Sihphir 2018

* Kumi'n chhung hian Sihphir khuaah mitthi 36 lai an awm a, ruang pakhat (hnamdang) chu an awmna Assam lamah mi tlawmngai ten an zuk dah nghe nghe. Nupa ṭangṭhen hi 17 zet awmin he'ng zinga 6 hi hmeichhia an ni. Thi hmasa ber chu Pi Lunghnemi (72), w/o C. Lalmawia, Tlangveng, January ni 7 a thi kha a ni a, hnuhnung ber chu Pathianni kaltaa thi nausen, thla thum mi, Lalhriatpuii d/o Lalchhuanawma, Damveng kha a ni. Kumi'n hi kum 2012 hnua Sihphir khuain mitthi kan neih tam ber ṭum a ni a, khami (2012) kum a mitthi leh kumi'na thi hi inzat chiah a ni. Tin, kumi'n chhung hian Venghlun lam pawhin mitthi hi 22 ( leh ruangchhuak 1) an nei ve bawk. * January ni 22, Thawhṭanni zanah Pu Lalbiakzuala h/o Abisag Lalngaihsaki, Kawnveng chu a motor khalha Serkhan khuaa a kal chu an hnunga CM escort party te chuan 'kawng min kian duhlo' tiin kut an thlak a, Pu Biaka hian damdawi in luh ngai khawpin hliam a tuar. Hemi chungchangah hian khawtlang mipui an lawmlo hle a, politics-a inbeihna pawh a thleng zui. Pu Biaka chhungte hian pawikhawihtute hi an ngaihdam theih avangin buaina lian tham thleng zui loin an inrem thei a, a lawmawm hle. * Revenue department chuan khawchhunga inhmun leh ram zawng zawng chu an teh fel. Hei hi Modern Land Record atana tih a ni a, satellite hmanga duan a niin a felfai dawn hle a, kan ram kha engtia'ng pawhin lo danglam (leimin etc.) pawh nise, hmundang daih aṭang pawha a awmna lai tak hriat theihna tura ruahman a ni. Hmun hma zawng zawng hi hetia'ng atana tih theih hi ni se tih chu department lam duh dan a ni na a, sum indaihlohna avangin duh angin hma a lak chak theihloh niin helama thawk tu ṭhenkhat chuan an sawi. In hmun leh ram LSC na tura hmalakna ni'a hriatna awm erawh a ni lemlo a, heta tana ṭul hmasa erawh a nih thu thawktu te chuan an sawi bawk. Engpawhnise, kan ram chin mumal taka siam hi chu thil ṭha tak chu a nih a rinawm. * Kan playground neihchhun chu thildanga hman tumna a awm avangin khelmual tur hmun remchang dang zawn a ni a, khawtlang hruaitu ten theihtawp chhuaha an zawn hnu-ah Neihbawia Pu Rothanga (L), Arpu leh Pu Lalnuntluanga (Tluangtea) w/o Thansiami, Venghlun te ram chu leisakin bulṭan a ni a, tunah hian hna engemawzat thawh a ni tawh a, hmabak erawh a la tam hle. Hetih lai hian naupang ṭhenkhat erawh chuan infiam na'n an hmang ṭangkai hle tawh a ni. * Sihphir khua in hun rei tak kan lo nghah tawh chu a takin a thleng dawn ta niin a lang. Khawchhungah tui connection kan neih ve theih na'n SIPMIU lam chuan theihtawp chhuahin thler tinah pipe lian phum hna an thawk mek a, hun reilote-ah mahni in lum ngeiah tui kan herh haw thei dawn a nih hmel. * Kum 2008 a din, Higher Secondary School, (HSS) Sihphir chuan hun rei tak a lo beisei tawh Lump sum grant in aid-ah hlankai a ni ve ta. HSS, Sihphirah hian tunah hian zirlai 94 (XI-48, XII-36) leh zirtirtu 6 an awm mek a, principal chu Pu Lalrinawma, Arpu a ni. * Khawchhung inkal pawhna kawng hrang hrang siam leh cheiṭhat a ni. Kawng ṭhenkhat RCC a chhun a ni a, step ṭhenkhat checker tile rem a ni bawk. Hmun hrang hrangah street light vuah belh a ni bawk. Khawchhung hmel pawh a ti mawi hle. Chhunzawm zel tura hma pawh lak mek a ni. Tin, Arpu, Kawnveng leh Neihbawi a bazar te chu siamṭhat hna thawh mek a ni bawk. * Mizoram chu sawi loh, India ram pawha la awm ngailo, Development of Eco-Adventure Circuit Aizawl hmalakna a Skywalk siamna tur lungphum chu April ni 3 khan Sakawrhmuituai tlang chhipah a changtu Minister, Pu John Rotluangliana'n a phum. He hunah hian bialtu MLA, Pu R. Lalrinawma, Deputy Speaker ni bawk leh helai hmun ṭhenkhat hi Lungdai ram a nih ve tho avangin Lungdai lam (Tuirial constituency) bialtu MLA, Pu Hmingdailova Khiangte bakah Pu Lalrinliana Sailo, MLA te an tel bawk. Sawi tak angin helai ram hi Sihphir khaw ta bik a nih loh avangin hemi ni pawh hian chanvo insiam rem a ni a, Sihphir lam chuan thingpui buaipui a ni. Skywalk hi meter 25 a sei tur a niin kham ko-ah 'U' angin a va kual dawn a ni. Helai hmunah hian visitor's center, bamboo craft & souvenir shpo, nature trail, viewing gallerry, camping ground leh watch tower te a awm tel bawk ang. A hmun hi motor-a kal theih a nih dan loh