1st. Thursday : Lal Isua mantira a awm zan (venpui zan) ani a, kohhran hrang hrangah inkhawm awmin, kohhran engemawzat chuan Lalpa Zanriah Sacrament an kilho. Synod Moderator, Rev Dr. C. Lalhlira chuan Venglai kohhranah Sacrament a theh.
2nd. Friday : V/C Treasurer, Pi Lalbiakdiki pianchampha vawi 60 na a ni a, chhungkhat leh thenrual tha te sawmin hlim takin hun an hmanga, tlai-ah chawhlui an kilho nghal.
3rd. Saturday : Sihphir branch Kristian Thalai Pawl te chu khawhnuai kawng cement chhungin an hnatlang.
4th. Sunday : Easter Sunday a ni a, kohhran hrang hrang te chuan zingkarah Sunrise Service hun hmangin, chhun leh zan hunah Pathian biak inkhawm an nei hlawm.
5th. Monday : Sehlawh kawnga kalte kawng siam tha in an
hnatlang.
6th. Tuesday : V/C house-ah Gram Sabha neih a ni a, he hunah hian Village Monitoring Committee leh Village Employment Committee Office Bearers tur te thlan a ni.
7th. Wednesday : VCP, Pu Lalropuia Pachuau, MNF General Headquarters Secretary ni bawk chu Serchhip Constituency MLA By-election lo awm turah party campaign pui turin party hruaitu engemawzat nen a zin chhuak.
8th. Thursday : Vanlalruati, (48) D/o Kutdengi, Tamlo Veng chu LRM Hospital-ah 'Ril T.B' natna avangin a boral.
9th. Friday : Aizawl District Volleyball Association 2nd Division Zone - B Season Ending Tournament Chanmari West Volleyball Court-a khelhah Sihphir team A te chuan Albert Volleyball Club, Muanna veng chu 3-2 a hnehin an champion.Trophy leh Rs 10,000/- an dawng a, first division-ah an in hlangkai nghal bawk. Tin, Nelson Zothanpuia s/o Vanlalhriata, Tlangveng chu best spiker atan thlan a ni.
10th. Saturday : Chhungkaw pawimawhna avanga chawlh hmanga rawn haw, missionary, Pu R. Vanlalsiama te chhungkua chu an thawhna hmun Rangamati, Assam panin an haw leh ta.
11th. Sunday : Bial Kristian Thalai Pawl te chu Sunhlu tlangah an bethel.
12th. Monday :
YMA Branch OB, Section tina leader te leh Mizoram sorkar-a Surveyor, Pu V. Lalrindika te chu YMA Conference Hall-ah
House No siam chungchang sawiin an inhmu khawm. He hun hi President, Pu Lallianfala'n a kaihruai a, Map/diagram duangtu surveyor, Pu V. Lalrindika'n Projector hmangin, ruahmanna a duan te a tarlang bawk.
13th. Tuesday : Nl Malsawmdawngkimi d/o Tlankimi, Kawnveng, tunkar Ningani-a Aizawla pasal nei tur chu a chhung ten thenawm khawveng leh chhungkhat laina te sawmin an thlah.
14th. Wednesday : Village Level Task Force chuan Covid-19 thawh hnihna a nasat chhoh zel avangin inkaihhruaina tur hlawm hrang 11 zet a chhuah.
15th. Thursday : Jio company chuan Arpu-ah sim card duh tan a thlawnin an pechhuak a, mi thahnem takin an book.
16th. Friday : April ni ruka thlan, Village Monitoring Committee te chu Pu Lalbiakkima Kawlni te inah chanvo insiam rem a, Chairman atan, Pu Lalbiakkima Kawlni, helama tawnhriat tha tak lo nei tawh chu thlan a ni. Secretary atan Pu Lalchhanhima Varte chu thlan a ni bawk.
17th. Saturday : Sihphir Pastor Bial KTP Diamond Ju-
bilee (Kum 60-na) lawmna chu Sihphir
Kohhran Biak Inah neih a ni.
18th. Sunday : Tripura atanga lo haw, Marina Lalrinfeli d/o Lalmuanawmi, Venglai leh Vanlalruatpuii, Serchhip te chu VLTF ten Covid Care Centre atana an buatsaih, Govt . P/S-III, Tlangvengah khunghran an ni.
19th. Monday : Biaksangi, (82) m/o C. Vanlalpeka, Tamlo Veng chu an chenna Inah 'Cancer' natna avangin a boral.
20th. Tuesday : Arm Wrestling Club ten tun thla ni 24-a tournament siam an tum chu hripui leng mek avangin an thulh.
21st. Wednesday : AH & Vety Department hmalakna in tunlaia vawk hri leng mek, African Swine Fever chungchang zir hona Sihphir YMA conference Hall ah neih a ni. He hun hi AH & Vety Department Sihphir ten an kaihhruai a. Sihphir khawchhunga Vawk vulhtu thlan bik te bakah Sihphir VC leh Sihphir Venghlun VC te hnenah Vety officer Dr Ch Lalṭhafamkima chuan zirtirna a pe.
22nd. Thursday : Bangalore atanga April ni 14 a rawn haw, Lalremruati (23) d/o K. Lalbiakmawia, Venglai chu Covid 19 a lo positive tih hriatchhuah a ni. Amah hi home quarantine lai ani.
23rd. Friday : Venglai Presbyterian kohhran committee chu Committee Room-ah an thu a,
May thla inkhawm hruaitu turin Upa R. Sapthlengliana leh Upa Ch. Sanglura te an ruat. Thil pawimawh dang engemawzat an rel bawk.
24th. Saturday : Branch YMA hnuai a Section pakhat, Chawngbawla Section (Neihbawi lam) te chuan an Section chhung a parawl pakhat chenna In chu an thawm sak. Hei bakah hian a mutbu leh thuamhnaw an suk fai sak bawkin tui dahkhawlna tur Brite Bucket lian tak an lei sak bawk.
25th. Sunday : Vailokawn zau chhunga forest plantation leh a chhehvel chu nasa takin a kang.
26th. Monday : UPHC-ah Venghlun lam mi covid 19 hri kai mi 10 lai hmuhchhuah an nih avangin khaw pumin lockdown puan a ni.
27th. Tuesday : Sorkar-in covid 19 do na kawng a ruahmanna a siam pawisa lo, hmun danga zu lei tum mi 4 te chu Selesiha Executive Duty ten lo man in, VLTF Sihphir hnenah hlan an ni. Dan an bawhchhiat avangin Sorkarin chawi tur a tih zat Rs 1000/- ṭheuh chawi tur a tih an ni.
28th. Wednesday :
VC Emergency committee chuan
Bunghmun leh a chhehvel kang mek chu thelh theih a nih leh nih loh te finfiah ni se, ram kang dinhmun a zirin khawtlangah ram kang thelh tura au nise tih chu Pu Lalchhanhima Varte leh Pu Peter Lalrinnunga, Kawnveng ve ve te chu lamkalah tirin anni hian ram kang a rem ti tih thu an sawi.
29th. Thursday : Zan dar 8:00-ah khawtlang tan chhungtin te a rual a tawngtai a ni.
30th. Friday : Village Level Task Force, Secretary, VC Secretary ni bawk, Pu PC Lalrinliana chuan vanduaithlak taka Sihphir Venghlun lam a Covid-19 positive hmuhchhuah kaihhnawih leh chhan dang avanga hmalak mekna kal zelah thuchhuah hrang hrang a siam.
Comments
Post a Comment