1st. Monday : Thla hlui ni 28 a Aizawl Special Court (Prevention of Corruption)-in thiam loh a chantir tak, State Bank of India Mission Veng Branch Manager hlui, Lalkhomang Guite leh Aizawl Sacred Heart Society hotu Gary T. Haokip te hremna chu Special Court chuan a puang a, kum 4 chhung Jail tang tur leh cheng nuai 10/- ve ve chawi turin a hrem.
Lalkhomang Guite, Churachandpur Manipur leh Gary T. Haokip, Aizawl Republic Mual Veng-te hi kum 2006 leh 2007 inkar chhunga a tak awm lo Self Help Group hminga cheng vaibelchhe 2.10/- chuang loan pek chhuah kawngah dan bawhchhiaa puh an ni.
2nd. Tuesday : Council of Ministers thutkhawm/Cabinet meeting chu Chief Minister, Pu Lalduhoma kaihhruaina in Lunglei HPC Conference Hall-ah neih a ni.Tuntum hi Aizawl khawpui pawna Council of Ministers thutkhawm nghah tum khatna a ni nghe nghe.
3rd. Wednesday : Autonomous District Council hnuaia Lawngtlai Chandmary Bial By-Election neih zawh taka MDC a thlantlin C.Lalsawmzuala chu LADC Chairman V.L Hmuaka'n rinawmna thu tiam tirin MDC atan a lalut.
4th. Thursday : Congress Party chuan Congress Bhavan-ah ‘Friday Political Session’ an hmang a. He hunah hian MPCC President, Pu Lal Thanzara chuan thu sawi in, “Lalpa rawngbawl chunga politics hi kan kalpui anih chuan kan hlawhtling ang." a ti. He Friday Political Session hi Pu Zosangliana, Secretary, MPCC chuan a kaihruai a, Pu C. Ngunlianchunga, Vice President, MPCC leh Pu C. Vanlalruata, Vice President, ADCC chuan report an pe bawk.
5th. Friday : Supply Minister, Pu B Lalchhanzova leh FCI, Shillong General Manager, Sandeep Deora chu Shillong Mizoram House-ah an inkawm a, Chief Minister, Pu Lalduhoma’n Prime Minister hnena D.O. letter a thawn bawhzui dan tur vel an sawi.
6th. Saturday : Mizo Hmeichhe Insuihkhawm Pawl (MHIP) din champha vawi 50-na a ni a, Golden Jubilee hi MHIP branch hrang hrangah lawm a ni.
MHIP Day pual hian MHIP Gen. Hqrs. president, Ngurmawii Sailo chuan thuchah a siamin tlang hrang hranga MHIP member-te chibai a buk.
7th. Sunday : Rev. Dr. Lalchungnunga,
Kum 91, Founder and President, Mission For Christ, Durtlang chu Civil Hospital-ah a boral.
8th. Monday : Kar hmasa Inrinni a Serchhip District jail aṭanga tlan chhuak, Myanmar mi pahnih zinga pakhat zawk, Lalnunnema (31) s/o Lalkima (L), Thántlang, Myanmar chu Vanchengte kham hnuai-ah hliam na tak tuarin hmuh a ni a. Serchhip police ten Vancheng khaw mi tlawmngaite puihna in lak chhuah a ni.
Lalnunema hi a ṭhianpa, Lalchhanhima nen June ni 7 khan AK 47 silai tam tham tak nen man an ni.
9th. Tuesday : Hortoki bul, Tlawng lui-ah Hortoki khaw mi, Tlawng hnar lama hnathawka kal te chuan vawk thi (ruang) 7 zet an hmu. Vawk thi ruang hi lui-ah hian kar hmasa lam pawh khan hmuh a lo ni tawh bawk.
10th. Wednesday :
MRB Branch 105-na tur, Luangmual Branch chu Dr Renu Sharma, IAS, Chief Secretary chuan Sheryl L Vanchhong, MRB Chairman leh mi pawimawh hrang hrangte hriatpuinain Luangmual, Aizawlah a hawng. Luangmual Branch hi Luangmual leh a chhehvela chengte tana chhawr theih leh ṭangkai tak ni tura beisei a ni.
