Zing ka tho chiah tihin ka ni pasal hian 'Leitan khamah Sihphir bus a accident a, i kal ve dawn em?' a rawn ti ta mai. Leitan kham dinhmun ka hrechiang ve nasa mai si. Ka rilruah enge an dinhmun tur lam ka ngaihtuah lo hrim hrim. Thi vek tura ngaiin tute nge chuang ang? tih a ni ka ngaihtuah zawk daih ni. Mahni remchan ang angin chetsualna hmun chu kan pan ruih ruih a, chutih lai tak chuan tlangau lo au in accident avanga thi leh hliam an awm nual thu a rawn sawi leh ta. Hetianga chhiatna rapthlak hi Sihphirin kan la tawn loh avangin Pathian remruata ngaih har ka ti hle. Khatih hunlai kha mahni tawka ka intih rau ve lai a ni a, thil engkimah tawngtai phawt ka duh thin. Kha boruak zetah erawh kha chuan tawngtai a lang tlatlo.
Mahni remchan ang angin chetsualna hmun panin kan kal hlawm. Motor lian thawhchhuah pui an awm a, chuan phallo a, thawl taka tlan lah bo lo. Durtlang damdawi in tual pawh Sihphir mipuiin kan al hneh hle a nih kha. Mi chuang te dam an awm kan ring hlawmlo a nih hmel, Biakin veng nu pakhat chu a lo tap rawih rawih mai a, a monu chu a thi ngei turah a ngai hmiah mai. Mahse, hemi tum hian a monu chu motor dangah a lo chuang ta hlauh a ni awm a, a tap sual chiang viau niawmin an sawi. Thil tisual rau rau-ah a lawmawm viau awm e. Mahni rik rikin kan ri a, motor chetsual dan chu kawngthlanga liam niloin kopang su mai a lo ni zawk awm a. Kawngthlangah hian a liam teuh viau nghe nghe niin a hmuna lo hmutu te chuan an sawi.Thi pawh pakhat chiah a awm avangin thi vek tura ngai tan chuan thu lawmawm tak a ni.
Motor hi a break lam a chian loh avanga ding mai theilo a lo ni a, driver Pu Lalrinchhana s/o Zirliani, Venghlun (muang ten chawl se, tn 16112018) hi a fakawm thlawt. An sawi hmangin chiai miahloa motor khalhin a mi chuangte himna ngaihtuah ran chungin motor a khalh a, kawng thlanga tlak a pawi tur zia ngaihtuah chungin kopang su a din mai theih a in beisei. Kopang chu a'n tai hrawk a. A ding zo tlatlo. Hetah tak hian a ni driver tha a nih a chian na chu. A din theihloh hnu pawhin riru fim a pu tlat a, a bula leivung kha hel lo selang chuan kawngthlangah a tla ngei in a rinawm. Mahse, leivung chu pangngai taka hel leh te te in kopang chu a su nawn leh a, a ding fel thei ta a nih kha.
Chetsualnaah hian nunna chan pakhat awmin pahnih in hliam na tak tuarin pakhatin a kut, pakhatin a ke a chan hial a nih kha. Hliam dang chu awm ve nual tho mah se nunna atan a hlauhawm an nilo hlauh hlawm a nih kha. Hliam tuarte motor neitu ten an kan reng bakah damdawi in atanga an chhuah hnua pawisa, cheng sangnga lai an pe hlawm te kha a ropui thlawt. A hunlaia a hlut tham tur zia ngaihtuah phei chuan motor chhe bawk si tan chuan an ti ropui takzet a ni.
Tlipna : Thuhmahruaia ziah zawk awm tak a ni awm e. Vawiin hi kha chetsualna rapthlak tak champha (24th Sept. 1998, Ningani) a lo herchhuah leh takah hian facebook lamin kum kal taa kan thu post te 'Your Memories on Facebook' tiin min rawn hrilh leh thin ang hian kha chetsualna kha ka thinlunga a cham reng avangin ka rawn tarlang a ni e. Ka lawm e.
Comments
Post a Comment