1st. Wednesday : International Day of Older Persons (Upate Ni) a ni a, Mizoramah pawh hmun hrang hrangah hman ve a ni.
2nd. Thursday : Assam Rifles leh Lunglei police-te chuan Lunglei Bazar Vêngah heroin gram 62.56 chu B Daniel Chakma (29), Ujhol Chakma (35) leh a nupui, Kajala Devi Chakma (26), Lunglei Bazar Venga khawsa mêk nia insawite hnên aṭangin an man.
3rd. Friday : Pathianni zân thleng awh tûr, Salvation Army ṭhalai pâwl, Salvation Army Youth (SAY), India Eastern Territory Congress vawi 27-na chu Dârlâwnah ṭan a ni.
4th. Saturday : Excise & Narcotics Minister, Pu Lalnghinglova Hmar chuan Vairengte Excise Check Gate a tlawh a, Excise & Narcotics-a thawktute thahnemngaihna zarah ruihhlo man a pung chho zel chu thil lawmawm tak a ni tih a sawi.
5th. Sunday : TV lam atanga fakna lar tak thin, KC Face Pack neitu nu, Pi Lalmuankimi (59), d/o K. Lalchhinga, Chhinga veng chu a thi.
6th. Monday :
Election Commission of India chuan India ram state hrang hranga inthlan leh bye-election neih hun tur a puang a, heng zingah hian Dampa bial bye-Election neih hun tur pawh telin, inthlan hun atan November 11, 2025 ruat a ni a, November 14, 2025-ah result puan a ni ang.
7th. Tuesday : October ni 24-a tan tur, LPS Comedian Search chu Chief Organiser, H. Rotluanga’n Hyve City Hall-ah a kick off.
8th. Wednesday : Minister, Dr Vanlalthlana department chan lai, Information, Public Relations, Printing & Stationery department chu minister of state, B Lalchhanzova enkawl tura dah a nih thu Chief Secretary chuan notification a tichhuak. B Lalchhanzova hian a enkawl lai, Revenue dept. leh Supply dept. te a enkawl zui zel dawn a, Dr Vanlalthlana hian School Education, Higher & Technical Education leh ICT dept-te a enkawl zui zel thung ang.
9th. Thursday : Tunhnaia Traffic Warden atana training chhuakte hnenah Traffic SP, Ruatsanga Ralte chuan certificate a hlan. Certificate hlanna inkhawm hi Traffic Roll Call ground, Control Room-ah neih niin, tun tumah hian training chhuak mi 23 an awm a ni.
10th. Friday : Tunlaia model lar ber ber pahnih, Zuali Chhangte leh Timothy Vangchhia te channa, ‘LASI EM NI?’ chu Vana Pa Hall, Aizawlah tlangzarh a ni. He film hi BS Pictures kut chhuak niin, Timothy Vangchia direct leh ziah a ni bawk.
11th. Saturday : Zaithiam, Lalbiaktluanga (Tetea), kum 50, 'Mual hla kar dan' tih sa lartu chu a thi.
12th. Sunday : Presbyterian Church of India Mizoram Synod hnuaia Inkhawmpui lian ber dawttu, Presbytery Inkhawmpui Ningani zan atanga Mizoram chhung leh pawn hmun hrang hranga tan chu a tiak. Synod puipa ten Presbytery hrang hrangah inkhawmpui hi an hmanpui a, Moderator, Rev. R.C. Lalnghakliana chuan Tuivai Presbytery-a hmanpui a ni.
13th. Monday : Tun term kal mek (2023-25) chhunga Central Executive Committee ( CEC) meeting hnuhnung ber tur chu Central YMA Committee Room-ah neih a ni.
14th. Tuesday : Champhai Zotlâng field-ah October ni 17 thleng awh “Hnahsin Kut – 2025” chu chief minister, Pu Lalduhoma chuan a hawng.
15th. Wednesday : Dampa bial MLA by-election atâna ZPM party official candidate, Pu Vânlalsailova chuan Returning Officer hnênah nomination file. A ni hi nomination ffile hmasa ber a ni.
16th. Thursday : Dampa bial MLA by-election lo awm tûra chuh tum, BJP official candidate, Pu Lalhmingthanga chuan Returning Officer hnênah nomination a file.
17th. Friday : Civil Hospital, Aizawl aṭanga a nu leh pate’na an tlân chhiatsan nausen pakhat boral chu, Aizâwl Zuangtui Branch YMA-te’n a ruang la in an vûi. Zuangtui khawtlang hian anmahni hi an hre chiahlo naa, naute neitu nia insawi te hian Zuangtui mi nia an insawi avangin veng mi anga ruang hi hlawm ta an ni.
18th. Saturday : Dampa bial MLA by-election lo awm tûra chuh tum, INC party official candidate, Pu John Rotluangliana leh MNF party official candidate, Dr R Lalthangliana-te’n Returning Officer hnênah nomination an file.
