England rama rawngbawla awm, Pu Zaichhawna chu email hmanga biain England rama zin ka tum thu leh min lo dawnsawn theih ka beisei thu sawiin keimah min hriatna turin ka insawi nghal. Min hre chiahlo na a, ka pa hming ka sawi erawh chuan ka pa chu a lo hre hlauh mai thung. A nupui erawh chuan a unaupa, Lawma nen kan inkawm thin avangin min lo hre viau mai thung. A nupui hi kan VCP hlui, Pu H. Rohmingliana, Biakin veng farnu a ni.
Tichuan, ka beisei ang ngeiin min lo buaipui theih tur thu a sawi ta. Ka lawm ngei mai. England ram khawpui, London leh an awmna, Birmingham khawpui vel fan dan tur te kan sawi nghala, a nghahhlelhawm duh kher mai.
Ka thawhpui pa hnenah chuan England lama kal ka tum thu leh thlawhna ticket dawra min kalpui turin ka sawm. Kan kala, flight awm dan vel kan en lai chuan England hming sawi lo a, London ti hlira a lo inziah tak avangin a hrethiam lo hle. 'England-ah ka kal dawn i ti sia, London hlir in sawi leh bawk sia' tiin min zawt nghe nghe. England khawpui chu London a nih thu a hrelo a lo ni.
Naupan laiin Kristian Thalai chanchinbu ka u lak ka chhiar ve thin a, a tawp lama thungaihnawm huang kha a thupui ang ngei khan ngaihnawm ka ti hle thin. Chung zinga Lady Diana chanchin an ziah chuan min hneh hle. A chanchin ngaihnawm tak tak ka chhiar zui phah ta fo.
Kum 1997 a Ramthar centenary kan lawm, chawhma inkhawm bana ka thu hriat zet chuan min thawng ngei mai. Diana te car accident avanga an thih thu a lo ni. Ka hnuk a khawih zar mai. Dik taka sawi chuan min hringtu, ka nu boral aia ka ui loh bik awm ka hre chuanglo.
England ramah ka kal a nih ngat chuan a thlan tlawh ngei ka tum thin.
Kal tum hun a lo inher chhuak ta. Sipai tang tura ambush ka nih tak thutah chuan tum ang ngawtin hun ka nei thei talo tawp mai. Pu Zaia te tlawh chu sawi loh London a ka hmun tlawh tum pawh chhawk then a ngai ta zawk hial mai. Heng te avang hian Lady Diana thlan pawh tlawh ngaihna a awm talo a ni. Manilomaha mittui sen ve hrim hrim tum tehlul nen.
Ziakmi, Darrokima'n 'Thih sak pawh ka ngam' tih bu a 'Leitlangpui tualah ka tap leh lo' tih a Lunglei a zin chuan Lunglei lam thu leh hla lama mihrang mual liamta, C. Thuamluaia leh Lalzova te thlana tah ngei a tum thu a sawia kawng laka harsatna a awm avanga an zin leh theihloh chungchang a sawi kha entawnin Lady Diana thlana ka tah leh loh thu ka han sawi ve a ni e. A ni kha chu kawng chhia avangin a kal pawh a kal talo hrim hrim kha a nia, kei erawh tum angin awm ta chiahlo mah ila, a ram chu ka thlawk lut ve ngei alawm.
Comments
Post a Comment