Skip to main content

MAY 2023, SIH(PHIR) DIARY

 


1st. Monday : Sihphir Presbyterian Kohhran ten mi harsa in an sak sak chu Pathian hnenah hlanin a luahtu turte hi an lut zui. Kohhran ho ten mi harsa in an sak pathumna a ni.


2nd. Tuesday : Tv Lalnunkima, kum 39 s/o Zatluangi,

 Tlangveng chu Aizawl Civil Hospital-ah ‘Kal tha lo’ avangin a

boral. 


3rd. Wednesday : Thlahlui, April ni 20 a ruihhlo an khawih avanga Social Reform & Action Committee ten Sihphir chhuahsan tura an tih, Lalrimawia s/o Lianthangpuia, Tamlo veng leh Lalropuia s/o Lalchhawni, Tlangveng te chu khawchhungah an hmuh leh tak avângin khua chhuahsan tir leh an ni.


4th. Thursday : Tv Lalruatpuia s/o Lalrinliana

Royte, Damveng chu Qatar-ah

Grassroot Badminton coaching pe turin a kal. Kum khat

chhung coaching a pe ang. Tv

Lalruatpuia hi SAI Gopichand Acamedy,

Hyderabad a thawk mek a ni.


5th. Friday : Chief Minister, Pu Zoramthanga chuan MNF party zawm thar mi 122 chu Rohrenga Hall-ah a lawmlut.


6th. Saturday : Aizawl Hmar Presbytery huamchhunga Kohhran Committee member,

leh Bial hruaitu - Hmeichhia, KTP leh

KPP bakah Branch YMA OB te tan

'Kohhran mite party politics ruihchilh

lo tura in zirtirna' seminar Durtlang

Kohhranah neih a ni a, Sihphir atang pawhin a tel awm mi engemawzat an tel.


7th. Sunday : Hmarveng Presbyterian Kohhran chuan Tualchhung Upa atan heng mite hi an thlang :

1. Pu Lianchungnunga

2. Pu R. Lianzama

3. Tv Tawnhmingthanga

4. Pu Vanlalramtharnghaka. Pu Vanlalramtharnghaka tihloh hi chu tual upa tanglai vek an ni.


8th. Monday : Branch YMA Executive Committee Member te chu WhatsApp group kaltlangin an Committee a, tunlaia Manipur Zohnahthlak  unau raltlan te chungchangah  Central YMA in Aizawl City Branch YMA te mahni branch huamchhung țheuhah țanpuina (sum faiin) khawn nise a tih avângin hmun ualau laia bawm dawh an rel.


9th. Tuesday : Venglai Kohhran Pavalai rising day a ni a,  nilengin kohhran hall-ah an lawm a, chawhlui kil ho nghalin zanah mimal inah an hmang chhunzawm bawk. 


10th. Wednesday :   Malsawmtluanga h/o Zaluni, Zion veng te chu Social Reform & Action Committee chuan an zu vawi engemawzat an man sak tawh avang leh zuar tawhlo tura warning an pek hnua an man sak leh tak avângin khua atangin an hnawtchhuak. 


11th. Thursday :  

Sihphir

Road Taxi Welfare te chuan kum chanve

intihhlimna RT Resort, Neihbawihah

nilengin an hmang.


12th. Friday :

Excise & Narcotics Department te

chuan Pu Lalchhanchhuaha (Sêna)

h/o Lalparmawii, Theihaingaw te

inah Pi Zohmingliani w/o

Zohmingliana, Theihaingaw (Pu B.

Helluaia in luah) ta Heroin (No. 4)

chu an man.

Pi Zohmingliani hi Excise &

Narcotics lam hian an rinhlelh deuh avangin Sairang atangin an chhui zui tawh a. A

thiante inah hawng 11 an mansak phawt a. Pu

Lalchhanchhuaha (Sêna) inah hian soundbox

chhûngah hawng 9 an mansak leh ta a ni.Excise & Narcotics Department te

hian Pu Lalchhanchhuaha (Sena) bakah Pi Zohmingliani

leh a pasal Zohmingliana te hi an man nghal. 


13th. Saturday : Ni hnih awh tur, Bible Society of India

Aizawl Auxiliary, Durtlang Branch

Annual Meet vawi 19-na chu Leitan

Kohhran Biak Inah tan a ni. Durtlang branch-ah hian Sihphir khuaa kohhran hrang hrang te pawh kan tel a ni.


