Pathianni chawhnu inkhawm ban a ni a, Krismas thawhlawm khawn a ka kal kualna lamah nu pahnih hian Neihbawih lama in sawisa an awm thu an lo sawi a. 'A va zialo ve' ka ti mai a. Ka ngaihtuah zui lemlo. Zanriah te kan eikham hnu chuan vawiin lama pawikhawih tu te man an nih thu leh V/C house lama an awm thu an rawn sawi ta mai. Rang takin kan nupain kan phei ve nghal a, rin ai takin mipui an lo pung hnem hman.
Tlangval pungkhawm ho chuan V/C house a pawikhawih tute awm chu an hmel hmuh khawtlang hruaitute an ngen. Anni'n an lo remti silo. Tukverh
te chum ri bur burin nasa takin an au bawk. Khawtlang hotute an in lamlet duhlo. Thiltih chi lah ni hek suh. Tlangval ho lah an pung tual tuala, thinrimna pawh a sosang chak hle. Pathianni a nih avanga mipui tam lai tak a lo ni nen, a mawh lo e. Tlangval pungkhawm an tam ang bawkin hmeichhia leh naupang chenin an kat nuk mai. Heng ho hi chuan hmuhnawm thlirin an thlir ni berin a lang.
Buaina bul :
Durtlang rawlthar mi 9 chu chak tak taka kawngpuiah tlanin mi an chhaih kual a. Arpu-a mitthi in zawn an tlan lai pawhin kawng kam tawn tawna mipui pawh zah zoloin an muan phah chuanglo. Lirthei an khalh chak avang hian tuna a chungchang kan sawi tur ber a thlen hma pawh hian pa ho zilh an tawk hial. Nula kawng kal an chhaih nawmnah hle a, tlangval an cho thul. Chutianga buai cho tak (niin a ngaih theih tlat) chuan buaina bul Dumping Ground chhaka kawng mar laiah chuan kan hliam tuar tlangval pahnih te hi an tibuai zui a, anni (Sihphir tlangval) chuan an aia naupang lehchhawng an nih avangin cho let tlakah pawh ngai loin khawtual mi an nih angin an lo hau ve a, anni an lo pawr si. An cho loh thu leh an tlawm thu tlawm taka auchhuah pui ngai khawpin an khawih ta ni awm tak a ni. An thiante an rawn lan tak phak phakah chuan an in khawih zawm ta lo a ni. Sihphir tlangvalte hian khawchhunga an thiante awm zuk punin Durtlang rawltharte chu kawng lakah an lo chang a, hetih lai tak hian khawtlang hruaitu (Social Reform & Action Committee) duty ten hmu fuhin V/C house lamah an la thla ta a ni.
Tlangval ten an hmel hmuh tumin nawr reng mah se khawtlang hruaitu te tan remtih chi a ni silo. Aizawl City Police te an lo thleng a, mipuiin kan chimbuai loh dan tur ang berin kawngka hnaih takah motor an rawn hung. Tlangval ten rem an tih theih ngangloh avangin hung pawnah an chhuak leh rih. Tlangval ho lungawilo an pawng tual tual a, an pung tual tual bawk. Nunau lah bang hek suh. Kohhran hruaitu leh VCP meuh ten zaizap taka tin tura an ngenna pawhin awmzia a nei theilo. Pawikhawihtu, Durtlang lam khawtlang hruaitu te rawn tawngchhuak ve in pawikhawihtute an dem ve takzet thu leh tlanchhuak ta te pawh man an nih theih nan'a hma an lak ve tur thu te, hliam tuarte damdawi in awmna senso zawng zawng an tum sak vek tur thu leh in lama in enkawl zui a ngai a nih pawha an tlanchhiat loh tur thu an sawi pawhin awmzia a nei thei chuanglo. YMA President, Pu Zohminga a rawn tawngchhuak ve leh a, hliamtuar te zingah a tupa a tel ve avanga tlangval te aia a thinrim a inrin zawk mah thu sawiin khawtlang mualpho theihna a nih avanga tinsan tura a ngenna pawhin awmzia a nei chuanglo.
Police an rawn thlen belh ruih ruih a, a khattawkin innawr leh au (haw haw) thawm a ri leh hlut thin. Tlem lai deuha Sawmpali khama kan innawr (Lungdai nen'a innawr kan ti leh ngawt thin) chiam tawh avangin min hlau deuh nge mawni lukhum leh phaw nen an rawn intam rap mai. Harsa lemlo takin hungchhungah prison van chu a tlanlut mai. Tawnhriat an ngah bawka mipui duh ber pawikhawihtute hmel hriat an hlau hle. Police thuam famkim inbela, mask vuahin, eng an ti thim bawk nen, chiang taka hretu tan lo chuan hriat ngaihna an awmlo. Inhlang fel eng ang mah se tlangval ho an tin duh bik siloh avangin an tlanchhuak lui ngam biklo. Khawtlang hruaitu te leh police te ngei pawh au thawm chu awm that thah mah se a tlang theih mai ka rin pui thu ka sawi pawhin an kal lui ngam tlatlo. Tlangval te tlem hun nghakin khuantevikah meuh chuan kal theih mai an inrin thu an sawi ve.
