NGENNA LEH LAWMTHU SAWINA

  (Sawiremtlang editorial)

Kar hmasa khan editorial chungchangah  chanchinbu ti ngaihnawm leh a hlutna hriat theih dan tha ber chu editorial hi ni a an  sawi thin thu sawiin theihtawp chhuah zel kan tum tur thu te kan sawi a nih kha.  

Kan chanchinbu hi YMA ta a nih rualin khaw pum chanchinbu a tih theih ang chu. Chuvangin, a hlu in a bengvarthlak viau thin a, kum 30 chuanga upa ni ve tawhin media committee kuta awm a ni. Anni hian a enkawl tur an ruat chhuak leh thin a ni. YMA chanchinbu enkawltu te hi eizawnna atana thawk kan ni lo a, hei vang hian thuchhuah tur lakkhawm thu-ah buaithlak chang a tam hle. Chhuah awm tak chhuah loh chang kan nei fo tih pawh kan inhria. Hei hi board member te hian a thleng tih kan hriat lemloh thil a thlen ve fo vang pawh a ni ang chu. Chuvangin, thuchhuah tur hria chuan board member te hnenah hriattir thin nise kan lawm ngawt ang. Chubakah, thil thleng tur hriatlawk theih chi awm thu-ah pawh lo in hrilh lawk theih ni phei se chu a lawmawm lehzual ang.

Hetih mek lai hian a buatsaih na-ah hian sum tam tak a ngai a, chuvangin, a lak man pawh cheng 30 lai kan han ti a nih hi. Harsa tak chunga la (subcribe) hram hram thin tu te chungah kan lawm takzet a, chutih rualin dinhmun tha taka lang la lemlo pawh kan awm nual niin hriat a ni. In tih luih theih ni hauhlo mah se hetianga kan lo lak ve hram hram hian tu sum tur mah a ni biklo tih hria ila, keimahni vèk pawh in kan la hmang maithei tih hre chungin tlawmngaia min lak sak zel turin kan sawm che u a, a la lo hriat kan nei a nih pawhin la tura lo fuih thin turin kan ngen nghal bawk a che u.

A man chungchangah thlatina Inrinni hnuhnung ber hian  khawn a ni tlangpui a, thlathar Inrinni hmasa ber leh remchang danga khawn pawh kan awm zeuh zeuh bawk. Chuti a nih chuan karleh khi a khawn hun tur a lo ni leh dawn a, lo inkau lawk deuh te pawh a tha in a rinawm a, sum kawltu kan awm dawnlo a nih pawhin in nghaktu te hnena dah nachang hriat pawh a fuh in a rinawm.      

Chanchinbu hi naupang semtir thin a ni a, a man khawn thu-ah pawh anni hian an keng tlang mai thin. Naupang an nih avang tak hian thenkhat hian zahlo taka lo tawngkhum in 'min pe ngai silo a, a man khawn hre hlur ringawt mai' tih an hlawh fo niawm tak a ni. 

Thenkhat chhiar duh si a man pe duh manglo te pawh an awm niin a semtute hnen atangin thu kan dawng fo. A zialo khawp mai. Tin, pe emaw inti a pe silo te pawh a awm theih a nia. Naupang rilru thianghlim tak te an ni a, rilru sual pu a indil nawn ang chi hi chu a awm a rinawm lo. Dil nawn anga thil tisual tu-ah riak te kan lo puh hian thil thalo anmahni-ah kan tuh daih thei tih hria ila, chanchinbu kan chhiar duh a nih chuan a man pek lamah tan i la deuh deuh ang u.