JUNE 2022, MIZO (RAM) DIARY

 

1st. Wednesday : Ni thum awh tur ‘Horticulture Fair 2022’ chu Aijal Club Park-ah Chief Minister, Zoramthanga chuan a hawng.  

2nd. Thursday : Doctor, Linda Lalbiaknungi, Sialsuk damdawi ina thawk lai chu damlo te laka mawilo taka a chet avangin R. Lalramnghaka, Secretary, Health and Family Welfare Department chuan suspend na order a ti chhuak. 

3rd. Friday : Exise Minister, Dr.K.Beichhua chuan NABARD RIDF XXIV kaltlanga sak, District Veterinary Hospital, Kolasib hawnga a kalnaah tunhnaia Millenium Centre a Grape Wine an man chhan chu tawngtai miten Chief Minister hnena an thlen vang a nih thu a sawi.

4th. Saturday : CID (SB) Ops team-te chuan  Sateek khaw daiah heroin, sahbawn bawm 17 a thuhruk, grams 222 a rit, international market-a cheng nuai 111/- vel man hu chu, Lalhruaitluanga (25) s/o Dailova, Lunglei venglai leh Vanlalruata (27) s/o Doliana, Electric veng, Lunglei te kut atangin an man.

5th. Sunday : 44th National Arm Wresling Championship 2022,Telangana state a khelh zawh takah 80kg huanga khel, Denie Lalruattluanga ITI chuan Gold medal a la a, category tina champion theuh ten an khelh thin,   Champion of the champions-ah a champion leh bawk. 

6th. Monday : Exise & Narcotics Department chuan May ni 27 a khawchhak lama greep atanga siam uaiin an man chungchangah  thuchhuah siamin,  Aizawl khawpui hmun lun laia dawr thenkhatah ualau takin zu leh a kaihhnawih zuar an awm tih report dawn a nih angin, Exise & Narcotics Department chuan hma an la, tih tarlangin an hmalaknaah heng zu leh a kaihhnawih chi hrang hrang an man te hi tuna Mizorama Zu khuahkhirhna Dan hman mek, The Mizoram Liquor (Prohibition) Act 2019 ang chuan khap vek leh man theih vek an ni, an ti a. Hetiang laka inthiarfihlim theuh turin mipuite an ngen bawk.

7th. Tuesday : Tuirial Tlang venga Pi Thlahhniangi In, Assam Type chu bungraw chuh hman lohin a kang ral. In kan lai hian Pi Hniangi te chhungkua hi an awm lo va, a kan chhan hriat ani lo. 

8th. Wednesday : New Champhai kawna Zodailova Kawlni inchung berah bomb a puaka, he bomb puak avang hian Zodailova nupui, K.Lalzawmpuii(55) chu a boral. Thudawnna in a tarlan danin nunna chan ta K.Lalzawmpuii hi rilru lama harsatna nei a ni a, bomb a puah lai hian a mah chauh inah a awm a, a pasal hi a zinchhuah lai a nih bawk avangin bomb hi ama tihpuah a nih rin a ni.

9th. Thursday : Tun hnaia Sialsuka vanduaina tawh avanga Sialsuk doctor suspend takna leh mite lâinat hlawh tak, May 13, 2022-a boral Pu Lalrengpuia nupui, Pi Sangthanṭhuami (Mami) chu Aizawl S-III MLA, Dr. Lalnunmawia Fanai chuan a ral.  

10th. Friday : Kar kalta Thawhlehni, May 31, 2022 atanga chin hriat lohva bo, Pi Famthluaii, kum 67 mi, Vawmbuk khua chu thia hmuh a ni. 

11th. Saturday : June 16-22, 2022 chhunga National Muaythai Championship 2022 Dewas, Madhya Pradesh-a khelh tura tel turin Mizoram Muaythai Team te chuan Mizoram an chhuahsan. Mizoram aiawh turte hi players 10 niin Ramhlun Indoor Stadium-ah hun engemawchen training an nei a ni.

12th. Sunday : Excise & Narcotics Department chuan Ngur Road, Champhai District-ah Heroin gram 142 (Hawng 11) leh a neitu nia puh mi pahnih – Tinsianngaihi (25) Bethel veng, Champhai leh Lalnunmawia (25) Rangvamual, Aizawl nia inchhalte chu an man bawk.

13th. Monday : Union Cabinet Minister for Fisheries, Animal Husbandry & Dairying, Parshottam Rupala chuan Mamit DC Conference Hall-ah Mamit khawpui chhunga Sorkar Official te leh Central Scheme hrang hranga hamthatna dawngtute a kawm. Thutkhawm hi District Bawrhsap Lalnunhlua'n a kaihhruai.

14th. Tuesday : Mizoram Rajya Sabha MP, K. Vanlalvena chuan Zophai-a Mizo IR Camp leh Rail Station a buhfai unload chungchanga FCI in harsatna a tawh thin te a hmunah a enfiah a, IR Camp-ah hian an Commander Inspector, F. Tlanghmingthanga'n lo dawngsawngin ramri bulhnaia Mizoram Police duty te mamawh leh tul dangte a sawipui.

