1st. Saturday : Vanapa Hall-ah movie thar "Hremhmun Shortcut" tih, Leitlang Pictures siam chu Information & Public Relations Secretary, Betsy Zothanpari Sailo chuan a tlangzarh. Betsy chuan, Movie in a tarlan tum thu pawimawh leh tha tak mipuiin an lakluh ngei theih nan hmuhnawm ti taka an en theih a beisei thu a sawi. He movie hi Lersia App-ah a en theih dawn a ni.
2nd. Sunday : Aizawl Diocese Sunday School Ni chu Mizoram pumah Catholic Kohhran ten an hmang.
3rd. Monday : Kar hmasa Thawhlehni a South Hlimen leh Melthum leimin avanga chin hriatloh a awm zui ta mi pali te zawn hna chu Mizo dana ni sarih a lo kim tak avangin ruang hmuh zawh tak loh te pali te zawn kharna hun Melthum leh Aibawkah te hman a ni.
4th. Tuesday :
Mizoram-in Lok Sabha-a seat a neih chhun hnawh khah nana kumin April ni 19-a vote thlak te chu boruak muanawm tak hnuaiah chhiar a ni a, State-a ro rel lai, Zoram People Movement (ZPM) Candidate, Pu Richard Vanlalhmangaiha chuan vote 206377 hmuin amah hnaih bertu, MNF party candidate, K. Vanlalvena chuan vote 13932 chiah a hmu thung.
5th. Wednesday : World Environment Day a ni a, Mizoram hmun hrang hrangah hman a ni. Kumin World Environment Day thupui chu 'Land restoration, desertification and drought resilience' tih a ni.
6th. Thursday : Tunhnaia ruahsur nasa in Aizawl khawpui tui tlan tur lakna Greater Aizawl Water Supply Scheme Phase I chhehvela hnawl a chhekkhawm thianfaiin Zotrek adventure club chu an hnatlang.
7th. Friday : Tualpui khawtlang chuan an khaw chhuak, chief minister, Lalduhoma chu Mizoram Chief Minister anih avangin an chawimawi. Tualpui khuan hian Chief Minister hi a lim lianpuiin an lo siam sak nghe nghe. Lalduhoma chuan amah leh a chhungte siam lian a, a thlavang vawi tam hauha chawimawi thintu Tualpui khawtlang chungah lawmthu a sawi a. Mizorama la thleng ngai zen zen lo - a lim din a ni chu zahthlak a tiin, phu lo a intih thu a sawi.
8th. Saturday : RGSA Grassroots 2024 chu ISL Odisha FC winger, Isak Vanlalruatfela'n Republic Veng Field-ah a hawng. Grassroots hawnnaah hian naupang 100 chuang an kal a ni.
9th. Sunday : Pu Lalduhawma, kum 41 B/o Lalthantluangi, Sihphir chu Lungphuchawlin Tuikuala an chhungte inah a thi.
10th. Monday : Bawngkawn leh Leitan inkar, Haflong pelh kawng chhaka Petrol pump tur nia sawi lei laih avanga harsatna thleng leh lungrem chim avanga mipui kal vel tana him lo chu MPYCC in a hmunah an enfiah.
11th. Tuesday : Lai Autonomous District Council hnuaia Village Council 99 inthlan leh Lawngtlai Chandmary MDC bye-election hun atan June 27 ruat a nih thu State Election Commission, Mizoram a, Commissioner, Laima Chozah chuan DC Conference Hall, Lawngtlaiah a puang.
12th. Wednesday : Dawrpui venga Mosque bul dawrah dawr nghaktu hnam dang pakhat chu Lalnunsanga, kum 32, Armed Veng South nia inchhal a chuan pistol-in a kezungpuiah a kap a, lawikhawihtu hi police in an man nghal.
13th. Thursday : Zanlawn leh Serkhan inkar, Buhro pengah pick up pakhat chu chesual in khalhtu, Nur Ahmed s/o Ibrahim Ali, Dholai, Assam-in nunna an chan a, a handleman hian hliam na lutuk lo a tuar ve bawk.
14th. Friday : Home Minister, Pu K.Sapdanga chuan Directorate of Forensic Science Laboratory, MINECO a tlawh. He hunah hian
FSL Conference Hall-ah FSL officer te nen inkawm a ni.
15th. Saturday : YMA day vawi 89 na a nia, branch hrang hrang in mahni remchan dan angin an lawm hlawm a. Central YMA hruaitu te pawh hmun hrang hrangah an zizn chhuak hlawm.
16th. Sunday : Presbyterian kohhran chuan 'Rualbanlo te ni' an hmang. He hunah hian mahni kohhran chhung theuha rualbanlo te chu thilpek an hlan hlawm.
17th. Monday :
Agriculture Minister, Pu P. C. Vanlalruata'n Ramthar Veng Pastor Bial Pavalai Pawlten Chite Lui thenfai hnatlang an neih chu a telpui. Ramthar Kai chhehvel Chite Lui dungte thenfai hnatlangah hian member 90 chuang an thawk chhuak a, hnatlang tan hma in lui leh tuihna humhalh pawimawh zia chungchang thusawite ngaihthlak a ni bawk. Hnatlang hi Save Chite Lui Coordination Committee hruaituten an telpui bawk.
