1st. Saturday : MPL12 final RG Stadium-a khelhah Chanmari chuan Aizawl FC chu 1-0 a hnehin an champion. Chanmari FC hi MPL-ah vawithum an champion-na a ni.
2nd. Sunday : Khawvel Sunday School Ni a ni a, kohhran hrang hrang ten hmangin Mizoram Presbyterian Kohhran chuan puitling lamah “Fanau Enkawl”, Upa B. Lalhmunliana ziah an zir.
3rd. Monday : Higher & Technical Education Department chuan Mizoram sawrkar hnuai College hrang hranga Associate Professor ṭanglai mi 9 chu Professor (Academic Pay Level - 14) ah an kaisanna order a ti chhuak.
4th. Tuesday : YRC-ah KTP General Conference 2026 Hla Bu chu CKTP Leader, Rev. H. Lalawmpuia chuan a tlangzarh. Conference Hla Buh-ah hian hla 52 (Solfa - 46, Lengkhawm - 4, Chorus - 2) a awm.
5th. Wednesday : Lengzem zaithiam leh lemchan thiam "thingtlang tlangval" actor, Israel Lalbiakrema leh Durtlang Leitan nula, Rebecca Lalhlimpuii chu St Andrews Church, Baktawngah an innei.
6th. Thursday : Zonet buatsaih LESDE Mizo Idol season 8 chu R.Dengṭhuama Hall-ah neih chhunzawm leh in a hmawr bawk a ni ta. Mizo Idol thar atan contestant 700 chuang aṭangin Emmanuel Lalremruata, Tuikual South thlan a ni. Idol thar hian Rs 200,000/- a dawn bakah LBS Suzuki atangin Scooty a dawng bawk.
7th. Friday :
Pawl pali heng : Mizoram State Consumers Union, Aizawl City Local Councils Association, All Mizoram Vawk Vulh Association leh Aizawl City Vawksa zuar Association inremna ziakin vawiin aṭangin Aizawl Municipal Corporation huam chhungah vawksa rate chu Rs 400/- atangin Rs. 450/- in tihsan a nih thu an puang.
8th. Saturday : Thazual Award vawi 11-na chu semchhuah a ni leh ta a, Lengzem huangah Lalsangliana, Youth icon, 2024 chuan Best Male Artist award a dawng.
9th. Sunday : Mizo Cultural Dance - 'Cheraw' mawi lo taka kaihlek a nih chungchangah, a mawhphurtu, Producer, Yashwi Arora chuan MZP kaltlangin Mizo mipuite hnenah ngaihdam a dil.
10th. Monday : Chief Minister Pu Lalduhoma'n College of Veterinary Sciences & Animal Husbandry, Central Agriculture University (Imphal), Selesih din champha kum 27 lawmna chu khuallian niin a hmanpui. Chief Minister chuan, "Selesih Vety College chu Mizoram mai ni lo, India hmarchhak state dangte tana zirna in tangkai a ni a ti a, Mizoram mipui tam ber eizawnna chu lo neih kaihhnawih leh ran vulh a nih angin hemi lama thiamna chu Mizoramin a mamawhna a sang em em a, mipuite hnena zirtirna uar taka kalpui a tul bawk a, hemi kawngah hian Vety College chu a tangkai hle a ni" a ti.
11th. Tuesday : Dampa bial MLA by-election neih a ni a, vote 83.07% a tla. Bye election-ah hian candidate panga an awm a ni.
12th. Wednesday : Central YMA Hall, Tuikhhuahtlangah CCC Meeting vawi 104-na neih a ni. He hunah hian YMA Inkhawmpuilian Vawi 75-na Sakawrdai a hman zawh tak chu thlir letna hun hman a ni a. Sakawrdai khua ten mikhual min thlen danah palai ten lawmawm leh nuam an tih thu an sawi a, rorel inkhawm erawh tun aiin palai ten ngaihpawimawh a ngaih thu leh inkhawmpui kal uar tura tan kan lak a ngaih thu te sawi a ni. Rorelah hian YMA khawih panga a leh sorkar khawi thu pathum te sawiho a pass a ni bawk.
13th. Thursday : Ministry of Social Justice and Empowerment hnuai-a Pradhan Mantri Anusuchit Jaati Abhyuday Yojana (PM-AJAY) sum cheng nuai 525/- senga Lunglei Pukpuia Higher And Technical Institute Mizoram (HATIM) Campus-a Scheduled Caste (SC) Girls Hostel sak tur lungphum chu Social Welfare Minister, Pi Lalrinpuii'n a phum. Pi Lalrinpuii chuan hostel mamawhna a san avanga HATIM, ZMC&H leh Appolo Nursing School tan Social Welfare Department kal tlanga SC Girls Hostel sakna tur rawtna siam a nih dan leh ngawrh taka Ministry lama bawhzui a nih dan tar langin, thawktute theih tawp chhuahna leh sawrkar duhsakna zarah a hlawhtlinna hmuh a ni ta chu lawmawm a tih thu a sawi.
14th. Friday : Tunkar Thawhlehni a Dampa Bye-Election neih zawh taka vote tla te chu chhiar a ni a, hetah hian MNF candidate, Dr. R. Lalthangliana chuan vote 6981 hmu in a hmu sang ber a, ZPM candidate Vanlalsailova chuan vote 6419 hmu in a dawt a, Congress candidate, John Rotluangliana chuan vote 2394 hmuin, BJP candidate, Lalhmingthanga Sailo chuan vote 1541 a hmu a, PC candidate, Zohmingthanga chuan vote 50 a hmu ve bawk. Tin, NOTE-ah vote 45 lai a tla ve bawk.
