1st. Wednesday : Synod Hospital Durtlang Lawmna Ward-a mipa nau piang pakhat chu zan lai pelh hret, dar 12 leh minute 3 ah a piang a, India rama kum 2025 a nau piang hmasa ber (Generation Beta) a ni. Naute hi Frankie Remruatdika Zadeng a ni a, a nu hi Ramzirmawii niin a pa hi ZD Remruatsanga a ni a, Khatla East, Aizawla cheng an ni.
2nd. Thursday : Champhai Tlângsâm Presbyterian kohhran chuan nikum, 2024 chhûnga mitthi an neihloh avangin Pathian hnenah lawmthu sawi inkhawm an nei a, ruai an theh nghal. An kohhran member hi 775 an ni.
3rd. Friday : Champhai district-a Mualkâwi aṭanga kilometer li vêla hla-ah Mêlbûk khaw pana kal bike leh Zokhawthar aṭanga Champhai pana kal, truck an insut avângin bike-a chuang Siamthangpuia (44), Mêlbûk khua chu an insutna hmunah a thi.
4th. Saturday : Reverend Doctor Chuauṭhuama thih (2024) champha a ni a; a pualin Chuauṭhuama Memorial Society huaihawtin Reverend Chuauṭhuama Memorial lecture chu Ramhlun Vêngchhak kohhran hall, Aizâwlah neih a ni.
5th. Sunday : Kum 2025 atan Pathianni hmasa ber a nih angin Sunday School Pawl siam rem ni leh hming ziah ni atan hman a ni.
6th. Monday :
Prakash M Nadar (kum 50) Aizawla thisen pe tur ngawr ngawra Mumbai atanga rawn kal chuan Synod Hospital Blood Bank-ah thisen a pe a, hei hi thisen a pek vawi 126-na a ni. Prakash hian India rama state leh UT tinah thisen pek a tum a, Mizoram telin state 25 leh UT 5-ah thisen a pe tawh a ni. Amah hi pianphunga rualbanlo, kea kal thei lo, wheelchair hmang a ni.
7th. Tuesday : Dr Vanlalthlana, Minister, School Education, Higher & Technical Education, Information & Public Relations leh Information & Communication Technology Department Pisa-ah kum 2025 atana inhlan tharna leh infuih tharna hun hman a ni. He hun hi Minister Dr Vanlalthlana'n kaihhruaiin Rev. R. Laltlankima, Superintendent, Aizawl East District, UPC (NEI) chuan hunserh a hmang a; Minister Dr Vanlalthlana enkawl department hrang hranga officer-te an tel bawk.
8th. Wednesday : State Election Commission, Mizoram thuchhuak angin Aizawl Municipal Area huam chhunga Local Council leh Aizawl District huam chhunga Village Council General Election neih tur atan a hman tur Local Council leh Village Council Electoral Rolls chu Aizawl DC, Er. Lalhriatpuia'n Aizawl DC Conference Hall-ah a tlangzarh.
9th. Thursday: Lalmalsâwma (39), Tuikhuahtlâng Aizâwl; inneih chhima Champhaia a kal, Circute House kawta a ding lai chu lîrthei pakhat back chuan su palhin a hmunah a boral.
10th. Friday : Krismas leh kumthar chawlh an hman zawh hnûah kum 2025 atân sikul hawn ṭan a ni.
11th. Saturday : Zonuam, Aizâwla ban khur laiha inhlawhfa, Akash (19), Assam chu lei vûngin a chhilh hlum.
12th. Sunday: Vaitin khaw pa pahnih, Pu Lalduhsaka (32) leh Pu Vânlalhnuaia (28) te chu an khaw bul Tuiruang luiah che sualin, an tlahlum.
13th. Monday: Pharbâwk, Diphûl Mual mawng, Aizâwl Tlângnuam ram chhûngah tu tih hriat loh mipa ruang chhe tawh tak chhar a ni.
14th. Tuesday : Sawrkâr laipuiin Vision - 2047 ti hlawhtling tûra a programme siam pakhat “Viksit Bharat Young Leaders Dialogue, Youth Festival – 2025” neih zawh tâkah Mizoram aṭangin Grace Lalrinpâri Hauzel chu Prime Minister hmaa presentation nei thei tûra thlan a ni.
15th. Wednesday:
Mizoram police leh an thawhpui Intelligence Agency-te chuan Saithah khuaah AK-47 rifle 6, silai mu kartût 10050 leh magazine 13 an man.
