Skip to main content

JUNE 2023, MIZO(RAM) DIARY

 


1st. Thursday : David Lallawmsanga c/o Laldawngliani, Sihphir leh Mary Lalchhuanawmi d/o PC Vanlalhruaia, Chhinga veng te chu Sihphir Venglai Presbyterian Kohhran Biak Inah an innei.


2nd. Friday : Health & Family Welfare Department hnuaia peng hrang hrang ten kum 2022-2023 chhunga hma an lak dan te Health Minister, Dr. R. Lalthangliana hovin DHME Conference Hall, Aizawl-ah an thlirlet. Minister chuan Department mi leh sa te chu an hna thawhna kawngah theihtawp an chhuah thin avanga lawmthu hrilhin, chutihrual chuan an thlen chin atanga hmasawn zel tu an nih thu a sawi bawk.

 

3rd. Saturday : 

Vaivakawn Auditorium-ah Hliappui Lal, Suakphunga Sailo Documentary chu Art & Culture Minister, Pu R Lalzirliana chuan a tlangzarh. Thu sawiin tlangzarhtu Minister chuan, documentary buatsaihtute chu fakawm a ti hle a; Zoram mipuite tan history pawimawh leh chhinchhiahtlak tak an hnutchhia a ni tiin an inpekna leh thawhrimna chu ropui a tih thu a sawi.


4th. Sunday : Ni hnih awh, Aizawl Hmar Presbytery hiamchhunga KTP meet vawi li na chu Sihphir Kohhranah neih a ni. He hunah huan speaker atan Revd.  Chuauthuama, Ramhlun vengchhak chu hman a ni.


5th. Monday : Chief Minister chuan

Sihphir a (Venghlun telin)   Agriculture Department hmalakna a siam kilometer 16.58 a thui, Agriculture Link Road 8 bakah tuikhuah 39 te chu Sihphir Kawnveng a Rohrenga Hall atangin a hawng. He hunah hian Agriculture Minister, Pu C. Lalrinsanga chuan Chief Minister hi a tawiawm. 


6th. Tuesday :

Airport road, Sairang, Sihhmui piah Tlawng lei aṭang lang phak lo deuh, Tlawng hnar lam Tatkawng li-ah Lawmsangzela s/o C. Thangkhuma, Nursery Veng leh Lalhmunsiami d/o Zonunsanga, Zonuam te chu an tlahlum.


7th. Wednesday : Saitual PS te chuan

Khawlianah Ganja Kg 10.75 chu

Taxi No. MZ 01H - 4784 atangin an man a, taxi driver Lalrempuia (38) leh a passenger pakhat chu an man nghal.


8th. Thursday :

Govt of India chuan AGMUT cadre IPS officer te awmna a thlak danglam a, Andaman and Nicobar Islands DGP,  Anil Shukla chu DGP Mizoram atan sawn a ni.   Hetih rual hian Mizoram DGP ni mek Devesh Chandra Shrivastava chu DGP of Andaman and Nicobar Islands-ah sawn a ni thung.


9th. Friday : Inter Branch YMA football tournament chu a hmawrbawk a ni ta. He hunah hian Venghnuai branch chuan final 1-0 in Tlangnuam branch chu hnehin an champion.


10th. Saturday : Venghnuai Branch YMA chuan YMA Day lo thleng tur pual leh LBS Suzuki Inter-Branch YMA Football Tournament Champion annih lawm nan thisen pek runpui an hmang a, thisen hi ZMC, Falkawn Blood Bank thawktuten an venga Rokunga Hall-ah an rawn laksak a ni. Thisen hi unit 62 pek niin mipa 48 leh hmeichhia 14 in an pe a ni.


11th. Sunday : Ni hnih awh, Bible Society of India Aizâwl Auxiliary inkhâwmpui lian (annual meeting) vawi 38-na leh lâwmthu sawina inkhâwm Aizâwl Khatla Presbyterian kohhran biak ina neih chu a ṭiak.


12th. Monday :

Mizoram State Chief Information Commissioner, Pu Lalnunmâwia Chuaungo chuan governor, Dr Hari Babu Kambhampati hnênah bânna a theh lût.


13th. Tuesday : Rângvamual rama  thlâm pakhatah Pu Lalrokima (42), Thêntlâng ruang chhe tawh tak hmuh a ni.


