Lamlian venga ka chho tur chu kawng lakah Zorami leh Adiki te hian 'kum engzatnge i nih tawh?' tiin kum zat an lo in zawt a, an inchhanna pawh hre hmanlo chuan rang takin inah ka tlan haw nghal. Ka nu hnenah ka kum zat ka zawt nghal var a, kum sarih ka nih thu in min lo chhang. Hemi hma hian 'kum' tih tawngkam hi ka la hre ngailo hrim hrim. Chuvanga ri ta hluai ka ni reng a.
Kum sarih zet ka nih pawha kum zat hriat chu sawi loh a tawngkama ringawt pawh ka la hre ngailo a ni a, naupang fing tak ka nilo ang tih chu in hrethiam mai awm e. Kan khawvel te kha a zim narawh. La kal lo mah ila, Aizawl chu khawpui tak a ni tih kan hriaa, Sihphir nena a inkara awm a nih avangin Selesih leh Durtlang pawh kan hre ve ngei. Kan khaw piaha Lungdai awm pawh kan hre bawk tak e. Bengah a ring bawka, foreign-ah chuan Israel leh America pawh kan hre lar fu.
Kan len hun chuan ka pa te nen inrual chho ve leh mai tura ngaiin a hminga koh hun te la awm turah ka'n ngai ah. Ka nu leh pa hi fing ber, huai ber leh engkim siam thiam tur leh hausa hle turah ka ngai thin. 'Nu Thlawhnain Israel ramah kal dawn ila, engtia rei nge kan thlawh ang?' tia ka zawhna chu 'ni za' tiin min chhang. I he loin ka awih hmiah.
Sawngnawi viau mah ila, ram kal te kha chu nuam ka ti ve ru ra. Thiam leh thiamloin sairawkherh te kha ka chelek ve viau. Ka nu hnenah 'perh thla ila, min lo nghak angem?' tih chu 'i perh thlak phawt chuan tehreng mai' tiin min chhang thin. Tun thlengin eng sava mah chu ka la perh thla chuang hleil'aw. Thangkam te pawh kan uar ve viau. Tumkhat chu chhimtir ka awk ve miala, ka lawm kher mai. Chip mei pawh tumkhat chu ka awk bawk tak e. Ka hriat leh dan in thiante uang in an lo dah chu lo ni lek in.
Buklem sak te kha kan van uar ve tak. Bailem te kan chhuang pah ngei a, ngaihzawng te kha anmahni hriat ve hleihloh khan kan nei ve ngei. An hming lawmtawi te sawiin kan min ti hlim ve viau tho mai.
Tumkhat chu tlangah artui bo kan chhar teuh mai a, kan bukah chuan hip tumin kan chhuk ta alawm le. Kan chhu hawng. A rawn hnang chhuak hliak hliak chu tenin a chhungmu kan nghak. A mu lawngin a rawn chhuak mai thei silo. A tawpah hetiang hi a ni vek dawn tih hria in ka thianpa pa chu marble panga in kan thleng tir ta vek a. A lo lawm hle a, keini lah lan lawm. Tumkhat chu ina awm laiin buklem chu a kang hluah mai. Kan zinga pakhat chuan 'khuaah ramar a lut a niang, hetiang nikhua hian buk a kang duh an ti' a ti. A hal a nih erawh kan ring hmiah thung.
Hman atanga tun thleng hian tleirawl sual hi mi tam zawkah a awm niin a lang. Mahse, kei kha chu tleirawl sual hmain naupang sual ka ni hman tlat. Mi in rawk te kha kan ching narawh. Kan rawk dan erawh a danglam. An thil la loin an chaw leh chawhmeh belah te khan vut kan han phul tehreng a nih kha. An va han thinur thin tehreng em. An ekinah lah phelsep kan lo kham kawkalh thul. Ka pa khan hrem nan thutthlengah min phuar bet thin. Naupang dang ho lah chuan hmuhnawm thlir khan min thlir thup mai a, zahthlak duh tak chu a ni.
Hei mai a ni lo. Hnung lam atanga hmeichhe awm tha hle hle lai an sama keh a, tlan hawn daih te kha ka van ching tak e aw. Heng avang te khan thenawm nu leh pa te vau pawh ka hlawh zing hle.
Thil te kha kan hre mak thin teh e. Rel hi a sei lutuka, naya 5 tlang pawh chil se a let ang kan ti thin. Mihring meuh an inchil hlum tir pawhin a letlo chu a ni si a.
Hnim bawh en te kha a va nuam thin em. Thing zar sang tak atangin kan han zuangthlaw pawp mai thin a nia, thil zum leh a dangah te khan kan lo in tipalh lo zawk thin ngawt mai.
Mipa mah ni ila hmeichhe ho inkhualtelem naa tel ve te kha nuam kan ti thei. Mipa ta na chu driver-ah kan han tang ngei a, hmun danga inkhualtelem te kha kan han biaa, chaw te kan han ei lem lem vel a, supply te pawh kan inphurh tawn ta awm e.
Naupang mawl tak niin rethei bakberhin kan khawsaa, chantawkah erawh kan hlim ve hle thin. Kan ramvak awllo a, tlai tin tui chengin sephung te pawh kan lai ve nasa. Bawng insi te kha kan hmuhnawm neih pawl kha a nia, hnap tla pura pawnto in kan tlankawi zawr zawr thin. Naupangah pawh dinhmun hniam ber pawla khawsa kan ni chungin chhungte thatna zarah ramdang hial thlengin radio ngaihthlak tur neih ringawt pawha lungawi em em khan computer nen kan inchhawp ve ta rup mai chu a nia. Thian ho zinga a ngawng ber pawl khan tunlai thiamna chungchuang AI hial kan hre ta chu a nih hi. Heng zawng zawng avang hian Pathian chungah ka lawm em em a ni.
Comments
Post a Comment