1st. Sunday : Vaivakawn Zohnuaia Sangthanmawia building, chhawng 7 a sang chu a chim. Vanneihthlak takin in chim avanga thi leh hliam an awmlo hlauh. Khawtlang hruaitute tarlan danin, kum 2017 vel atanga in hi che tan tawh niin tum engemaw zah khawtlang leh Sawrkara thuneitute pawhin an endik tawh a. Aizawl District Disaster Management Authority chuan August ni 29, 2024 khan khawtlang him zawk nan thiat tura thupek a lo chhuah tawh nghe nghe.
2nd. Monday : Shillong-ah North Eastern & Eastern States/Union Territories Tourism Ministers Conference neih a ni a, he hunah hian Mizoram Tourism Minister, Pi Lalrinpuii pawh a tel ve. He Conference hi Union Minister for Culture & Tourism Pu Gajendra Singh Sekhawat leh Union Minister of State for Tourism Pu Suresh Gopi te kaihhruainain Vivanta, Shillong, Meghalaya-ah hman a ni.
3rd. Tuesday : A kaptu hriat loh silaimu in, Rothiangi (73) w/o R. Lalengliana (L) Mission Vengthlang chu a banah a fuh a, tu kah nge tih Kulikawn police ten an chhui zui nghal. Silai mu hian an bathlar thlang lam tlangbana puan a pho laiin a rawn fuh a ni.
4th. Wednesday : Mizoram Sorkar official-te leh Aizawla Assam Rifles hotute chuan Zokhawsanga Assam Rifle-te an insawn chhuah chungchang an sawiho. Mizoram Sorkar official-te hi Secretary to Chief Minister, Vanlaldina Fanai leh Home Secretary, Vanlalmawiate'n hoin, Officer's Mess-a an inkawm hnuah, Assam Rifles ram awm dante a hmunah an enho nghal.
5th. Thursday :
Ramchhung hmung dang rualin Mizoram pumah Zirtirtute Ni, (Teachers Day) lawm a ni. School Education Minister, Dr Vanlalthlana chuan Zirtirtute Ni, pual hian ramchhunga zirtirtu zawng zawngte chibai a buk a, a hna chu sawrkarin a ngai pawimawh tih sawiin 'nunkawng dik zirtirna hna ropui tak a ni' a ti a, 'zirtirtu hna chu nakina ram hruaitu la ni tur leh eizawnna kawng zawh thei tura zirlai naupangte kawng kawhhmuha, nunkawng dika kaihhruai a ni' a ti bawk.
6th. Friday : Mizo hmeichhe lengzem artist kan neih ṭhat zinga mi, Siampuii Ralte chuan music video thar, "Lengi" chu a ma YouTube channel-ah a ti chhuak. 'Lengi' tih hi The Radio vocalist, Philip Lalremruata phuah a ni a, music hi Smiley siam niin; video directing, shooting leh editing hi Reuben Malsawma (Zothlir) kut chhuak a ni thung.
7th. Saturday : Kolasib Deputy Commissioner, Pu Robert C. Lalhmangaiha chuan Serkhan atanga Bagha State Highway dinhmun a enfiah.
Inspection neih na-ah hian Serkhan atanga Bagha inkar kawng chu khuar tenau a awm zeuh thin tih lohah chuan a tha thawkhat ni a hriat a ni a. Amaherawhchu, Bukpui, North Hlimen leh Saipum inkar kalpawhna erawh khuar lian tham tak tak leh motor tan a tlan hrehawm tham hmun a awm nual tih hriat a ni thung.
8th. Sunday : Vawk natna ASF vângin hmun hrang hrangah vawk 32 thiin vawk 62 suat a ni.
9th. Monday : Custom Preventive Force, Champhai leh Assam Rifles tangkawp chuan Mêlbûkah heroin gram 22; chêng 15,40,000/- hûa chhût mi pakhat hnên aṭangin leh Mêlbûkah vêk hian foreign cigarette bâwm 5 leh foreign beer bûr 39 an man bawk.
10th. Tuesday : Central YMA hnuaia Kumpuan Committee-te’n December 12, 2023 aṭanga September 9, 2024 chhûnga ruihhlo an man khâwm chêng vaibêlchhe 5.58/- hûa chhût chu CYMA office kawtah an hâl ral.
