1st. Saturday : Transport Minister, Pu T.J. Lalnuntluanga chuan National Highway (NH) 6, Dulte to Champhai kawngpui Package-III, Shri Balaji Construction Company (SBCC) in an siam mek chu Company lamin an sawm angin a hmunah tlawhin a enfiah.
Environment, Forest & Climate Change changtu Minister ni bawk, Pu T.J. Lalnuntluanga chuan kawng siamtu Company-te chu Champhai mipuite'n an nghahhlelh em em NH 6 kawngpui siam hna chu zawh fel thuai a nih theih nana chak taka thawk tur leh hna tlo leh tha, ram tana rotling tak hnutchhiah tum turin a hrilh. Hetihrual hian environment dan ngaipawimawh turin a chah bawk.
2nd. Sunday : Presbyterian Kohhran hrang hrang te chuan (Chawhmaah) Health Sunday leh (zan lamah) Damdawiin Pathianni an hmang. He hunah hian kohhran hrang hrang te chuan damlo te tan thilpek an lakhawm hlawm a ni.
3rd. Monday : Mizorama Zosâp Missionary lo chhuak te zinga Mizoram chhuahsan hnuhnung ber, Pi Zomawii (Miss Joan T. Smith) June 26, 2023-a thi chu a pianna khua leh a lawina Kohhran, Central Baptist Church Dundee, UK-ah vuina inkhawm (Funeral Service) neih a ni. Vuina inkhawm hi Central Baptist Church Pastor- Rev. Jim Turrent in kaihruaiin, Pi Zomawii chanchin tlangpui leh thuchah a sawi.
Pi Zomawii vui hun lai hian Mizorama Missionary-a a rawn thawhna, Kristian Hospital Serkawn-ah pawh thawktute chuan he hun hi an lo hmang ve a ni.
4th. Tuesday : Chief Minister chuan a Instagram account kaltlangin ni 62 lai hnuah pawh Manipur buainain ziaawm lam a pan thei lo chu pawi a tih thu leh he buaina avanga nunna inlaksak leh hliam tam tak an awm chu hriatthiam har a tih thu a sawi a, a chinfel dan kawng khat chauh a awm a nih pawhin, he buaina rapthlak tak a tawp theih nan a chinfel dan kawng rang taka ngaihtuah leh chet lak nghal chu mawhphurhna la ngei ngei tura ngaihte mawhphurhna leh an tihmakmawh a ni a ti.
5th. Wednesday :
Mizoram Police, Dungtlâng Checkgate (Champhai district) duty-te chuan heroin gram 57.05; sahbawn bâwm ngaa thuhrûk chu Kabir Hussain, Assam nia inchhâl kut aṭangin an man.
6th. Thursday : Mizo Hmeichhe Insuihkhâwm Pâwl (MHIP) Day vawi 49-na a ni a, Mizoram hmun hrang hrangah lawm a ni.
7th. Friday : MZP leh MSU huaihawta tunhnaia Mizoram Assembly Secretariat hna lâk dân duh loh avânga hna lâk tawh sût (cancel) leh ngiatin Aizâwl khawpui chhûnga zirlai ṭhenkhatte lungâwi lohna lantîrin Assembly House tualah an pung khâwm.
8th. Saturday : Excise & Narcotics Department chuan Selesih (TMEF Camping Centre bul)-ah heroin kg. 2 leh gram 635 (hâwng 230) leh a neitu nia puh mi pasarih – H Thangngaihliana (49), Vapâr; Kausar Alom Laskar (24), Jaidul Hussain Laskar (20), Assam; Abdul Rahim Laskar (25), Aizâwl Bâwngkâwn; Ajmal Hussain Laskar (21), Uttarkrishnapur; Hamidul Hoque Barbhuiya (30) leh Jakir Hussain Laskar (20), Assam nia inchhâlte an man bawk.
9th. Sunday : Mizoram Kohhran Hruaitu Committee (MKHC) leh North East India Christian Council (NEICC)-te ngenna angin kohhran hrang hrangte chu Manipur-a tualchhung buaina a lo reh theih na’nte, Manipur a rorelna dik a awm theih na’n leh ram puma dan inang, Uniform Civil Code (UCC) tihpuitlin a nih loh na’n te an tawngtai rual.
10th. Monday :
Mizo film star, VL Pêka Zote (42) c/o PK Liana, Bethlehem veng chu typhoid avangin LRM Hospital-ah a boral.
11th. Tuesday :
Zan khat riak tûrin Union Minister of State for Agriculture & Farmers’ Welfare, Pi Shobha Karandlaje chuan Mizoram a lo thleng.
12th. Wednesday : Chêurâl khuaah Lalsângliana (23) chu current-in a man hlum.
13th. Thursday : National Trade Union of Mizoram (NTUM) te chuan Aizawl Press Club-ah an President C. Remtluanga hoin chanchinbu mite an kawm.
14th. Friday :
Mizorama pa chak leh nu chak - 2023 zawnna chu Vânapa Hall-ah a
hmâwr bâwk a ni ta a, a pumpuia pa chak berah Lalhmangaihsânga, Saron Vêng niin nu chak ber chu Lalhmangaihsângi, Dîlkhan a ni.
