Skip to main content

JANUARY 2023, KA DIARY

 


1st. Sunday : Chawhma, chawhnu leh zanah te kann inkhawm. Zanah hian Maawmi a inkhawmlo. Zanriah Ponty te unau hnihin an rawn ei.


2nd. Monday : Kumthar lawmna ruai siamnaah ka fatu. Ar leh sangha chu ka chanpual a ni. Chaw ei kham ka thut muan laiin Apa a nawmloh zual avangin min rawn ko chho. Durtlang damdawiin ah kalpui a ni a, test hrang hrang tih a nih hnuah an lo haw leh.


3rd. Tuesday : Kar hmasa lama ka hna, Pu Dingluaia huan sam chu ka han chhunzawm. Mamite an pu lungphun dawn avangin an lo chhuak.⁹/¹


4th. Wednesday : Pu Dingluaia huan ka han sam leh. Maawmi Pu Ruatkima lungphun naah a kal a, chaw a ei nghal. He diary (a bu pangngai) bu hi Rs 250/- in ka lei.


5th. Thursday : Pu Dingluaia huan ka han sam leh a, ka zo ta. Ka lawm khawp mai. Atei, Ahlui nen an lo chho. Atei hi Aizawlah ina lutloin a tlang. YMA Committee Member atâna ruatna lehkha ka dawng. A hmain WhatsApp atang chuan ka hre tawh tho na a.


6th. Friday : Au Zoliana tunu birthday vawikhatna a ni a, Chawhnuah kan nupain kan han kal ve a, kawr kan pe a, chaw kan ei ve nghal. Zanah Finance Committee te Committee roomah a kumina a vawikhatna atan kan nei a, Tamlo Veng vel ka bial dawn a ni. Chanchinbu buaipui a ngaih avangin ban hmain ka chhuak.


7th. Saturday : Conference hall-ah YMA kumthar duan Committee kan nei a, Library sub-comtt chairman atan min ruat leh a, Sangpuii, U Atea fanu chu Secretary a ni ang. A hma chuan Sangzeli a ni. Chuan, Venglai biakin bawr chu Ahlima nen kan bial dawn a ni. A hma chuan kan in bawr vel keimahin ka bial kha a ni a. Committee naah hian kum kalta chhunga Sawiremtlang chanchinbu man Rs 66,360/- chu President hnenah ka hlan a, thu tlem ka sawi nghal. Finance Secretary, Vansanglianan a phat avangin a thlak tu tur kan thlang a, H. Mera ka thlang a, Au a tling. Au a tlin leh avangin ka lawm hle. Committee naah hian zanriah kan ei nghal. Zanah ka inkhawm a, rawngbawltu hlann inkhawm chu bialtu pastor, C. Sapkaia chuan a hmang. Keipawh Finance Committee Member ka nih ve avang leh tantu liat a ka tel ve avangin ka tel ve a ni. Inkhawm ban hian krismas leh kumthar Committee chu Committee roomah kan nei a, kan hun hman tak te kan thlir let.


8th. Sunday : Chawhmaah Sunday School kan kal a, hming ziah thar ni a ni a, pawl no 5 naah Joseph Lalsangzuala pawlah ka awm. Senior department atangin mi engemawzat an rawn insawn chho a,  kaikim lawmman leh kai tha (vawikhat chiah kailo) sem a ni bawk. Chawhnu-ah Sihphir Kohhran biakinah kan pastor in bial thar a cawn dawn avangin thlah a ni a, ka han inkhawm ve. Hei vang hian Biakin khar a ni. Kam pastor hi Khatla ah a awm anga, synod hospital chaplain tanglai chuan min rawn bial thung ang.


9th. Monday : Tuizem lian zawk dahna ka siam tha. Zanah Ni Biaki damdawi in atanga lo chhuak chu kan zuk tlawh. Nikum lama ka article ziah, 'Thlawhnaa thlawh' tih chu ka ziak tha. Hei hi ka ziah lai ka tih bo avang a ni. Mami te chu an haw leh ta. ³/¹


10th. Tuesday : Loah zawngtah ka va lo. Arpu a mi, ST Thara (36) chu Silchar-ah a thi. A pa te khua, Selingah a ruang hi lak a ni ang. He thu ziah lai (mut dawn) hian ruang hi a lo la thlenglo a ni.


11th. Wednesday : Huan, November thlaa ka vag hmabak kha ka va vah chhunzawm. Zingkarah YMA Library OB te hmunhma enfelin kan hnatlang.


12th. Thursday : Huan ka va vat leh. Atei a lo chho. Pu Dingluaia huan ka sam man Rs 7,000/- a la a, ka lawm hle. Rs 5,000/- a inbia in hniam te min dil zawka, rin aia rei (ni 6) beicta kha ka ni si a.


