1st. Tuesday : Zaithiam, Lalngengpuii Tochhawng (51), Bethlehem Vengthlang chu kal thalo avangin Greenwood Hospital Aizawl-ah a boral.
2nd. Wednesday : NGO Co-Ordination Committee chu Central YMA Committee Room-ah neih a ni a, he hunah hian Manipur-a kan unau Zohnahthlakte avanga harsatna tawkte tanpuina atan Rs 7,00,000/- pek an rel.
3rd. Thursday : Mizo Zirlai Pawl leh Mizoram Sports & Youth Services Department tangkawpin an buatsaih Y20 Meet on Patriotism, Nationalism & Development chu Govt Saitual College Auditorium-ah hman a ni a. Lengteng Bialtu MLA leh Human Resource Development Vice chairman ni bawk, Dr L Thangmawia chuan khuallian niin a hmanpui. Khuallian chuan thu sawiin, "Zohnahthlakte hi harsatnain min hnukkhawm thin," a ti a, "Tunah chuan tunhmaa Lusei tawng hmang lo Mizo lo riaua hmuh ṭhinna tam tak a bo tawh," tiin, "Tuna harsatna zawng zawng hi kan hnam indinchhoh hunah thawnthu ngaihnawm a la chang dawn a ni," a ti bawk.
4th. Friday : Govt. Kolasib College-ah, Directorate of Sports & Youth Services leh Mizo Zirlai Pawl bultum a buatsaih 'Youth 20 Meet on Nationalism, Patriotism & Development' tih thupui hmang a zirlai intawhkhawmna neih a ni a. Minister Pu K.Lalrinliana chu khuallian niin Pu T.Zahmingliana, Principal, Govt. Kolasib College chuan hun a kaihruai a ni.
5th. Saturday : Central Jail-a tang mek pa pakhat, kum 67 mi, ND & PS act avanga man chu thi a hmuh a ni. Prison department thawktute chuan a mah hi zunthlum leh BP sang nei niin an sawi.
6th. Sunday :
Ruihhlo (Heroin) avanga excise department-in an man, Rabul Uddin Lasker (23), Chemphai Kolasib District Hospital Isolation Ward atangin a tlan chhuak.
7th. Monday : Zoram Medical College/ State Referral Hospital din a nih champha vawi 5-na a ni a. A lawmna inkhawm hi chief minister, Pu Zoramthanga chuan a hmanpui.
ZMC/SRH ah hian thawktu 723 awm mekin zirlai 489 an awm a, hospital unit 19-ah khum 470 awmin, casualty-ah khum 20 leh ICU-ah khum a awm mek bawk.
8th. Tuesday : Thorang bialtu MLA, Zodintluanga chuan tunhnai ruahsur nasa avanga khuarel chhiatna nasa tak a bial chhunga thleng chungchangah Home Minister, Lalchamliana, Disaster Management & Rehabilitation Department changtu leh Er. B. Lalawmpuia, PWD Engineer-in-Chief charge la mêkte an Office-ah a tlawh.
9th. Wednesday : Ni hnih awh tur NGO library enkawltu te traning chu Chanmari YMA hall-ah tan a ni.
10th. Thursday : Parliament session neih mekah "Manipur tribal-te hi Myanmar mi an ni lo. India Independence hma, British lo luh hmain kum 200 he ramah hian an lo awm tawh. Myanmar mi emaw, foreigner emaw an ni lo," tih thu MP, K. Vanlalvena a sawi a, sirkar laipui hotute an lawmlo hle. A sawi zawm theihloh nan mike pawh off sak hial a ni.
11th. Friday :
Zarkawt Branch YMA ten mini library 'LAISUIH RUN' an siam chu mi tu tih hriat loh ten an hal.
12th. Saturday : TKP, Bawngkawn Pastor Bial chuan ZMC Blood Centre tan thisen unit 110 an pe a, a petute mipa 85 leh hmeichhia 25 an ni.