15th. Saturday : Zo Inspiration Foundation ten Falkland East a Pu David Lalremruata te chhûngkaw chenna in tur mi inphal te thilpek tlingkhawm hmanga an sak chu hawn a niin luah luh zui nghal a ni. In hi June ni 12 khan a sak hna tan a ni a, heti hian luah theiha peih a lo ni ta a ni. He In sakna tura pawisa sen ral zawng zawng hi cheng ₹4,52,355/- a ni a, ti hian an pual a thilpek an dawn cheng ₹273,710/- la chuang chu an eizawn bul tanna tur a ruahman nghal a ni bawk.
16th. Sunday :
Alex Rohluzuala (22), Rahsivêng Lunglei chu Mat luiah a tla hlum a; Teirei luiah Lalfakawma (20), Dârlâk chu a tla hlum bawk.
17th. Monday : Covid - 19 enkawl lai awm chhun pakhat chu chhuahtîr a ni ta a; a vawi hnihna atân Mizoramah Covid - 19 hri vei an awm tawh lo.
18th. Tuesday : Mizo Cultural Artistes’ Association (MCAA)-in kum 25 a tlin lawmna atâna Art & Culture Department leh MCAA ṭang kawpa buatsaih ‘MCAA Silver Jubilee Chheih Lâm Intihsiak – 2023’ Aizâwla neih chu Vânapa Hall-ah khâr a ni ta. Intihsiakna hi category chi hnih (kum 16 hnuai lam leh kum 17 chung lam)-ah ṭhen a ni.
19th. Wednesday :
Assam Rifles leh Zokhawthar police-te chuan Zokhawthar leh Mêlbûk inkârah methamphetamine mûm 20000; chêng 6,00,00,000/- man hû chu Jaynal Uddin (27) leh Fayzul Hague (28), Assam ve vete kut aṭangin an man.
20th. Thursday : CID (Special Branch) leh Champhai District Police-te chuan heroin kg. 3.039 (hâwng 251) chu TK Khupa, Champhai Dinthar Vêng; K Lalrohlua, Mual Vêng Hnahlân; Lalbiakngûra leh Êngzakho, Myanmar ve ve nia inchhâlte kut aṭangin Hnahlân khaw daiah an man.
21st. Friday : Mizo Writers Association (MWA)-in Foundation Day & Thu Leh Hla Kûtpui a buatsaih chu Aizâwl Synod Conference Centre-ah hman a ni a; he hun hi Art & Culture minister, Pu R Lalzirliana chuan a hmanpui.
22nd. Saturday : Assam Rifles leh Custom Department ṭang kawp chuan Myanmar aṭanga lâk luh cigarette ṭhahnem tak chu Chhûngte khuaah bâwm 26; chêng nuai 33.8/- hu an man.
23rd. Sunday : Tuidam leh Tumpanglui inkarah HBKCP volunteers ten Aizawl to Guwahati Service Sumo pahnih aṭangin Kuhva ro bags 22 an man a, an kuhva mante hi tiral nghal vek lovin Police kutah dah a ni a, Custom lamah pek chhawn zui tura ruahman a ni.
24th. Monday : Dam chhûng tâng tûra court-in hremna a pêk tawh, tualthattu, Tuansianmuanga (41), Hnahlân chu Champhai district jail aṭangin a tlân chhuak a; hemi ni vêk hian man leh a ni.
25th. Tuesday : Manipur a Zo hnahthlakte thlavâng hauhin hmun hrang hrangah kawng zawh a ni. Kawngzawhna pui ber Aizawl a neihah chuan Chief Minister, Pu Zoramthanga chuan a telpui.
26th. Wednesday : Assam Rifles leh Excise & Narcotics Department-te ṭang kawp chuan Mualkâwiah methamphetamine tablets 94,940, chêng vaibêlchhe 28.48/- man hu an man a; chumi hnûah Khuanglêngah methamphetamine tablets 87,720; chêng vaibêlchhe 26.316/- man an man leh bawk.
27th. Thursday : North Eastern Council (NEC) bultuma Art & Culture Department leh MZI General Headquarter ṭang kawp buatsaih, ni hnih awh tûr Zoawi Kût – 2023 chu Dâwrpui Multipurpose Hall-ah hawn a ni.
28th. Friday : Supply Minister, Pu K. Lalrinliana chuan Kolasib Vengthar a Urban Health & Wellness Centre a tlawh.
29th. Saturday :
India chuan Asian games khel tur football squad a puang a, hetah hian Mizo midfielder pahnih, Lalengmawia Ralte (Apuia) leh Lalnuntluanga Bawitlung te thlan zingah an tel.
30th. Sunday : Thalai Kristian Pawl Ni, (TKP Day) vawi 72-na a ni a, BCM hnuaia tualchhung Kohhran hrang hrangah urhsun tak a hman a ni.
31st. Monday : C. Lalremruata (36) s/o C. Lalsangzuala, Tualcheng khua chu chawhmeh zawnga ram a kalnaah sapel mi, Romana, tualcheng mi vêk chuan Sathar emaw tiin a kap palh a, a awm bawr velah kap fuh in a hmunah a boral nghal.
Comments
Post a Comment