1st. Thursday : Pu HS Lalhlimpuia h/o Lalremmawii, Damveng, Synod Hospital, Durtlanga
Pharmacy Assistant chu pension-in a chawl.
2nd. Friday : Kawnveng scientist tia hriat lar, Pu Lalramzauva rocket siam chu twin market tual atanga kah chhuah a ni.
3rd. Saturday : MHIP te chuan a tul apianga an hman atan TNT-ah cheng 10,000/- an pe.
4th. Sunday : Kum 2026 chhunga Sihphir Branch YMA hruaitu tur chu YMA hall-ah thlan a ni. Inthlanna hi post by post a inthlang loin mi paruk thlan chhuah phawt an ni a, thlan chhuah te hian Pu Vanhnuaithanga in, Tlangvengah post an insiam rem nghal.
5th. Monday : Sihphir lelte zinga, J. Lalruatsangi'n YouTube-a a dah chhuah, 'Hmangaih kan ni' tih music video chuan 1 million views a nei tling ta. He hla hi Jonathan Lianhna phuah a ni a, September 27, 2025 khan YouTube-ah dah a ni.
6th. Tuesday : Kawnveng Transformer chu a kang. A chhiat nasat hmain thelh mih a ni.
7th. Wednesday : Sihphir Pastor Bial Kohhran Hmeichhia te
chuan ‘Khaw hlan tawngtai’ Sihphir
Hmarvêng Kohhranah an nei.
8th. Thursday : Zoramtharnghaki d/o Laikunga,
Kawnveng leh Lalchhanchhuaha s/o Lalthanpuii, Bilkhawthlir, Tuitha Veng te chu Bilkhawthlirah an innei.
9th. Friday : Pu Changliana, Venghlun quarry, Mota lui bula mi chu a chim a, a quarry leh a bula hnathawka lo awm lai mi pali chu lung hian chhilhin mi pathum an thi a, pakhatin hliam na tak a tuar bawk.
10th. Saturday : Nimin lama quarry chimin a chhilh mi pahnih te phumna turin thlan pahnih laih a ni.
11th. Sunday : Sihphir pastor bial enkawl tu tur, Rev RC Lalthavula, Darlawn chu Pastor R. Lalremruata, Sihphir Vengthar bialtu chuan a induct. Pastor thar hi Kolasiba FG&CC a thawk lai a ni.
12th. Monday : Venglai Kohhran te chu an Biak
In sak mek hmunah leivung senghawiin an hnatlang.
13th. Tuesday : Mota lui bula Quarry chim a ruang zawnnaah DM&R officer te, Sihphir Venghlun VCP leh YMA hruaitu te an tel tha hle. Ruang zawn hna thawk turin Hitachi thar a lo thleng bawk.
14th. Wednesday : January ni 9 tlaia Mota lui a quarry chim avanga ruang pahnih la tang zinga Solen Tudu, Jharkhand lam mi ruang chu hmuh a ni a, a lo chhiat deuh tawh avangin Sihphir thlanmualah phum a ni.
15th. Thursday : Pi Thianghlimi h/o H. Lalchhuanawma (L) Chhanhim veng chu thawhhah avangin Synod hospital-ah admit a ni.
16th. Friday : January ni 9 tlaia Mota lui a quarry chim avanga ruang pakhat hmuhloh la awm chu ngawrh taka ni 7 chhung zawn a nih hnuah hmuh a la ni lo. Mizo dana 7 a kim tak avangin a nawlpuia ruang zawn hna chu tih tawp a ni ta a. District Level Disaster Management Authority ruahmanna hnuaiah ruang zawn hna hi chhunzawm zel erawh a ni ang.
17th. Saturday : Tv Lalhuapzauva Kum (50), s/o Thanngura (L) Kawnveng chu an chenna inah lungphuchawl in a boral.
18th. Sunday :
Pu Lalrimawia,
kum 68, Telkata, Assam, taksa bawrhsawmna avanga Pu Lalramdina s/o Lalchuailova Fanai (L), Tamlo veng te hnena awm chu a awm mekna inah a boral. A chhungte duh danin Sihphir thlanmuala phum a ni a, chhiatni inkaihhruaina, khawntesep leh khawhar in kal vel erawh tihloh a ni.
19th. Monday : Zo Inspiration chuan quarry chim avanga nunna chan, Samal Chakma in a kalsan tak, a nupui Pi Zosangliani puala ṭanpuina lut te chu an rawn hlan. Pi Sangi puala an sum hmuh hi Rs 85780/- a ni a, tuntumah hian Rs 7000/- hlan phawt niin a bak hi YMA lamin kawlin a tul anga pek chhuah thin tura ruahman a ni. Zo Inspiration hian kar kal ta khan YMA kal tlangin ralna Rs 10000/- (Rs 5,000/- YMA in a kawl) an lo hlan tawh bawk.
20th. Tuesday : YMA secretary chuan branch kumthar duan committee kohna lehkha a sem chhuak. January ni 26, Thawhtanni-ah conference hall-ah committee tur a ni ang.
21st. Wednesday : Quarry chimin na taka a hliam, Pu Lalnunsanga, Tlang Veng ZMC&H a enkawl mek chu doctor ten thisen unit hnih tal a mamawh an tih avangin YMA aiawhin Pu Lalchhanhima Varte, Taitesena section leh Pu Lalramzauva, Khuangchera section ten thisen an va pe.
22nd. Thursday :
Tv Lawmnakima S/o C. Lalhunthara, Rinchhanveng chu Guwahati-a January 19-22 chhunga NE India-a State hrang hrangte pangpar khawi intihsiakah telin pakhatna a ni.
23rd. Friday : Aizawl Smart City in Kawnvenga Sihphir Khualbuk an sak chu CC Lalchhuangkima CEO/ASCL chuan a hawng.
24th. Saturday : Ni 100 i hlawhna pawisa, December hlawh chu VC House-ah sem a ni.
25th. Sunday : Bial KTP conference, Zirtawpni atanga Venglai Kohhran a tan chu a tiak. Tuntum conference-ah hian 'Lawm chunga Lalpa rawngbawl' (Sam 100:2) chu thupui niin bual OB ten an in sawi chhawk a ni.
26th. Monday : YMA kumthar duan committee chu conference hall-ah neih a ni.
27th. Tuesday : Ruihhlo a harsatna neite Tana Chhanchhuahna Kailawn Hulhliap-Short Stay Centre Synod camping center a neih thin chu a thawh sarihna atan kalpui leh tan a ni. Tuntumah hian mi 242 an lut a ni.
28th. Wednesday : Khaled Memorial 2nd. Division Screening Tournament - 2025-2026, Sihhmui a khelh mekah Zarkawt Lords Cricket Club tana khel, Tv H. Malsawmzuala s/o H. Laltanpuia, Neihbawi chuan run 101 zet siamin man of the match a thlan a ni.
29th. Thursday : IDBI Bank, Sihphir Branch te chuan UPHC, Sihphir tan Stainless Steel Chair (3 Seater) Cushion awm chi 5 an pe a, thawktute an lawm hle.
30th. Friday : Sihphir chawmtu PHE pipe chu
Zuangtui Road, Durtlang hnuaiah a chhia a. Ngawrh taka repair hna thawh nghal ni mah se an zo hmanlo deuh.
31st. Saturday : Pi Lungmuani, kum 86 w/o Pu H.Ronghinglova (L), Arpu Veng chu Aizawl Civil Hospital-ah 'Stroke' natna avangin a boral.
Comments
Post a Comment