Tlangval lungfing thenkhatin min rawn bekbawr a, kan in dang reng thei dawn lo a, in dan reng lah a tul ber heklo. An hmel hmuh a rem dawnlo tih kan hriat chian bawk avangin tlangval te tin tir dan tur ngaihtuah ve a ngai. V/C, tlawmngai pawl leh kohhran hruaitu te, police hotu te leh Durtlang lam khawtlang hruaitu te ngenna pawh zawm theilo tlangval thinur te tin tir chu thil huphurhawm tak a ni.
Durtlang lam khawtlang hruaitu ten hliam tuarte damdawi in awmna senso zawng zawng an tum sak vek tur thu leh in lama in enkawl zui a ngai a nih pawha an tlanchhiat loh tur thu an sawi kha tawngka mai anih avanga ziaka dah kan phut ta. Ziaka dah a nih chuan tlangval te tin turin kan ngen ve ta bawk. Khawtlang hruaitu thenkhatin kan thiltih chu tul tilo viau mah se ngenna dang pawisak a nihloh hnu a thil har tak pawh nilo, tawngka a sawi vek tawh, ziaka dah mai avanga tlangvalte kiang tur chu thil har a nih loh tur thu kan sawi hnu chuan Durtlang lam khawtlang hruaitu te kan ngen ve ta a, anni chuan lehkhate chu siam ta in zanlai pelh hretah buaina awm zui loin an kal liam thei ta a ni.
Sawizui ang :
1. Tlangvalte ngiat pawikhawihtute hmel hmuh phalloh a nih laiin social media lamah an thlalak a darh nasa leh hle si hi a mak khawp mai.
2. Tlangval pungkhawm leh an che tla vel thlalak remtih loh a ni a, thil tihawm tak pawh a ni. Amaherawhchu, khawtual mi ve ve buai phahna atan em kha chuan a ho lu hret niin a lang. A hnuah social media lamah thlalak leh video en senloh a awm leh tho.
3. Sawi tawh angin a khattawkin innawr leh zeuh zeuh thin a ni. A fawr deuh ten kut thawh te pawh an awm. Hetih laia V/C member, hmeichhia lehnghalin kut a tuar ve erawh kha chu a zialo khawp mai.
Punkhawm kha thil tul a ni em?
Mi thenkhatin hetianga punkhawm hut hut kha khaw tan a zahthlakin a mualpho thlak thu an sawi. A dikna chin awm bawk mah se hmanlai chuan khaw mi te ralin an bei a, ral a te man an nih tum chuan lal tualzawlah an daha, tlangval leh nunau chenin diriam takin an en luih luih thin a nih kha. Tuntumah pawh hian kan tlangval sawisatu te chu man an niin lal tualzawl (VC House)-ah kan chhuakkhawm ni maiah ngai ila a tha mai awm e. Tin, hetiang a kan punkhawm chiam hian damlo te an dam phah loh thu sawi an awm bawk. Damlo leh an chhungte tan hetianga an thlavang hauhtu thahnem tak min hmu kha an lawm hle ang tih a rinawm.
Dawtsawi a tul kher em?
Kum 2013 a Sawmali khama Sihphir tlangval pakhat Lungdai hoin kut an thlak chungchangah boruak ti alh thei a nih avangin police ten thukru in, thil awm dan dik tak an lo thup tawh a. Tuntumah lah khan police lam khan pawikhawihtute zinga mi man ve takloh te pawh an kuta an awm tawh thu kha a sawi ngawt a, Thawhtannni zing chanchintharah lem tuntuma man te bak an lang hauh silo. Prison van a an luhtir hnua an la luhloh thu sawi a awm te pawh kha a zialo angreng.
Engpawhnise, kan tlangvalte tih ang kha khawdanga thleng ni tase an tih ve vek a rinawma, a hunlaiin zahthlakin mualpho thlak viau mah se kan la tanrual zia tarlanna a nih bakah Sihphir leh a chhehvela rawn kal tur misualte tan hmun a awmlo a, mi felte tan lah a thlamuan thlak zia tarlanna a ni awm e.
Kan tlangval kuttuar te pawh an ziaawm tawh khawp mai. Lo dam tha vat turin ka duhsak e. Ka lawm e.
Comments
Post a Comment