1st. Friday : 'A nuam awm vei' tih hla hmanga Mizote min awitleitu, Lalengmawia, Zonuam chu lei cancer avangin Civil Hospital-ah a boral.
2nd. Saturday : Central YMA leh PHED ṭang kawpin a buatsaih, Tlawng lui fintu lui then fai hnatlangpui chu group hrang hrang 11-ah inṭhen darhin thawh a ni a. Deputy Chief Minister, Pu Tawnluia chuan hnatlanga thawkchhuak tur te hi Vanapa Hall kawt atangin a vailiam.
3rd. Sunday : Health Sunday leh Hospital Sunday a ni a, Presbyterian Kohhran chuan chawhnu-ah Health leh zanah Hospital Sunday angin an hmang.
4th. Monday : BJP, Mizoram Pradesh president, Vanlalhmuaka chuan sorkar laipuia Road Transport & Highways minister, Nitin Gadkari chu a chennaah a kâwm a, Mizorama NHIDCL hnuaia kawngpui siam hna thawh mek chungchang a sawipui.
5th. Tuesday : Tv Lalnunkima (19), s/o Lalhlupuii, Bilkhawthlir, June 26 a bike accident avanga hliam tuar chu Synod Hospital-ah a boral. Lalnunkima chuanpui pa hi an chetsual na hmunah hian a boral nghal a ni.
6th. Wednesday : Mizoram-a hmeichhia te insuihkhawmna pawl lian ber, Mizo Hmeichhe Insuihkhawm Pawl (MHIP) chuan an pawl dinchampha vawi 48-na chu hmun hrang hrangah an lawm.
7th. Thursday : Chief Minister hlui leh MNF Founder President, Pu Laldenga (L) thih champha vawi 32-na a ni a, he ni pual hian a thlan, Aizawl Treasury Square-ah MNF President leh Chief Minister, Pu Zoramthanga hovin Pu Laldenga zahna chibai an buk a, a thlanah pangpar an dah a, inkhawm tawi program an hmang bawk. Pu Laldenga hi kum 1986 khan Mizoram sorkar lailawk (interim)-ah Chief Minister a ni a, kum 1987-a Mizoram state Assembly inthlan hmasa berah Sateek leh Aizawl North-II bial aṭanga thlan tlin a ni a, state nih hnua Chief Minister hmasa ber a ni.
Kum 1990 khan Cancer a nih hriatchhuah a ni a, Memorial Sloan Kettering Cancer Centre, USA-ah thla thum enkawl a nih hnuin Mizoram pana an haw kawng, Ashford Hospital, London-ah July 7, 1990, India sanaa tlai dar 2:30-ah a thi. Pu Denga ruang hi July 11, 1990 tlai dar 4:30-ah Tuirial Airfield-ah helicopter-in phurh thlen a ni a, July 13-ah vui niin, Mizote zinga state funeral-a vui awm chhun a la ni.
8th. Friday : Kawnpui a Awithangpa Hall-ah Kawnpui Field No 2 tihzauh leh Phullem phah hna tanna tur lungphum chu Sports Minister, Pu Robert Romawia Royte-in a phum a, Tuirial Bialtu MLA, Pu K. Laldawngliana, Pu TC Pachhunga, SEDP (Tourism and Sports) Board Vice Chairman leh mi pawimawh dangten Sports Minister hi an tawiawm.
9th. Saturday : Thangkura Drama Party member hmasa ber te zinga mi, Thangkura bialnu Zohopi lema chang thin, K. Lalchhanhima (68), f/o Lalramdinfela, Ramthar veng chu LRM Hospital-ah a thi.