14th. Sunday :

UPC, Ramthim Department te

chuan bial pawn feh chhuah programme atan Bawngthah Kohhran an tlawh.


15th. Monday : Venglai KTP ten branch sports am hman mek chu an zo ta. A kharna hunah hian group tin atangin special item hmuhnawm tak tak thlir ho a ni.


16th. Tuesday : LBS Suzuki Inter 21st Inter Branch YMA Football Tournament inpuahchahna kal zelah Kolasib ground-ah Sihphir Branch YMA team leh Kawnpui team ten Friendly Match an zu khel a. Sihphir Branch YMA team hi 0-5 in an tlawm hlauh mai.


17th. Wednesday :

K.Pahlira

Kum 86, Pu Lalchhuana puzawn, Chhanhimveng chu an in hnuai-ah inawkhlum a hmuh a ni.


18th. Thursday : V/C house-ah  ni 100 inhlawhna pawisa March leh April hlawh, a vaiin Rs 3,000/- sem a ni.


19th. Friday : MBSE-in Higher Secondary Leaving Certificate results a ti chhuak a,   Sihphir Higher Secondary School zirlai te chu an pass vek. Mizoram chhunga 100% pass thei school 54 zingah Sihphir Higher Secondary School hian candidate 84 neiin zirlai  ngah ber an ni nghe nghe.


20th. Saturday : Branch YMA hnuaia Environments and Forest sub-committee te chuan Herhsengaw an tlawh a, mimal ram neite neih dan a him tawk em? tih leh  nungcha te an him tawk em? tih vel an va en a ni. Anni hian   YMA in Herhsengaw hi a humhalh tlat ani tih chhinchhiahna an tar nghal.  


21st. Sunday : Kan nghahhlelh em em Durtlang to Sihphir kawng laih zauh hna thawh a ni ta. A bultan nan hian Selesih hmar lam deuh thawh hmasak a ni.


22nd. Monday : Venglai Branch KTP te chuan Project 250 an hmanga, he hunah hian Pu Lalnghinglova Hmar chu speaker atan ann hmang a, KTP member bakah kohhran mipui te nen mi 333 zet inkhawm an awm.


23rd. Tuesday : V/C house-ah Dengue

leh Malaria chungchangah khawtlang

hmalak dan tur sawi khawm a

ni a, Health Department CMO atangin

consultant 3 leh V/C te an tel.

 


24th. Wednesday : Inter

Branch YMA Football Tournament khelh mekah Sihphir

Branch YMA te chuan an match hmasa ber atan Piler Branch

YMA te khelin Sihphir Branch YMA te hian

4-2 in hnehna an chang.  Sihphir Branch YMA

Team te hian kar leh Thawhtanni hian an khel leh dawn a ni.


25th. Thursday : Luangmual Vengthlang Kohhran

Pavalai Pawl te chuan Sihphir Kohhran

Pavalai pawl te an rawn tlawh.


26th. Friday : YMA Environments & Forest Sub-Committee te chuan Sihphir School pathum heng :

 Higher Secondary School, Govt. High School, Govt. Middle

School-I te tlawhin ramngaw leh nungcha humhalh Awareness Campaign an

nei.


27th. Saturday : Sihphir Farming Cooperative Society te chuan Annual General Assembly YMA Conference hall-ah an hmang a, kum

2023-2028 chhunga hruaitu tur an

thlang nghal. 


28th. Sunday : Pentikost ni a ni a, tualchhung kohhran hrang hrang te chuan an hmang hlawm.


29th. Monday : Kumin hi Pu C. Lallianzuala leh Pi Vansangkimi, Kawnveng te inneih kum 25 na (silver jubilee, 20th. May, 1998) a ni a, thenrual tha te sawmin RT Resort-ah hlim takin an lawm.


30th. Tuesday : Hmingthansanga (Elli Illan), kum 65 h/o Lalremawii d/o RK Lalduha, Damveng, Sihphir atanga Israel pem hmasa ber chu cancer natna avangin Israel ramah a thi.  


31st. Wednesday : Inter Branch YMA Football Tournament khelh mekah Sihphir Branch YMA te chuan an khelh vawi thumna'n Darlung branch YMA chu Muallungthu khelmualah khelin penalty shoot hmangin an tlawm. Thawhtanni khan Sihphir Branch YMA team hian Piler leh Dinthar Branch YMA team chu an lo hneh tawh a ni.

