NOVEMBER 2021, KA DIARY

1st. Monday : Huanah bean leh dania te kan va la. 'The Mossada' by Maranatha Printing Press ka chhiar tan. (15/11) 2nd. Tuesday : Maawmin Bilkhawthlir a mi chengkawl zawrh tur a chah. Atei Aizawl a kal bawk si avangin inah ka awm. Pi Darthawmi (85), Lalchullova nu, Dinthar veng chu Asthma avangin a thi. Zanah kalin ka han tlaivar. 3rd. Wednesday : Mitthi lumenna atangin zing dar ngaah ka haw. Chawhma-ah vui thleng kal lehin zan khawhar in hunah ka kal leh bawk. Ka bike nung thei lo chu mechanic, PCa hnenah ka dah. 4th. Thursday : Huanah thlai kan va la. Tlai-ah PCa hnena ka bike dah ka va la. A that tak avangin ka lawm hle. Fabiana fapa chuan covid hripui a kai. 5th. Friday : Lo-ah thlai hmun ka va sam. Zanah Krismas leh kumthar committee chu committee room-ah kan nei. Chumi hnuin chanchinbu chhutnaah ka kal. Hei hi April thla hnua kan chhut lehna hmasa ber a ni. Maawmin health care a renew. 6th. Saturday : Thlah lui (dt. 26/12) a Neihbawia huan sam tur ka han en kha ka han thawk tan. Rs 3,000/-in ka theka dawn a ni. 7th. Sunday : Chawhma-ah Sunday School kan kal. Khawvel Sunday School ni a ni a, hei vang hian hming lam a ni ngailo. Hrileng avangin tun thla bakah kumin atan hming lam loh tur a ni hrim hrim bawk. Kaikim Lawmman pawh sem a ni dawnlo a ni. Zanah ka inkhawm leh bawk. Hei hi April ni 11 zan atanga zan inkhawm theih loh chu tun Nilai ni zan atanga zan a inkhawm leh theih tak avang a ni. Nilai ni leh Inrinni zan ka thuluh nghal mai pawh a. Atei vawksa lei chungchângah Pu Rokungaten a man pe tawha a inngaih laia ringhlela an rawn dil leh avangin a lungawilo hle. 8th. Monday : Huanah thlai kan va la. Nimin lam vawksa chungchângah 'Inpuhna' tih thupuia hmangin article ka ziak. Danga quarry a thawk mi panga in covid hripui an kai. YMA chanchinbu September & October inkawp a lo thleng. 9th. Tuesday : Neihbawi-a ka huan sam ka han chhunzawm, ka zo. 10th. Wednesday : Chhuat carpet vel phah tha in nilengin kan buai. Neihbawia ka inhlawhna pawisa ka dawnga, ka lawm hle. 11th. Thursday : Lo-ah thlai hmun samin ka riaklut. Burma raltlan Synod Camping Center a awm lai chu a thih avangin Sihphir thlanmualah phum a ni. 12th. Friday : Kuhva hmun ka sam a, ka haw. Zanah YMA Community Hall-ah kan comtt. Kum 2022 OB turin nomination OB tanglaite bakah mi paruk thlan chhuah anni a, Pu Duhzuala, Tv Remruata, Marina, Mapuia, U Bawla leh Apuiate ka thlanga, ka thlan te atangin Pu Duhzuala leh Tv Remruata te bakah JS a, H. Mera, AuSawma leh Hruaia Ngente te an tling. Committee banah chanchinbu chhutnaah ka kal. Maawmin Bilkhawthlir a mi chengkawl zawrh tur a la leh. 13th. Saturday : YMA Committee member te thlanmual lane siamin kan hnatlanga, nimin piaha Burma raltlan thi ta thlan kan siam nghal. Zanah ka inkhawm a, inkhawm banah committee room-ah Krismas committee kan thu. 14th. Sunday : Zingkarah Krismas thawhlawm ka khawn. Chawhnu-ah Sunday School ka kal. Maawmi chu chawhnu a nih avangin a inkhawmlo. Tlai-ah kan huan zaute Pa Faka, Treasurer te inah kan comtt. Zanah ka inkhawm. Johanan thu a sawi. A ni hi tunkar chho khan a hnathawhna tur Missionary Training Center, Mission Vengah, a insawn thla a ni. Neihbawi nula pakhat chuan covid hripui a kai. 15th. Monday : Khua a nawmloh avangin inah ka awm nileng. Ka lehkhabu chhiar lai chu ka chhiar chhuak ta a, (1/11) YMA Chanchinbu September & October issue inkawp chu ka chhiar chhuak bawk. 16th. Tuesday : Khua a la nawm meuh loh avangin inah ka awm nileng. Tlai-ah leh zan thimhlimah erawh reivaklo ve ve chengkawl zuarin kan chhuak. 