10th. Sunday : School Education Secretary, Dr Lalzirmawia Chhangte, Pu Lalhmachhuana State Project Director Samagra Shiksha leh Federation of Mizoram Samagra Employees (FEMSE) hruaitute an inbia a. FEMSE hruaituten naktuk ațanga pendown strike neih an tum chu an thulh. FEMSE hian an hlawh tihpun leh dinhmun țha zawk sorkarah an dil a, tun hnaia cabinet meeting-ah an dinhmun remtihsak tura an beisei chu ngaihtuah a nih hnuah siamțhat ngai tlem a awm avangin ngaihtuah țhat leh tura dah a ni a. An lungawi lo hian badge dum an bel hnuah naktuk ațanga pendown strike neih an rel a ni.
11th. Monday : LBS Suzuki All Mizoram Inter Village Football Tournament khelh mekah inkhel pahnih awmin Armed Veng South in Bungkawn te 6-0 in an hneh a, Ramhlun North LC in 3-1 in Thenzawl West VC an hneh bawk. Heti hian team 204 atangin quarter final lût tûr te chinfel a ni ta a ni.
12th. Tuesday : Phaisenah in pahnih, bungraw chuh hmanlohin a kang ral.In kangte hi Pi Zamveli leh Pu Vanlalliana in te a ni a, thi leh hliam an awm lo. Current kal sual avanga kangmei hi chhuak a nih rin a ni.
13th. Wednesday : Lawngtlai bawrhsap, Amol Srivastava hovin Lawngtlai khawpuia faina leh thianghlimna kawnga hmalakna tur leh leilung leh boruak humhalh kawnga hmalakna tur te a kaihhnawih sorkar lam mi pawimawhte leh tlawmngai pawl aiawh te nên sawiho a ni.
14th. Thursday : Banker’s Institute of Rural Development (BIRD), Kolkata leh Mizoram Rural Bank (MRB) tangkawpin MRB hnuaia officer-te tana ni thum chhung awh tur training an buatsaih chu neih tan a ni. Training hi MRB Head Office, MINECO-ah neih a ni.
15th. Friday : Health minister, Dr R. Lalthangliana chuan, district hrang hranga DC, chief medical officer leh Information & Public Relations officer-te internet kaltlanga thil pawimawhte a sawipuinaah
sorkar laipuiin India ram zalenna kum 75-na pualin kumin July 15 aṭanga September 30 inkarah kum 18-59 inkarte hnenah a thlàwna Covid-19 vaccine precaution dose pek rûnpui, Covid Vaccine Amrit Mahotsava a puang tih a sawi.
16th. Saturday : Mizoramah a vawikhatna atan Trinity Hospital, Silaimualah lung zai (Heart Surgery) hlawhtling takin neih a ni. Dr. Rahul Chandola, Cardio Thoracic and Vascular Surgeon (CTVS) (Super Specialist) leh a team ten lung natna nei; mipa, kum 59 mi chu zaiin, Heart Bypass Surgery chi khat : Coronary Artery Bypass Graft Surgery hlawh tling takin an tih sak.
17th. Sunday : Sairang police-te chuan Sairang Dinthara Zonunsanga (33) s/o RK Rodingluaia, Luangmual, Aizawl kudam aṭangin sap zú úm 22 leh beer úm 144 an man. Zu leh beer mante hi Rs 39,316/- man hù a ni.
18th. Monday : Ram chhung hmun dang rualin Mizoramah India President 15-na tur thlanna chu Mizoram state Legislative assembly house-a Committee room-ah neih a ni a, MLA zingah Aizawl South II MLA, Pu Lalchhuanthanga'n vote a thlak hmasa ber a, MLA 40 te hian vote an thlak vek a ni. Hetih rual hian MP pahnih te chuan Delhi lamah vote hi an thlâk thung.
19th. Tuesday : LBS Suzuki All Mizoram Inter Village Football Tournament khelh mek chu an hmawr bawk (final) a ni ta. Final-ah hian Champhai Kanaan VC leh Sialhawk V C te chu intumin Champhai Kanaan lam hian 2-0 in hnehna hlu tak an chang.
20th. Wednesday : Mizo Idol Season 7 chu Elimination Round hmangin tan a ni ta. Elimination Round hi District hrang hrangah neih tura ruahman a ni a, Champhai District-ah bul hi tan a ni.
