1st. Thursday : Tu tih hriat loh mi pakhat ruang chhe tawh tak chu Saichal ram Dâmpui lui-ah hmuh a ni.
2nd. Friday : Mizoram Police leh Assam Rifles ṭang kawp chuan Keifângah lîrthei pakhata phur methamphetamine kilogram 11.062, chêng vaibêlchhe 33.186/- hûa chhût chu Hassan Ali, Assam kut aṭangin an man.
3rd. Saturday :
Mizoram Pollution Control Board (MPCB) chuan Aizawl khawpui boruak teh chungchangah kumhlui thlah zan (December ni 31, 2025) bik chu, Central lam khawl chianloh avanga hriat theih a nih loh thu an puang.
4th. Sunday : Presbyterian Kohhran chuan Sunday School hming ziah ni atan an hmang.
5th. Monday : Mizo naupang zaithiam, Esther Hnamte chu Asia rama hausa ber Mukesh Ambani-an a sawm angin a In, khawvela mimal ta chenna in man to ber Antilia, South Mumbai-a India Cricket team te hlawhtlinna lawmna-ah a zai.
6th. Tuesday : Assam Rifles chuan Ruantlang, Champhai District-ah foreign cigarette chi hnih, Peacock Classic Cigarette cases 20 leh V Cigarette cases 20 chu an man a, cheng nuai 52 man huin an chhut. Mihring man tel erawh an nei lo.
7th. Wednesday :
Public Works Department changtu Minister Pu Vanlalhlana’n, Lengpui Airport Runway siam that hnathawh mek chu, tha tak leh chak taka thawh zawh thuai anih theih nan, a hmun ah kalin, a endik a; March thla tawpah runway re-carpeting hi thawh zawh hman an inbeisei thu hnathawktute chuan Minister an hrilh.
8th. Thursday : Cricket player, K. Lalremruata chu Suaka Cricket Ground, Sihhmui-ah an inkhelh laiin thawhah a nei thut a, a hnu reilo te-ah a thi. Stroke ni a rinhlelh a ni.
9th. Friday : Pu Changliana, Sihphir Venghlun quarry, Sihphir ramchhung a mi chu a chim a, a thenawm quarry-ah chim thla in, hnathawka lo awm, mi pali a delh a, mi pakhat thiin pakhatin hliam na tak a tuara, mi pahnih te chin hriatlohin an awm thung.
10th. Saturday :
Christina Lalramdinzauvi (Apostolic Carmel) d/o Philip Lalchhanhima, Ramrikawn (St Andrew's Parish, Luangmual) chuan Mangalore-ah thutiam hmasa ber tiam in Apostolic Carmel Sister a lakluh a ni.
11th. Sunday : Presbyterian Kohhran hnuaia Pastor bial thar vawng tur te chuan induction service an nei hlawm.
12th. Monday : Aizawl-Thenzawl-Lunglei (ATL) kawng siamtute khawl suasamtu nia hriat, T Lalrinmawia (39) s/o T Rongura (L), Lunglei Pukpui nia inchhal chu Lunglei Zotlang YMA leh Pukpui VDP nen ṭangkawpin an man.
13th. Tuesday : Sports & Youth Services Minister, Lalnghinglova Hmar chuan sports association hruaitute hovin New Champhai Multipurpose Ground a tlawh.
Minister chuan he hmun hi nakin atana inkhelhna mual pawimawh tak a la ni dawn a, inelna sang tak tak khelhna tur a la ni dawn tih a sawi a. Champhai ta tur a nihna angin a enkawltu pawh Champhai an ni dawn a, tha taka lo enkawl turin a fuih.
14th. Wednesday : January ni 9 tlaia Sihphir Quarry chimin a delh hlum zinga pakhat, Solen Tudu (38), Jharkhand Dumka District-a Dupari khaw mi ruang chu hmuh a ni. A ruang hi a pa-in Jharkhand-a lak duh mah se, a chhiat deuh tawh avangin Mizoram Sorkar aiawh leh Sihphir Branch YMA hruaitute nen an inbiak hnuah Sihphir thlanmualah phum a ni.
15th. Thursday : Lalchunga In, Bilkhawthlir Kharzawl veng a mi chu bungrua engmah chuh hman lohin a kang ral vek a, mihring thi leh hliam an awm lo. Kangmei hi an tapchhak atanga kang tan ni a hriat a ni.
16th. Friday : January ni 9 tlaia Sihphir a quarry chim avanga ruang pakhat hmuhloh la awm chu ngawrh taka zawn a ni chungin Mizo dana 7 a kim tak avangin a nawlpuia ruang zawn hna chu tih tawp a ni ta. District Level Disaster Management Authority ruahmanna hnuaiah ruang zawn hna hi chhunzawm zel erawh a ni ang
17th. Saturday :
KTP General Conference 2026 lo awm tur puala siam, Mobile Application chu Saitual Prebyterian Kohhran Centenary Hall-ah tlangzarh a ni. App hi Siruk Consultancy in inkhawmpui puala an siam a ni.
18th. Sunday : January ni 9 tlai lama Sihphir a Quarry chimin a delh zinga ruang hmuh loh awm chhun, Samal Chakma ruang chu hmuh a ni. Quarry chimah mi pahnih an tanga, ruang pakhat chu ni 16 khan hmuh a lo ni tawh a ni.
