Pathianni chawhnu her a ni a, zau OB te chu AS, Pi Dini te inah kawnglaih dan tur chungchang ngaihtuahin kan thukhawma, hetih lai vel hian Lunglei leh a chhehvel bakah chhim lam khaw hrang hrangah kangmei a chhuah thu social media-ah a lar hle. Hun a kal leh deuh a, chhim lam mai niloin Zoram hmun hrang hrangah a chhuah thu kan hriat zawm zel. Kan khawngaih thu te kan sawi liam liam bawk.
Kan committee te kan bana, kang tuar khua te tawrh dan report leh video te ka en mek laiin kan member pui, Pu Aua te pafa ram riaklut tur te chuan kan lo an thlen laiin chawhnu dar 4:25-ah Pu Aua chuan min rawn fawn a, forest plantation vel a kan thu leh Pu Thangliana te tan pawha a hlauhawm theih a rin thu a rawn sawi. A biak theihloh avanga hrilh turin min rawn ngen. Tichuan, kei chuan Pu Thangliana chu ka hrilh nghala, dak chhuak nghalin a'n thlir vel pawh a ni mahna, 'a nih saw, a khu vung vung alawm,' a rawn ti nghe nghe. Forest lam hotupa, Saktea pawh ka hrilh nghal a, a lawmawm e ti dawn se thil lawmawm a ni chiah silo, min chhan dan tur a haihchham ve hle tih a tawng dan atangin ka hrethiam mai.
A zan a zanin an nau thenkhat hruaiin zau member thenkhatin chairman, Pu Atea hoin an zui bawk. Hlauhthawnawm vak dawnloa an ngaih avangin an rawn hawnsan leh mai a, tlem azawng erawh riak zui ta an awm tho.
A tukah chinchang ngaihvenin ka va kal a, Bungngaw ka thlen chuan thawm a na ham ham hle. Meikhu a awm nual bawk avangin a rawn kang sang tawh hle a nih ringin a tlanin ka tlan hlawk hlawk a, lo lu ka thlen meuh erawh chuan rin ai tak chuan a lo la hla a, rawn thleng turah ka ngai lo hrim hrim. Forest lam hotu te hlawhfa nen'a an lo kal tak tak takah chuan hlauthawng ve leh hnuhnawhin meilam te chu ka sial thuak thuak a, chumi hnuin plantation lamah puih tumin ka kal thla. Rin ai takin a lo kang zau daih mai. Theihtawpa thelh tuma kan beih hnu-ah thelh harsa tak leh kan huan vel a rawn kai theih mai ka rin tak deuh avang chuan meilam chu zau lehzualin ka han sial leh rih a, chumi hnuin ka tlan thla leh. Kan invaw leh lauh lauh a, zau member dang te kan inpun khawm leh hnuin a theih chin chin kan inhal khalh bawk. Ngaih khat a that takah chuan kei leh forest lam chuan kan hawsana, zinglam dar thumah in kan thleng. Tlem zawng erawh chuan tlaivarin an la veng thung.
Ngaihngam chiahlo, chau kan intih deuh avanga kalloh mai kan tintuah laiin Pu Mahriata ngaihtha theilo chuan lamkal a tir hi a lo ni a, chumi thu rawn thawn dan chuan, "Tunah hian kawng thlang a kang kai leh tawh a, a rawn tawlh zel chuan tumah kan la him chuang lo, engtia hmalak chi nge nidawn, a kal theilo pawhin aiawh in tirh a tha khawp mai," tih a ni ta mai. A tlai la la in engemawzat kan tlanlut lehnghal. Hmun thenkhat kan vawhlum a, thenkhat kan hal khalh bawk. Him khat nia kan inhriat hnu-in zanlai dar minute thuma a rik hmain Pu Mala huan atangin kan rawn chhuaka, darkar khat leh a chanve kan kal hnuin khawchhung kan lut.
Zan rei tak hun kan hman laia kal ve remchanglo thenkhatin ral atanga chanchin an lo ngaichangin in fel, in hah awm kher mai, hahzu in la zuk khawp ang, chaw kan eikhawm dawn nia tih ang chi tawng kan hriat chuan hah a ti dam sang sawng thei. A tak ram a thlen ngei pawh a beiseiawm.
Nilaini zing a ni a, khawtlang hruaitu, V/C te chuan Emergency Meeting neiin thurel pakhatnaah
Bunghmun leh a chhehvel kang mek chu thelh theih a nih leh nih loh te finfiah ni se, ram kang dinhmun a zirin khawtlangah ram kang thelh tura au nise. (Ṭul thut a che chhuak thei turin thalai ten beng lo chhi ila.) Tiin thu an dah. VC te ngenna angin kei leh thenawm pa, Petera te chu chinchang ngaihvenin kan va kal ta a, kan ram kang pawh a rem felin a lang e. Mau puak leh khu vung vung erawh hmun hrang hrangah hmuh leh hriat tur a la awm thung. A lawmawm khawp mai.
He ramkang hi a uiawm hle mai a, sik leh sa thu-ah nasa takin min nghawng thei dawn a, nungcha tinrengin an tawrh bakah thlai a tihchhiat neitu te an lainatawm takzet a ni. Ramkangin a tihchhiat dan tlem azawng : Forest department lampang hmalakna a kang chhe deuh vek a, Pu Thangliana panhnah a kang nasa hle bawk. Pu RC-a ram a kang vek a, a ni erawh chuan kut a la thlaklo thung. Pu Marina ram a kang deuh vek bawk. A ni pawh hian a ram lei thar a ni a, kut a la thlak lemlo a, thlai puitling tlem a zawng erawh a awm. Pu Aua hi an lo inven ve avangin pawi liantham a thlenglo niin an insawi. Kei chu ka him hlauh e. Pi Dini ram a kang vek a, Pu Faka ram pawh tlem azawng a kang na a, a panhnah erawh a kanglo hlauh thung. Pu Sawma huan lu leh mawng lam tlem azawng a kang bawk. Pu Mala huan hi kan halkhalh na lamah thlai pahnih khat bakah a ram a kang chhe nual bawk. Pu Zawma thingthupui hmun a kang deuhvek a, a khanghu te erawh an him hlauh. Pu Tluangtea quarry a kang deuh veka, a lung hmun hrim hrima, a ziaawm. Pu Lura ram pawh a kan vek a rinawm. Thlai a ching lemlo mai pawh a. Pu Nunpuia ram kang a awm nual na a, a ni pawh huan thlai a neihloh lai a ni hlauh. Pu Chhuanga, Pu Nghaktea leh Pu Zawnga te an him bawk.
Duhtawk phawt ang. Inrinni-ah motor kal theih tura kawng siam tum chungchangah ram enfela hnatlan tur a ni e. Pu Dunglena te pafa hnen atangin cheng 35,000/- zet kan dawnga, a lawmawm khawp mai. Kangmei rapthlak tak kan tawrh lai-in chanchin hriat nuam tak a ni.
Comments
Post a Comment