11th. Wednesday : Environment, Forests & Climate Change Department chuan ram ngaw leh nungchate humhalhna kawnga nunna chânte hriat rengna ni, National Forest Martyrs’ Day chu State Forest Training Institute, Bethlehem Vêngthlang, Aizâwlah an hmang.
12th. Thursday : Assam Rifles leh Excise & Narcotics Department ṭangkawp chuan Sairâng Dinthar Vêngah heroin gram 24; chêng nuai 16.80/- hûa chhût chu Laltlankimi (39), Zokhawthar nia inchhâl kut aṭangin an man.
13th. Friday : AMC ward no. VI corporator atâna thlan tlin, Pu H Lalremtluanga chu Aizawl DC, Pu Lalhriatpuia chuan rinawmna thu tiamtîrin a la lût.
14th. Saturday : National Legal Services Authority-in ram puma National Lok Adalat buatsaih tûra a tih angin Lunglei leh Sêrchhîpah buatsaih a ni.
15th. Sunday : Presbyterian kohhran hnuaia Senior department chuan bial inkhawmpui an hmang hlawm.
16th. Monday : Chief Minister, Pu Lalduhoma chuan a office-ah Mizoram Commercial Vehicle Union hruaitute a kawm a, an harsatna te a sawipui. Chief Minister hi Pu Vanlalhlana, PWD leh Transport Minister, Pu TBC Lalvenchhunga, Adviser to CM (Finance) leh PWD Official pawimawhten an tawiawm.
17th. Tuesday : Mizoram Oil Tanker Driver Association (MOTDA) leh Petroleum Entrepreneurs' Transport Union of Mizoram (PETUM) te chuan kawngpui chhia avanga lirtheite tana chetsual hlauhawm an tih avangin pawl pahnih hnuaia lirtheite an tlan lo. MOTDA leh PETUM hruaitute chuan Mizorama kawngpui, a bikin Kawnpui leh Sairang inkar chu tuialhthei phur lirtheite tan chetsual hlauhawm khawpin a chhe mek a. Kawng chhia a tlan hian Petrol leh Diesel baw palh in chhiatna nasa tak a thlen theih avanga tuialhthei phur te chu tlan rihloh nise ti anni.
18th. Wednesday : Vanlaldina Fanai, Commissioner & Secretary, GAD chuan office hour thar a ti chhuak.
October ni 1, 2024 - February ni 14 (winter) chu zing dar 9 atanga tlai dar 4 thleng a ni anga; February ni 17, 2025 atanga October ni 3 (summer) chu zing dar 9 atanga tlai dar 5 a ni thung ang. Hetih lai hian state pawn lama Mizoram house te working hour tur pawh tih chhuah nghal a ni bawka, state chhung nen tlem azawng danglam a awm thung.
19th. Thursday :
Mizoram sorkar hmalakna lian ber ni tura duan, ‘Bana Kaih (Mizoram Hand-holding) Scheme 2024’ chu Chief Minister, Pu Lalduhoma’n Vanapa Hall-ah a tlangzarh. Chief Minister chuan, thawkrim, taima leh tumruhte tan Mizoram sorkar a din dawn thu sawiin, 'Sorkar hmalakna dawng tur leh chang turin party induhsakna leh party-a inziah luh kher a ngai dawn lova, party mi ten thlang loin a thlang tur bika ruat ten endikin an thlang thin dawn a ni', a ti bawk.
20th. Friday : Sairang leh Kolasib inkar National Highway kawng siam mek chu Central YMA hruaitute chuan an tlawh. Hemi hunah hian CYMA President, Pu Lalhmachhuana bakah OB 2 leh CEC 11 te an kal a ni. Central YMA hruaitute hi Zoram Drivers Union hruaituten Khamrang leh Kawnpui inkarah an tawiawm bawk.
Hnathawk mektu Department hotute bakah Mualkhang, Khamrang leh Kawnpui Branch YMA hruaitute nen an hma lo lak tawhna te pawh an ngaihthlak bakah, Kolasib Sub-Headquarters YMA hruaitute Kolasib DC te nen thil engmawzat an sawi ho bawk.
