1st. Wednesday : MZP chuan January thla ral hmaa Mizoram Subordinate Services Selection Board (MSSSB) Chairman, Pu Ramhmangaiha Râlte bân tûra sawrkâr an phûtna a hlawhtlin loh avângin MSSSB chairman pisa kai tûr dan tumin Mizoram Secretariat kawtah an pung khâwm.
2nd. Thursday : JH Lalhmangaiha (34), Champhai chu an chênna inah elhbun silaiin a inkâp hlum.
3rd. Friday : Champhai police leh 42nd Assam Rifles Joint Operation team-te chuan Mualkâwi-a lîrthei an endikna lamah heroin gram 119 (hâwng 9), international market-a chêng nuai 59/- chuang man chu Zokhawthar atanga Champhai pan mêk atangin an man a, a khalhtu, Vânlalchâma (36), Khâmrâng, chu an man nghal.
4th. Saturday : Pu R Lallungmuana (56), Saitual Vênglai chu an in rel aṭangin a tla a; Aizâwl panpui a nih hnûah Ebenezer Hospital-ah a boral.
5th. Sunday : Excise & Narcotics department (END) chuan Bawngkawn (Lunglei Road)-ah heroin gram 503 (hawng 39) an man a; a neitu-a puh mi pathum - Z Rozampuii (22) d/o Z Lalhumhima leh C Malsawmdawngliana (20) s/o C Lalhlimpuia, Lunglei Ramthar Veng ve ve nia inchhál leh, Lallawmzuala (27) s/o Thankhara, Lunglei Luangmual nia insawite an man nghal.
6th. Monday : Melthum dai-ah tu tih hriatloh hmeichhe ruang chhar a ni.
7th. Tuesday : Tuirial Hydel Project a ram laksak leh zangnadawmna chungchangah mi 6 thiam loh chantir an ni.
8th. Wednesday : Assembly session neih mekah Deputy Speaker thar atan Lawngtlai East Bialtu MLA, H. Biakzaua chu thlan a ni.
9th. Thursday : Aizawl West III bialtu MLA, VL Zaithanzama chuan Khatla-a Motherless Babies'Home tlawhin tanpuina sumfai, Rs.2,00,000/- a hlan.
VL Zaithanzama chuan, “Aizawl West III huamchhunga zirna in hrang hrang - Health Department hnuaia Sub Centre leh Clinic bakah sawrkar hnuaia veng mipui tana din hmunhmate kan tlawhchhuak thawkhat tawh a, hmalak zelna tur tam tak awm karah veng bil ni lo, ram pum huap pawha langsar leh hmingtha, mite thinlung khawihtu - Motherless Babies'Home tana kan luangchhuak leh thei hi ka lawm takzet a ni. MLA Fund atanga tanpuina leh hmasawnna tur kan kalpui mek hi he Home hian tangkai takin hmang se tih hi ka duhthusam a ni,” a ti.
10th. Friday :
Assembly Session neih meka zawhna leh chhanna hunah member te zawhna leh zawh belhna te chhangin Education minister, Lalchhandama Ralte chuan, Academic session thar 2023-24 atangin Mizoramah sawrkar enkawl school-ah uniform inang tlang hman a nih tawh tur thu a sawi.
11th. Saturday : Zote Entertainment buatsaih, "AMAWII" film chu Vanapa Hall-ah Minister, Pu Robert Romawia Royte chuan a tlangzarh.
AMAWII hi chhungkaw pahnih, in ang lo tak, zu vanga buaina an tawh dan te, khawtlang leh thlarau nun thlenga a nghawng nasat theih zia pholanna a ni a, thil thleng tak tak behchhana siam leh buatsaih a ni.
12th. Sunday : Tunkar Zirtawpni atanga tan, Presbyterian Kohhran hnuaia Pastor Bial hmeichhe inkhawmpui chu a tiak.
13th. Monday : Chief Minister, Pu Zoramthanga chuan kum 2023-'24 tangka kuma Mizoram sum ruahman cheng vaibelchhe 14,209/- leh nuai 95 chu Assembly-ah a pharh.
14th. Tuesday : Chief Minister, Zoramthanga chuan Airtel 5G Plus Services chu a tlangzarh. Tlangzarh inkhawm hi CM office conference Hall-ah neih a ni.
15th. Wednesday : Champhai Kanan Veng a cheng, Pi Lalpari (46) chu a pasal hlui, Lalropianga (43) chuan an chenna inah ulhbun silaiin a kaphlum a, a kaptu hi a tlanbo nghal.
16th. Thursday : Mizote zinga football a thleng sang leh hlawhtling ber te zinga mi Jeje Lalpekhlua, Hnahthial chuan a hliam a dam chian theihloh vangin football a chawlhsan thu a puang. Aijal club a farewell programme hman hi LPS leh ZONET techuan LIVE in an pe chhuak a, Pu Lalnghinglova Hmar, Honorary Secretary chuan thlahna thu sawiin AIFF president, India captain,
Abhisek Bachan,
Chief Minister leh
Sports Minister te chuan video hmangin duhsakna leh thlahna thu an sawi chu tihlan a ni bawk.
17th. Friday : Sawrkar laipuia Telecommunications Ministry enkawltu, Minister of State, Pu Devusinh Chauhan chuan Helicopter-in Serchhip a tlawh.
