1st. Wednesday : India ram chhiarpui vawi 16-na (Census of India 2027) chu ram chhûng hmun dangte rualin Mizoramah pawh ṭan a ni. Census of India 2027 thawh khatna-ah hian in ding lai leh a chhûnga chêngte dinhmun leh an bungraw neihte chhinchhiah hna (house listing) neiin bul an ṭan a ni.
2nd. Thursday : Mizo Writers’ Association chuan kum 2025 chhûnga Mizo ṭawnga lehkhabu lehlin ṭha ber atân H. Ngûrthansânga lehlin “Second Chance : Israel Narvaez” tih, Darla Milne ziah chu an thlang.
3rd. Friday : Champhai District Police-te chuan Chalbawia Junction, Khankâwn Police Check Gate-ah car pakhata phurh, heroin kilogram 1.860, chêng vaibelchhe 30720000/- hûa chhût; driver Zothangpuia (34), Myanmar; Zokhawthara khawsa mêk leh a chuanpui, Hawiliankhûpa (23), Myanmar, Mêlbûk khuaa awm mêkte phurh an man a; anni rual hian, hemi kaihhnawihah Lalneihthanga (32) leh Lalṭanpuia (36), Myanmar; Zokhawthara awm mêkte an man tel bawk.
4th. Saturday : Mamit District Excise & Narcotics Department duty-te’n NH 108 Mamit Pholêng Pêngah Tripura pan tûr bike-a phur heroin hâwng 2, gram 23 chu, bike-a chuang, Vânlalhlana (28) leh Mohan Joy Reang (28), Tripura ve vete kut aṭangin an man.
5th. Sunday : Synod moderator, Rev. John Raldosanga chuan a bial hlui, Sihphir Pastor biala kohhran hrang hrangte a tlawh.
6th. Monday : Mizoram DGP Sharad Agarwal, IPS chuan Police Modernization hnuai atanga lei, Electric Scooter 15, Ather Company siam chu Police Station hrang hrang leh Aizawl Traffic Police hman turin Police Headquarters kawt atangin a vai liam.
7th. Tuesday : World Health Day a ni a, he ni pual hian Mizoram hmun hrang hrangah hun hman a ni.
8th. Wednesday :
Union Minister of State for Jal Shakti, Dr Raj Bushan Choudhari chuan zan khat riak turin Saitual district a tlawh.
9th. Thursday : Mizo Hlakungpui Mual thawh rukna leh Ruby Jubilee lawmna hun hman a ni a, hetah hian, hla phuahtu pahnih – Pu Hawva (1893-1956) leh Pu Lalmama (1901-1959)-te bâkah, thu ziak mi pali – Captain LZ Sailo (1924-2008), Pi Khâwlkûngi (1927-2015), Reverend Zairema (1917-2008) leh Pu Lalhmingliana Saiâwi (1937-2016)-te lungphun hawn nghal a ni.
10th. Friday : ‘Ek Bharat Shreshtha Bharat’ hma lâkna hnuaiah Bihar, Rajasthan, Odisha leh Himachal Pradesh state din champhaphâk lawmna Lok Bhavan-ah hman a ni.
11th. Saturday : Nupa a zaithiam, Nicky Lalchhanhima (Lil Kikki) leh a nupui, Rebecca Lallawmsangi te chuan BN Hospital-ah a hmasa ber atan fapa an nei. Naute hi Kg 3 a rit a ni.
12th. Sunday : Salvation Army officer tur te nemnghehna leh tirhchhuahna service (Keepers of the Covenant session) chu ITI corps, Aizawl, Central South Division a Thianghlimna inkhawmah neih a ni a, Colonel Lalbulliana, Territorial Commander chuan a nemnghet. ‘Keepers of the Covenant session’ a Salvation Army officer atan nemngheh leh tirhchhuah tharte hi cadet 7 niin, nupa tuak thum leh single cadet pakhat anni.
13th. Monday : Lungdaia Pi Lalremsangi chu ni danga an hnathawhna hmun a thlen thin hun (fehrehsan) a a thlenloh avangin a thawhna dawr neitute ngaihtha lo chuan an inah an kal chilh a, thawm nei miahloin chhung lamah kawng kalh a lo la ni! Kawngkhar tichhia in an lut a, an fanu, Priskil Vanlalhriatpuii, kum 14 mi chu thi in hmuh a ni. Chhungkaw nu, Lalremsangi leh a fapa, Austin Vanlalmalsawmna te chu an lo chau hle. Boruak tlakchham vanga thleng nia hriat a niin hliam tuar te hi damdawi ina kalpui nghal an ni a, boral ta hi an inpui, Zanlawn lamah lak a ni thung.
14th. Tuesday : Mizoram Chief Minister hlui, Pu Zoramthanga’n ama chanchin a ziahna lehkhabu, “From Guerrilla Fighter to Chief Minister” tih chu Mizoram Lârsâp, General, Dr. Vijay Kumar Singh, PVSM, AVSM, YSM (Retired) chuan Aijal Club-ah a tlângzarh.
