1st. Monday : D3 Amrit Cement 22nd Inter Branch YMA Volleyball Tournament 2022 neih zawh tak a, Runner Up, Khawhai Volleyball Team-te chu an khua, Khawhai thlengin Khawtlang mipuite'n khaw dai-ah lirthei thahnem tak nen an lo hmuak.
2nd. Tuesday : Tlawnglui, Lengte kai atanga a chhak lawk, Lengte ram lama Daifim Picnic Spot-a inti hlim haw lam, Venue car chu chesualin Tlawng lui-ah a tla thla a. Car-a chuang mi 2 dama chhanchhuah an ni. Midang pahnih te erawh hmuh an nilo thung.
3rd. Wednesday : Pu H. Lalkhawliana (60) Rawpuichhip khua, Rawpuichhip Middle School Headmaster hna chelh mek chu a car hmang a Aizawl atang a an khua, Rawpuichhip a pan lai in Phunchawng mel 9, Lungverh peng thlen thlak hma deuhah kawng thlangah tlan liam in mi tlawmngai ten a chetsualna hmun atang a la chhuak a, Aizawl lam an panpui hnu-ah a hliam tuarlo in a thi.
4th. Thursday : Aizawl District Boxing Association leh Zonet Cable TV Pvt. Ltd. chuan Mizoram a Amateur Boxing intihsiakna sang ber tur, Mizoram Fight Night buatsaih dun turin inremna thuthlung Zonet Studio-ah an ziak. He inremna thuthlungah hian Aizawl District Boxing Association aiawhin President, Pu Andrew Lalthlamuana'n a hming a ziak a, Zonet aiawh hian Director, Pu LV Lalthantluanga'n hming a ziak bawk.
Mizoram Fight Night hi November thlaa neih tum a ni.
5th. Friday : LBS Suzuki All Mizoram Inter Village Football Tournament, 2022 neih zawh taka pahnihna dinhmun hauhtu, Sialhawk VC Team-te puala lawmna hun Sialhawk Community Hall-a buatsaih chu District Bawrhsap, C.C. Lalchhuangkima chuan khuallian niin a hmanpui.
6th. Saturday : Thenzawl rawlthar, Hmangaihzuala (16) S/o Laltlanzauvi chu Mat luiah a tla hlum.
7th. Sunday : Commonwealth Games 2022 neih meka hmeichhe hockey inelna huanga Kolasib nula, Lalremsiami Hmar telna India chuan New Zealand chu hun pangngai-ah 1-1 a a indraw pui hnuin penalty-ah 2-1 in an chak a, bronze medal an dawng.
8th. Monday : Jeremy Lalrinnunga, Commonwealth Games a India ram aiawh a rit inchawisiak a gold medal latu chuan Mizoram a rawn lut a. Lengpui Airport-ah ama puala lawmna inkhawm sawrkarin a buatsaih zawhah Aizawl khawpui fan kual pui a ni.
9th. Tuesday : Assam leh Mizoram sorkar aiawhte chu Aijal Club-ah ramri buai chinfelna tura hmalakna chungchangah an inbia a, October thlaa inbe leh turin thu an thlung. Assam leh Mizoram ramri chungchang inbiakna-ah hian Mizoram aiawhin Home Minister, Lalchamliama leh I&PR Minister, Lalruatkima te leh Assam aiawhin Border Protection & Development Minister, Atul Bora leh Housing & Urban Minister, Ashok Singhal te bakah state pahnih atanga sorkar mi pawimawh dangte an tel a ni.
10th. Wednesday : Health & Family Welfare Department, Mizoram leh Guwahati Neurological Research Centre (GNRC) tangkawp chuan Aizawl Civil Hospital Conference Hall-ah Stroke enkawl dan chungchang “Continuing Medical Education on managment of stroke” tih thupui hmangin zirhona an buatsaih a. Health Minister, Dr R.Lalthangliana chu khuallian niin Health & Family Welfare Board Vice Chairman, Dr ZR Thiamsanga chu khualzahawm a ni.
11th. Thursday :
Khawzawl District Treasury Office thar, Khawzawl Vengthar a mi chu Deputy Chief Minister, Tawnluia chuan a hawng.
12th. Friday : HS Lalhruaitluanga, kum 33, s/o Hmuaki, Pangzawl chu Ramrikawn Baptist Kohhran Biak In chhungah thi a hmuh a ni.
13th. Saturday :.
Ramchhung state dangte rualin National Lok Adalat chu Aizawl leh district hrang hrang bakah Gauhati High Court (Aizawl Bench) -ah te neih a ni a, thubuai chi hrang hrang sanghnih za nga chuang ngaihtuah a ni. He hun hi Justice, Michael Zothankhuma, Gauhati High Court Judge leh Mizoram State Legal Services Authority-a Executive Chairman ni bawk chuan Guwahati atangin a endik.
14th. Sunday : Bangalore-a neih mek, National Conference of State Agriculture and Horticulture Ministers-ah Agriculture Minister, Pu C. Lalrinsanga'n Mizoram loneitute tan Oil Palm scheme thar chu scheme tha tak a nih thu sawiin Mizoramah Agriculture lama hmasawnna tur a tam thu leh Central Sawrkar tan pawh duhsak bik an tul thu a sawi.