Minister hian Serchhip district chhunga sawrkar laipuiin hmasawnna hnathawh a kalpui mekte a mit ngeia a hmuh thu leh heng hnathawhte hi tha taka tihhlawhtlin a nih chu an duhthusam a ni tih sawiin, an duhkhawp lohna laite leh tan lak ngai laite a awm a nih chuan a hnena thlen turin official kalkhawmte a chah.
18th. Saturday : Emmanuel Lalbiakzauva, Ramhlun North-a khawsa mek chuan Republic Veng Kawipui bula ATM booth chu bomb hmangin a ti chhia. Pawisa erawh a la theilo hlauh.
19th. Sunday : Lunglei Police te chuan heroin engemawzat leh a neitu a puh, Lalhruaitluanga (26), Lalnunmawia (22) leh kumtlinglo pakhat, Zawlpui khua leh tui nia inchhal te chu an man.
20th. Monday : Mizoram State Day a ni a, Mizoram hmun hrang hrangah hman a ni. A hmanna pui ber, Aizawla Vanapa Hall-a hmanah chuan Chief Secy., Dr. Renu Sharma-i’n a kaihruai a. Mizoram Kohhran Hruaitute Committee Chairman, Rev. Dr. C. Chawnghmingliana’n hunserh hmangin Chief Minister, Zoramthanga leh NGO Co-ordination Committee Chairman, Central YMA President, Pu Lalngheta te’n thu an sawi.
21st. Tuesday : Pachhunga University College chuan an college Lecture Hall-ah Pianpui Tawng Ni (International Mother Languge Day) an hmang.
He hunah hian Remlalthlamuanpuia, Asst. Professor chuan Pianpui tawng ni thupui 'Multilingual education - A nescessity to transform education' tih chu sawiin, 'Tawng chu hnam nihna (identity) kengtu a ni a, hnam nunphung
(culture) nen a inzawm a, Mizo tawng chu Mizo hnam nihna pawimawh tak a ni," a ti.
22nd. Wednesday : Zoram Medical College Doctor te chuan phir, an taksa a inzawm "conjoined twins" chu an zai hrang. Vanduaithlâk takin pakhat zawk erawh a hnu deuhah a boral. ZMC doctor ten phir inzawm an zai hran takte hi tunthla, February ni 9 khan Lawngtlaiah an piang a ni.
23rd. Thursday : Mizoram Police hnuaia Seling Police Out Post staff-te chuan lirthei pahnih - Lalsiamtluanga (kum 32) s/o Sangrohnuna leh Lalthangliana (kum 26) s/o Lalfakmawia, Chhungte, Champhai District ve ve nia inchhalte khalh atangin kuhva ro bag 75 (kgs. 6,000 vel) an man. Kuhva rah hi Aizawla phurh thlen tum nia hriat niin, dan anga hma lak zel turin Superintendent, Custom Preventive Force, Seling, Aizawl District-ah hlan a ni.
24th. Friday : Saitual Police te chuan Khanpui Branch YMA atanga an thudawn bawhzuiin kuhva rah, bag 140 (Kg 11200) lirthei pali - 1) TATA 407 Truck, Vanlalnunchhana (23), Champhai Vengsang nia inchhal khalh, 2) TATA Yodha Pick-up, Lalchhuana (30), Zemabawk, Aizawl nia inchhal khalh, 3) SML, Lalhmingsanga (26), Hmunhmeltha nia inchhal khalh leh 4) 207, Lalawia (57) of Kawnpui nia inchhal khalh hnen atangin an man.
Heng an kuhva rah man hi an hralh leh na tur rate anga chhutin Rs.7,28,000/- man hu nia ngaih a ni a, kuhva rah man te leh lirthei te hi Superintendent, Custom Preventive Force, Seling, Aizawl District hnenah dan anga hmalak zui turin hlan nghal a ni.
25th. Saturday : Lengpui Model Branch YMA kum puan committee te chuan report an dawn bawhzuiin, Lengpui ram chhung an enfiah na lamah Myanmar atanga tawlh ruk, foreign cigarettes tam tham tak an man.
26th. Sunday : Chawnpui veng a Pu Lalhmunsanga (Pu Kawnga) Excise Commissioner (Retd) Garrage hlui, hnamdang luah thin Assam type chu a kang a, car pakhat leh bike pahnih kang chhe vekin in dang a kan kai hmain an thelh mih a ni. In hi thingzai hlui vel dahkhawmna a ni a, mihring luah lai a nihloh avangin engvanga kangmei hi chhuak nge tih hriatchian theih a ni lo.
27th. Monday : Mizoramah Covid-19 sample 2 test a ni a, Covid-19 positive pakhat hmuh a ni leh ta hlauh mai. December ni 12, 2022 hnu lama Mizoram a Covid-19 positive hmuh leh hmasak ber a ni.
28th. Tuesday : February 6, 2023 a Melthum dai a ruang chhe tawh tak an chhar, a chhungte'n (a nuṭa ngeiin) Zahleipari (Kum 28) ngei a ni an tih avanga February 9, 2023 a Lawngtlai thlanmual a vuiliam chu , Zahleipari a ni lo tih hriatchhuah a ni.
Comments
Post a Comment