1st. Thursday : Mizoram State Election Commission (SEC) chuan Aizawl Municipal Corporation (AMC) Ward No. VI by-election hun atan August 22, 2024 a ruat. He ward-ah hian MNF ticket-a corporator atana thlan tlin John Zosangliana Ralte chu a thih avangin by-election hi buatsaih a ni.
2nd. Friday : 23rd Inter branch YMA volleyball tournament 2024, August 5-17, 2024 chhunga R. Dengthuama Hall, Mualpui-a neih tur chu General secretary, Prof. Malsawmliana chuan a beng hawng. Pu Malsawmliana chuan team tel turte chu dik tak leh fel taka inelna hmachhawn turin a chah. Inelnaah hian mipa team 73 leh hmeichhia team 26 an tel dawn a ni.
3rd. Saturday :
Mizo Village Volunteer Rising Day lawmna hun hmanga Lamka, Manipura cham mek, Pu Lalmuanpuia Adviser to Chief Minister chuan thuthar thehdarhtute a kawma, tun hnaia Manipur Chief Minister Pu Biren Singha’n Manipur State a buaina chungchangah remna leh muanna a awm theih nana hma la tura Mizoram Chief Minister a biak pawh chungchang leh thil awmdan a sawi.
4th. Sunday :
Zirtawpni zan atanga tan, Presbyterian kohhran Harhna Inkhawmpui, vawi 10-na Saron Veng Kohhran Biak Ina hman mek chu a tiak. Harhna Inkhawmpui thupui hi 'Nunna chu thlang rawh u' tih a ni.
5th. Monday :
State Working Committee for Teachers’ Day 2024 chu an Chairman, School Education Minister, Dr. Vanlalthlana hovin Directorate of School Education Directorate conference hall-ah kumin Teachers’ Day hman dan tur leh zirtirtute hmakhua kaihhnawih pawimawh dan sawiin a thukhawm.
6th. Tuesday : Ni li awh tûr, Mizoram Florists Association buatsaih Florist Fair – 2024 chu Aijal Club Park-ah hawn a ni.
7th. Wednesday : Khawvêla paraglider naupang ber, Samuel Lalbiakhlua, kum 11 leh thla 5 leh ni 3 a niha paragliding professional course hlawhtling taka zova khawvêla certified paragliding pilot naupang ber ni thei hnêna International Book of Records-in hriatpuina certificate a pêk chu Chief Minister Pu Lalduhoma chuan a pisa-ah a hlân.
8th. Thursday : Assam Rifles-te’n Mêlbûkah heroin gram 134-a rit Israelliana (29), Zokhawthar hnên aṭangin an man.
9th. Friday : J & M Sofa LPS Comedian Search – 2024, season 16-na chu Zârkawt Community Hall, Aizâwlah ṭan a ni.
10th. Saturday : Sawrkar laipuia Rural Development Minister, Kamlesh Paswan chuan zan khat riak turin Mizoram a rawn tlawh.
11th. Sunday : African Swine Fever (ASF) avangin district pali-ah vawk 23 a thi. Heng te hi Aizawl, Lunglei, Serchhip leh Hnahthial district a mi te an ni. Heti hian kumin February ni 9-a Champhai district Leithum khua a ASF vawk pulhri avanga vawk thi an hmuhchhuah leh atang khan vawk pulhri avangin vawk 9,322 a thihna a ni.
12th. Monday : Shillong a India hmarchhaka Autonomous District Council hrang hrang hruaitute inhmukhawmah Lai Autonomous District Council atangin Chief Executive Member, Pu C. Lalmuanthanga bakah Deputy Chairman, Pu H.Lalmuansanga leh Executive Member pahnih Pu Lalropuia Chinzah leh Pu HC Lalthawmliana te an tel.
13th. Tuesday : GSC Auditorium, Govt. Saitual College, Saitual-ah "Nasha Mukt Bharat Abhiyaan" campaign hnuaia ruihhlo laka fihlim tura intiamna chu Saituala Govt. High School, Govt. Higher Secondary School leh Govt. Saitual College zirlaiten an nei. He intiamna hun hi Pu Lalthakima Chhangte, Sub-Divisional Officer (S) in a kaihruai a, Saitual Bawrsap, Dr. Lalngura Tlau bakah hian Resource Person, Pu R. Lalruatkima President, Sub-Hqrs, YMA Saitual chuan thu a sawi bawk a ni.
14th. Wednesday : Governor chuan Mizoram Public Service Commission (MPSC) member thar atan K Lalhmingliana, MCS a ruat. K Lalhmingliana hi Commerce & Industrues Addl. Secretary ni thinin, heta tang hian AMC Commissioner atan ruat a ni. Volunary-a pension-in MCS member nihna hi a chelh dawn a ni. Tunah hian MPSC-ah hian chairman chu R Lalramnghaka, IAS (rtd.) niin, member pahnih Vanlalngaihsaka, IAS (rtd.) leh PB Lianthangpuii, MIS (rtd.) an awm mek.
15th. Thursday : India ramin zalenna a hmuh champha 78th Independence Day a ni a, India hmundang rualin Mizoramah pawh hmun hrang hrangah lawm ve a ni a, minister, MLA te bakah sorkar mi pawimawh ten insem darhin an hmanpui hlawm. A lawmna pui ber, Aizawla AR Lammualah chuan Chief Minister, Pu Lalduhoma chu khuallian a ni.
