FEBRUARY 2016, MIZO(RAM) DIARY

 

1st. Sunday : Roneihtluanga s/o F. Laldintluanga (24), Lunglâwn, Lunglei chu Mat lei aṭanga zuangthla in a thi.

2nd. Monday : January ni 31, 2026 zân aṭanga chin hriat loha bo, Philip Lalfakzuala s/o Lalramlawma (39), Khumtung khua chu an khua aṭanga kilometre chanve vêla hla kawng thlang leivûng paihnaah thîa hmuh a ni.

3rd. Tuesday : Thingsai Police Station-a thawktute’n Thingsai leh Cherhlun inkâr, New Ngharchhîp panna pêngah Lalêngmâwia (47), Sêrchhîp P&E Vêng leh Lalchhanhima (21), New Sêrchhîp-te hnên aṭangin heroin gram 88.4, chêng 2,65,200 hûa chhût an man.            

4th. Wednesday : Central YMA hnuaia ruihhlo do pâwl (Central Anti-Drugs Squad) chuan Aizâwl khaw chhûng hmun hnihah heroin hâwng 30 an man.

5th. Thursday : Ni hnih awh tur, Artificial Intelligence (AI) Regional Pre-Summit, Indian Institute of Mass Communication (IIMC), Aizâwla buatsaih chu ṭan a ni. 

6th. Friday : Saitual Police-te’n car pakhat, Champhai lam  atanga Aizâwl lam pan aṭangin methamphetamine kilogram 17.724 an man.

7th. Saturday : Lalliantluanga h/o Lalnunziri (66), Mission Vêng, Aizâwl, Maubuanga khawsa mêk, a ui bo zawnga ramhnuaia a kal chu electric current man avângin a thi.  

8th. Sunday : Presbyterian kohhran hnuaia bial kohhran hmeichhe inkhawmpui, Zirtawpni zan atanga tan chu a tiak.  

9th. Monday : R Lalawmpuia building, Bawngkawn a mi chu a kang. In kang hi plastics item damdawi dawr atan tea hman a ni a, bungrua cheng nuai 40 man vel a kang nia chhut a ni.  

10th. Tuesday : December 21, 2025 atanga a chin hriat loha bo, Ngurthanmawia Sailo (30), s/o Lalliana Sailo Lunglei Farm Veng chu Lunglei Ramthar Veng huamchhung Tuilut lui kamah thi a hmuh a ni.

11th. Wednesday : Pu Lalnghinglova Hmar, Minister of State, Sports & Youth Services Department chuan 7th. Senior National Muaythai Championship 2026 neih zawh taka Mizoram tana medal 12 late chu MINECO a a office-ah lawmpuina hun a hmanpui. India rama Muaythai inelna sang hi January 22-25, 2026 khan Hyderabad, Telangana-ah neih a ni a. Hetah hian Mizoram in player 11 tirin mi 10 in inelna hrang hrangah medal 12 (gold - 5, silver - 3 leh bronze -4) an la a ni.

12th. Thursday : Minister, Pu P.C. Vanlalruata chuan Mizoram Urban Co-operative Development Bank Ltd. Branch thar, Aizawl Bawngkawn West a mi chu a hawng.  

13th. Friday : Kum kalta a Under Secretary, GAD thuchhuah angin Mizoram sawrkar hnuaia hnathawkte pisa kai hun chu February ni 16, 2026 (Thawhtanni) a atanga October ni 2, 2026 (Zirtawpni) thlengin zing dar 9:00 AM to 5:00 PM a nih tur thu tarlan a ni.

14th. Saturday : Mizoram Sawrkar hnuaia Sports & Youth Services Department leh Innovations India ṭangkawp in an buatsaih, Aizawl International Half Marathon chu khawvêl hmun hrang hrang aṭanga Aizawla lo kal bâkah, tualchhûng mite nên mi 3000 bâwr vêl an tlân a; he intlânsiaknaa mipa inelna kilometre 21-ah, Kenya tlangval, Kemboi Kevin Kiprono chu tlân chak berin dârkâr 1:06:28 chhûngin a tlân thleng a; hmeichhiaah Renu Singh (Uttar Pradesh, India) niin dârkâr 1:21:22-ah a tlân thleng bawk.

15th. Sunday : Chhingchhip Venghlun daiah Truck, buhfai phur  chesualin, Gospel Lalhmingthanga (32) Phullen khúa chu a thi. Motor hi kawng thlang lamah a tlan liam a, metre 100 vela thui a lum a ni. Driver hi a mah chauhin a chuang a ni.

16th. Monday : Kolasibah NHIDCL leh an hnuaia contractor-te'n kawng an siam dan duhkhawp loh avangin kawng an zawh. Hetiang a nih avang hian police te nen pawh nasa takin an innawr.

