KUMTHAR THUTIAM KA TI HLAWHTLING

THUHMAHRUAI : January ni khat a lo herchhuah apiang hian ka hringnunah emaw eizawnna kawngah emaw pawh nise tum/thutiam hi ka nei ve ziah. Tih hlawhtlin chu nei ve zeuh zeuh mah ila ngaihtuah zui lutuk lemloh pawh ka nei nual. Nikum lamah kha chuan heti'a chanchinbu enkawltu te zinga han tel ve takah chuan' tiin Sihphir Diary ziak turin ka in buatsaih a, ziah tur hriat mai loh avanga thil ho mai mai tarlan chang a awm a, ziah tur ber hriatthiam har khawpa thil thlen chang a awm bawk. Nitin thil pakhat zel ziah ka tum avangin buaithlak chang a tam ve hle. DIARY LEH KEI : Kum 1994 kumthar ni a ni a, kan thenawm a ka thianpa pa (Upa Laibat) chuan kumhlui lama a diary ziah dan vel leh diary bu a insak dan, khawvel map, rihzawng leh seizawng tehna hrang hrang bengvarna atan an ziah vel te chu a tangkai dan vel min entir a, tha ka ti hle. Hemi atang hian mimal thil mai nilo in khawvel huap ang pawha thil thleng langsar leh pawimawh te ziah ka ching chho tan a. Exercise bu a ziak mai ka nih avangin nitin ka ziah loh chu sawi loh a thla thla a ziah loh tum pawh ka ngah mai. Kum 1998 a ni a, Aizawl a hna ka thawh laiin ka thawhna hmuna an tlangval chuan diary bu hlui, kumtir lam tlemte (January leh February tlem) chauh la ziahna chu hmu in min pe hlauh mai a, chu chu March thla laihawl vel a ni a, chuta chin chu ziahna a awl vek tawh bawka nitina ka hun hman dan vel chu ka ziak tan ta a. Heta chin hi chu a bu pangngai neiin kumtin ka ziak chho ta a. Zan mut dawnah ziakin nizan thleng khan ka la ziak ta reng a ni. Ram dangah te han awm ve takah chuan Zoram ngaih a na in a chanchin pawh ka ngaihven ve reng. Khawvel thang zelah computer te neiin internet te ka khawih thiam ve ta. Heti'a diary ziah takah chuan tiin keima thil pawimawh ka ziah zawhah Zoram thil thleng chu ka ziak tel ta thin a, kum bi a kimin kum kalta a thil thleng chu thlirletna ka ziak leh thin bawk. Sihphir thil hlui vawngtu pawl (LIDCAS) a lo ding a, chu pawlah chuan tel ve in mawhphurhna hrang hrang kan insiam a, kei chu kumtina Sihphira thil thleng chhinchhiah tura ruat ka ni. Kum thum lai ka chhinchhiah ve tak hnu chuan nikum kumthar thutiam (project) atan diary ziah hi ka neih ta a, thenkhat tan thil ho tak ni mah se kumtluana nitin ka ziak thei hi ka tan chuan thil hlu tak a ni. TLIPNA : Tluang takin Sih(phir) Diary chu ka ziak zo thei ta a ni a, chanchinbu enkawltu nih a thil ka ngaihven piah lamah thil ka hriathnem phah hle. Sihphir tih a 'phir' tih lai ka kualkhung (bracket) chhan chu Mizo(ram) Diary ka ziah a 'ram' tih ka kualkhung ang deuh in Sihphir mi hmun danga awm ka huam tel tir avang leh hmun dang mi pawh nise Sihphir nena in kungkaihna nei ka huam tel tir vang a ni. Sihphir leh Mizoram diary ka ziah thin chungchângah in pawi ka lo sawi palh a ni thei e, chutia'ng thil a awm a nih chuan in mi hriatthiamna ka dil a, thurawn min pek theih chuan ka lawm ngawt bawk ang. Diary ziah chungchangah hian ziah tur chin te hi hriatthiam a har em em mai a, a hnu a enlet tlaklo khawpa ka ziah kimloh chang awm mah se thil ziah chian lutuk avanga pawi a thlen theih zawk chang a awm thei tih ka hriat chhuah phah bawk.