'Hmangaihna avanga mittui tlakna' by Jakob Lalramtiama ka chhiar tan. (17/11) U Rinzuala hnenah chem chher turin ka dah. Mera lu ka mehtira, Maawmin min dum sak nghal. 17th. Wednesday : Zingkarah kawmchhak Pa Ruatate bungrua unload in ka inhlawh. Mi pali kanni. Nimina ka lehkhabu chhiar tan chu ka chhiar chhuak ta. (16/11) Maawmi Community Hall-ah sum enkawl dan leh thiam thil hrang hrang zirin a han training. Kristian Tlangau a lo thleng. URinzuala chuan chem chu a rawn dah ta. Tahtawn niin, Rs 600/- man a ni. 18th. Thursday : Huanah bean ka va lo. Hralh takin kgs 9 a ni. A man a tlawm bawk nen, a manhla lo khawp mai. Kristian Tlangau ka chhiar chhuak a, 'Vullai chulhnu' by Darrokima ka chhiar tan bawk. (25/11) Maawmi nimin lama a training chhunzawm in a kal leh a, certificate dawngin a zo fel. 19th. Friday : Lo-ah kuhva hmun samin ka riaklut. 20th. Saturday : Ka hna ngai ka thawk leh a, ka haw ta. 21st. Sunday : Zingkarah Pathian ram ka khawn a, Chawhma-ah Sunday School kan kal. Tlai-ah Pathian ram kan chhiar a, chumi hnuin Krismas thawhlawm ka khawn. Zanah ka inkhawm. 22nd. Monday : Huanah thlai lain ka va feh a, bean chu a awm tawh meuh lo. Hralh tham pawh ka lolo. Antam tel 23 ka la bawk. 'A hmunah Krismas' tih thupuia hmangin kum 2008 a Bethlehema ka kal chungchang kha ka ziak tan. 23rd. Tuesday : Sawiremtlang samin ka inhlawh. Khawtlang hnatlanga hna pakhat a ni. Atei Aizawl a kal. Arpu lamah covid hripui kai mi panga hmuhchhuah anni. 24th. Wednesday : Tihtur neuh neuh a awm avang leh Maawmi a nawm meuh loh avangin inah ka awm. Zonundangite chhung atangin mi 4 leh Muanpuiite nura hnihten covid hripui an kai. Inrinni zanah boxing PPV a en thei turin Pu Hmuaka te inah Rs 60/- ka va pe. 25th. Thursday : Liana te Serkhan huan samin Perera nen kan zuk inhlawh. Ka lehkhabu chhiar lai chu ka chhiar chhuak ta.(18/11) 26th. Friday : Lianate huan Petera nen bawk kan zuk sam leh a, kan zo. Zanah chanchinbu chhutnaah ka kal. Arpuah bike a chhiar, ka nawr haw tawp. 'Paradise Lodge' by Chhantea Pautu ka chhiar tan. (6/12) 27th. Saturday : YMA Branch committe leh section committee te Sakawrhmuituai a bawlhhlawhte thianin kan hnatlang. Kan zinga Tetei scooty a chhiat avangin Neihbawi, Vala te in thleng ka khalh hawn sak. Vala hian chhoah scootyin min hnuk a ni. Zanah TV (PPV) in boxing kan ena, Mizo pasarih inhnekin pakhat a chaklo. Lianate huanah an huan kan sam hlawh Rs 1,000/- ka la. 18th. Sunday : Covid hrikai an pun leh tak viau avangin Krismas thawhlawm ka khawnlo. Chawhma, chawhnu leh zanah te ka inkhawm. Chawhma leh chawhnu hi pavalai intawhkhawm programme a ni a, hei vang hian Sunday School a awmlo. Intawhkhawm speaker atan Upa C. Ngurthantluanga a ni. Kumthar OB leh committee turte hlanna hman nghal a ni a, au pawh committee member ah hian a tel ve daen a ni. Zan inkhawm ah December ni khat khi World AIDS Day a ni a, hemi puala Social Front thuchah chhiar chhuah a ni. Tlai-ah U Ateate inah kan huan zau committee te kan thu. 29th. Monday : Nu Dini nen huan zaute aiawhin Aizawl kal tura tih kan nihna angin Nu Dinite inah ka pheia, min lo thulhsan leh hnu hne avangin lungawilo takin ka haw. Pa Ruatate balu unload a inhlawhna a lo awm hlauh a, ka thawk ve. Ruatsanga leh Rinhluate an lo thawk sa a ni. Hlawh chungchângah an mi pek zata kan lungawi chiah loh avanga sum kan dil zat ch u kan hlawhtling lo chiang kher mai. An nupa thinur zia chu rapthlak tak a ni. Covid hrikai thar pali awmin an zingah hian ka nu a tel ve tlat mai. (9/12) Inah an in enkawl zui ang. VCM, Nu DRi hnen atangin hun remchanga Sawiremtlang samna tur Rs 1,200/- ka dawng. Hand pump Rs 250/- in Paihte zawrh ka lei. 30th. Tuesday : Sawiremtlang ka han sam. Covid hrikai mi 7 hmuhchhuah a ni.