21st. Thursday : MHIP General Headquarters kum 2021-2025 chhung hruaitu tur thlanna Vanapa Hall-ah neih a ni a. MZP General Headquarters President, Pu Lalnunmawia Pautu chuan Returning Officer niin inthlan a kaihruai a, MZP mi leh sa te chu Polling Officer niin inthlan an buaipui bawk. President atan Pi Ngurmawii Sailo w/o Dr. R. Lalthangliana, Minister thlan a ni.
22nd. Friday : Chakma Autonomous Dist. Council hnuaia development fund cheng nuai 1,371,147/- hman dik loh thubuaiah Special Court Judge, Pu Vanlalenmawia chuan thutlukna a puang. Hetah hian khatih laia district Council member 13 te chu Special Court, Prevention of Corruption Act-in thiam loh a chantir a, an zingah hian tuna BJP MLA nilai, Dr BD Chakma a tel.
23rd. Saturday : Maruti Suzuki Arena showroom, Edenthar, Aizawlah zirlai beiseiawm rualin Mizorama hralh chhuah turin car hriat hlawh tak Brezza an khuh hawng. Khuhhawngtu te hi Mizoram board hnuaia High School Leaving Certicate (HSLC) 2022 exam-a 10-na chin, mi 14-in an ni a, mi 51 zetin an hauh lawk nghal.
24th. Sunday : Dicipleship Traning Institute, Sihphir te chuan tualchhunga awm, Sihphir Venglai Presbyterian kohhran an tlawh. He hunah hian director, Rev Zaidarhzauva chuan Pathian thuchah sawiin traning lai ten China tawngin fakna hla an puangchhuak bawk.
25th. Monday : July ni 22, 2022 a thiamloh chantir tawh, MLA, Dr. BD. Chakma leh midang 12 te chu, Special Judge (PC Act) chuan hremna puangin, kum 1 chhung jail tang tur leh Rs. 10,000/- theuh chawi turin a ti a, hetihlai hian thiamloh chantir mi 13 te hi bond sign tir an nih hnuah bail a chhuah an ni.
26th. Tuesday : Aizawl Local Council leh District hrang hrang Village Council By-election neihnaa hman tur Draft Roll tarchhuah a ni.
27th. Wednesday : Fire & Emergency Services te chuan an department din champha kum 50-na pualin Civil Hospital, Aizawl Blood Bank tan Fire & Emergency Services Headquarters, Hunthar Veng-ah mi 30 in thisen an pe.
28th. Thursday :
India ramin zalenna a hmuh champha kum za-na, kum 2047-a Kawlphethaa intodelh hman tuma hmalakna Ujjwal Bharat - Ujjwal Bhavishya Power @ 2047 chungchang inhrilhhriatna, 'Kawlphetha Kut' chu Mizoram chhung hmun hrang hrangah hman a ni.
Aizawlah chuan Hrangbana College-ah Minister, Lalruatkima hovin hman a ni a; Aizawl District DC, Dr. Lalhriatzuali Ralte pawhin he hun hi a hmanpui.
29th. Friday : D3 Amrit Cement 22nd Inter Branch YMA Volleyball Tournament 2022, hmeichhia chu khelh zawh (final) a ni ta. He hunah hian Bungkawn chuan 3-1 Kolasib Diakkawn chu hnehin an champion.
30th. Saturday : D3 Amrit Cement 22nd Inter Branch YMA Volleyball Tournament mipa inelnaah Huntharin Khawhai chu 25-21, 25-19, 16-25, 15-13 a hnehin an champion.
31st. Sunday : Birmingham, UK-a
Commonwealth Games 2022 neih mekah Mizo tlangval,
Jeremy Lalrinnunga chuan 67 kg huangah gold medal a chawi chhuak. Mizo tlangval hian snatch 140kg leh clean & jerk 160kg, total-ah 300kg a chawi a ni.
Comments
Post a Comment