1st. Monday : Rial nasa taka tla chuan chenna in tam tak a ti chhia.
2nd. Tuesday : Lalzawmi Frankcom, Australia
rama in bengbel ta chu a hnathawhna, Gaza-ah Israeli Air
Strike avangin a boral. Lalzawmi Frankcom hi Paul Frankcom leh Lalrinmawii
(L) te fa pahnih zinga a upa zawk a ni a, a pa hi Australian niin, a nu hi Saitual khawchhuak a ni thung. A hna avangin Bangkok-ah a in-base a, Asia rama an operation hrang hrangah
hotu niin, Senior Manager hna a chelh mek a ni. World Central Kitchen hi Non-profit/ Non-Government NGO niin, khawvel ram hrang hrang a indona leh chhiatna thlenna
hmuna chhiat tawkte hnenah a thlawnin chaw an sem thin a ni. Chutiang hna thawk tur chuan Gaza ah hian a thawhpui te nen an luh tuk lawkah a vanduai ta a ni.
3rd. Wednesday :
Excise and Narcotics Department chuan Falkland Veng-a Aizawl View hmunah heroin kg 5.427 a rit an man a, hemi kaihhnawihah hian mi pahnih man an ni bawk. END hotute sawi danin heng damdawi an man te hi Myanmar atanga rawn lak, Secondhand Bale kara thuhruk an ni a, a phurhkualna atana hman Motor pakhat pawh man nghal a ni bawk.
4th. Thursday : Mizoram-a harhna lo thlen champha a ni a. Kohhran hrang hrang ten an hmang.
5th. Friday :
Mizoram Public Service Commission (MPSC) hotute chuan an pisa-ah thuthar thehdarhtute kâwmin, exam an buatsaih ṭhin dan chungchangah MPSC chu a rintlak zel dawn thu an sawi.
6th. Saturday : Mizoram Badminton Association chuan season kalta chhunga player che tha te hnenah MBA Awards 2024 a hlan. He chawimawina hian trophy bakah pawisa fai leh badminton bungrua chi hrang hrang a keng tel a ni. Badminton Inn Player of the Season MBA Award 2024 hi category 4-ah then a ni.
7th. Sunday : Lawngtlai District-a Sakeilui-II ah ṭekin Mithun Chakma, Kum 31 mu chu a deng hlum. Mithun Chakma hian a nupui leh a fate 3 a kalsan a ni.
8th. Monday : Lok Sabha inthlan atana candidate tura hming thehlutte inhnuhdawh theih hun tawp ni a ni a. Inhnukdawk an awm lo. Heti hian candidate hi paruk an awm dawn ta a ni.
9th. Tuesday : Mamit Dinthar kawn-a Lungtiawii in chu bungrua engmah chuh hman lovin a kangral vek a, mihring thi leh hliam erawh an awm lo. In-ah hian an fapa rualban chiah lo(Down Syndrome nei) leh chetha hlei thei lo a Pu puia an awm a, a Pu puia chuan an naupang hi lighter kengin pindan lamah a lut a, a hnu lawkah pindan lam atang hian kangmei hi a rawn chhuak ta niin a sawi. In-ah hian Lungtiawii leh a fate pathum leh an monu leh an tu pakhat bakah an Pu puia te an cheng a ni.
10th. Wednesday : Lunglei atanga Aizawl kal tur Wagon R chu Sialsuk bulah chesualin thi leh hliam na lutuk an awm lo. Motor-ah hian Captain Lalnunmawii w/o Major Lalthlamuana, Kawlkhuma Boys Home Lunglei a Superintendent leh a fate pahnih mipa kum 14 leh hmeichhia kum 12 mite an chuang a ni.
11th. Thursday : Khawvel ram danga Muslim-te rualin Mizorama Muslim-te chuan an hun pawimawh, Id-ul Fitr an hmang. He hun hi Aizawlah chuan Aizawl West joint YMA field, Vaivakawnah hman a ni.