15th. Wednesday : Excise & Narcotics Department chuan chawhma dâr 11:40 khân Aizâwl Falkland Park bulah methamphetamine kilogram 10.021 (mûm 1,00,000) leh a neitu, Jakaria Hussain (28) leh Taj Uddin (25), Assam-te an man a; an chhui zuina-ah Myanmar aṭanga lo kengtu, Lalnunziri (38) chu tlai dâr 4:30 khân Khatla, Aizâwlah man lehin a phurh kualna atâna lo puitu Vânlalrintluanga (27), Armed Vêng South, Aizawl chu zân dâr sarihah an man leh bawk.
16th. Thursday : Khawzawl police-te chuan Neihdawn Junction-ah scooty, Lalhriatpuia (25), Lunglei Chanmari vêng khalh aṭangin heroin hâwng 9, gram 104-a rit; chêng 20,80,000/- hûa chhût an man.
17th. Friday : James Lapi (5), Old Laty chu a nu leh pate nên an lui kal haw lamah saiin sawisain a boral a; a chhûngte pawhin hliam an tuar nual.
18th. Saturday : Thu leh Hla Inpui (Mizo Academy of Letters) chuan Book of the Year – 2025 atân ‘Khâm leh Suar’ tih lehkhabu, Pu Lalrammâwia Ngênte ziah chu a thlang.
19th. Sunday : Bnei Menashe (Israel thlah) ni'a inchhal mi engemawzat chu Israel ram pem turin Lengpui airport atangin an chhuak. Nikum November thla khan Israel sorkar chuan Bnei Menashe hnam member 4,600 vel chu kum khatah mi 1,200 vel hruai luhna tur ruahmanna siamin, hemi tana senso tur ruahmanna pawh Israel sorkar chuan a lo remti tawh a, group grang hranga inthenin tun tuma mi te hi group hmasa ber an ni.
20th. Monday : Samuel Lalrinchhana (kum 17) s/o VL Thanvela Lungmawi chu an khua leh South Chawngtui inkara Khawhthla sang li-ah a tlahlum.
21st. Tuesday : Aizawl Municipal Corporation (AMC) inthlanpui vawi 4-na chu tluang taka neih a ni. Inthlanah hian voter mi 2,39,985 zinga 1,50,640-in vote an thlak a, vote tla percentage 62.77% a ni.
Vote tlate hi April 27, 2026 ah chhiar a ni ang.
22nd. Wednesday : Kaladan Multi Modal Transit Transport Project (KMMTTP) leh Sairang Rel lo lutin mipui min nghawng dan tur zirhona chu Aijal Club-ah Home Minister, Pu K Sapdanga hova neih a ni.
23rd. Thursday :
MBSE chuan HSLC results a ti chhuak a, Mizoram pumah mi 18,257 in exam hmachhawnin, mi 14,663 (80.31%) in an pass.
24th. Friday : Mualpui, Aizâwla R Dengṭhuama Indoor Studium-ah Zonet TV Private Limited huaihawt, WCD Miss Mizoram thlanna chu a hmâwr bâwk a ni a; Miss Mizoram – 2026 atân C Lalthlamuanpuii, Bâwngkâwn South, Aizâwl thlan a ni.
25th. Saturday :
World Malaria Day a ni a, hemi pual hian Mizoram sawrkar chuan thuchhuah a siam.
26th. Sunday : Presbyterian Kohhran bial inkhawmpui, Zirtawpni atanga tan chu a tiak.
27th. Monday : Kar hmasa Thawhlehni a AMC inthlana vote tla te chu Bawrhsap pisa pui-ah chhiar a ni a, state a rorel lai ZPM chuan seat - 17 an la a, INC leh MNF chuan seat khat ve ve an la ve bawk.
28th. Tuesday : July, 2023-a sak tan, Rs. vaibelchhe 18.25 man, Suaka Cricket Ground (SCG)-a Indoor Cricket Academy chu Prime Minister, Narendra Modi-a’n Sikkim atangin a hawng. He hmun hi Cricket Association of Mizoram (CAM)-in India cricket pawl, Board of Control for Cricket in India (BCCI) atanga sum a hmuh hmanga a din a ni.
29th. Wednesday : Mizoram Board School Education (MBSE) chuan Higher Secondary School Leaving Certificate (HSSLC) Examination 2026 result a tichhuak a, zirlai exam 12,243 zinga 10, 734 an pass a, pass percentage chu 87.67 niin, nikum pass parcentage 81.10% aiin a sang zawk.
30th. Thursday : State Election Commissioner, Dr. H. Lalthlangliana, MCS (Rtd) hovin MPF te, Political Party aiawhte leh MJA-te chuan AMC Inthlanpui chu thlirletna hun an hmang.
Comments
Post a Comment