MASI

 Atira Pathianin lei leh van a siam lai khan ‘MASI’ hi a la ngaihtuah thleng lo a, ni ruk nia mihring a siam lai pawh  a la ngaihtuah thleng hek lo.

 Pathian ruahman loh ang takin A siam mihring te chuan Pathian dan bawhchhiain thei ei thianglo eiin a chhia leh a ṭha an lo thliar hrang thiam ta a. Tichuan, an thlah te kan nih avangin misual vek kan lo ni ta.

 Juda-te chuan Eden huanah khan Evi leh Adama te khan nikhat niah an bawhchhe nghal niin an sawi. Tak tak nim’aw?! Finfiah theih lah a ni tawh si lo. ‘Pathian hian engkim a ti thei’ kan tih rual hian a siam mihring ten an lo bawhchhiat avang khan a inchhir em em a, tih theih loh neiloa kan sawi ṭhin Pathianin tih theih loh a neih chu a tih tawh chu ti lo angin a awm leh thei tawh lo. Chuvangin, keini pawh kan thiltih ṭheuhah ‘nakinah kan la inchhir ange'm?’ tih ngaihtuah chungin Pathian rawn chung zelin thil i ti ṭhin ang u.

 Bawhchhiatna avanga misual kan lo nih tak avangin kan thih hunah setana leh a ho te tana siam hremhmun kal mai tur kan lo ni ta. Chu chu Pathian hian ngai ngam loin a fapa Isua chu kan tan a rawn tir ta a. chu a fapa chu mihring angin a lo piang a, chu a pian champha chu ‘MASI’ kan lo ti ta a ni.

 Mi ṭhenkhat chuan Pathianin kan tana a fapa a rawn tirh hi sawi nepin ‘Pathian meuh tan te chuan a ho e. Rei lo teah a lo kir leh dawn tho a,’ an ti ṭhin. Mawl taka ngaihtuah chuan a dik hmel viau. Mahse, kan chhungte ni hnih khat lek chama an kal bo dawn pawhin kan lungngai em em a ni a, Pathian thil thlawn pek hi a hlu thlawt a ni.

 Masi a lo thlen dawn hi chuan uluk takin kan lo in buatsaih a, kan thil neih ropui thei ang bera inthuamin thuamhnaw pawh a thar neih ngei kan tum ṭhin a nih hi. Rawngbawltu ṭhenkhat hian thuamhnaw thar kan lei ṭhin hi an dem fo ṭhin.Khawiah emaw kan kal dawn a emaw mi pawimawh tak kan hmuh dawn emaw chuan a ṭha thei ang berin kan inthuam ṭhin a nih hi. Chuvangin, Pathian fapa meuh chawimawi tur hi chuan a ṭha thei ang ber hi a phu a ni tih hriain thawmhnaw thar neih hi i inthlahrung lo ang u. Amaherawhchu, kan khawsak mil tawk erawh hrethiam ila.

 Krismass leh kumthar vuakvet vel a zo a, kan zawhna dawn tlanglawn tak chu ‘I hmang nuam em?’ tih a ni fo. ‘Ka hmang nuam loa, ka hmang ṭha’ kan ti chawk bawk. Kan hman ṭhat chuan kan hmang nuam tihna ni mai awm tak! Setana lawmzawng chauh hi emaw nuam tih loh tur. Pathian duhzawng tih hi a nuam ve tho tih hria ila, Pathian hian Thuhriltu a a sawi angin ṭhatlai kan chen hi a phal a, hlim taka kan awm hi a phal a ni tih hre thar leh ila, kan nuam tih zawng hi ngaihtruah chiang ang u.

 ‘U ama’ kan tih mai ṭhin KHB no 81 naa ‘Ringtu zawng zawng te u’ tih hla kan dawnsawn dan hi a mak ngawt mai. A thu chu sawi zau ka tum lemlo.

 Chang thum a awm a, a tlar tawp ber zelah ‘Amah i fak ang u, Krista kan lal’ tih a ni. ‘amah i fak ang u’ tih bik hi sak nawn tur a ni tih kan hria. Kan sak nawnnaah chuan ‘U amah’ tiin kan lam ta a. Hebrew dan takah a tawpa ‘H’ hi lam ri tello in ‘u ama’ tiin a ri ta a, MASI sawi nan kan hmang ta mai ṭhin a ni a, a mak angreng ngawt mai.

 Krismass hi Mizoṭawng in ziak mah ila, sapṭawng aṭanga lak a ni a, ‘MASI’ tih hi a Mizo ngawih ngawih a ni. Chuvanga rawn hmang pawh ka ni reng e.

 Masi leh kumthar hlim taka hmang ṭheuh turin ka ṭhiante zawng zawng ka duhsak a che u.