15th. Wednesday : YMA day a ni a, Chief Minister, Zoramthanga chuan chhunah Zembawk leh zanah Thuampui-ah te a hmanpui.

16th. Thursday : Mizoram sorkar chuan Mizoram Public Service Commission (MPSC) chairman atan JC Ramthanga, IAS (Rtd) a ruat thar tih DPAR secretary, K Lalthawmmawia chuan hriattirna a tichhuak. JC Ramthanga hian thla khatah Rs 2,25,000/- leh hamṭhatna dangte a la dawn a ni.

17th. Friday : Raj Bhavan-ah Governor, Hari Babu Kambhampati leh Pu Ravideep Singh Sahi, IGP, Tripura Sector, CRPF te an inkawm a. He hunah hian Mizoram chhunga CRPF hnathawh leh mipui vantlang tana an luanchhuah chungchangte an sawi dun.

18th. Saturday : Mizo ten'a professional boxer kan neih that zinga mi, Professional Boxing a luhchilh hnua hneh loh la tawng lo, NT Lalbiakkima leh Tuipui tlangval, Professional boxing a luhchilh hnua hneh loh la tawng lo ve bawk, Laldingliana te chuan Dubai-ah inkhel hmuhnawm tak an khel a, NT-a hian a tumpui pa, Philippines mi chu hnehlo in Laldingliana leh Kazakstan mi chu a khelhpui pa in dan a bawhchhiat avangin inkhel lo (no contest) anga puan a ni thung!

19th. Sunday : Mizoramah ruah a la sur chhunzawm zel dawna hmuh a nih avangin Mizoram sorkar chuan Mizoram pumah June 20 & 21 (Thawhtanni leh Thawhlehni) sikul chawlh (pawl 12 chin hnuai lam) a puang. 

20th. Monday : Congress thalai bultumin Congress party mite chu health care bill ba zawng zawng July 20, 2022 hmaa pek phutin CM pisa tualah an pungkhawm. CM hmuh an tum a, security lamin an dang. An hruaituten CM laka an thil phut hrang hrangte CM Secretary hnenah an hlan.

21st. Tuesday : Kolasib Sports Stadium, Project Vengah Mizo Professional Footballers Association leh Kolasib DFA XI ten Charity Match an khel a, 3-3 in an inhnehtawk.

22nd. Wednesday : Cooperation Department Minister, Pu C.Lalrinsanga chuan Mizoram Cooperative Fish Farming Marketing and Processing Federation Limited (ZOFISFED) General Assembly vawi 18-na-ah khuallian niin, Hawla Indoor Stadium, Republic Vengah a hmanpui. Minister Pu C. Lalrinsanga chuan, "Mizoram chhunga sangha a intodelh piah lamah state danga thawnchhuak thei tura tan lak bakah rinawmna, taimakna leh cooperative society inthurualna a pawimawh a ni," a ti. 

23rd. Thursday : PHE Department chuan Berawtlang Multipurpose Hall-ah  department hnathawh thlir lètna an nei a, he hunah hian Dy. Chief Minister Pu Tawnluia PHE changtu ni bawk chuan department in tui bill tihpun chungchang chu chu thil tih àwm tak a nih thu a sawi.

24th. Friday : Chalbawiha Junction, Khankawn Police Checkgate duty te chuan Heroin gram 26, international market-a cheng nuai 13/- man hu,  Niangsanluni (44) w/o Rothlengliana, Khawmawi, Myanmar kut atangin an man.

25th. Saturday : Champhai District Football Association buatsaih, Upa C. Keikhuma Memorial Inter Village Football Tournament  Chhangphut Field a khelh mek chu a hmawr bawk (final) a ni ta a, final ni hian Melbuk chuan Zokhawthar chu 3-0 a hnehin an champion.

26th. Sunday : Tun hnaia kan ram thenawm mai Silchar, Assam leh a chhehvela mipuiten tui lian nasa tak an tawrh avanga tuithianghlim in tur an tlakchham nasat zia hriain Central YMA chuan tui thianghlim (Package drinking mineral water) Litre 15,000 zet mai chu City Park kawt atangin Silchar lama phurh thlak turin Central YMA President Pu R. Lalngheta'n a vai liam.

27th. Monday : 23rd. Sector Assam Rifles chuan Aizâwl Chawlhhmun vêngah ruihhlo, methamphetamine mûm 58000; ₹ vaibêlchhe 1 leh nuai 74/- man an man.

28th. Tuesday : Champhai police te chuan Tlangsama LPK Truck an endikna atangin kuhva rah ro bag 70 hi an mana, heng kuhva rah te hi tun hnaia Myanmar atanga lakluh ni lovin a neituten an kudam a that loh avanga hmundanga an dahsawn tur a ni a. Champhai police te hian kuhva rah an mante hi dan anga hmalakna chhunzawm zel turin Custom Department ah an hlan.

29th. Wednesday : International Day against Drug Abuse & Illicit Trafficking chu Aizâwlah Chief Minister, Pu Zoramthanga hova hman a ni.

30th. Thursday : Mizoram pumah Remna Ni vawi 36-na pualin hun hman a ni.