12th. Friday :
Lawngtlai khawpuia Damdawi in pahnih- Lairam Christian Medical Centre leh Christian Hospital, Lawngtlai-ahte chuan damlo a thlawna zai - Free Surgical camp neih a ni a, damlo 50 chuang zaitur awmte zai an ni. A thlawna damlo zaina Free Surgical Camp hi Association of Surgeons of Mizoram bultumin, Association of Surgeons of India, North East Chapter leh Indian Society of Anesthesiologist, Mizoram Branch nen tangkawp buatsaih a ni a, Christian Hospital, Lawngtlaiah naupang lam leh awlsam deuh zawka zai theihte zai an ni a, a dang zawng chu Lairam Christian Medical Centre-ah zai an ni thung.
13th. Saturday : Aizawl leh Sesawng inkar service, Sumo pakhat chu Sesawng thlen hma 3 km velah chesualin, a chuang ten hliam an tuar vek. Sumo hi kawng thleng a lum a ni. Sumo-ah hian puitling vek chuangin, a seat pawh an khat vek a ni.
14th. Sunday :
Mizoram pum huap Presbyterian Kohhran Pavalai Pawl Intawhkhawm vawi 6-na Zirtawpni atanga East Lungdar a neih chu a tiak.
Intawhkhawmah hian thupui “A chhe lai siamthatu” tih chu speaker, Synod senior executive secretary Rev. C. Zorammawia chuan a sawi.
15th. Monday : MZP chuan Mizoram Public Service Commission (MPSC) hnalak hrang hrangah thil fel lo a awm ngei nia a hriat vangin MPSC Chairman chu mawhphurhna laa bang turin a lo ngen tawh. Press Release bakah Press Conference in awmzia a neihloh avangin Chairman ban phutin MPSC Office kawtah an pisa kai tur dangin an pungkhawm.
16th. Tuesday : Bairabi khaw luh dawna Kawnpui lui Lei (Bailey bridge) chu Tripper pakhatin a chhuat phah (deck) a rah pelh avangin Tripper ke (tyre) hi lei kangkhangah (transom) a tang a, avang hian Bairabi atanga lirthei kal te an buai phah hle.
17th. Wednesday :
Mizo Academy of Letters (MAL) chuan kum 2023 chhunga Mizo ṭawnga chhuak lehkhabu zinga a ṭha ber, Book of the Year 2023 atan ‘Pangparhnima’ tih an thlang a, a ziaktu chu Ahmangaihi Khiangte a ni.
18th. Thursday : Pu Lalthansanga kum 45 (Bru) S/o Zohmingthanga leh,
Lalngaihawma kum 52, s/o Oddikumar (Bru) Buhchang phai a cheng ve ve te thiandun, zurui chu inti buaiin, Lalngaihawma chuan a thianpa hi a nghawngah a zaihlum.
19th. Friday : Mizoram aiawha Lok Sabha member tur thlanna chu tluang taka neih a ni. Electoral roll thar ber atanga a lan danin voter 8,61,277 an awm a. Mipa 4,14,777,
hmeichhia 4,41,520 leh service voter 4,980 an ni. Vote hi 4,87,103 (56.87) a tla a ni. Amaherawhchu , hetah hian postal ballot hmanga vote tla leh EPBS hmanga vote tlate chhiar tel a la ni lo thung.
20th. Saturday : Maubawk Branch YMA chuan tui tla an awm palha chhanchhuah hna thawk tura inruahmanna atan Tlawng luiah tui hleuh, inpil rei siak leh tui chhunga thil inzawn intihsiak an nei.
21st. Sunday : Laldinpuia (26) S/o Lalrinpuii, Durtlang chu Tuirial luiah a tla hlum.
22nd. Monday : Burma ram Zofate zinga politics din hmun sang ber, Second Vice President dinhmun luah mek tu, U Henry Van Thiauva, Vice President chu
Myanmar military council sorkar chuan a mawhphurhna chelhlai an chawlhtir. U Henry Van Thiauva hi Chin State atangin NLD ticket in MP atana 2015 kum atanga thlantlin a ni.
23rd. Tuesday :
LMC thukhawm
Lunglei Municipal Council (LMC) hnuaia Municipal Sanitation Committee chu Lunglei Convention Centre-ah an ṭhukhawm a, hmalak dan tur hrang hrang an rêl. LMC-in sanitation fee a lak hnuah complaint chi hrang hrang - septic tank pût (leak), bawlhhlawh paihna hmun tur ni loa paihte vawi eng emaw zat endik a nih tawh thu tarlan a ni.