17th. Tuesday : Mizoram Legislative Assembly Budget Session chu ṭan a ni a, Larsap Gen. VK Singh chuan Mizoram sorkarin intodelh a tum thu a sawi. Tun ṭum session hian March 16, 2026 thleng a awh ang.

18th. Wednesday : Congress Thalai te chuan Chawlhhmuna Chief Minister, Lalduhoma in sak lau chu a hmunah tlawhin an zirchiang. Thuchhuah an siama an tarlan danin, 'kum 2021-a Serchhip By Election-ah khan tuna CM hian, kei hi pawisa engmah ka nei lo. Bye-election hi ka tan a huphurhawm lutuk, General Election-a ka leiba pawh ka la rul zo lo, tiin dinhmun tha lo leh rethei, khawngaih thlak takin a in sawi a. Khatiang khawpa pawisa nei loa insawi khan Chief Minister atana lakluh Swearing-in a nih hma hauhin a chenna tur Babel in sang sakna turin tlang a rawt nghal a, thla khat chhung teh meuh zing 9 atanga zan dar 10 chhunga in hmun chhum lo chat lovin a lai zui leh nghal zat thei leh si hian Mizoram mipui mak tih leh rinhlelh a hlawh nasa hle a. Lengpui ram hralh chungchanga a hralhna man an thlakhlelh thu a sawi leh ZPM sorkar hlima ram hralh tur hmanhmawh phelenga file an kal tir khan Chief Minister in sak hi a in zawm ngeiah mipuiin an ngai a ni' tiin. He Building Drawing hi Hrangthanga Zote (R. No A/AMC/2011/13) niin, a neitu hi Ruata s/o Lalduhoma a ni. Building hi Ground Floor tel lovin Mizo chhiara chhawng 6 tura duan a ni a. Ground floor hi 66 m2, 1st Floor 150 m2, 2nd 226 m2, 3rd Floor 352 m2, 4th floor 443 m2, 5th floor 504 m2 leh 6th Floor 504 m2 niin building pumpui zau zawng (area) hi 2245 sq.m a ni.   

 

19th. Thursday : Tlabung Chawnpui Venga National Highway kawngpui laih mek chu, JCB in a laih laiin chhak lam ațangin lei nasa takin a min a, hei hian in pahnih chimpuiin, mi pali an hliam a, damdawi in panpui nghal an ni. 

20th. Friday : Mizoramin state nihna (statehood) a neih champha, State Day a ni a, Mizorama district hrang hrangah State Day of Prayer tia hun hman a ni. A hmanna pui ber, Lammualah chuan Chief minister, Pu Lalduhoma'n 'Ka thlarau zawkin le' tih hmanhin thuchah a sawi.

 

21st. Saturday  : Thenzawl Vengthar naupang pathum, H Lalhriattluanga (9) s/o H Laldawngliana, Lalmuansanga (9) s/o Lalthangpuia (L) leh C Lalbiakhlua (7) s/o Lalfakzuala te chu an khaw dai a dilah thi a hmuh an ni. An leng chhuak an hawn mailoh avanga an chhungte mangangin an zawnna lama hmuh an ni.

22nd. Sunday : Lalchungnunga kum 26, s/o R. Vanlalruata, Zemabawk East chu a bike khalh lai in motor a sut avangin a boral.

23rd. Monday : Bêlthei hmeichhe naupang, Lalramthari chu a naute nêna an pipu suihah che sualin a inkhai a, a boral.

24th. Tuesday : Pu Mc Lalmuanpuia te nupa, Siahatlah -III te chu Noaotlâh (Siaha District) bulah motor 909 in an chesuala, a hmunah an boral  nghal.  

25th. Wednesday : Aizawl Municipal Corporation (AMC) buatsaihin  AIZAWL DAY lawmna programme chu Lammualah hman tan a ni. He hun hian ni 28 thleng a awh ang.                 

26th. Thursday : Pathianni thleng awh tur, Kristian Ṭhalai Pawl general conference vawi 61-na chu Saitualah ṭan a ni.

27th. Friday : Keifang dai, Champhai Road, Keifang atanga Km 7 velah truck, MZ 04 - 0405 chu kawng chhak kawrah a tlan lutin a chesuala, chuang pali zingah Mualkawi nu, Pi Lalrinawmi (43) W/o Lalthanzawna chu a hliam tuar lovin a boral. Midang pathumte pawh hian hliam na vak lo an tuar ve hlawm bawk.

28th. Saturday :    

Tourism minister, Lalnghinglova Hmar chuan Aizawl leh a chhehvela khualzinte’n an tlawh ṭhin hmun, heng : Sakawrhmuituai tlang, Durtlang North, Sakeikhawthlir (Durtlang), Muthi leh Laipuitlang te a tlawh a, Tourism department hotute’n an ṭawiawm. Minister chuan khualzinte tlawh tam hmunte chu khuarel mawina tichhe lo thei ang bera chei ṭhat tum a nih thu a sawi.