA hruaitute chuan NHIDCL hnuaia Vairengte leh Sairang inkar NH kawngpui short term maintenance contract-a siam mek leh PMGSY hnuaia Hlimen leh Lungleng inkar kawng siam mek an enfiah. YMA hruaitute’n kawng siam an enfiahna-ah hian, Vairengte leh Sairang inkar kawng siamtu contractor-te’n hna an thawh dan chu lungawithlak loh hlea an ngai thu an sawi a; contractor-te hian July 2025-ah hna an thawk ṭan a, July 2026-a thawh zawh tur a nih laiin, thawh tur zatve an la thawk lo vek a ni.
7th. Sunday : Mi harsa zawk ten Krismas hlim leh lâwm taka an hman ve theih nan, Mizoram Arsenal Supporters' Club (MASC) chuan luan chhuah hun an hmang a. Sairang-ah chhungkaw pali leh Lengpuiah chhungkaw pali hnenah sumfai Rs. 82,200/- an sem chhuak.
8th. Monday : Serchhip District Magistrate, Paul L. Khuma chuan kum 2025 krismas leh kumthar 2026 vuakvet-ah Serchhip District-ah halpuah leh halmawi khapna thupek ti chhuak.
9th. Tuesday : December ni 3 a LADC inthlan naa vote tla te chu chhiar a ni ta. Hetah hian MNF party chu tling hnem berin pariat an tlinga, INC in bial 7 hmua dawtin, ZPM 6 leh BJP 2 an tlin bakah
Independent 2 an tling ve bawk.
10th. Wednesday :
Kum 2025-2027 chhunga YMA kumpuan “ Ruihhlo Do” chu Vanapa Hall ah Central YMA President, R Lalngheta’n a hawng. R Lalngheta, President chuan thusawiin, “Zanin atangin khawlai a kan unaute thle mai mai riahna tur tha neilo te, CYMA kumpuan ten hma la tanin TBCC-ah dah thlak tan leh a ni ang," a ti.
11th. Thursday : Mizo zinga mi hmingṭha, ram leh hnam tana thawh hlâwk, mi chhuanawm bikte hnena Vanglaini chanchinbu in kum thum dana a hlan ṭhin, Mizo Award chu B. Lalthangliana hnenah hlan a ni. Mizo Award hi kum thum dana hlan ṭhin niin, kumin hi a vawi ngana a ni a, hlanna inkhawm hi HYVE Aizawl City Hall-ah buatsaih a ni. Award hian nomawi leh Rs 2,00,000/- a keng tel.
12th. Friday :
BJP Mizoram chuan BJP Mizoram State Office Upper Republic, Mipui Run-ah, Advance Christmas leh kum 2025 atana Office khar na hun an hmang a, thuhriltu lar, T Lalhmachhuani (Mimi-i) chuan Pathian thuchah a sawi. Mimi chuan chuan, "BJP Mizoram te hnen ah vawihnih lai mai Pathianin min rawn tir hi a thlawn dawn lova, Pathian-in mal a sawm ngei dawn che u a ni. A chhan chu Pathian thutiam a nih vangin, Pathian ringtute chu kan kal na leh kan thlenna a piang te tan pawh Pathian a vangin malsawmna kan ni thin a ni. Chuvangin, nang malsawmna ni ang che tih kha kan chanvo a ni," a ti.
13th. Saturday : December ni 1 atanga bo, Tanhril nula, Marina Lalchhanchhuahi (26) chu MZU field thlang lawkah thîa hmuh a ni.
14th. Sunday : December ni 9 atanga Synod Inkhawmpui Vawi 102-na Zarkawt Kohhran Biak ina neih chu a tiak.
15th. Monday :
Sêrchhîpa Excise & Narcotics Department-te chuan zan tîr dâr 6:06 khân Keiṭum leh Tuichâng lui inkârah heroin hâwng 17, gram 200.16-a rit chu Joseph Lalrindika (48), Tlângsâm Dinthar Vêng kut aṭangin an man a; zân dâr 8:10 khân Lower Chanmari Vêng Sêrchhîpah Lallâwmzuali (33), Lower Chanmari Vêng hnên aṭangin ganja gram 133.85 an man bawk.
16th. Tuesday : Excise & Narcotics Department chuan Aizâwla Falkland-ah heroin gram 349 (hâwng 210) chu Zorinsânga (32), Lunglei Chanmari; Lalhmangaihsânga (39), Bûngkawn Vêngthar, Aizâwl leh Bâwihchhuanpiang (29), Myanmar-te kut aṭangin an man.
17th. Wednesday :
Vairengte Joint YMA chuan, kum chanve chhûnga zu chi hrang hrang an man khâwm chu Dumping Ground-ah an tichhia.