11th. Thursday : Zoram Pawn Mizo Pawl Summer Sports 2024, chu Mizoram Youth Commission Chairman, Pu Malsawmzuala Ralte in Aizawl Armed veng playground-ah a hawng. Summer Sports 2024 hi Inrinniah Mission Vengthlang Basketball Indoor stadium-ah khar a ni ang.
12th. Friday :
Salvation Army thalai pawl, Salvation Army Youth (SAY) Central South Division chuan Serchhip Blood Bank-a dah turin thisen Unit 35 an pe a, thisen petute hi mipa 27 leh hmeichhia 8 an ni.
13th. Saturday :
Central YMA chuan Central YMA Hall-ah tunhnai a Cyclone Remal avanga chhiatna tawkte tanpuina, hmun hrang hrang atanga a dawn khawmte semna hun a hmang. a. He hun hi Fabian Lalfakawma, Assistant Secretary, Central YMA-in a kaihruai a. Prof. Malsawmliana, General Secretary-in chhiat tawhna thlen dan hrang hrang leh tanpuina luh dan report a pe bawk.
14th. Sunday : Assam Rifles leh Zokhawthar police ṭang kawp chuan heroin gram 38.5, chêng nuai 38.5/- hûa chhût chu Lalrohlûra (30), Myanmar nia inchhâl motor khalh aṭangin an man.
15th. Monday : Lalhmingsânga (20), Buang khua, Aizâwla college kal lai chu Tuithumin Tlawng a fin thlâkna chhak Khawhthla lî-ah a tla hlum.
16th. Tuesday : Beckham Lalhmunsânga (16), Bulfekzâwl chu Aizâwla a inhlawhna-ah electric current-in a man avângin a thi.
17th. Wednesday : Sakawrhmuituai tlângah Central YMA hnuaia Science & Environment Sub-Committee leh Sihphir Branch YMA ṭangkawp chhuan thing leh thei ṭiak engemawzat an phun. Pu Lalhmachhuana, President , Central YMA, Chairman, Science & Environment Sub-Committee, CYMA ni bawk chuan Sakawrhmuituai tlânga thing phun an thlâng chu an ti fuh hle nia an hriat thu te, Sihphirah Environment & Forest Sub-Committee ṭha taka a ding leh an hmalakna fakawm a tih thu a sawi a. A beisei phâk bâka Sihphir lamin an lo ṭawiawmnaah lawmthu a sawi bawk.
18th. Thursday : Power & Electricity Department-a thawk, Lalmuansânga (55), Model Vêng, Aizâwl chu Saikhamakâwnah electric current-in a man avângin a thi.
19th. Friday : Zurlaibu a kan zir thin, Buarpui nu huaisen, sakei chêk hlumtu, Pi Zadingi (72), India ram huaisen châwimâwina ‘Shaurya Chakra’ pawh lo dawng tawh chu cancer natnain a boral.
20th. Saturday : Thangkura drama a, Churchuha tia chang, CH Lalnunmawia chu Stroke avangin a boral.
21st. Sunday : Ni 19.7.2024 atanga chin hriat loa awm, PC Zomuanthanga (40) s/o PC Rotuahzuama, Vathuampui chu ramhnuai-ah thi a hmuh a ni.
Ni 19.7.2024 tukthuan eikhamah PC Zomuanthanga hi hnang tur mau/rua sat turin ramah a kal a, haw hun awma ngaihah a haw loh avangin an chhungte leh mi tlawmngaiten an zawng a, an hmuh zawh loh avangin a tuk atangin Vanthuampui YMA ruahmannain zawn chhunzawm a ni a, an chhehvel khuate pawh mibo zawng hian an thawk chhuak nghe nghe.
Tichuan, khua atanga kms. 2 vela hla ramhnuaiah thia hmuh a ni ta a ni.
22nd. Monday : Women & Child Development leh Environment, Forest and Climate Change Department buatsaihin Sakawrhmuituai Tlang, Sihphirah Nu pual thing pakhat phun 'Ek Ped Ma Ka Naam and Plant4Mother Campaign' neih a ni a. He hun hi Social Welfare, Tribal Affairs, Women & Child Development Minister, Lalrinpuii chuan hmanpuiin a hovin thingphun hian an hnatlang a ni. Ek Ped Ma Ka Naam and Plant4Mother Campaign pual hian thing tiak hi 50 zet phun a ni.