14th. Wednesday : Lawngtlai DC aiawhin Chawngte SDO Civil, Pu Lalneihthanga Colney chuan 11th CADC Executive Member atân mi pasarih: Kalasoga Chakma, Lakkhan Chakma, Sanjib Chakma, Santosh Chakma, Supan Chakma, Ananta Bikash leh Montu Chakma-te chu rinawmna thu tiamtîrin a la lût.


15th. Thursday : Mizorama tlâwmngai pâwl lian ber, Young Mizo Association (YMA) din champhaphâk vawi-88 na a ni a; Mizoram hmun hrang hrangah vântlâng tâna thil ṭha tih nân hman a ni.


16th. Friday :  Covid - 19 hri kai thar 2 hmuh chhuah niin mi 17 chhuahtîr an ni.


17th. Saturday :  Er. Lalrinawma, Minister leh Tuikum Bialtu MLA ni bawk chuan a bial chhung a Thentlang leh Sialhau te a tlawh a, khawtlang mamawh leh tulte khawtlang hruaitute nen an sawi ho. 


18th. Sunday : Sihphir Venglai Presbyterian Kohhran chuan tualchhung upa tur an thlanga, mi pali an dil laiin Pu H. Lalremruata chiah an thlang tling.


19th. Monday : Covid - 19 hri kai thar 7 hmuh chhuah an ni a, mi 15 chhuahtîr an ni.


20th. Tuesday :

Centrally Sponsored Scheme hnuaia Mizorama thawkte chuan Study Group on CSS Employee rawtna tihlawhtling tûra Mizoram

sawrkâr kar nân ni thum awh tûr badge dum an bel ṭan.


21st. Wednesday : 

Kum khat chhûng awh, Mizoram Legislative Assembly kum 50 tlin lawmna chu khar a ni.


22nd. Thursday : All Mizoram CSS Employee Co-ordination Committee te chuan Mizoram sawrkâr laka an thil phûtte leh hma lak zêl dân tûr chungchâng ngaihtuaha ṭhu khâwmin an lungâwi lohna lantîr mêkin rah ṭha a chhuah loh avângin badge dum bel chhunzawm zêl ni se, an ti.


23rd. Friday :   Mamit police-te chuan Mamit khaw luh dâwnah bolero pickup-a phurh heroin kg. 3.47; international market-a chêng vaibêlchhe 17.36 hu chu motor khalhtu, Mohammed Idrish Miah (36) leh Khugon Das (28) handyman, Tripura-te hnên aṭangin an man.


24th. Saturday :  Tv. Joseph Lalnunmâwia (18) s/o David Lallawmkima Bîlkhawthlîr chu Bîlkhawthlîr Kualmâwi vênga thîr ban an thlâk tûr electric-in a man a; damdâwi in panpui a nih hnûah a thi.


25th. Sunday : Baptist Church of Mizoram (BCM) te chuan Sunday School kum chanve exam an nei. BCM hnuaiah hian Puitling Senoir B te chuan ral chhan in exam hi an bei a, Senoir A, Intermediate Department leh Baptistma Zirlai naupang te chu ziak a an exam in Beginner atanga Junior Department naupangte chuan ka chhangin an exam thung.


26th. Monday :

Zosâp missionary, 

Pi Zomawii(Miss Joan Tailor Smith) kum 85, BMS Missionary Mizoram chhim lama Zosap lo chhuakte zinga mi chu Dunde-a Old-aged Home-ah a thi. Pi Zomawii hian kum 1977-ah Mizoram a chhuahsan a; 1994 khan Centenary chhimin a rawn chuangchhuak leh bawk.


27th. Tuesday : Mizoram Pradesh Congress Committee (MPYCC) huaihawtin CTI Sesawngah Martarte Lungphun kum 26-na champha hriatrengna hman a ni. Martar lungphunah hian Congress Legislature Party (CLP) Leader, Zodintluanga Ralte bakah MPYCC hruaitu hlui leh MLA ni mekten pangpar an dah.


28th. Wednesday : Forest Minister, T.J. Lalnuntluanga chuan Champhai Zotlang hmunhlui Botanical Garden-ah Nature Learning Centre (NLC) dinna tur lungphum a phum.Helai hmunah hian nikum khan  lungphum phum a lo ni tawh a ni. 


29th. Thursday : TATA SK 712 pro volleyball league 2023 hmeichhe final khelh a ni a, Luangmual VC te chuan Kanan VC te chu 3-0 (25-21, 25-12, 25-17)  a hnehin an champion.


30th. Friday : Remna ni a ni a, district tinah urhsun taka hman a ni. A hmanna pui ber Aizawl a Vanapa hall-ah chuan khuallian niin Chief Minister, PuZoramthanga ho a hman a ni.