18th. Thursday : Lai Autonomous District Council Deputy Chairman hlui, Pu Pushpa Ranjan Chakma (87) chu an khua Sumsilui-ah a boral.
19th. Friday : Aizawl Municipal Corporation buatsaih – kâwn chei intihsiak lâwmman sem a ni a; Zârkawt veng chuan lawmman pakhatna an dawng.
20th. Saturday : Chief minister hlui, Pu Lal Thanhâwla nupui, Lal Riliani (82) chu Ebenezer Medical Centre, Aizâwlah chuap thalo avangin a boral.
21st. Sunday : Presbyterian kohhran hnuaia naupang Sunday school zirlai te chu an exam.
22nd. Monday : Two Wheeler Taxi Driver, Lalremkima chuan Kristian te hunpui, Christmas lo thleng tur atan leh chawimawina a dawn pualin a thlawn in a service.
23rd. Tuesday : Zodin Square leh Chanmari inkarah lirthei kal phal lohna hmun (no vehicle zone) siam a ni a, mipuiin an hlut in bazara chhuakvâk an tam hle.
24th. Wednesday : Larsap, General (Dr) Vijay Kumar Singh chuan feet 108-a sang, Mizorama India hnam puanzar sang ber chu, 34 Assam Rifles, Zokhawsang, Aizawlah a pawt pharh.
25th. Thursday :Nl Ezrela Dalidia Fanai (41) D/o Lalhmerliani Fanai (L) chu a chenna in Khatla-ah thiin hmuh a ni. Lungphuchawl a nih rin a ni.
26th. Friday : Naupang zaithiam, Esther Hnamte (Esther Lalduhawmi Hnamte) chuan India rama naupang chawimawina sang ber Rashtriya Bal Puraskar Award chu Delhi-ah President Draupadi Murmu kut atangin a dawng.
27th. Saturday :
Armed Veng VDP-te’n ruihhlo an man khawm cheng nuai 6.67/- man hu chu bialtu corporator, Christina Roluahpuii Sailo-in a hal ral. Ruihhlo hal ralte hi heroin Rs. 43,500/- man hu, alprozelom Rs. 1,200/- man hu, ganja Rs. 4,000/- man hu, rakzu Rs. 13,000/- man hu leh sapzu (a senchi) Rs. 5,000/- man hu a ni.
28th. Sunday : Zemabawk ṭawngṭaina thlangah motor MZ 05 A 6335, hnamdang khalh chu a kang a, a hnung lam a kan chhiat hmain thelh mih a ni.
29th. Monday : Champhaia cham mek Adviser to CM (Finance & Planning), Pu TBC Lalvenchhunga chuan National Highway No. 6, (Seling leh Zokhawthar inkar kawngpui) atanga Champhai khawpui luhka, Khankawn atanga Champhai Kanan veng inkar kawngpui sial zauh mek chu a hmunah kalin a enfiah. Tuna kawngpui laih zauh mek, Metre 8 vela zau chu a tha tawk lo ni a ngaiin PWD hotute chu alignment siamtha a, kawng chu metre 10 a zau tura ruahman tur leh a kikawi lo thei ang bera ruahmanna thar siama, a hnena thehlut thuai turin hnathawktute a hrilh nghal.
30th. Tuesday :
Vairengte Police Checkgate-a Duty ten Assam atanga Mizorama luh tum lirthei pakhat an endikna atangin Royal Stag Whisky um puitling 120; McDowell’s No.1 Rum um puitling 72 leh um chanve 576 an man a. A neitu-a puh, Sunil Kumar, kum 38, Bihar Vaishali District lam mi, tuna Assam Cachar District-a cheng mek ni-a insawi chu an man nghal.
31st. Wednesday : Tourism Department buatsaihin Sakawrhmuituai tlang, Sihphirah kumin ni tla hnuhnung ber thlirliamna hun 'Sakawrhmuituai Sunset' hman a ni. Sakawrhmuituai Sunset-ah hian stall chi hrang hrang hawn a ni a, zaithiam lar tak takte'n Mizoram chhung leh pawn hmun hrang hrang atanga mipui kalkhawmte chu zaiin an awi a ni. He hun hmanpuitu Tourism Minister, Pu Lalnghinglova Hmar chuan Mizoram chuan khawvel pum huapa tlang thengthaw nuam pawl, Sakawrhmuituai tlang a nei tih sawiin, he tlang hi ni chhuak leh ni tla tur thlir na’n a mawi em avangin khawvelin an hriat theih tura phochhuah an duh a, mipuite'n he tlang hi tlawhchhan an neih theih na’n Sihphir khawtlang nen tangrualin Tourism Department chuan Sakawrhmuituai Sunset hi an buatsaih thu a sawi.
Comments
Post a Comment