avangin a panna tur hian step bakah ropeway hman tur a ni dawn a ni. Tunah hian hna hi thawh mek a ni a, engtikahnge an zawh dawn hriat a nilo. * Sihphir ram, Sakawrhmuituai tlanga Batminton High Altitute Training Center sakna tura Tata Trusts & Mizoram Batminton Association te hnena, Sihphirin ram kan pek avangin Balipara Foundation, Assam chuan Eastern Himalayan Sport Developement Award chu November ni 2 khan Gauhati-ah min hlan a, award hi VCP leh secretary ten an zuk dawng a ni. Thusawi tura sawm a nih angin VCP, Pu HVL Zarzoliana chuan english-in thu a sawi nghe nghe. Ram hi kum 50 chhung atan cheng 1/- a hmantir a ni a, hemi hnu hian tih danglam emaw tih tawp theih a ni ang. * Dt. 28.9.2018 khan Govt. Sihphir High School tual zawl a MLA fund hmanga siam Basketball Court chu fund petu Bialtu MLA, Pu R. Lalrinawma, Deputy Speaker chuan a hawng. He hun hi V/C te leh NGO hruaitu bakah High School leh Higher Secondary School zirtirtute leh an naupangten an hmang a. Sihphir Basketball Club ten Friendly match an khel bawk. Technical report an pek atanga a lan danin Basketball Court hi 31.7 mtrs. a thui, 16.7 mtrs. a zau a ni a. June ni 18, 2018-ah hna thawk tanin, September ni 21, 2018-ah an zo. Fibre board an hmang a, a siam zawh nan a senso zawng zawng chu Rs. 750,000/- a ni. Basketball Court changtlung tak a awm ve ta hi khawtlang hmasawnna zel a ni a. Fund petu bialtu MLA a fakawm hle a ni. Sihphirah hian Sihphir Basketball Association tiin pawl mumal takin a ding a, an pawl President chu Vansangliana a ni. Tlaiah hian an inkhel ṭhin a, hmundangah tournament khel te pawhin an chhuak ve ṭhin a ni. * Sakawrhmuituai tlanga bawlhhlawh paihna (dumping ground) chu cheiṭhat a ni a, bawlhhlawh paih hnu rawn leng chho leh ṭhin danna siam a niin motor aṭanga bawlhlawh paih a nawm zawk nan leh chetsual hluhawm lo tura siam a ni. * Sihphira a hmasa ber ni turin Sihphir Arm Wrestling Association chuan Arm Wrestling Tournament September ni 15 khan Twin Market, Kawnvengah a buatsaih a, weight category hrang pariata ṭhen a niin mipa veilam leh hmeichhia (open) a awm bawk. A pumpuiah Pauthianlala, Kawnveng chu pakhatna a ni. Tournament hi V/C te sponsored a ni. * Central YMA huaihawtin hengah te hian kan che chhuak: 1/10: Lalramliana (28), Bilkhawthlir mi, Selesih a an chhungte hnena rawn zin chu a bo a, branch hrang hrang te hnatlang tura ruahman a nih angin hnatlangin mi engemawzat thawhchhuah a ni. A ni hi 3, October-ah Selesih tlaklama an thlanmual ramah thiin hmuh a ni. 10/10: Chakma Autonomous District Council ṭhiah duhzia lantirna kawngzawh in. 6/11: Chief Electoral Officer thiltih dana lungawiloh avang leh Mizoram aṭanga sawnchhuah ngiata hnam hnatlang neihnaah. * Venghlun lama thlai siam ṭhenkhatin thlai ṭhatna tura damdawi an hman uar deuh avangin thlai-ah rim a nam chhuak a, hei vang hian thlai te hi paih a ni. He thil hi social media lamah a lo darh tak chiam mai avangin khawpui-ah kan thlai te a hnawng phah hle. Tunlaiah chuan mi tam zawkin damdawi kan hmangin a rinawm. Chintawk hriat a ṭul hle. * Sihphir Hmarveng Kohhran biak in sak ṭhat, cheng nuai 58/- zet senna chu Aizawl Hmar Presbytery Moderator, Upa C. Lalrinthanga chuan a 1st. November khan a hawng a, tlaiah a lawmna ruaiṭheh nghal a ni. Hmarveng kohhran hi November ni 1, 1989 khan Neihbawi Preaching Station tiin Sihphir kohhran aṭangin a indang a, tunah hian kohhran member 340 (dan zawhkim 215) awmin nemngheh leh tualchhung upa hi pali ve ve (8) an awm mek a ni. * 7th. Mizoram Legislative Assembly Election 28th. November a neih chu Sihphirah pawh boruak muanawm tak hnuaia neih a ni a, Sihphir V/C huamchhung bikah hian polling booth hi pathum (Arpu 2 leh Kawnveng 1) siam a niin hetia'ng hi booth tina voter zat leh vote tlak dan a ni: booth-I Kawnveng voter 1018, tla zat 891, booth-II voter 1139, tla zat 988, booth III, voter-914, tla zat-776 a ni a, Venghlun lamah hian voter 2040-ah vote 1753 a tla thung. Kan bial Aizawl East-I ah hian candidate paruk awmin MNF candidate Zoramthanga (party president) chuan vote tla zawng zawng 19551 aṭanga 8358 hmu in a tling a, a awmna party in hnehna an chan bawk avangin Chief Minister a ni zui ta a ni.