16th. Friday : Lalruatdika s/o T. Laldanglova, Serchhip chu a hnathawhna-ah Electric in a man avangin a thi. Lalruatdika hi mistiri niin a in sakna-ah a iron rod lek chuan a chunga kal Serchhip Entlang lam Power pekna, 11kV Line chu a fuh palh a, Electric hian a man zui ta a ni.
17th. Saturday : LBS Suzuki 23rd Inter Branch YMA Volleyball Tournament 2024 chu a hmawr bawk a ni ta. Final-ah hian Muanna Veng chuan Hunthar chu 3-0 (25-19, 29-27, 25-21) in an hneh a ni.
18th. Sunday :
Vawk pùl hri, African Swine Fever (ASF) avangin vawk 60 a thi a, vawk 58 suat a ni bawk.
19th. Monday :
Health & Family Welfare department hnuaia pisa hrang hrang leh damdawi-inte laka vuivaina leh lungawi lohna thlen duhte tana online hmanga thlen theihna tur, 'Vahui' online grievance portal chu HFW minister, Pi Lalrinpuii chuam a pisa-ah a tlangzarh.
20th. Tuesday : Mizoram State Commission for Protection of Child Rights (MSCPCR) hotute chuan Aizawl Press Club-ah thuthar thehdarhtute an kâwm a; naupang pawi khawihtute laka rilru puthmangah Mizoram mipui náwlpuiin insiamṭhat an la ngaih nasat thu an sawi.
21st. Wednesday Ni hnih awh, Mizoram State Legislative Assembly pakuana session vawi thumna chu zawh a ni. Speaker, Pu Lalbiakzama sawi danin tun session chhung hian chhan nghal chi zawhna (starred question) lut 273 atangin 263 pawm a ni a, ziaka chhan chi (unstarred question) 17 lut te pawm vek a ni bawk.
22nd. Thursday :
AMC Ward 6 Corporator, Pu John Zosangliana a thih vanga a bial ruak hnawhkhat tûrin By-election neih a ni a, hetah hian vote 4,691 a tla. Inthlanah hian Candidate pathum, Pu H. Lalremtluanga, ZPM, Pi Lalrinfeli, independent leh BJP Candidate, Chawnghmingthanga te an awm a ni.
23rd. Friday : Sports & Youth Services Minister, Lalnghinglova Hmar chuan a office-ah Khelo India State Centre of Excellence (KISCE) a thawktu lak thar te a kawm a, KISCE chu Centre of Excellence a nih ang ngeiin Mizorama infiammi tha ber ber chherchhuaktu nih tum turin a chah.
24th. Saturday : Education Minister, Dr Vanlalthlana chuan a bial chhung Ramthar North-a YMA committee room-ah mipui ten an mamawh an thlen theih nan hun a hmang.
Education Minister hnenah hian, mi thahnem takin an harsatna leh mamawh an thlen a, heng an mamawh leh harsatna te hi minister hian a theih ang ang a tihhlawhtlin a tum thu a sawi bawk.
25th. Sunday : Assam Rifles Director General thar, Lt. General Vikas Lakhera, VSM, SM, chu Shillong atanga rawn kalin Chief Minister, Pu Lalduhoma a rawn hmu. Chief Minister chenna inah inkawmin AR sawn chhuah chungchang an sawi dun. Inkawmna an neih zawh hian Assam Rifles te hmunhma thenkhat a hmun ngeiah an tlawh nghal.
26th. Monday : AMC Ward 6 Corporator, Pu John Zosangliana a thih vanga a bial ruak hnawhkhat tûra tun thla ni 22-a By-election neiha vote tlate chu chhiar a ni ta a. ZPM Candidate, Pu H. Lalremtluanga chuan vote 2,354 hmuin thlan tlin a ni. Amah hnaih bertu MNF leh Congress-in an thlawp Independent Candidate, Pi Lalrinfeli chuan vote 2,273 a hmu a, an inthlauhna hi vote 81 chauh a ni.
27th. Tuesday :
Samagra Shiksha hnuaiah Khawzawl district-a sorkar primary school leh middle school 49-a zirtirtute hnenah zirlai te an zirtirna tur atana hman tur tablet 101 sem a ni.
28th. Wednesday : Ruah nasa taka a sur avangin Zoram hmun hrang leimin avanga harsatna a thleng nasa hle. Hetih lai hian mihring nunna chan leh hliam an awm hriat a ni lo hlauh thung.
29th. Thursday :
Central YMA Hall, Tuikhuahtlangah branch tina YMA chanchinbu enkawltute tan Mizotawng zirna buatsaih a ni a, he hunah hian Mizo Language Development Board member pahnih, Pu B. Lalhmunliana, Bethlehem Vengthlang leh
Prof. Rualkhuma Colney, Republic Vengthlang te hnen atangin 'Mizotawng ziah dan/hman dan dik zirna' tih leh 'Mizotawng dik leh tha I zir ang u' tih te chu zir ho a ni.
30th. Friday : Aizawl Traffic Police te chu khawpui chhung hmun hrang hranga zan a Two wheeler chak leh bengchheng tak taka tlan, silencer/exhaust tih danglam leh ri bengchhengte vaiin an duty.
31st. Saturday :
Ngaizel, Kulikawn a D-3 Business Enterprise showroom thar chu Lalrinthazuala (vohbik), Gilead Special School a zirlai chuan a hawng. D-3 Business Enterprise hi LG, Haier leh AmritCem Cement distributor Mizoram tan an nih bakah, Rongli Animal Feeds tan Mizoramah Distributor an ni bawk.
Comments
Post a Comment