18th. Tuesday : Union Minister of State for Home Affairs atana lakluh thar, Bandi Sanjay Kumar chuan Kolasib a tlawh a, Prime Minister in PM Kisan hnuaia lo neitute tanpuina tur a semchhuah chu KVK Kolasib atangin video conferencing
kaltlangin an zawm ve a ni. Bandi Sanjay Kumar hi NDA sawrkar Narendra Modi kaihhruai term 3-na a Mizoram tlawh hmasa ber a ni nghe nghe.
19th. Wednesday :
Mizoram Arsenal Supporters Club leh Arsenal fans group lian pathum heng : Gooners Inn, Mizo Arsenal Fans Ruhkawl leh Mizo Arsenal Fans - A thling hlang hlakte ṭang rualin Cyclone Remal vanga chhiat tawk, Pu Matthew Lalchhanhima te chhungkaw puala vehbur an khawn a pawisa fai tling khawm, ₹ 61502/- chu Bawkpui Gooner Hut (Aibawk) kal tlangin, Pu Matthew Lalchhanhima'n a kalsan tak a chhungte an hlan.
20th. Thursday :
Lalsangliana, director, education department chuan Primary, Middle leh High school zirtirtu lak result a ti chhuak.
21st. Friday : Sports Minister, Lalnghinglova Hmar chuan Hmangaihhlima lehkhabu ziah “Thlantui far (Infiamna thu ngaihnawm)” chu MZP Conference Hall, Treasury Square-ah a tlangzarh. Hmangaihhlima (Hmaa Hauzel) hi Aizawl Post chanchinbu-a infiamna column ziaktu a ni a. A lehkhabu ziah, phek 224 a chhahah hian thuziak tawi 35 awmin, sports discipline hrang hranga infiammi langsarte thawhrimna chungchang ziah a ni. A man hi Rs 299/- a ni.
22nd. Saturday : Bawngkawn Branch YMA chuan an veng huamchhungah damdawi ti an hluar em avangin 'addict khâwm rûnpui' neiin an hnatlang a, vengchhung mi 11 leh veng dang atangin mi 42 manin an zavai hian mi 53 zet anni. An mi man te hi a then counselling te pe in an chhuah tir leh a, thenkhat chu Tawngtai Bethel Camping Center (TBCC), Sakawrtuichhunah an dah thla bawk.
23rd. Sunday : Lawngtlai a Pu Thangnawna (L) in chu a kang a, vanduaithlak takin in neitu nu, Pi Sungtiali, kum 76 mi leh a pasal (Pu Thangnawna) a farnu, (an ina cheng ve) Pi Darhliangi, kum 70 te chuan nunna an chan.
24th. Monday : MNF party chuan Mizo Hnam Run-ah chhung inkhawm a nei a, Prova Chakma, MLA chuan thusawiin, "Hmeichhiate chu kawng tinrengah mipate el pha kan ni tawh a, politics khelh chungchangah ngat phei chuan duhthlanna leh inpekna chiah kan bak tawh a ni," a ti a, "Khawtlang nun leh politik chu hun hnih – Kristian hma leh Kristian hnuah a then theih a. Hun hmasaah chuan hmeichhiate dinhmun a chhe hle a, amaherawhchu, tunah zet chuan hmeichhia te hi thilti thei tak, lehkha zirnaah pawh mi chung en, an hnathawhnaah pawh hlawtling tak tak te an nih tawh avangin hmeichhia nih vang ringawta insit leh kiltawih a hun tawh lo hle a ni," a ti bawk.
25th. Tuesday : KVK Khawzawl chuan Chawngtlai khuaa sapthei chingtute nen Farmers Scientist Interaction an nei. He hun hi Dr. Malsawmkimi Senior Scientist & Head chuan kaihruaiin, Pi R. Vanlalduati SMS (Soil Science), Pu Rambuatsaiha SMS (Agronomy) leh Pu Prakash Thapa (Farm Manager) te chuan hian zirtirna an pe thung.
26th. Wednesday : Khawvel puma ruihhlo hman sual leh tawlhruk do na ni, International Day against Drug Abuse and Illicit Trafficking a ni a, he ni pual hian Mizoram police te chuan Aizawl Zoological Park, Lungverh, Aizawlah incinerator hmangin ruihhlo an man hrang hrang, Rs.14,03,25,585/- man hu zet chu an halral.
27th. Thursday : Melbuk atanga km 3 vela hla Tiau lui-ah balu khur a chim a, Melbuk khaw mi pahnih leh Myanmar raltlan pakhat, Melbuk a kar hnih vel khawsa tawh te chu an boral.
28th. Friday : Ni hnih awh, Mizoram Weightlifting Association (MWA) buatsaih, Mizoram Inter District Senior Weightlifting Championships 2024 Serchhip a khelh zawh takah Aizawl district chu mipa leh hmeichhiaah an champion.
29th. Saturday : Tun kar Thawhtanni a tan, MSBA Hall, Hawla Indoor Stadium, Republic Vengthlanga khelhah Mizoram Snooker & Billiards Association (MSBA) buatsaih Mizoram State 10 Ball Pool Ranking Tournament 2024 chu khelh zawh a ni ta a, K Lallawmkima, Khatla South a champion.
30th. Sunday : Ni hnih awh, Sihphir Pastor Bial Kristian ThalaiPawl
'Kum chanve Intawhkhawm' Venglai kohhran biakina hman chu a tiak ta. He hunah hian intawhkhawm thupui -'Ringtu nun' tih chu Knight for Christ
team (Synod Revival Team) Speaker,
Henry Lalhmingthanga chuan a sawi.
Comments
Post a Comment