Comments

Post a Comment

Popular posts from this blog

KUM ZA CHHUNGA MIZO HMEICHHIATE DINHMUN

 1. Tunhmaa an dinhmun : Kan pi pu te khan 'Hmeichhe finin tuikhur ral a kai lo', 'Hmeichhia leh uipui chu lo phun lungawi mai mai rawh se' tih leh 'Hmeichhe hna, hna ni suh, chakai sa, sa ni suh' tih te hi an ṭawng duh dan a ni a, hetaṭang hian hmeichhia te an dah hniam ṭhin zia a chiang viau awm e.  Nula in inleng a neihin an mi ngei zawng tak pawh ni se, biak chhiat an ngaitheilo a, ngaihtheih loh chu sawi loh, thianglo hialin an ngai a ni. Khawvar tirh aṭangin hna an ngah nghal hle mai a, tuichawi, buhden, ei rawngbawl, chawei siam leh a seng fel. An kuta awm vek a ni. Pi pute hunlai kha chuan an eizawnna hi a inang ṭhûma, lo neih a niin an feh tlut tlut ringawt mai ṭhin a, chuvangin, Mizo hmeichhia te chuan hetia'ng nikhua hian feh tur mamawh zawng zawng hi an tihtura ngaih vek a ni a, an emin an phurh vek a ngai bawk ṭhin. Mipa chuan iptepui an ak ve hram chauh a ni.  Feh haw'n kawngah lah hmeichhia chuan em khatin in lam mamawh an phur haw ...
Post a Comment
Read more

CHANCHINBU MAN KHAWN A HUN LEH DAWN TA

  Thlatina Inrinni hnuhnung ber hian chanchinbu man khawn a ni tlangpui a, thlathar Inrinni hmasa ber leh remchang danga khawn pawh kan awm zeuh zeuh bawk. Thla a lo tawp (Inrinni hnuhnung ber) leh takah hian chanchinbu man pek lamah tan i la teh ang u. Kan chanchinbu hi thla khat lak man cheng 30 kan ti a ni a, heti hian a mah leh a mah a intum tawk vel viau a ni. A man pawh a lut tha tlangpui a, a lawmawm. Chutihrualin, pek lam ngaihsak lutuklo kan awm leh zeuh thin erawh a zialo thin khawp mai. Chanchinbu hi naupang semtir thin a ni a, a man khawn thu-ah pawh anni hian an keng tlang mai thin. Naupang an nih avang tak hian thenkhat hian zahlo taka lo tawngkhum in 'min pe ngai silo a, a man khawn hre hlur ringawt mai' tih an hlawh fo niawm tak a ni.  Thenkhat chhiar duh si a man pe duh manglo te pawh an awm niin a semtute hnen atangin thu kan dawng fo. A zialo khawp mai. Tin, pe emaw intia pe silo te pawh a awm theih a nia. Naupang rilru thianghlim tak te an ni a, rilru sual ...
Post a Comment
Read more

BIBLE CHHIAR

Lehkhabu, a kawm dum, a changtupa thihna ‘Bible’ kan tih mai hi hi khawvela lehkhabu darh zau leh copy pawh tam ber a ni awm e.  He lehkhabu hi chatuan nunna kawng min kawhhmuhtu lehkhabu hlu tak a nih avangin chhiar ngei tur a ni a; a chhiar ve lo pawh chhiar tura in fuih a tul bakah hnam hnufual zawk te pawh chhiar tur chhawp chhuah sak theih hi a tul ngawt mai. Chutiang atana mi thahnemngai tlem azawng an awm pawh hi a tihzia e. Tunhma chuan nitina chhung inkhawm nei thin kan nia; (tunah erawh ‘tunlai chuan mihring kan tul tawh a’ tih chhuanlam tute zingah ka tel ve ta.) chu’ng lai chuan ka pa hian kumthar project-ah ka u hnenah Thuthlung Thar bu pumpui hi chhiar chhuak turin a tia;  kei Chanchin Tha bu li te, tin, ka naute pahnih chu Sam bu chhiar turin a ti bawk. Ka unau dangte khan ka pa  ngenna kha an ti hlawhtling ta em? ka hre ta chiah l’aw, kei erawh chuan ka tih hlawhtlin mai bakah Thuthlung Thar zawng zawng chu ka chhiar ta vek a, ka tui tak zel avangin Thu...
Post a Comment
Read more