Comments

Post a Comment

Popular posts from this blog

KUM ZA CHHUNGA MIZO HMEICHHIATE DINHMUN

 1. Tunhmaa an dinhmun : Kan pi pu te khan 'Hmeichhe finin tuikhur ral a kai lo', 'Hmeichhia leh uipui chu lo phun lungawi mai mai rawh se' tih leh 'Hmeichhe hna, hna ni suh, chakai sa, sa ni suh' tih te hi an ṭawng duh dan a ni a, hetaṭang hian hmeichhia te an dah hniam ṭhin zia a chiang viau awm e.  Nula in inleng a neihin an mi ngei zawng tak pawh ni se, biak chhiat an ngaitheilo a, ngaihtheih loh chu sawi loh, thianglo hialin an ngai a ni. Khawvar tirh aṭangin hna an ngah nghal hle mai a, tuichawi, buhden, ei rawngbawl, chawei siam leh a seng fel. An kuta awm vek a ni. Pi pute hunlai kha chuan an eizawnna hi a inang ṭhûma, lo neih a niin an feh tlut tlut ringawt mai ṭhin a, chuvangin, Mizo hmeichhia te chuan hetia'ng nikhua hian feh tur mamawh zawng zawng hi an tihtura ngaih vek a ni a, an emin an phurh vek a ngai bawk ṭhin. Mipa chuan iptepui an ak ve hram chauh a ni.  Feh haw'n kawngah lah hmeichhia chuan em khatin in lam mamawh an phur haw ...
Post a Comment
Read more

CHANCHINBU MAN KHAWN A HUN LEH DAWN TA

  Thlatina Inrinni hnuhnung ber hian chanchinbu man khawn a ni tlangpui a, thlathar Inrinni hmasa ber leh remchang danga khawn pawh kan awm zeuh zeuh bawk. Thla a lo tawp (Inrinni hnuhnung ber) leh takah hian chanchinbu man pek lamah tan i la teh ang u. Kan chanchinbu hi thla khat lak man cheng 30 kan ti a ni a, heti hian a mah leh a mah a intum tawk vel viau a ni. A man pawh a lut tha tlangpui a, a lawmawm. Chutihrualin, pek lam ngaihsak lutuklo kan awm leh zeuh thin erawh a zialo thin khawp mai. Chanchinbu hi naupang semtir thin a ni a, a man khawn thu-ah pawh anni hian an keng tlang mai thin. Naupang an nih avang tak hian thenkhat hian zahlo taka lo tawngkhum in 'min pe ngai silo a, a man khawn hre hlur ringawt mai' tih an hlawh fo niawm tak a ni.  Thenkhat chhiar duh si a man pe duh manglo te pawh an awm niin a semtute hnen atangin thu kan dawng fo. A zialo khawp mai. Tin, pe emaw intia pe silo te pawh a awm theih a nia. Naupang rilru thianghlim tak te an ni a, rilru sual ...
Post a Comment
Read more

BIBLE CHHIAR

Lehkhabu, a kawm dum, a changtupa thihna ‘Bible’ kan tih mai hi hi khawvela lehkhabu darh zau leh copy pawh tam ber a ni awm e.  He lehkhabu hi chatuan nunna kawng min kawhhmuhtu lehkhabu hlu tak a nih avangin chhiar ngei tur a ni a; a chhiar ve lo pawh chhiar tura in fuih a tul bakah hnam hnufual zawk te pawh chhiar tur chhawp chhuah sak theih hi a tul ngawt mai. Chutiang atana mi thahnemngai tlem azawng an awm pawh hi a tihzia e. Tunhma chuan nitina chhung inkhawm nei thin kan nia; (tunah erawh ‘tunlai chuan mihring kan tul tawh a’ tih chhuanlam tute zingah ka tel ve ta.) chu’ng lai chuan ka pa hian kumthar project-ah ka u hnenah Thuthlung Thar bu pumpui hi chhiar chhuak turin a tia;  kei Chanchin Tha bu li te, tin, ka naute pahnih chu Sam bu chhiar turin a ti bawk. Ka unau dangte khan ka pa  ngenna kha an ti hlawhtling ta em? ka hre ta chiah l’aw, kei erawh chuan ka tih hlawhtlin mai bakah Thuthlung Thar zawng zawng chu ka chhiar ta vek a, ka tui tak zel avangin Thu...
Post a Comment
Read more