Skip to main content

WORK CAMP-AH KA KAL VE

 WORK CAMP-AH KA KAL VE


Kar hmasa khan kan kohhran (Venglai Presbyterian) Pavalai Pawl ten New Sachan, Lunglei district a work camp kan neih na-ah member ka nih ve angin ka kal ve thei hlauh mai a, ramthar zin a khat bawka, ka lawmin hlawk thlak pawh ka ti hle. He khua hi kan kohhran mi, Pu H. Lalfamkima (Makima) s/o Sangthuami (L) thawhna hmun a ni. 


Kan chhuah dawn zingkarah vice-chairman in tawngtaiin min thlaha, a thlamuan thlak khawp mai. Work camp hi hruaitu te hian an ngai pawimawh hle tih an a hriat.   OB paruk zinga panga ngawt an kal thei a ni.    


Tluang takin kan kal a, khaw tam tak kan paltlang. A awm tih pawh ka hriat ngailoh kan kal tlang nuala, khawchhak lama awm ni a ka hriat kal tlang tak mai te pawh a awm nawk mai.

     

Kan tum ram kan thleng hnai ta. International border fencing lo inphan ruah mai ka hmuh chuan mak ka ti hle. New Sachan khua hi ramri hnaih a awm mah ni se ramri atanga kilometres engemawzat a ni ang tih map atangin a chiang reng. Chumi awmzia chu India/Mizoram chhungah ramri hung a ni tihna a ni. Hei hi sorkar laipui mawh nge State sorkar mawh ka hrethiam chiah lo a, ngaihven tul tak ni chuan ka hria. Hetih lai hian Bangladesh lam chuan motor kalkawng tha takin an siam zui mai thung.   


A khua hi lawngleng hmanga kai ngai a ni a, thal lai erawh chuan luiah hian motor a kal kai thei thung. Kan kal lai pawh hian pickup pakhat hi a tlan leh vau vau thin a, thal laia lut, fur in a nan avanga tangkhang ta niin an sawi. Khaw tin hian vanneihna kan nei vek a, chu erawh a inang lo thei viau thung. Anni pawh hi thingtlang, motor tam lohna hmun mah ni se lawng kalna remchang tak an nei a, tuipui hrula awm tih takah tuiah an harsa lo hle a, lui in a ken tel hamthatna tam tak an nei bawk.  


Kan kal chhan ber hi biak in leh a vel (Synod compound) hung hna a ni a, mau lo sat lawkin pal awmna turin thirlen an lo kaih sa bawk nen, hnathawh a ti awlsam hle. Tum aia hmaa hna  kan zawh avangin thawktu te ruahmannain kohhran in enkawl zel nan a tangkai ringin kuhva hmun tur kan vat nghal bawk. 


An khuaah hian ui a tam ve hle. Amaherawhchu, an ui te hi an hnawksak lo viau thung. Mi han bauh emaw ngur chhur chhur ang hi an ti ve meuh tlatlo! A kal te pawh hian mak kan ti zawk hle. Heti hian chung hian an VC ten khuahkhirh a tul thu an sawi ve mek bawk.


An khawsak dan a inthlau hle a, thenkhat cement concrete ina an awm laiin kawngkhar tur takngial pawh nei zolo a, puan zar ta mai pawh hmuh tur an awm. A khaw pilril ngaihtuah chuan an in a tha pangngai viau in ka hria.


Thawktu te sawi danin New Sachan khuaah hian in 280 vel a awm a, Kristian hi in 30 (Presbyterian) awmin member 97 (dzk 62) an awm mek a ni. (Baptist lamah member 70 vel an awm ve bawk) A tam zawk hi Buddhist sakhaw vuan an ni. Kum 1992 ah an khua hi luah tan a ni a, 2005 khan Synod Mission hian hma an la tan a ni. Pu Makima hi kumin April thla khan Chawngte atangin a insawn lut a, a nupui leh a fa te pathum nen helai bial hi an thutchilh a ni. 


Chakma awm hlangna khua niin Makima te chhung bakah sorkar a medical lam thawktu pakhat awm ve te nen chiah Mizo an awm a ni. 


Thorang MLA constituency huamchhunga awm niin MNF MLA an nei a, ZPM hlangna VC an nei thung. 


Kan kal na hi Home mission North in a huam chiah chiah a, Marpara bial chhunga awm a ni. Quarter ruak a lo awm nual a, tunhmain sikul te ding thinin changtlung takin an lo awm thin ni a sawi a ni a, Marpara lama an suan phei tak duak avangin a ruakin a awm ta mai mai a ni. Marpara hi Aizawl atangin km 188 (via West Phaileng) a ni a, Marpara atanga New Sachan hi jeep road niin, km 12 a ni leh bawk. An khaw thleng hi phaizawl ni chiah silo in a rem hle a, tlang ti'a sawi tur awmlo mah se ruam thuk tak tak a tam avangin chhuk chho kal tur erawh a awm phah ve deuh. 