13th. Friday : Zing dar thumah Angila a thi. Chawhma vuinaah ka kal a, zan thalai hunah ka kal leh bawk. Chumi hnuin Vansangliana dawrah YMA media sub-com te kan Committee a, kumin atana Sawiremtlang chanchinbu enkawl dan tur chungchang kan sawi. Editor atan min ruat leh a, joint editor -ah Vansangliana, Edy-a, Arema leh Mapuia te an awm anga, joint editor-ah Rinhlua, Mera, Ajona leh Venate awm thungin Manghaki chu circulation maneger a ni leh ang. Atei Aizawl a kal.


14th. Saturday : Huan ka va vat leh a, ka zo. Atei Bilkhawthlirah a chhuk.


15th. Sunday : Chawhmaah Sunday School kan kal. Pawl no 4 na Siamliana pawlah min sawn. Chawhnu-ah Sihphir Kohhran biakinah Pastor induction service hmannaah ka tel chho ve. Kan pastor thar tur hi Rev H. Lalzuiliana a ni. Synod Hospital chaplain tanglai a ni. Zanah khawhar inah ka kal. Angila kha YMA pui a nih angin dekchi, citation leh Rs 9,415/- in kan ral nghal. Lalrokima (39) s/o Ngurdawla, Tlangveng chu thawhah avangin Synod Hospital ah a thi.


16th. Monday : Forest department hnuaiah Sakawrhmuituai tlanngdungah meilam sialin ka inhlawh. Khawl a chhiat avangin chemin ka sam bakah midang samna ka thian bawk. Hlawh erawh a pangngai ja lak tho avangin ka lawm hle. Mahse, ka thawhpui pa Rema hian Rs 1,200/- a lo inchhiar avangin Rs 1,300/- ka la thin na a, 1,200/- chu ka la ve ta mai. Kohhran Year book a lo thleng. Arsi thawnthu by James Dokhuma ka chhiar tan. 


17th. Tuesday : Khawl axla thatloh avangin loah ka va feh tawp. Nimbu hmun ka sam.


18th. Wednesday : Khawl a that tak avângin Forest ah chuan ka han thawk leh. Ban hma deuhin khawl part dang a chhe leh. Mahse, kan bang zui a, ka lawm hle. Part leia Aizawl kal a ngaih dawn avangin Aute scooty ka hawn. Maawmi a pa dammloh avangin Bilkhawthlirah a chhuk.


19th. Thursday : Zingkarah electrict veng ah khawl part ka zuk lei. Tichuan, ka hna ngai ka thawk leh. Hna a laklawh deuh avangin extra kan thawk a, Rs 300/- min belhin Rs 1,500/- ve ve kan hlawh ta. Tichuan, nimin hlawh nen Rs 1,700/- ve ve kan la. Zing chaw leh tlai chu Ni Laite inah ka ei.


20th. Friday : Sakawrhmuituai ah ka han thawk leh. Ban dawn tepah khawl ngul a chhia. Hlawh ka la nghal. Maawmi a zin avangin chanchinbu chhutnaah ka kal lo.


21st. Saturday : Dawr ka nghak. Tlaiah Maawmi a lo haw. Tlaiah Nu Thangpuii a thi.


22nd. Sunday : Chawhma ah mitthi vuinaah ka kal a, zan thallai hunah ka kal leh bawk. KTP inkhawmpui kan kohhran in kan dawn avangin Sunday School a awmlo. Maawmi te thenawma Lalnghakliana te chu reksaw in an chesuala, a u pakhat a thi. 


23rd. Monday : Loah nimbu hmun ka va sam. Zanah thenawm Vanlalfela chu a OD. Ka hriat veleh ka phei ve nghal. Chuan, eitur vel kan buaipui zui a, zing dar thum velah ka haw.


24th. Tuesday : Mitthi in thingpui lumna velah ka buai. Zan thalai hunah ka kal leh bawk. Chawhn uah Thuampuiah pigded ka zuk lei. Tlaiah Maawmi Pari te inah a leng.


25th. Wednesday : Maawmi ten kohhran hmeichhe inkhawmpui liana bialin an rem tur hla zirin Neihbawi ah a kal avangin dawr ka nghak. Zan khawhar inah ka kal. Vanlalfela kha YMA a kan member pui a nih avangin dekchi, citation leh Rs 10,320/- in kan ral nghal. Kristian tlângau a lo thleng. JCa lu ka mehtir.


26th. Thursday :Loah zawngtah hmun ka va sam.


27th. Friday : Loah zawngtah hmun ka va sam leh. Zanah YMA Committee Rohrenga Hall, Twin Market ah kan nei. Hei vang gian chanchinbu chhutnaah ka kal lo.


28th. Saturday : UPHC-ah ha Doctor a lokal a, ka han inentir ve. X-ray ngai min ti. Chawhnu-ah Electrict vengah khawl Rs 8,400/- in ka zuk lei.


29th. Sunday : Chawhmaah Sunday School kan kal a, chawhnuah ka inkhawm leh bawk. Tlaiah YMA Hall-ah (Community hall) YMA OB te bakah sport sub-committee leh Library sub-comtt ten Library leh infiamna tura ruahmanna te kan en ho. Library hi sawn tumna a awm avanga tel ve kan ni a, thil ken tel a lo ngah deuh avangin a ngai angin kal leh rih mai se tih a ni. Zanah inkhawmloin Vanlalfela kan ral.