15th. Monday : India Independence Day vawi 76-na a ni a, a lawmna pui ber Aizawl Lammual-ah Chief Minister, Zoramthanga hovin neih a ni.
16th. Tuesday :
Commonwealth Games 2022, Birmingham, England-a neiha hockey-a Bronze Medal latu, Lalremsiami Hmar chu a lo haw a, Mizoram sorkar bultumin Lengpui Airport-ah lo hmuah a ni.
17th. Wednesday : Milari Chhangte d/o Zoramthanga (Chief Minister), Zarkawt chuan amah enkawltu Doctor, Dr. Zonuna chu a (doctor) clinic-ah kut a thlak.
18th. Thursday : Ni hnih awh, State chhunga ramsa te humhalh nan'a, ramsa tih chereu leh sumdawn nan'a hman chungchanga hmalak dan tur inzitrtirna, Chief Wildlife Warden Conference Hall, MINECO a neih chu a tiak ta.
19th. Friday : Mizoram Sorkar chuan Commonwealth Games - 2022 a Gold Medalist, Jeremy Lalrinnunga leh Bronze Medalist, Lalremsiami te chu Vana Pa hall-ah an chawimawi.
20th. Saturday : August ni 17 a Chief Minister (CM) fanu in Doctor pakhat kut a thlak chungchangah CM te nupa chuan Doctor leh mipuite hnenah ngaihdam dilna social media kaltlangin an siam.
21st. Sunday : Durtlang rawlthar panga te chuan Sihphir tlangval, Sakawrhmuituai tlanga lengte an sawisa a, Sihphir Social Reform & Action Committe te chuan manin Police kutah an hlan nghal.
22nd. Monday : Tun thla ni hnih a, car chesual avanga hmuhzui tak loh, Pu Lalfakzuala Chenkual (Pu Mafaka), Chaltlang ruang chu hmuh a ni. Hetih lai hian Pu Mafaka fapa, an chetsual hnua bo ve tho, Malsawmkima (10) ruang chu tun thla ni 17 khan Changsil kai-ah hmuh a lo ni tawh bawk.
23rd. Tuesday : Chief Secretary Conference Hall-ah Samagra Shiksha Executive Committee meeting neih a ni a, kum 2018-23 chhung hian school 52 hawn thar tura ruahman a ni a, tun academic session 2022-23 ah hian school 17 hawn thar tura ruahman a ni bawk.
24th. Wednesday : Bungthuam tlangval, Tongminlal Mangzel (28) S/o Letthanga chu Langkaih lui hleuh kai a tumna lamah a chesualin a tlahlum.
25th. Thursday : Single Use Plastic (SUP) Enforcement Squad, Mizoram Pollution Control Board chuan Lêngpui Airport leh Bairabi rêl chawlhhmunte an tlawh a.Hman khat daih sarâng khap a nih hnûah he khap na hi zawm a ni em? tih an enfiah.
26th. Friday : Ni 21.8.2022 Pathianni zan a Ngur khuaa mipa naupang kum 9 mi boral ta, kutthlaktu nia sawi, a patea, Lalzidinga chu man a ni. Lalzidinga hi nupui fanau pawh nei tawh niin a nupui nen inthen tawhin naupang nu leh pate nen chhungkuain in khatah an cheng ho a ni.
27th. Saturday : August ni 24 a Bungthuam tlangval, Tongminlal (28) S/o Letthanga Langkaih lui hleuh kai a tumna lama chesual ta ruang chu Bungthuam leh Luimawi inkar Koboi luiin Langkaih lui a finna, Goboi lui chhuahah hmuh a ni.
28th. Sunday : West Delhi Mizo Presbyterian Church ni mek chu Mizoram Synod Moderator, Rev. Dr. Vanlalnghaka Ralte chuan kohhran puitlingah a hlangkai. Delhi West kohhran hi September ni 16, 2018 atanga branch church a ni a, tunah hian member 144 an awm mek a ni.
29th. Monday :
Thangpui SSA Primary School a zirtirtu, Zirlai naupang Uniform hlih saka puh, Child Welfare Committee Lunglei in a laka FIR an thehluh avanga Police in an man, Jaila awm mek chu Education Department in Suspend Order tichhuakin, a hna atangin chawlhtir nghal a ni.
30th. Tuesday :
Chief Minister, Pu Zoramthanga hovin Council of Ministers chuan Mizoram sorkar department thenkhat atanga sawrkar inrelbawlna tura thu pawimawh an thlen chu ngaihtuahin CM Conference Hall-ah an thukhawm.
31st. Wednesday :
Tata Yodha 4x4 LPS Pro Fight 2022 chu R. Dengthuama Hall, Salem veng, Mualpuiah tan a ni ta. Zan hmasa berah hian lightweight a khel, C Lalfakawma, Phuaibuang chuan Lalhmingthanga, East Phaileng chu Technical Knockout a hnehin
GIG Motors Fighter of the Night atan thlan nghal a ni.
Comments
Post a Comment