16th. Thursday : Mizoram Governor thar atan Gen. Dr Vijay Kumar Singh chu Gauhati High Court chief justice Justice, Vijay Bishnoi chuan rinawmna thu tiamtirin Mizoram Governor atan a la lut a ni. Raj Bhavan Circular Lawn-a Governor lak luhna inkhawmah hian chief minister Lalduhoma, speaker Lalbiakzama, chief minister hlui pahnih, Lal Thanhawla leh Zoramthanga, minister te, Rajya Sabha leh Lok Sabha MP te, MLA te, sorkar official-te leh sawm bik eng emaw zat an tel.
18th. Friday : Kolasib Diakkâwnah Lalvohbîka (17), Kolasib Diakkâwn chu thîa hmuh a ni.
19th. Saturday :
Assam Rifles leh Mizoram Police tangrual chuan Khatla chuan hnuai kawngkamah gelatine tlawn 30 leh a deh puahna ‘detonator’ 20 an man a, a neitu ni a puh, Hmingthansanga (kum 42), Hnahthial district chu an man bawk. An thil man teleh Hmingthansanga hi Aizawl Police Station-ah an hlan nghal.
20th. Sunday : Ni 17.1.2025 zân aṭanga chin hriat loha bo, Zosangliana (37), Chanmari chu Tlawng luiah a thi a hmuh a ni.
21st. Monday : Governor, Gen (Dr) VK Singh chuan Governor a nih hnua a tum khat nan New Delhi-ah President Droupadi Murmu, Prime Minister Narendra Modi leh Sawrkar laipuia mi pawimawh tak takte a hmu a, Mizoram hmasawn nana tul leh pawimawh hrang hrangte a sawipui.
22nd. Tuesday : Mizoram police din champhaphâk vawi 53-na a ni a, district hrang hrangah hman a ni.
23rd. Wednesday:
Mizoram Truck Owners Association leh Mizoram Truck Drivers Association ruahman angin Vairengte leh Sairang inkar kawngpui chhe lutuk chungchangah sorkar kar nan tiamchin awmlo a tlânloh an rel chu kalpui tan a ni.
24th. Thursday: Excise and Narcotics Department leh Assam Rifles-te ṭang kawp chuan Chhungte khuaah heroin kilogram 5.73 (hâwng 440) leh a neitu nia puh, Gilbert Lalnunhlima (27), Bairabi leh Lalawmpuia (29), Zemabâwk Beraw Vêng Aizâwl nia inchhâlte an man a; tin, heroin gram 23.600 (hâwng 2) chu Rorêlkima (27), Vânhnê-a khawsa nia inchhâl kut aṭangin an man bawk.
25th. Saturday : Ram chhûng hmun dangte rualin Mizoramah a vawi 15-na atân National Voters’ Day hman a ni.
26th. Sunday : KTP bial inkhawmpui, Zirtawpni atanga hmun hrang hranga neih chu a tiak.
27th. Monday : Pu C Lalsawivunga LAD Minister chuan an party office-ah thu sawiin "VC/LC inthlan an pawh tawi na chhan chu, Sawrkar sum an hmuh ang ang te dik zawka an kalpui theih nan" a nih thu a sawi.
28th. Tuesday: Mizoram Chemists & Druggists Association (MCDA) hruaitute chuan chief minister, Lalduhoma chu a pisa-ah an hmu a; an harsatna leh mangannate an thlen.
29th. Wednesday: Jail atanga tum 2 tlanchhuak tawh ruihhlo tawlhtu langsar, Lalchhanmawii (44) C. Mawii ti-a hriat chu Myanmar-ah man a ni a, Mizoram thuneitute kutah hlan nghal a ni. C. Mawii hi December ni 18, 2024 khan Champhai District Jail atangin a tlan chhuak a ni.
30th. Thursday :
Lalrinmawia (kum 15) s/o. Lalrotlinga, Sialsuk chuan New Delhi-ah Naupang Huaisen Chawimawina a dawng. Lalrinmawia hian August ni 7, 2024 khan Sialsuk YMA Tuikhuaha tui naupang tui tla a chhanchhuak a ni.
31st. Friday : Lunglei District Superintendent of Police, Pu J. Lalmuankima kaihhruaiin SP office chamber-ah Lunglei khawpui chhunga hnu chhuitu investigating officer-te nen kum hmasa lam leh kum kal meka pawi khawihna thlen dan thlir hona, crime review meeting buatsaih a ni. He hunah hian kum 2024 chhunga thu buai ziah luh (case register) ennawn a nih bakah, kum 2025 chhunga thu buai ziah luh tawhte thlir ho a ni bawk a. Thu buai chhui zuina kawnga hriat tur leh zawm tur thu pawimawh tak tak sawi ho a ni bawk.
Comments
Post a Comment