30th. Monday : Zing dar rukah Pi Rangchhingi a thi. Ka hriat veleh phei ve nghalin chawhma thingpui lumnaah ka va tel ve leh bawk. Vuizawh hma deuhin Rinpuii, ZMC a kal thalo avanga a thih avangin ka haw. Tichuan, Maawmi'n ruang a zui thla.


31st. Tuesday : Dawrah ka awm nileng.



Comments

Post a Comment

Popular posts from this blog

KUM ZA CHHUNGA MIZO HMEICHHIATE DINHMUN

 1. Tunhmaa an dinhmun : Kan pi pu te khan 'Hmeichhe finin tuikhur ral a kai lo', 'Hmeichhia leh uipui chu lo phun lungawi mai mai rawh se' tih leh 'Hmeichhe hna, hna ni suh, chakai sa, sa ni suh' tih te hi an ṭawng duh dan a ni a, hetaṭang hian hmeichhia te an dah hniam ṭhin zia a chiang viau awm e.  Nula in inleng a neihin an mi ngei zawng tak pawh ni se, biak chhiat an ngaitheilo a, ngaihtheih loh chu sawi loh, thianglo hialin an ngai a ni. Khawvar tirh aṭangin hna an ngah nghal hle mai a, tuichawi, buhden, ei rawngbawl, chawei siam leh a seng fel. An kuta awm vek a ni. Pi pute hunlai kha chuan an eizawnna hi a inang ṭhûma, lo neih a niin an feh tlut tlut ringawt mai ṭhin a, chuvangin, Mizo hmeichhia te chuan hetia'ng nikhua hian feh tur mamawh zawng zawng hi an tihtura ngaih vek a ni a, an emin an phurh vek a ngai bawk ṭhin. Mipa chuan iptepui an ak ve hram chauh a ni.  Feh haw'n kawngah lah hmeichhia chuan em khatin in lam mamawh an phur haw ...
Post a Comment
Read more

CHANCHINBU MAN KHAWN A HUN LEH DAWN TA

  Thlatina Inrinni hnuhnung ber hian chanchinbu man khawn a ni tlangpui a, thlathar Inrinni hmasa ber leh remchang danga khawn pawh kan awm zeuh zeuh bawk. Thla a lo tawp (Inrinni hnuhnung ber) leh takah hian chanchinbu man pek lamah tan i la teh ang u. Kan chanchinbu hi thla khat lak man cheng 30 kan ti a ni a, heti hian a mah leh a mah a intum tawk vel viau a ni. A man pawh a lut tha tlangpui a, a lawmawm. Chutihrualin, pek lam ngaihsak lutuklo kan awm leh zeuh thin erawh a zialo thin khawp mai. Chanchinbu hi naupang semtir thin a ni a, a man khawn thu-ah pawh anni hian an keng tlang mai thin. Naupang an nih avang tak hian thenkhat hian zahlo taka lo tawngkhum in 'min pe ngai silo a, a man khawn hre hlur ringawt mai' tih an hlawh fo niawm tak a ni.  Thenkhat chhiar duh si a man pe duh manglo te pawh an awm niin a semtute hnen atangin thu kan dawng fo. A zialo khawp mai. Tin, pe emaw intia pe silo te pawh a awm theih a nia. Naupang rilru thianghlim tak te an ni a, rilru sual ...
Post a Comment
Read more

BIBLE CHHIAR

Lehkhabu, a kawm dum, a changtupa thihna ‘Bible’ kan tih mai hi hi khawvela lehkhabu darh zau leh copy pawh tam ber a ni awm e.  He lehkhabu hi chatuan nunna kawng min kawhhmuhtu lehkhabu hlu tak a nih avangin chhiar ngei tur a ni a; a chhiar ve lo pawh chhiar tura in fuih a tul bakah hnam hnufual zawk te pawh chhiar tur chhawp chhuah sak theih hi a tul ngawt mai. Chutiang atana mi thahnemngai tlem azawng an awm pawh hi a tihzia e. Tunhma chuan nitina chhung inkhawm nei thin kan nia; (tunah erawh ‘tunlai chuan mihring kan tul tawh a’ tih chhuanlam tute zingah ka tel ve ta.) chu’ng lai chuan ka pa hian kumthar project-ah ka u hnenah Thuthlung Thar bu pumpui hi chhiar chhuak turin a tia;  kei Chanchin Tha bu li te, tin, ka naute pahnih chu Sam bu chhiar turin a ti bawk. Ka unau dangte khan ka pa  ngenna kha an ti hlawhtling ta em? ka hre ta chiah l’aw, kei erawh chuan ka tih hlawhtlin mai bakah Thuthlung Thar zawng zawng chu ka chhiar ta vek a, ka tui tak zel avangin Thu...
Post a Comment
Read more