Engpawhnise, missionary te hi mahni nun hlana inpe an ni a, kan khua atang pawhin missionary hnathawk thahnem fe an awm ve ta. Hmun nuam taka awm awm bawk mah se thingtlang chengker tak taka awm te pawh an awm nawk tih hria ila, an thawhna khua te nen mai bakah thawhpuite nen ngei pawh neuh neuh awm ve thei a ni tih hriaa tawngtai pui an ngai hle in ka hria.

Comments

Post a Comment

Popular posts from this blog

KUM ZA CHHUNGA MIZO HMEICHHIATE DINHMUN

 1. Tunhmaa an dinhmun : Kan pi pu te khan 'Hmeichhe finin tuikhur ral a kai lo', 'Hmeichhia leh uipui chu lo phun lungawi mai mai rawh se' tih leh 'Hmeichhe hna, hna ni suh, chakai sa, sa ni suh' tih te hi an ṭawng duh dan a ni a, hetaṭang hian hmeichhia te an dah hniam ṭhin zia a chiang viau awm e.  Nula in inleng a neihin an mi ngei zawng tak pawh ni se, biak chhiat an ngaitheilo a, ngaihtheih loh chu sawi loh, thianglo hialin an ngai a ni. Khawvar tirh aṭangin hna an ngah nghal hle mai a, tuichawi, buhden, ei rawngbawl, chawei siam leh a seng fel. An kuta awm vek a ni. Pi pute hunlai kha chuan an eizawnna hi a inang ṭhûma, lo neih a niin an feh tlut tlut ringawt mai ṭhin a, chuvangin, Mizo hmeichhia te chuan hetia'ng nikhua hian feh tur mamawh zawng zawng hi an tihtura ngaih vek a ni a, an emin an phurh vek a ngai bawk ṭhin. Mipa chuan iptepui an ak ve hram chauh a ni.  Feh haw'n kawngah lah hmeichhia chuan em khatin in lam mamawh an phur haw ...
Post a Comment
Read more

THLAZING

  (Sawiremtlang editorial) August thla han hman meuh chuan chhum a zing phui chuai reng mai a, upa ten 'thlazing' an lo ti pawh hi a awm viau mai. Amaherawhchu, heta thlazing tih hi pi pu te thla hming pakhat emaw ti kan awm leh mai thin. Mizo thla chhiar danah chuan Thitin thla a ni tih i hria ang u khai. Hmanlai chuan mitthi te hi pialrala kal nghal mai loin kan velah hian an la tap thin a, August thla hian mitthi khua an pan thin nia an ngaih avanga thitin thla ti pawh an ni niin a hriat. Chuvangin, August thla hi Mizo thla chhiar dan chuan thitin thla tihna a ni a, thenkhat ten thlazing tia an sawi erawh thla hming ang niloin tun thla chu chhum a zing chuai reng mai an tihna a nih chu. Mizo thla chhiar dan hriat hi kan mawhphurhna ni ve in a langa, thla chhiar dan mai bakah an nunphung te pawh hi hriat ve hram hram I tum ang u. August thla chu a zo ruai chu a ni leh ta a, ni reilo te-ah Ber thla kan kan kai anga, derhken, nuaithang, anthur leh senhri nu ten par an chhuang l...
Post a Comment
Read more

BIBLE CHHIAR

Lehkhabu, a kawm dum, a changtupa thihna ‘Bible’ kan tih mai hi hi khawvela lehkhabu darh zau leh copy pawh tam ber a ni awm e.  He lehkhabu hi chatuan nunna kawng min kawhhmuhtu lehkhabu hlu tak a nih avangin chhiar ngei tur a ni a; a chhiar ve lo pawh chhiar tura in fuih a tul bakah hnam hnufual zawk te pawh chhiar tur chhawp chhuah sak theih hi a tul ngawt mai. Chutiang atana mi thahnemngai tlem azawng an awm pawh hi a tihzia e. Tunhma chuan nitina chhung inkhawm nei thin kan nia; (tunah erawh ‘tunlai chuan mihring kan tul tawh a’ tih chhuanlam tute zingah ka tel ve ta.) chu’ng lai chuan ka pa hian kumthar project-ah ka u hnenah Thuthlung Thar bu pumpui hi chhiar chhuak turin a tia;  kei Chanchin Tha bu li te, tin, ka naute pahnih chu Sam bu chhiar turin a ti bawk. Ka unau dangte khan ka pa  ngenna kha an ti hlawhtling ta em? ka hre ta chiah l’aw, kei erawh chuan ka tih hlawhtlin mai bakah Thuthlung Thar zawng zawng chu ka chhiar ta vek a, ka tui tak zel avangin Thu...
Post a Comment
Read more