CHANCHINBU MAN CHUNGCHANG

 (Sawiremtlang editorial)

A hmasa in chanchinbu min hlut saka min lak sak (subscriber) tute chungah lawmthu kan sawi e. 

Chanchinbu enkawl hi a hautak em em mai a, tha leh zung kan sen te hi chu lo dah tha ta ila. A buatsaihna lamah  hian sum tam tak a ngai a, chuvangin, a lak man pawh cheng 30/- lai kan han ti a nih hi.     

A man hi thlatina Inrinni hnuhnung ber hian khawn a ni tlangpui a, chuti a nih chuan karleh khi a khawn hun tur a lo ni leh dawn a, lo inkau lawk deuh te pawh a tha in a rinawm.  He mi hunah hian khawn vek theih a nih loh thin avangin thlathar Inrinni hmasa ber leh remchang danga khawn pawh kan awm zeuh zeuh bawk.      

Chanchinbu hi naupang semtir thin a ni a, a man khawn thu-ah pawh anni hian an keng tlang mai thin. Naupang an nih avang tak hian thenkhat hian zahlo taka lo tawngkhum in 'min pe ngai silo a, a man khawn hre hlur ringawt mai' tih an hlawh fo niawm tak a ni. 

Thenkhat chhiar duh si a man pe duh manglo te pawh an awm niin a semtute hnen atangin thu kan dawng fo. A zialo khawp mai. Tin, pe emaw inti a pe silo te pawh a awm theih a nia. Chutiang thil kan tawh loh nan receipt siam a ni a, a man kan pek in  receipt min pek theihnghilh te pawh a awm thei. Dil mai pawh hrehlo ila a fuh in a rinawm.

Engpawhnise, chanchinbu man kan pek hi YMA sum tur a ni a, YMA sum chu khawtlang mipui te ta a ni bawk. Chanchinbu man tha taka kan pek hian khawtlang kan tanpui tihna a ni a, hreh lo a tha taka pe thin turin kan inngen e.