13th. Sunday : Kum 2019-2021 chhunga Mizo Zirlai Pawl (MZP) President lo ni tawh, B Vanlaltana chu septicemia avangin Trinity Hospital-ah kum 44 mi niin a thi.
14th. Monday : Samagra Shiksha hnuaia Netaji Subhash Chandra Bose Awasiya Vidhyalaya (NSCBAV) Secondary Girls Hostel, Mamit chu Er. H.Lalzirliana, Bialtu MLA & Vice Chairman, Roads & Infrastructure Development Board chuan a hawng. Hostel Mamit-ah hian Seat 30 awmin Mamit High School atangin mi 10 leh Higher Secondary School atangin mi 20, an vaiin naupang 30 an awm dawn a ni.
15th. Tuesday :
Ramchhung hmun dangte rualin ramin zalenna a hmuh vawi 77-na chu Zoram hmun hrang hrangah lawm a ni. A lawmna pui ber Aizawl Sipai Lammuala neihah Chief Minister Zoramthanga chuan, 'Mizoram Police chu ram venhim kawngah BSF leh Assam Rifles te nen thawkho in ngawrh takin hna an thawk thin' a ti.
16th. Wednesday :
Pathiannia Tlawng luia tla mi pahnihte ruang chu an tlakna atanga kilometre 1 vela hlaah hmuh a ni.
17th. Thursday : Mizoram sawrkar hnuaia hnathawktu hrang hrang inzawmkhawm, Federation of Mizoram Government Employees & Workers (FMGE&W) chuan ni hnih chhung atan sawrkar laka lungawi loh lantir nan badge dum bel chungin hna an thawk.
18th. Friday : Excise & Narcotic Department chuan an Minister, Er. Lalrinawma hovin thlakhat chhung a an hnathawhte thlir letna Minister room, MINECO, Khatla-ah an nei. Minister chuan ruihlo kan dona kawnga thawktute inpekna leh thawhrimna chu a taka hmuin fakawm a ti hle a, theihtawp kan chhuahna hian khawtlang leh chhungkua ah ruihhlo avanga harsatna tawk mekte tan chhanchhuah hna nasa takin kan thawk a ni tih hre reng turin a sawm.
19th. Saturday : Bairabi South Village Council chuan inhmun neilo mi 29 hnenah number pawhtirin inhmun Bazar building, zero point-ah an sem. Heng inhmun te hi bialtu MLA, Minister nibawk, Pu K.Lalrinlian'an ama sum senga a lei a ni a, tun hi a thawhkhatna a ni a, la sem chhunzawm tura ruahman a ni.
20th. Sunday :
Baptist Church of Mizoram hnuaia Mizoram Thalai Kristian Pawl (MTKP) rorel in Ruihhlo ngai te pual leh kan ramah rorelna dik a awm theih nan ram pum huap chawnghei tawngtai ni se tia a rel angin TKP Unit hrang hrangah chawnghei tawngtai neih a ni.
21st. Monday : Bible Society of India (BSI), Andhra Pradesh Auxiliary hruaitute chuan Manipur atanga raltlante tanpui nan Central YMA-ah Rs.2,50,000/- an hlan a, CYMA aiawhin Prof. Malsawmliana, Assistant Secretary in a dawng.
22nd. Tuesday :
August ni 17 atanga chin hriat loh a awm Vanlalzara, Durtlang chu Vairengte-ah damtaka hmuh a ni. A ni hi Bilkhawthlir-a kal tura insawiin two wheeler taxi-in a kal a, biakpawh theihlohin a awm zui ta a ni.
23rd. Wednesday :
Bairabi leh Sairang inkar rel kawng dawh hna thawh mekah, Sairang Zero Point, Kurung lui chunga bridge no 196 dawh mek chu a chim a, hnathawktu thiin mi in hliam an tuar bawk. He thil thleng chungchang hi pawi a tih thu Prime Minister, Narendra Modi chuan sawiin thi chhungte chu PMNRF hnuaiah zangnadawmna cheng nuai 200,000/- theuh leh hliam tuarte chu cheng sing 50,000/- pek an nih tur thu a sawi.
