Skip to main content

INDIA CHAMPION TEAM A TEL SIHPHIR RAWLTHARTE AN LO HAW

    


September ni 3-12 chhunga Hero Sub Junior Boys' National Championship, Behrampore & Malda Stadium, West Bengal a khelh a Champion team te chu nimin chawhnu dar 3:20 khan Lengpui airport an lo tum a, Mizoram Football Association chuan ropui taka lo hmuakin zanriah an buatsaih sak bawk. An zinga Sihphir rawlthar pathum : Valentine Lalmuanpuia

S/o Lalawmpuia (L), Arpu Veng

(Goalkeeper)

Isak Lalmalsawma

S/o Lalthazuala,

 Venglai, (Forward) leh Zodinpuia

S/o Zonunsanga, Venglai, (Forward) te pawhin zan dar 8 :25 khan Sihphir khaw chhûng rawn lutin Rohrenga Hall-ah V/C te ruahmanna in khawtlang mipui ten ropui taka lo lawm an ni.


A lawmna inkhawm hi V/C Vice president, Pu Thanglianchhunga,  

Chairman,

Sports Dev. Board chuan a kaihruai. Pu Thanglianchhunga chuan thil lawmawm em em mai football hmanga Sihphir in kan tawn avanga lawmawm a tih thu a sawi. Chairman in a sawmna angin anmahni lo enkawl hmasa tu Pu Zosangzela Rengsi, Grace academy enkawltu chu sawmin a ni hian an pawl indin chhoh dan leh kan naupang pathumte dinhmun tlangpui te a sawi a, tuntum championship a an dinhmun tlangpui te a sawi bawk.


VCP, Pu Lalnelawma chuan thu sawi ve lehin India ram Champion team player zinga Sihphir naupang an tel ve avang leh Sihphir in kan la tawn phak ngailoh kan tawn tak avanga lawmawm a tih thu sawiin sport lama V/C hmalakna tlangpui a sawi bawk. 


Hemi hnu hian YMA president, Pu Lallianfala chuan thu sawi ve lehin Mizoram player 19 zinga player 3 ngawt Sihphir atanga an tel theih avanga lawmawm a tih thu sawiin YMA chuan a chhuan takzet thu sawiin hmalam huna an kal zelna turah tumruhna leh chhelna nen, Pathian chakna ringin Sihphir khua leh Mizoram hming ti tha chhunzawm zel turin an hual bawk thu a sawi.


Hemi zan hian lawmpuitu mipui an thahnem hle a, player chhung te mai bakah an khawtlang hruaitu, V/C member, YMA leh MHIP hruaitu te an tel tha hle a, an chawrchhuahna Grace academy a traning lai, naupang engemawzat in an telpui bawk. V/C, MHIP, YMA, Grace academy leh MNF hruaitu te atangin lawmpuina leh duhsakna thilpek hlan an ni bawk. 


Kum 16 hnuai lam inelna, championship-ah hian team 16 telin group 4 ah then hran a ni a, Mizoram team hi group C-ah awmin Odisha, Kerala leh Maharashtra te nen awm hoin  Maharashtra 9-0, Kerala 1-0 leh Odisha 5-1 te in an group a awm te an hneh vek a, an group a sang ber an nih avangin semi final lutin semi final-ah hian Uttar Pradesh nen an inkhel a, an thiam puipa, Isaka a inhliam si. An coach chuan an hneh zolo mai dawna hriain risk la in Isaka hi minute 85 naah dahlut ta a ni. A ni hian goal khung zuiin 1-0 in hnehna hlu tak an chang zui a ni.


Tarlan tak angin final inkhel hmuhnawm takah hian Manipur team hlauhawm tak chu 3-0 laia hnehin title duhthusam an la. Final-ah hian Mizoram team-te hi an che tha takzet a. 

Minute 4-naah midfielder Lalruatdika, Sialhawk chuan box dinglam aṭangin goal mawi tak a khung a, chawlhlawk hma in goal dang a luh belhlo. Second half tan atanga minute sarih a liam chiah tihin minute 52-naah Lalhnehzova, Mualkhang chuan an hmahruai na a belhchhah a, minute 77-naah kan khaw rawlthar Isak Lalmalsawma chuan defender pahnih a paltlang zet hnuah mawi takin goal ding lam atangin keeper man hmanloh a na  a pet in goal mawi tak a khung ve leh bawk.


Sihphir naupang te khelhna an champion tih hriat a nih veleh Sihphir mipui football ngainatu te chu lawmin kan zuang a ni ber a, Chief Minister meuh pawhin chhuanawm a tih thu leh a lawmpui takzet thu Twitter kaltlangin a tarlang bawk.


Ngaihnawm :

1. Isaka hian match hmasa bera Maharashtra 9-0 a an hneh tum khan goal nga zet a thun a, man of the match a thlan a ni nghe nghe.

2. Final a an hneh tak Manipur team hian a hmain goal an chhuah miahlo a, Mizoram lakah erawh an goal an venghim thei talo a ni. Tunlai chuan anni hi India rama roreltu tih theih an ni a, an huphurhpui awm hle. Goal thum ngawt chhuah a an tlawm chian hle avang hian Mizoram an sut har avanga thleng sang mai mai pawh an ang ta hle. 