19th. Monday : Thuzuak mi, Chhuanliana BVT leh Zahmingthangi te chuan an inneih kum 70-na champha an lawm. Chhuanliana BVT hian kum 97 na hmang mêkin a nupui, Zahmingthangi hian kum 88 na a hmang mêk bawk. Kum 1956 khan Mission Vengah an innei a, fa pali, hmeichhia pahnih leh mipa pahnih an nei.
20th. Tuesday : Pu R. Zarzosanga, Commissioner & Secretary, Rural Development & Administration Department kaihhruainain Mizoram State Rural Livelihoods Mission (MzSRLM) leh Project Implementing Agencies pasarih (7) te chuan thalai 1022 te skill development training-na tur atan thawhdunna thuthlung (Memorandum of Understanding (MoU) an ziak.
21st. Wednesday : Lunglei North Bialtu MLA leh Lunglei HPC Vice Chairman ni bawk, Pu V. Malsawmtluanga chuan a mimal sum atangin Scooty (Burgman) thar tha tak mai Esther Hnamte hnenah a present a, hemi rual hian chawimawina thuziak a hlan bawk.
22nd. Thursday : DC Conference Hall, Mamit-ah Pi Carolyn LB Khiangte, Addl DC & Vice chairman , DAMC, Mamit District kaihhruainain notified crops “The Mizoram Handholding scheme” hnuaia sawhthing lei dan tur chungchangah Secondary Collection Centre(SCC) supervisors leh coordinator te tan training neih a ni. He training-ah hian Mamit District a SCC 7 atangin supervisor leh coordinator te telin, SOP hrang hrang - SOP for supervisors and coordinators, SOP for SCC leh PCC, record keeping leh portal entry chungchang zirho a ni.
23rd. Friday :
Mizoram Education Reforms Committee chu an chairman, Dr Vanlalthlana, Education minister ho in an thukhawm a, kum 2027 - 2028 academic session atang chuan sikul kai hun chhung atan January - December ni tawh turin an rel. HSLC exam erawh a pangngaiin a kal ang.
24th. Saturday : National Voters' Day vawi 16-na chu Aizawl SP Conference Hall-ah neih a ni a, inthlan buaipui kawnga District ti tha te hnenah lawmman hlan a ni. Voters Day lawmna hi Aizawl District Election Officer, Er. Lalhriatpuia chuan a kaihruai a, Mizoram Chief Electoral Officer, Dr Lalrozama chuan thu a sawi bawk.
25th. Sunday : Presbyterian kohhran hnuaia thalai inkhawmpui, pastor bial conference, Zirtawpni zana tan chu a tiak.
26th. Monday : Ram Danpui hman tan ni, Republic Day vawi 77-na chu Mizoram hmun hrang hrangah lawm a ni a, a lawmna pui ber Aizawlah chuan Lammualah Larsap, Gen. Vijay Kumar Singh hova hman a ni. Larsap hian India hnam puanzar pawtparhin parade contingent 23 te'n hnam puanzar zahna chibai an buk chu a chhanglet a. Hemi hnu hian Republic Day puala thuchah sawiin, Mizoram mipuite chu Republic Day vawi 77-na pualin chibai a buk.
27th. Tuesday : Mizoram Police te chuan thuchhuah siamin December ni 13, 2025 a ruang chhar, Marina Lalchhanchhuahi (26), Tanhril Vengpui thihnaah RL Peka (62), Tanhril Vengpui chu pawi khawihtu leh mawhphurtu ber nia an ngaih thu an tarlang. Hemi a nih avang hian Tanhril Veng mipui thinrim chuan RL Peka te in sak lai chu an halsak. Hetih lai hian Marina Lalchhanchhuahi thihnaa rinhleh, RL Peka chu Dececmber ni 16 2025 khan Zonuam Police Outpost-a inlan tura koh a nih laiin an chenna in atanga zuang thla in, damdawi in kalpui a nih hnuah a lo thi tawh thung.
28th. Wednesday : Tuirial Branch YMA-te chuan Tuirial luia sangha chu bomb hmanga manin an zuar!
29th. Thursday : Pu Lalthazuala Rawite, MIFCO Chairman chuan Chawngtlai khua tlawhin Sapthei chingtute leh khawtlang hruaitute a kawm a, an khawtlang mipui enzawnna pui ber, Sapthei hralhna kawngah buaina an neih lohna turin MIFCO chuan theih tawp a chhuah tur thu sawiin Chawngtlai khua Sapthei chinna hmun hrang hrangte a hmunah a tlawh nghal.
30th. Friday : Supply Minister, Pu B. Lalchhanzova chuan Dawrpui venga Mizoram Taxi Association (MTA) Office tlawhin, an pawl hruaitute a kawm a. Mizoramah khualzin an pung zel a, taxi enkawltute chu Mizoram hmel lanna an nih avangin theihtawp chhuah turin a chah. Minister hian computer set a pe nghal.
31st. Saturday : Mizoram Journalist Association, Mamit District Annual Conference vawi - 18 na chu MJA Press Club, Mamit-ah hman a ni. Chawhma hunah rorel a ni a, chawhnu lamah kum 2026 - 2028 chhunga hruaitu tur thlan a ni thung.
Comments
Post a Comment