24th. Wednesday : 12th Inter Branch YMA Cricket Tournament 2024 chu Ramhlun Sports Complex field-ah leh Joint YMA Field, Vaivakawnah te khelh tan a ni. He tournament-ah hian branch 50 an tel a ni.
25th. Thursday :
Excise & Narcotics department (END) chuan an commissionerate conference hall-ah quarterly meeting an nei a; kumin 2024-ah hian heroin (no.4) kg. 26.494 an man tawh tih an tarlang. END quarterly meeting hi commissioner, Z Lalhmangaiha'n a kaihruai a, END secretary, Lalramsanga Sailo-in a hmanpuiin END officer eng emaw zat an tel bawk.
26th. Friday : Miss Mizoram 2024 atan Jennifer Lalrinzuali, Republic Hmar Veng thlan a ni.
27th. Saturday : Ruah leh rial nasa taka thawk chuan Khawzawl District chhunga khaw pahnih - Tualpui leh Vankalah te chenna in chung engemawzat a deng chhia.
28th. Sunday : Thli leh rial nasa taka tla chuan Mamit district chhung khaw thenkhatah chhiatna a thlen nual.
29th. Monday : Lungsen Govt Middle School-II chu bungraw chuh hman lovin a kang ral. Bungraw kangral hlut zawng hi cheng nuai 45/- vel ni a chhut a ni.
30th. Monday : Central YMA chuan Assam atanga ruihhlo lo lut thin ni a sawi te enfiahin Kumpuan Sub - Committee te leh Cachar Young Muslim Association hruaitute nen an inkawm.
Inchibai hlutzia leh ropuizia hi in ngaihtuah ve ngai em? Kan inchibai hian kan inlâwm (welcome) tih a entîr a; chu lovah inremna leh inngaihdamna a lantîr bawk. Mikhual tharlâm nêna intawhin kan inchibai a, khawiloa chhuah dawnin a thlahtu tur emaw a chhuak tur zawk pawh ni ila kan in chibai a, inkhawmpui nikhuaa a thlengtu in chibai an lo sem te pawh hi a mawi em em a, inkhawmpui boruak pawh a ti nuam hle thin a nih hi. Tin, hlawhtlinna kan chanin lawmpuina chibai kan inbûk a, damlo na takin damna a chanin kan in chibai a, pian champhaphâkah pawh thil inpêk mai duh tâwk lovin kan inchibai lawp lawp bawk thin a nih hi. Lehkhathawnah takngial pawh ‘Suih loh chibai’ kan inbûk hrâm hrâm ṭhîn a nih kha. Tin, naktip maia thleng tur krismas leh kum tharah pawh kan in chibai leh lawp lawp ngei ang.
Sâphovin ‘worship’ leh 'wish’ bakah good morning tih angreng pawh hi Mizotawng chuan ‘chibai (bûk)’ kan ti fel êt mai a, a tha hle a ni.
Mizote hi pi leh pute chenah chi (salt) ngaina hnam kan ni a; mahse, pipute hunah pawh khân chi hi a vân êm avângin a nazawngin an ei thei bîk lo va; khual chhia/khual ṭha an neiha bai chi al an hlui chin tawh chu an duhsak hle tihna a ni an ti. Chuta ṭanga ‘chibai’ tih ṭawngkam pawh hi lo chhuak niin an sawi.
Chibai sem nachâng hriat pawh hi mi pangngai nihna pakhat a ni hial awm e. Chibai sem nachang hrelo chu mi chut, mi mâwl, mi hawih lo, ningkhâwng hre lo leh changkâng lo ah te pawh kan chhuah lek lek a nih hi. Ṭawng thei lo, bengngawng leh mitdelte pawh hian (mi) chibai nachâng a hriat phawt chuan mi fing an ni mai.
Mi hausa i ni emaw, mi huaisen i ni emaw, mi chapo i ni emaw, khawvêl ngaiha mi tlâktlai lo i ni emaw, mi dâwihzep i ni emaw, mi rethei i ni emaw, hmêlchhia emaw pawh ni raw sek sek, mi rethei leh chanhaite hnênah sum leh pai pêk tûr nei lo mah la mitinin kan tih theih ‘chibai’ nachâng i hria ang u. Ngaihsakna lantirna ropui ber a ni si a.
Chhiartu te krismas suihloh chibai kan buk vek a che u.
Comments
Post a Comment