15th. Saturday : Mizoramah a vawi khatna atân hman, ni hnih awh, tribal pasalṭhate châwimâwina nî ‘Janjatiya Gaurav Varsh - Tribal Pride Day’ chu chhunzawma hman zawh a ni.
16th. Sunday : Boxer, Lalruatdika (20), Hmunpui; November ni 14 zâna professional boxing match, LPS Area, Aizawla a khingpuipa nên an inhnek lai a nikhaw hre lova tlu a damdawi in panpui tak chu a hliam tuar loin a thi.
17th. Monday : National Press Day – 2025, November ni 16 chu Pathiannia a tlâk avângin remchân zâwkna avângin district hrang hrangah hman a ni.
18th. Tuesday : Dampa by-election-a MLA atana thlan tlin, Dr R. Lalthangliana chu MLA atan Speaker, Pu Lalbiakzama'n rinawmna thu tiamtirin a la lut.
19th. Wednesday : Excise & Narcotics Department, FGT (BSF), Aizawl leh 191st BSF-te ṭang ho chuan tlai dâr 4:24 khân Tuikhurhlu (Edenthar), Aizâwlah heroin gram 707 (hâwng 49) leh methamphetamine kiogram 14.905 (mûm 1,50,000) chu Nangsianmuanga (21) leh Nangsiansiam (18), Myanmar-a khawsa nia inchhâlte kut aṭangin an man a, hemi zân dâr 9 hian Excise & Narcotics Department chuan Falkland East Veng, Aizâwla kudam pakhat aṭangin zu ûm puitling (750 millilitre) hrang hrang - Royal Stag whisky, Signature whisky, Blenders pride whisky, Iconiq white whisky, Royal Stag barrel whisky, Royal Green whisky, Afterdark whisky, Malt in Black whisky, Old Monk Rum-te bâkah, Kingfisher Beer (500 each) bûr 84 an man a; he kudam luahtu leh zu neitu, Ruthi Lalrammâwii (31), Phunchawng an man bawk.
20th. Thursday : Chief Minister, Pu Lalduhoma’n Mizoram State University (MSU) chu Lunglei-ah dah a nih tur thu Lunglei High Powered Committee Conference Hall a thuthar thehdarhtute a kawmna-ah a sawi.
21st. Friday : KC TVS chuan Millennium Centre kawt, Dawrpui-ah scooter thar, Ntorq 150cc an khuh hawng a, a hmunah mi 17-in leiin an khalh haw nghal a; dealership inbunna, Aizawlah 70 chuangin an hauh lawk a, district danga an sub-dealer-te hnenah 30 velin an hauh bawk.
22nd. Saturday : Director of Agriculture and Farmers Welfare Department, Field Management Committee (FMC), Multipurpose Primary Agriculture Credit Society (MPAC) leh Vaphai VC buatsaihin Saikhumphai zawl (Tiau kam) ah Vaimim seng runpui programme buatsaih a ni a. Agriculture and Farmers Welfare Department Director, R. Lalnunzira chuan khuallian niin a hmanpui. Khuallian, chuan, "Kan ramah hian buh thar theihna a tlem hle a, 4% vel bak buh thar theihna kan neih loh avangin buh thar tam lamah tan la turin kalkhawm te chu a fuih a, Silchar kawng chhe hlek se pawisa ngah tak chunga ei tur neilo thei dinhmunah kan din avangin nasa leh zual a, buh thar tam lamah hmasawn a tul," a ti.
23rd. Sunday : East Lungdâr leh Biate inkârah Champhai aṭanga truck lo tlân chu che sualin, a hmunah truck khalhtu, (a neitu ni bawk) Lalrinthanga (33), Champhai Zotlâng a thi a; a mi phurh Rualthanchâma (31) chuan hliam na tak a tuar thung.
24th. Monday : Nimin lama East Lungdâr leh Biate inkâra truck che suala hliam tuar, Rualthanchâma (31), Champhai Zotlâng chu a hliam tuar loin a thi.
25th. Tuesday : Zoram Drivers’ Union (ZDU) buatsaih – fîmkhurna hapta (Road Safety Week) hman ṭan a ni.
26th. Wednesday : India ramin ama puala Dânpui hman theih tûra a pawmna ni pawimawh tak – Constitution Day (Samvidhan Diwas) chu India ram hmun dangte rualin Gauhati High Court, Aizâwl Bench-ah lawm ve a ni.
27th. Thursday : Hlimen khua in mitthi pathum ngawt an neih avangin veng/khua thenawm, Melthum, Saikhamakawn leh Samtlang tlangval ten thlan an laih pui.
28th. Friday : December ni 10 thleng awh tûr “Domestic Violence Week” chu Assembly Conference Hall-ah hman ṭan a ni.
29th. Saturday : Mizo Academy of Letters chuan Assembly Annexe Conference Hall, Aizâwlah Kum Tâwp Inkhâwmpui neiin kum 2025-2027 chhûng atân hruaitu an thlang bawk.
30th. Sunday : Sairang - Guwahati rel a chuang tur Tripura lam mi chu rel chet tawh hnu-ah rel a a lawn tur chesual in rel leh platform inkarah a tla a, rel hi a la tlan chak hman loh avangin tih din leh hman a ni. Sairang damdawi inah hruai niin hliam na a tuar lo hlauh. Hmun pui lama enchian turin refer a ni.
Comments
Post a Comment