Kan khawtlang enkawltu (VC) tur chu karleh maiah kan thlang dawn a ni a, ni tam a awm talo. Party hruaitu leh candidate te mai bakah mipui mimir te pawhin kan ngaihven tlangin a hriata, hei hi khua leh tui tha nihna kawng pawh a ni awm e.
Party lian pathum te tlin ngei tumin an inbuatsaih nasa hle a, candidate tur pawh an thlang uluk in an fimkhur hle tih a hriat. Chutiang chu a nih avangin tunge tling ang? tih hriat thiam a har hle mai. Thil kan hriatthiam theih nan inthlan hmasa pathuma kan dinhmun tlem azawng i en let teh ang aw.
February ni 23, 2012 khan kan inthlang a, Congress, MNF, ZPM leh PC party atang te in candidate an awm a, Congress seat 4 la in an tling a, MNF pahnih leh PC pakhat an tling bawk.
April ni 30, 2015 ah kan inthlang leh a, hemi tum atang hian hmeichhia te tan seat hnih reserved a ni a, hei vang hian mipa (general) tan panga bak a awm theih talo bawk. Tin, kum thum term ni thin chu kum nga a tih sei a ni ta bawk. Hetah hian Congress chuan seat thum changin, mak tak maiin independent a ding panga zingah pathum ngawt an tling bawk a, MPC chuan seat khat an la ve bawk.
Tun VC kal mek hi kum 2020 khan kan inthlang a, hemi tum hian covid hripui avangin a hun taka inthlang theilo in August ni 27-ah kan inthlang ta chauh a nih kha. Hemi tum hian MNF chuan seat ruk ngawt la in sorkar na an siam a, ZPM in seat hnih leh Congress in seat khat an la ve bawk a nih kha.
Hetiang hi kan dinhmun hmasa a ni a, tunge tling ang tih chu i duh thlanna ani e. Khua leh tui tha nihna a ni bawka, vote thlak theuh turin in buatsaih phawt mai ang u.
Comments
Post a Comment