21st. Saturday :
Synod Hospital, Durtlanga Doctor, Dr Laldinliana Sailo leh Dr Rinngheta Renthlei leh Durtlang tlangval pakhat te chu Ramhlun North tlangval panga ten an chuanna motor atanga hnukchhuakin na takin an sawisa.
22nd. Sunday : Vanlalvena (37) s/o Lalrinsanga, Tuithiang Veng, Aizawl chu Hunthar Vengah a scooty khalh laiin truck in a chil a, ka chhawn loin a boral.
23rd. Monday :
'Thuthlung Thar Theology' tih lehkhabu chu Synod moderator, Rev. R Vanlalnghaka'n Synod Conference Centre-ah a tlangzarh. Lehkhabu hi Mizo zinga Pathian thua doctorate degree nei hmasa ber, Rev. Rev. Dr Zaihmingthanga kum 80 tlin puala Rev. PC Nghaklianmawia leh Rev.Dr H Joseph Lalfakawma ten an buatsaih a ni a; Rs 500/- man a ni.
24th. Tuesday : Khaw hrang hrangah harsatna hrang hrang avanga VC nihna chelh tluan theilo te aiawh tur thlan a ni.
25th. Wednesday : Kawlchaw outpost a duty Police constable, Lalmalsawmthanga, New Colony, Siaha chu Chhimtuipui lei (Kawlchaw Lei) atangin a zuangthla a, a boral zui.
26th. Thursday :
Sihphir Higher Secondary School building thar chu bialtu MLA, Pu Lalthansanga, Forest, Environment & Climate Change, etc. Minister ni bawk chuan a hawng. Building thar hawnna inkhawmah thu sawiin, Minister chuan Sihphirah zirnain nasa takin hma a sawn a, tunhnaiah MPS, Bank leh sawrkar hna hrang hrangah hna hmu thar an awm chu lawmawm a tih thu a sawi a. Sihphir Higher Secondary School-in building tha tak an nei ta chu a lawmpui thu leh hma sawn zel tura a duh thu a sawi bawk. Sihphir HSS building thar hawn tak hi 17m x 6.5 m a zau a ni a, 17th January, 2023 a sak tan niin 25th September, 2024 ah sak zawh a ni a, ₹51,48,200/- sen a ni. A chhawng hnuai ber hi la khawr pum loh deuh a ni thung.
27th. Friday : Union tourism ministry-in World Tourism Day denchhena ‘Best Tourism Village Competition 2024’ a buatsaihah Sialsuk khua chuan Best Tourism Village lawmman an dawng. Lawmman hi New Delhi-a day lawmna-ah Vice Presisent, Jagdeep Dhankhar leh Union Tourism & Culture Minister Gajendra Singh Shekhawat te hnen atangin helai bialtu MLA, Baryl Vanneihsangi Tlau leh Dr. Lalrozama, Secretary, Tourism ten an dawng a ni. He intihsiakna-ah hian state 30 atangin khaw 991 an inlan a ni. Lawmman hi nikum khan Reiek khua chuan a lo la tawh bawk.
28th. Saturday : Ni 2 awh, Commonwealth Parliamentary Association (CPA), India Region, zone-III, Annual Conference vawi 21-na chu Assembly Session Hall-ah khar a ni. Inkhawmah hian project hrang hranga ruahhmanna leh thawhhona tha zawk a awm theih nan DoNER Ministry leh NEC chhunfin chungchang sawiho a ni.
29th. Sunday : LPS lama Kasauti serial-a Anurag-a aw thawhtu leh LPS Pro-Fight-ah te pawh ring announcer thin David F Lalmuankima (47), h/o Hmingthankimi, Ramhlun venglai chu Ebenezer Medical Centre-ah septicemia avangin a boral.
30th. Monday : Governor, Dr Hari Babu Kambhampati a damloh avanga min hmui tu tura ruat, Tripura Governor ni lai, Pu Indra Sena Reddy Nallu chu Durbar Hall, Raj Bhavan-ah Justice, Nelson Sailo, Judge, Gauhati High Court chuan rinawmna thu tiam tirin Mizoram Governor hna thawk lailawk turin a lalut.
Comments
Post a Comment