19th. Sunday : Mizo Sunday School Union-in Nau Hual Ni atana a lo tih thin angin Presbyterian Kohhran hrang hranga Beginners' Department te chuan Nau Hual Ni an hmang. Mizo Sunday School Union chuan Nau Hual Ni hi nausên in kum li a tlin huna Sunday School-a kai tura lo hual lâwkna atan leh nausên chu Pathian leh a kohhran tâna lo hual lâwkna ni atan an hmang thin a ni.
20th. Monday :PC party chuan Dampa bial by election-a an party Official Candidate atan K Zahmingthanga, Sakawrtuichhun a nih tur thu an puang.
21st. Tuesday : Ni thum awh tur, YMA inkhawmpui lian chu Sakawrdai, 'CHENGKAWLAWN RUN' palai lawm inkhawm a ṭan a ni. Inkhawm hi Pu Roneihthanga,
Treasurer, Central YMA chuan a kaihruai.
22nd. Wednesday : Dampa bial by election lo awm tur atan BJP party chuan West Phailengah campaign hawnna inkhawm an nei a, Union Minister, Parliamentary Affairs leh Minority Affairs changtu, Kiren Rijiju chuan thu a sawi.
23rd. Thursday :
Lunglei District Bawrhsap, Pi Navneet Mann chuan Lungsena Block Development Office, Primary Health Centre (PHC), Health ATM leh Cosmic Class te tlawhin, Aspirational Block Programme (ABP) hnuaia Phairuangkai Secondary School (RMSA) leh Phairuangkai Health & Wellness Centre thawm ṭhat hna thawh mekte a enfiah. Bawrhsap hi Additional Deputy Commissioner Pi Zoramdini leh District Information & Public Relations Officer Pu C. Lalhruaitluanga te'n ṭawiawmin, Lungsen Block Development Officer (BDO) Pu Lalhruailiana Zote leh thawktute'n an lo dawngsawng a ni.
24th. Friday : Tipper Owners & Drivers Association Kolasib District Headquarters ten nimin atanga kawng chhiat avanga National Highway an block chu tiam chin awmloin an ti tawp.
25th. Saturday : Mizo zinga mi chungchuangte zinga mi, Padma Shri dawng tawh, RK Lalhluna, Lunglei, Lunglawn Veng chu kum 87 mi niin a thi. RK Lalhluna hi literature lama tui tak a ni a, lehkhabu 37 vel ziakin, hla 45 a phuah bakah essay 100 chuang a ziak tawh bawk. Heng bakah hian thu fing tawi paruk leh drama pali a ziak bawk. Heng te avang hian Education & Literature huangah kum 1991 khan Padma Shri a dawng a ni.
26th. Sunday : CCM Sunday (Council of Churches in Mizoram) vawikhatna a ni a, a hnuaia kohhran hrang hrang ten an hmang. CCM hi October 27, 2024 Pathianni khan Aizawl-a Mission Veng Presbyterian Kohhran Biak Inah hawn a ni a. Hawn a nih lai hian Council member chu kohhran 8 an ni a, hawn a nih hnuah pakhatin a rawn belh leh a, pakua an lo ni ta a ni.
27th. Monday : ZPM Party Office-ah chhung inkhawmah Agriculture & Farmers Welfare Minister, PC Vanlalruata chuan ZPM ten an au hla ber thlai thar lei chu a takin an kalpui mek a, tun hnaiah sawhthing lei leh hralh chungchangah thil fel hlel a awm tih hriain sawrkar chuan a chhui chiang mek a, pawn lamah pawh mi thahnemngaiten tih tak zetin min lo veipui a, a lawmawm hle a ni, a ti.
28th. Tuesday : Youth Icon 2024 Lalsangliana (Taitea) birthday a ni a, hemi pual hian an khua, Bawktlangah a khaw nâwt a ruai ṭheh a ni.
29th. Wednesday :
MNF chuan FCAA 2023 adopt duh loh lantirna atan total bandh an huaihawt.
30th. Thursday : Pualreng Wildlife Sanctuary-ah Range Officer leh a team te chu an thu dawn bawhzuiin an duty a, mi panga man an nih bakah thing zai sa tlawn 150, thing zai khawl 4, battery pathum, solar plate pathum, mobile phone te, silai dawt leh a mu thahnem tak, mútbu leh bungbel bakah hmanraw hrang hrang an man. Heng an mi man te hi Aizawl Wildlife Division office-ah hren niin Court-ah thubuai ziah luh nghal a ni.
31st. Friday :
Excise & Narcotics Department chuan Ramhrangkawn, New Champhai-ah Methamphetamine, 10.100 kgs leh a neitu nia hriat mi pahnih – Zamsianmanga (41) S/o Suankhawpauva, Khawmawi, Myanmar leh Ronald Liana (26) S/o Vanlalchuanga, Tahan F Group, Myanmar (Present Address: Lianhna, Myanmar) nia inchhalte chu an man. Methamphetamine an man leh a neitute hi The Narcotic Drugs & Psychotropic Substances Act, 1985 tlawhchhanin thubuai siamsak an ni.
Comments
Post a Comment