23rd. Tuesday :
Aizawl West-II bialtu MLA, Sports Minister ni bawk, Lalnghinglova Hmar chuan a bial chhunga sawrkar School-a zirtirtute chu Vaivakawna Cultural Centre cum Auditorium-ah a kawm a, zirtirtu hna chu hna zahawm leh pawimawh tak a nih thu sawiin, zirlaite nunkawng dik kawhhmuh kawngah hunbi vawn dik ngaih pawimawh hmasak a tul thu a sawi a. Zirlaite harsatna hriatpui turin leh an mamawh ang a kaihruai tur chuan zirtirtute leh zirlaite chuan hun an hman ho tam a pawimawh thu a sawi bawk.
24th. Wednesday : Champhai Zotlang leh Khankawn Police Check Gate inkarah Champhai Police te chuan Myanmar atanga dan lova lak luh kuhva rah ro, bag 420, kg 28900 zet chu an man. Kuhva man hi cheng 1,878,500/- hu vela chhut a ni.
25th. Thursday : IIMC Aizawl, MZU Campus-ah India rama Community Radio Station 500 na chu Union Minister of Information & Broadcasting, Pu Ashwini Vaishnaw chuan online in Delhi atangin a rawn hawng. A hawnna programme hi Chief Minister, Pu Lalduhoma chuan a office atangin a lo zawm ve.
26th. Friday : PC Party President, Vanlalruata chuan Party office-ah thu sawiin Mizoram sawrkarin a duh phawt chuan CBI te duh duha thil chhui thei tura general consent a pek theih zia a sawi a, tun dinhmuna general consent a pek loh thu a sawi. Mizoram sawrkar leh CBI indawr tawh dan sawiin Ruata chuan kum 1990-a Mizoramin CBI hnena consent a lo pek tawh thu te, 1995-a hei hi sawrzim a ni a, 2002-a consent tihtawp anih thu te a sawi a. "ZPM a lo sawrkar a, an sawrkar hlim teah general consent an pek thu insawitheihnan an hmang a. Mipui pawh kan lawm a, corruption case lian te CBI in an chhui hun tlumtea thlir taka kan thlir laiin kumin June 27 khan hei hi tihtawp leh a ni," tiin Ruata chuan, "Heti chunga kan Chief Minister leh ram hruaitu thenkhatin CBI te general consent pe anga an insawi reng hi a dik lo a. An party Dan hremi ho phei chuan CBI te general consent pek theih anih loh thu Press Conference hial neiin an sawi a. Hetiang thu inkalh ngaihthlak fo hi a ninawm a ni," a ti.
27th. Saturday : Chief Minister, Pu Lalduhoma chu NITI Aayog Governing Council thutkhawm vawi 9-na, Prime Minister, Narendra Modi kaihhruaina a New Delhi a buatsaihah a tel. Thusawiin CM chuan, 'Tuna Mizoramin a mamawh hmasa chu inkalpawhna kawng tha zawk leh tam zawk neih a ni', a ti.
28th. Sunday :
Assam Rifles leh Mizoram Police tangkawp chuan Zokhawtharah ruihhlo, Meth-Amphetamine mum, kg 20 leh gram 665 a rit, cheng vaibelchhe 61,990,000/- man hu an man.
29th. Monday : Lungphunlian khaw daia Kanghmun kham puk chhungah mihring ruhro ni ngeia rin thahnem tak hmuh a ni. Ruh ro te hi khabe ruh, ngal ruh, ha leh lu ruh niin lang.
30th. Tuesday : Lalnghinglova Hmar, Sports Minister chuan SAI Stadium, Kokrajhar, Assam-ah Durant Cup 2024, Kokrajhar Chapter chu khuallian niin a hawng.
31st. Wednesday : Bairabi leh Sairang inkar rel kawng siam mek chu Bairabi atanga kms. 16 a awm Hortoki Station-ah rel pindan 12 tlan thlenpui a ni a, relah hian hnathawktute an chuang nghe nghe.
Comments
Post a Comment