Skip to main content

RI LOIN LAIPUI A PUAK



Tun kar Thawhlehni zanlai (Nilaini zing a ni mah awm e) khan English Premier League inkhel hmuhnawm

takah AFC Bournemouth chuan an khelmual, Vitality

Stadium-ah Manchester City lo mikhualin, 1-1 in an

inhnehtawkpui. Hei vang hian Arsenal chu khelh khat la awmah umphak theih an nih tawh loh avangin Mikel Arteta leh a naute’n kum 22 chhung teh meuh an lo nghahfak tawh, EPL Nomawi chu an chawi dawn ta a ni.


Premier League-ah hian club 20 awmin, an vaia vawihnih theuh an inkhelh kual hnu-ah point hmu sang ber chu champion an ni thin. Football danah (League a nih chuan) an inhnehtawk chuan point khat ve ve insemin, chak an awm erawh chuan a chak zawkin point thum hmuin, a chaklo lamin point an hmu ve lo thung.


Tunah hian vawi 37 theuh an inkhel tawh a, Arsenal hian point 82 hmu tawhin hma an hruai a, an hnuai chiahah Manchester City in point 78 hmuin an dawt.

Thawhlehni zana inkhelh hma hian Manchester City hian point 77 an hmu a, chak ni se champion theihna chance an la nei. Point khat chiah an hmuh tak avang hian khelh

lehah chak pawh ni se Arsenal an phak thei tawhlo a ni.


Arsenal club hi Gunner tiin hming lem sak an ni a, chu chu Laipui tihna a ni. An chak tum hian ‘Laipui a

puak’ ti a sawi thin a ni. Tuntuma an hnuai chiaha awm te an chak zawh tak loh avanga lehpelh theih an nih takloh avang hian khel lo mah se Laipui puak dum dum tluka ngaih a ni a, chuvangin, ri loin Laipui a puak kan ti ta a ni.


A chung lama tarlan tawh ang khian Arsenal champion lohna hi a rei ta vang vang hle mai a, kum 2003-04 season a hnehloh nei loa (The Invincibles) an champion kha a

hnunung ber a ni ta hial mai. Heng hnu hian champion chiahlo mah se a sang pawlah an awm reng a, pahnihna nih tum pawh an ngah hle. Season liamta pathumah te pahnihna an ni vek a, hengah te hian season tluan deuhthawin hmahruaitu an ni thin nghe nghe. Kumthar hnua an chet buai thin avang ten an hniam leh mai thin a ni. Heng te avang hian tun

season pawh hian an tawlhthluk leh mai rinna a lian hle. Tuna an elpui, City te'na an hneh zawh loh, Bournemouth hi an mualah an ngamlo a, City ngamlo zuiin thenkhat phei chuan pahnihna bawk ni leh mai turah an ngai hman.

Mahse, City lamin Everton an draw hram chauh avangin Arsenal dinhmun a tha leh ta hle. A khel hmasa an nih thin avangin City tan pressure na takin an siam a, chu chu City hian zoloin Thawhlehni zan hi tluk hlen zanah an hmang ta a ni.


Nomawi dawn chaka tuihal Arsenal hian tunah hian

an la chawi chiahlo a, naktuk khi season tawp ni niin, zan dar 8:30 ah a rualin an khel ang. Chutah chuan Crystal Palace mualah an lenglut dawn a, chutih hunah chuan a ri ngeiin Laipui a puah tawh a rinawm.

Comments

Post a Comment

Popular posts from this blog

KUM ZA CHHUNGA MIZO HMEICHHIATE DINHMUN

 1. Tunhmaa an dinhmun : Kan pi pu te khan 'Hmeichhe finin tuikhur ral a kai lo', 'Hmeichhia leh uipui chu lo phun lungawi mai mai rawh se' tih leh 'Hmeichhe hna, hna ni suh, chakai sa, sa ni suh' tih te hi an ṭawng duh dan a ni a, hetaṭang hian hmeichhia te an dah hniam ṭhin zia a chiang viau awm e.  Nula in inleng a neihin an mi ngei zawng tak pawh ni se, biak chhiat an ngaitheilo a, ngaihtheih loh chu sawi loh, thianglo hialin an ngai a ni. Khawvar tirh aṭangin hna an ngah nghal hle mai a, tuichawi, buhden, ei rawngbawl, chawei siam leh a seng fel. An kuta awm vek a ni. Pi pute hunlai kha chuan an eizawnna hi a inang ṭhûma, lo neih a niin an feh tlut tlut ringawt mai ṭhin a, chuvangin, Mizo hmeichhia te chuan hetia'ng nikhua hian feh tur mamawh zawng zawng hi an tihtura ngaih vek a ni a, an emin an phurh vek a ngai bawk ṭhin. Mipa chuan iptepui an ak ve hram chauh a ni.  Feh haw'n kawngah lah hmeichhia chuan em khatin in lam mamawh an phur haw ...
Post a Comment
Read more

THLAZING

  (Sawiremtlang editorial) August thla han hman meuh chuan chhum a zing phui chuai reng mai a, upa ten 'thlazing' an lo ti pawh hi a awm viau mai. Amaherawhchu, heta thlazing tih hi pi pu te thla hming pakhat emaw ti kan awm leh mai thin. Mizo thla chhiar danah chuan Thitin thla a ni tih i hria ang u khai. Hmanlai chuan mitthi te hi pialrala kal nghal mai loin kan velah hian an la tap thin a, August thla hian mitthi khua an pan thin nia an ngaih avanga thitin thla ti pawh an ni niin a hriat. Chuvangin, August thla hi Mizo thla chhiar dan chuan thitin thla tihna a ni a, thenkhat ten thlazing tia an sawi erawh thla hming ang niloin tun thla chu chhum a zing chuai reng mai an tihna a nih chu. Mizo thla chhiar dan hriat hi kan mawhphurhna ni ve in a langa, thla chhiar dan mai bakah an nunphung te pawh hi hriat ve hram hram I tum ang u. August thla chu a zo ruai chu a ni leh ta a, ni reilo te-ah Ber thla kan kan kai anga, derhken, nuaithang, anthur leh senhri nu ten par an chhuang l...
Post a Comment
Read more

BIBLE CHHIAR

Lehkhabu, a kawm dum, a changtupa thihna ‘Bible’ kan tih mai hi hi khawvela lehkhabu darh zau leh copy pawh tam ber a ni awm e.  He lehkhabu hi chatuan nunna kawng min kawhhmuhtu lehkhabu hlu tak a nih avangin chhiar ngei tur a ni a; a chhiar ve lo pawh chhiar tura in fuih a tul bakah hnam hnufual zawk te pawh chhiar tur chhawp chhuah sak theih hi a tul ngawt mai. Chutiang atana mi thahnemngai tlem azawng an awm pawh hi a tihzia e. Tunhma chuan nitina chhung inkhawm nei thin kan nia; (tunah erawh ‘tunlai chuan mihring kan tul tawh a’ tih chhuanlam tute zingah ka tel ve ta.) chu’ng lai chuan ka pa hian kumthar project-ah ka u hnenah Thuthlung Thar bu pumpui hi chhiar chhuak turin a tia;  kei Chanchin Tha bu li te, tin, ka naute pahnih chu Sam bu chhiar turin a ti bawk. Ka unau dangte khan ka pa  ngenna kha an ti hlawhtling ta em? ka hre ta chiah l’aw, kei erawh chuan ka tih hlawhtlin mai bakah Thuthlung Thar zawng zawng chu ka chhiar ta vek a, ka tui tak zel avangin Thu...
Post a Comment
Read more