3. Mizoram team te hi Sports & Youth Services enkawl, Regional Sports Traning Centre, Kolasib a traning lai te an ni a, nikum July thla atang khan helai hmunah hian an lut a ni. 

4. Keeper Valentine Lalmuanpuia pawh hi a khel chhelo hle. Final thlenga match ruk lai an khelh chhung khan an match thum naa Odisha nen an inkhelh tum khan goal khat a chhuah a, amaherawhchu, 3-0 ngawta hma an hruai tawh avang leh goal hnih an thun belh zui avangin a pawi nep hle. A ni tun championship-ah khan vice captain a ni nghe nghe.

Comments

Post a Comment

Popular posts from this blog

KUM ZA CHHUNGA MIZO HMEICHHIATE DINHMUN

 1. Tunhmaa an dinhmun : Kan pi pu te khan 'Hmeichhe finin tuikhur ral a kai lo', 'Hmeichhia leh uipui chu lo phun lungawi mai mai rawh se' tih leh 'Hmeichhe hna, hna ni suh, chakai sa, sa ni suh' tih te hi an ṭawng duh dan a ni a, hetaṭang hian hmeichhia te an dah hniam ṭhin zia a chiang viau awm e.  Nula in inleng a neihin an mi ngei zawng tak pawh ni se, biak chhiat an ngaitheilo a, ngaihtheih loh chu sawi loh, thianglo hialin an ngai a ni. Khawvar tirh aṭangin hna an ngah nghal hle mai a, tuichawi, buhden, ei rawngbawl, chawei siam leh a seng fel. An kuta awm vek a ni. Pi pute hunlai kha chuan an eizawnna hi a inang ṭhûma, lo neih a niin an feh tlut tlut ringawt mai ṭhin a, chuvangin, Mizo hmeichhia te chuan hetia'ng nikhua hian feh tur mamawh zawng zawng hi an tihtura ngaih vek a ni a, an emin an phurh vek a ngai bawk ṭhin. Mipa chuan iptepui an ak ve hram chauh a ni.  Feh haw'n kawngah lah hmeichhia chuan em khatin in lam mamawh an phur haw ...
Post a Comment
Read more

CHANCHINBU MAN KHAWN A HUN LEH DAWN TA

  Thlatina Inrinni hnuhnung ber hian chanchinbu man khawn a ni tlangpui a, thlathar Inrinni hmasa ber leh remchang danga khawn pawh kan awm zeuh zeuh bawk. Thla a lo tawp (Inrinni hnuhnung ber) leh takah hian chanchinbu man pek lamah tan i la teh ang u. Kan chanchinbu hi thla khat lak man cheng 30 kan ti a ni a, heti hian a mah leh a mah a intum tawk vel viau a ni. A man pawh a lut tha tlangpui a, a lawmawm. Chutihrualin, pek lam ngaihsak lutuklo kan awm leh zeuh thin erawh a zialo thin khawp mai. Chanchinbu hi naupang semtir thin a ni a, a man khawn thu-ah pawh anni hian an keng tlang mai thin. Naupang an nih avang tak hian thenkhat hian zahlo taka lo tawngkhum in 'min pe ngai silo a, a man khawn hre hlur ringawt mai' tih an hlawh fo niawm tak a ni.  Thenkhat chhiar duh si a man pe duh manglo te pawh an awm niin a semtute hnen atangin thu kan dawng fo. A zialo khawp mai. Tin, pe emaw intia pe silo te pawh a awm theih a nia. Naupang rilru thianghlim tak te an ni a, rilru sual ...
Post a Comment
Read more

BIBLE CHHIAR

Lehkhabu, a kawm dum, a changtupa thihna ‘Bible’ kan tih mai hi hi khawvela lehkhabu darh zau leh copy pawh tam ber a ni awm e.  He lehkhabu hi chatuan nunna kawng min kawhhmuhtu lehkhabu hlu tak a nih avangin chhiar ngei tur a ni a; a chhiar ve lo pawh chhiar tura in fuih a tul bakah hnam hnufual zawk te pawh chhiar tur chhawp chhuah sak theih hi a tul ngawt mai. Chutiang atana mi thahnemngai tlem azawng an awm pawh hi a tihzia e. Tunhma chuan nitina chhung inkhawm nei thin kan nia; (tunah erawh ‘tunlai chuan mihring kan tul tawh a’ tih chhuanlam tute zingah ka tel ve ta.) chu’ng lai chuan ka pa hian kumthar project-ah ka u hnenah Thuthlung Thar bu pumpui hi chhiar chhuak turin a tia;  kei Chanchin Tha bu li te, tin, ka naute pahnih chu Sam bu chhiar turin a ti bawk. Ka unau dangte khan ka pa  ngenna kha an ti hlawhtling ta em? ka hre ta chiah l’aw, kei erawh chuan ka tih hlawhtlin mai bakah Thuthlung Thar zawng zawng chu ka chhiar ta vek a, ka tui tak zel avangin Thu...
Post a Comment
Read more