24th. Thursday :
Transport Minister, TJ Lalnuntluanga chuan sorkar kum kalta chhung khan an department tana sorkarin revenue target a tuksak chu zaa 22.48-in a khum tih Aizawl Press Club-ah thu thar thehdarhtute hmaah a sawi. TJ Lalnuntluanga hian kum 2018-2023 chhunga a enkawl transport department hmalakna hrang hrangte sawi fiahin, sorkar kum kal ta (2022-2023)-a department tana sorkarin chhiah a tuk, revenue target chu Rs nuai 4,003.21 a ni a. Rs nuai 4,903.34 hmuh niin an target hi Rs 900.13 (22.46%)-in an khum a. Tun sorkar kum kal mek 2023-2024-ah hian sorkarin chhiah a bituksak, Rs nuai 5,000 pawh an tlin ngei an beisei thu a sawi bawk.
25th. Friday : Guwahati High Court Judge, Justice, Pi Marli Vankung chuan Champhai District Court Official Website chu video conference kaltlangin a hawng.
Justice Marli Vankung chuan Champhai District Court in Official Website a neih hma chuan, "Champhai District Court in hna a thawh dan te, mamawh an nei em tih leh enfel ngai te enfiah turin Champhai pan a ngai thin a ti a. Tunah chuan website hmangin awlsam takin thil tam tak a tih theih tawh dawn a ni,"a ti.
26th. Saturday :
Vohbik naupang Lalremruata (11) S/o Lalvulmawii Mamit High School veng, August ni 17. 2023 a tanga a chin hriat lova bo, August ni 23. 2023 a thi a hmuh thattu ni a rinhlelh pahnih Mamit Police Station-a kawl zinga phakhat chuan a thah a nih thu a puang. Mibo, Lalremruata ruang chhar anih atang hian Mamit Police te chuan pawikhawihtu zawnchhuah tumin theih tawp an chhuah nghal a, rinhlelh thil thuah mi 10 lai thu zawhfiah tura koh an ni. Heng mi 10 zinga pahnihte chu rinhlelh bik leh hnuchhui kawnga anmahni pui thei tur nia ringin an kawl a, tuna inpuang ta hi heng mi pahnih zinga mi hi a ni. Central Jail a dahluh turin Aizawl panpui nghal ani.
27th. Sunday : Pu Ch. Lalbiaknunga, kum 47 s/o Remmawii, Sihphir chu Synod Hospital, Durtlangah thin tha lo avangin a boral.
28th. Monday : Ramchhung hmun dang rualin Rozgar Mela/Job Fair chu Assam Rifles buatsaihin 2nd AR Gajraj Hall-ah Union minister of state for Minority Affairs, Pu John Barla hova hman a ni. Pu Barla-a chuan thalai hna zawng mek ten an eizawnna tur hna an hmu thei chu a lawmpui tih a sawi a. Prime Minister Narendra Modia'n India ram ngelnghet leh rintlak taka a din theih nan theihtawp a chhuah tih sawiin, chumi chhawrtu zingah Mizo thalaite an tel thei chu a lawmpui thu a sawi bawk.
29th. Tuesday : National Sports Day a ni a, SAI Training Centre, Mission Vengthlangah hman ve a ni a, Sports Minister, Pu Robert Romawia Royte chuan khuallian niin a hmanpui.
30th. Wednesday :
Rural Development Minister, Pu Lalruatkima'n Vairengte Joint YMA Field a phul lem phah chu a hawng.
Vairengtea Joint YMA Field-a phul lem phahna hi Special Assistance to State for Capital Investment (SASCI) hnuai a cheng nuai 600/- hmang a hmalakna a ni.
31st. Thursday : Mizo Academy of Letters (MAL) chuan hla phuah thiam, V. Thangzama Kutchhuak Zir Chianna seminar an buatsaih a, hetah hian mithiam 14 te thuziak zirho a ni.
Comments
Post a Comment